Nahali Bible
सबोपदेशक 9
मी ज्यु आख्यु वातुह पारख्यो एने मोना केरीन हास केरीन विचार किऱ्यो, काय किहीक देरमी एने एकलीदार माणहे एने तान कामे बोगवानान आथाम हेते; माणहान ओंगाण आखी बातीन वातु हेत्यु, पुण तो नाह जाणेत काय तो मोंग हे काय दुसमोनाय। आख्यु वातु आखान केरता एक हारक्यु रेत्युह, देरमी एय नाहते बाकतो, हाजो नाहते खाराब, बोली केरनार एने बोली नाह केरनार आखान देशा एकुस रिथे; जीहे हाजाला माणहान देशा, तिहेच केरीन पापी माणहान देशा; जीह केरीन सुगोण खाणारान देशा, तिहेच केरीन सुगोण खाणेन बिथे तान। देरती पोर जो काय ईथे, ता माय ज्यी बुराय ईथे काय आखा माणहान एकुस देशा ईथे; एने माणहान मोना माय बुराय बोराय रेनीह, एने जाह वोर ता जीवताला रेतेह तान मोनाम गांडायपोणा रिथे, एने तान बाद ता मुरेल माणहा माय जाय मिलातेह। पुण जाह वोर माणुह जीवतालो रिथे, ताह आसा हे; काहाकाय जीवतालो चितो मुरेल सिंहवागाह रेन जुलूम हाजो हे। काहाकाय जीवताला माणहे जाणतेह काय ताह मोरनु हे, पुण मुरेल कायच बी नाह जाणेत; एने नाह तान केरता ओंगाण काह उंजु फोल जुड़ी, काहाकाय माणहे ताह विहरी जातेह। एगदा माणहान मोरनेन बाद तान मोंग, दुसमोनाय एने तान कोपेट खेतेम एय जाथे; एने देरती पोर जो काय केराय जाथे, ता माय एवी रेन तान ईसो नाय रेय।
एवी तु तार गेर जात रे, तारो रूटो खुसी से खा, एने खुस मोन से तारो अंगुरान रूह पी; काहाकाय बोगवान तारा कामा से खुस एय जायेल हे। तारा फाड़का कायेम दोवल्या रेती, एने तारे मुंडी पोर तेलान कोमी नाय एय। तारी बिगेर कामान जीवायी माय जो तो देरती पोर तार केरता ठेरायेल हे, तारी मोंगाल्ली बायकु हिऱ्यो जीव, काहाकाय तार जीवाय एने तार मेहनेत माय जो तु देरती पोर किरेह, तारो ज्योस ईसो हे। जो काम तुवाह केरने जुड़ी ताह तारी पुरी ताकेत से केर, काहाकाय नेरका माय जा तु जाण्यो हे; नाह काम, नाह योजना, नाह ईकेल एने नाह बुध्दी हे।
देरती पोर मी दिख्यो काय जोरेह दोवेड़णाराह जिक नाह जुड़ने एने नाह ताकेतवोर सिपाय लेड़ाय माय जीकणे। ईकेलवाला माणहाह रूटो नाह जुड़ने, एने नाह सोमेजदाराह मालदेन जुड़ने, एने नाह गीण हाजालाह जुड़ने; जेवी टेम आवेह ते आखा हेऱ्य खाराब वातु गेट जात्युह। काहाकाय माणुह तान टेम नाह जाणेत, जीहे मासा जालाम एने चिड़ा फांदा माय फोस जातेह; तिहेच केरीन माणुह दुखान टेमाम जो ता पोर उचकाहुच आव पुड़ेह, फोस जातेह।
एकलीदार एने फोगान बापतीम विचार
मी देरती पोर ओहली बुध्दीन वात बी दिखेल हे, जी माहु जुलूम मोहत्वान लागी। एक आत्योच हियोर इतो, जा माय थोड़ास माणहे रेताला; एने एक दिह एगदो राजा ता हिऱ्यो लेड़ाय केरीन ताह कोंड लिदो, एने हेयरान कावदेन तान सेना लागाड़ दिनो। पुण ता आत्यास हेयराम एक गेरीब एकलीदार माणुह एतो, तो तान एकली केरीन ता हेयराह वोचाड्यो; तीबी ता गेरीब माणहाह आखा माणहे विहरी गीया। पुण गेरीब एदम्यान बुध्दीन कुण आदार नाह केऱ्य, तान वातु कुण नाह होमलेत तीबी मी केथु; ताकेतीह रेन बुध्दी हाजी हे। फोगान विचीम राजान आयेड़ने से कुवालोच एकलीदार माणहान वातु होमेलने ताह रेन जुलूम हाजो हे। लेड़ायीन आथ्याराह रेन बुध्दी हाजी हे, पुण एक पापी जुलूम हाजाला कामाह खेतेम केर दिथे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.