Nahali Bible
दानिएल 5
बितड़ा पोर लेखायेल लेख्य
एक दिह बेलशस्सर नावान राजा तान एक एजार मुखी माणहान केरता एक मोटलो बांडारो किऱ्यो, एने ता हिऱ्यो अंगुरान रूह पिदो। अंगुरान रूह पितो पितो बेलशस्सर उकुम आप्यो काय, होना चांदीन जा ठामला मारो आबोख नबुकदनेस्सर यरूशलेम ने मोंदिर माय रेन लुटीन लायेल इतो, ताह लियावो काय राजा तान मुखी, राण्यु, एने पावेरन्यु बेल ता माय पिय। तेवी जा होनान ठामला यरूशलेम माय बोगवानान मोंदिर माय रेन लुटीन लायेल एता, ता लावा; एने राजा तान मुखी, एने राण्यु, पावेरन्यु बेल ता ठामला माय पिय लेदा। ता अंगुरान रूह पिन होना, चांदी, पितलान, लोड़ान, लाकड़ान एने देगड़ान मुरतीन बोड़ाय केरताला।
तुलेच बुखे उचकाहुस माणहान आथ बितड़ा पोर लेखतालो देखाणे बाज गीयो, दिवान सामने राजवाड़ान बितड़ा पोर आथा केरीन लेखातालो राजा दिख्यो। ताह देखीन बेलतशस्सर राजा जुलूम बिय गीयो, तान मुय बियीन वोजेसे पेलो पोड़ गीयो एने तान आथ पाय थेर थेर कापणे बाज गीया, तान पाय लेरबोड़ाय पोड़ना काय तो उबी बी नाह रेय सेकतालो। तेवी राजा मोठेस आयड़ीन उकुम आप्यो काय जादुगेर एने कसदी पुजारा एने बोड़वा ता फाय आवी। एने राजा बाबेल ने न्या इकेलवाह केयो, “जो कुण ज्या लेख्याह वाचीन ज्यान मतलब माहु सोमजाड़े, मी ताह जामण्या रेंगान डेगलो एने तान गेलाम होनान हार पेरावुह, एने मी ताह मारा राज्यान तीसरो आदिकारी बाणाव देह।” ओवता राजान आखा एकलीदार माणहे माय आवा, पुण ताह लेख्य वाचता ओवेड़नो नाह; एने राजाह तान मतलब सोमजाड़ नाह सेक्या। तेवी बेलशस्सर राजा जुलूम बिय गीयो, तान मुय उंजु बी उतेर गीयो; एने तान मुखी बी जुलूम बिय गीया।
तेवी राजान एने मुखीन वातुह होमलीन राजान डावाली आहख राणी, रांदण्या गेराम आवीन केयी, “एय राजा तु जेलेम जेलेम जीवतालो रिहे, तार मोनाम मा बिय एने चिन्ता मा केरी। तारा राज्याम एक ओहलो माणुह हे, जा माय चोखाला बोगवानान जीव रिथे, तारा आबाख ने राज कालाम ज्यो माणुह ताह लिकायेल वातु सोमेजत्युह ज्य देखाड़ दियेल इतो काय तो जुलूम चालाक एने एकलीदार हे। तो ज्य देखाड़ दियेल इतो काय ज्यु वातु माय तो बोगवानान गेत हे। तारो डावालो आबोख नबुकदनेस्सर राजा ज्या एदम्याह आखा एकलीदार एदम्या पोर मुखी निवोड़ किरेल इतो। तो आखा कसदी जादुगेर माणहा पोर आदिकार चालाड़तालो। मी जा माणहान बाराम वातु केणे बाजरेनीह, तान नाव दानिएल हे। पुण राजा तान नाव बेलतशस्सर नाव मिलेल हे। दानिएल जुलूम चालाक हे, एने जुलूम वातु जाणेह तो होपनान मतलब केय सिकेह, वार्ताह सोमजाड़ सिकेह केठीण सावालान जापाप आपणेन ता फाय ताकेत हे; केरीन तु दानिएलाह हादाड़ ले, बितड़ा पोर जो लिखेल हे; तान मतलब तुवाह तोस केय।”
लेख्यान मतलब केणो
ओवता दानिएलाह राजान सामने लावा एने ताह फुशो, “तारो नाव दानिएल हे काय? जो मारो आबोख नबुकदनेस्सर राजा यहुदा देसाम रेन लायेल इतो। मी होमलेल हे, काय बोगवानान जीव तार माय रिथे एने मी ज्य बी होमलेल हे, काय तु लिकायेल वातुह सोमजेह, तु जुलूम चेतुर एने एकलीदार हे। बितड़ा पोर वालो ज्य लेख्य वाचणेन केरता, जादुगेर एने एकलीदार माणहे न्याहरी आवा काय ज्य लिखेल वाचे, एने तान मतलब माहु सोमजाड़े, ओहली मारी मोरजी एती; पुण ताह ता लेख्यान मतलब सोमजाड़ता नाह ओवड़नो। मी तार बाराम होमलेल हे, तुवाह वातुन मतलब केता ओवड़ेह लिकाईल वातु तु केय सिकेह। केरीन केदी तु बितड़ा पोर वालो लेख्य वाचीन तान मतलब माहु सोमजाड़हे, ताहार मी तुवाह जामण्या रेंगान फाड़का आपुह, एने तारा गेलाम होनान हार पेरावुह, एने राज्याम तीसरो तुस राज किरहे।”
ओवतो दानिएल राजाह केयो, “तारो दान तारेस फाय मेल; नाहते दिहराह आप दे; माहु काय नाय जुवे। मी तुवाह बितड़ा पोर वालो लेख्य वाचीन तान मतलब सोमजाडुह।”
“एय राजा, मुखी बोगवान तारा आबाख नबुकदनेस्सराह, एक मोटलो ताकेतवोर राजा बाणायेल इतो। बोगवान ताह बोड़ाय एने आदार एने बाहदुर बाणायेल इतो। जुलूम देसान, माणहे एने बात बातीन बाषा बोलनारे माणहे नबुकदनेस्सराह बिया केरताला, काहाकाय मोटलो बोगवान ताह एक जुलूम मोठो राजा बाणायेल इतो। केदी नबुकदनेस्सर एगदाह मारने होदतालो, ताहार ताह मार देतालो एने इखेह माणुह जीवतालो रेय इहकेरीन ताह लागनो ताहार ताह जीवतालो रेणे देतालो। केदी तो माणहाह मोठो बाणावणे होदतालो, ताहार तो ताह मोठो बाणाव देतालो, एने जाह नेचो पाड़ने होदतालो ताह नेचो पाड़ देतालो। पुण जेवी नबुकदनेस्सरान मोन मोठाय केरने बाज गीयो, एने तो एकएट्यो बोण गीयो, केरीन ताह राजगादि सोड़ने पोड़नी; एने तान बोड़ाय ता फाय रेन सांडाड़ाय गियी। नबुकदनेस्सर माणहान विचीम रेन निकालाय गीयो, तान मोन जेनवेरान गेत एय गीयो, तो जेंगली गेदड़ा हिऱ्यो रिनो; एने तो बोयलान गेत चारो खातालो, एने तो ओहटा माय बिजनो, जाह वोर काय तो सोमजी नाह गीयो काय आखाम रेन मोटलो बोगवान माणहान राज्या माय राज किरेह एने जाह हुदेह ताहास ता पोर आदिकारी ठेरावेह।”
“पुण एय बेलशस्सर, तुवाह ज्य आखो मालुम हे, तु नबुकदनेस्सरान बिटोख हे, पुण तु गेरबोड़ो एनो नाह। पुण तु गेरबोड़ो एनो नाह, एने उलटो हेरगावाला मालक्यान विरूद एय गीयो। तु बोगवानान मोंदिरीन ठामलाह तार फाय मांगाड़ीन तारा आदिकारी, ताऱ्यु बायकु एने पावेरन्यु बेल तु ता माय अंगुरान रूह पिदो; एने होनो, चांदी, पितलो, लोड़ो, एने दिगोड़ न्या केरीन बाणायेल देवतान तु बोड़ाय किऱ्यो। ता खेरला देव नाह सोता। ता देख नाह सेकते, होमेल नाह सेकते, एने ता काय सोमेज बी नाह सेकते तान ते बोड़ाय किऱ्यो, पुण जा बोगवानान आथाम तारो जीव हे, एने जान ताबाम तारो आखो चालनो फिरनो हे, तान तु बोड़ाय नाह किऱ्यो। केरीन बोगवानान उगे रेन ज्यो आथ मोकलानो एने ज्य लेख्य लेखानो।”
“बितड़ा पोर जा सोब्दा लेखायेल ता ज्या हेते, मने, मने, तकेल, उपर्सीन।” “ज्या सोब्दान मतलब ज्य हे, ‘मने’ मतलब बोगवान तारा राज्यान दिह गेणीन तान खेतेम केर दियेल हे। तकेल तान आर्थो तु ताकड़ा माय तोलाय गीयो, एने ओलवो निकेलनो। ‘उपर्सीन’ मतलब तुवा फाय रेन तारो राज्य सांडाड़ाय जाणे बाजरेनोह, एने तान वाटो पोड़ने बाजरिनोह। ज्य राज्य मादि एने फारसीन माणहाह आपाय जाय।” 1
ओवतो बेलशस्सर उकुम आप्यो, एने दानिएलाह जामण्या रेंगान फाड़का एने तान गेलाम होनान हाकेल पेरावाय गियी; एने ज्यी गोसणा केरानी काय राज्याम राज ने तीसरो जागो दानिएलास ने रेय। तीस राती कसदीन राजा बेलशस्सर माराय गीयो। मादि माय रेणार एक एदमी जान नाव दारा एतो, एने जान वोय बाहसाठ वोरह्या एता, तावालो नोवालो राजा बोणनो।
Source notes (1)
- Cross-reference उत्पत्ती 41:42
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.