Nahali Bible
सबोपदेशक 8
एकलीदार माणुह कुणीन गेत हे? एने काल्लो माणुह एगदी वातीन मतलब जाणेह? माणहान बुध्दीन वोजेसे तान मुय चोमकीह, एने तान दुख सेटो एय जाथे।
राजान उकुमान पालेन किरो
मी तुवाह सेला आपथु, काय बोगवानान सामने सुगोण खाणेन कारेण राजान उकुमान पालेन किरो। राजान सामने रेन जाणे उतवाल मा किरो, एने एगदा खाराब उद्देस से तान सामने उबी मा रिवो; काहाकाय तो जो हुदेह तोस एय। काहाकाय राजान सोबदा माय ते ताकेत रिथे राजाह कुण फुस सिकेह; तु ज्य काय केरने बाजरिनोह? केदी राजान उकुमान पालेन किरेह, ताहार तो वोचीन रेय, पुण एक एकलीदार माणुह उपयोगी टेम एने उपयुक्त कामान रित जाणेह, एने तो ज्य बी जाणेह काय ज्यी वात केवीह केरनु जुवे। काहाकाय एकेक वातीन ठिक टेम, एने नेम रिथे, काहाकाय माणहान दुख तान केरता जुलूम बारी रिथे। माणुह ज्य नाह जाणेत काय एण्यो हे, एने कुलबुखे एय? ज्य ताह कुण केय सिकेह? जीहे वाराह कुण नाह रोक सिकेत, तिहेच केरीन मोतीन दिह्या पोर कुणीन आदिकार नाह काय तीह रोक सेकी; एने लेड़ायीन बुखेत ताह सुट्टी नाह जुड़ेत, एने नाह बुराय केरनारे माणहे तान बुरायीन कारेण वोच सेकतेह।
बाकतो एने हाजो
जोला काम देरती पोर केराय जातेह ता आखाह मी हासकेरीन दिख्यो, एने ज्य बी दिख्यो काय एक माणुह दिहरा माणहान उपेर आदिकारी बोणीन तान उपेर नुकसान लावेह। तेवी मी खाराब माणहाह माहणा माय बुजाय जाताला दिख्यो, ता चोखाला जागाम आवताला जाताला। हेयरा माय जाहरी ता बात बातीन काम किरेल एता; तान बोड़ाय केराय जाताली, ज्य बी कायच कामान नाह। खाराब कामान केरता माणहाह उतवाल्यह डेन्ड नाह जुड़ने, केरीन माणहान मोन खाराब काम केरने माय लागीन रिथे। केदी पापी माणुह होव वारीन पाप किरेह, एने ताह डेन्ड नाह जुड़ेत; तो जुलूम वोरह्या वोर जीवतालो रिथे, तीबी मी ज्य जाणथो काय बोगवानाह बिणारान सेवोट हाजोच ईथे, बोगवान तान बोलो किरेह, काहाकाय ता ताह बितेह। पुण खाराब माणहान बोलो नाय एय, एने नाह तान जीवाय वोद सेकी; काहाकाय तो बोगवानाह नाह बित। एक कायच कामान नाह वात देरती पोर ईथे, मतलब ओहला देरमी हेते जान ती देशा ईथे जी खाराब माणहान एणे जुवे; केरीन मी केथु, ज्य बी कायच कामान नाह।
केरीन मी माणहाह सेला आपथु, खुसी माणावणेन सोड़ीन उंजु कायच बी हाजो नाह, काहाकाय ज्योस तान जीवाय बोर जो बोगवान तान केरता देरती पोर ठेरावी; तान मेहनेत माय ज्यीस खुसी बोणीन रेय।
जेवी मी बुध्दी सापड़ावणेन केरता एने देरती पोर एण्या काम वेपाराह सोमेजणेन केरता मारो मोन लागाड्यो, एने जेवी मी ज्य जाणनेन कोसीत किऱ्यो काय माणहे किहीक रात दिह जागताला रेतेह; तेवी मी बोगवानान आखो काम दिख्यो जो देरती पोर ईथे, केदी माणुह तान मतलब जाणनेन केरता कोलोक बी मेहनेत काहा नाय केरी, तीबी ताह जाण नाय सेकी; एने केदी इखेह एकलीदार माणुह ताह जाणनेन कोसीत केरी, तीबी तो तान पोतो नाह लागाड़ सिकेत।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.