Nahali Bible
दानिएल 4
नबुकदनेस्सरान दिहरो होपनो
नबुकदनेस्सर राजान उगे रेन देसा देसान एने राज्या राज्यान माणहाह, एने बात बातीन बाषा बोलनारे जा आखी दुनिया माय वोह रियेल एता, ज्य पोत्र मोकल्यो, “तुमूह जुलूम सान्ती जुड़ी।” माहु ज्य हाजो लागो, काय आखाम रेन मोटलो बोगवान, माहु जी जी निसाणी एने चोमेत्कार देखाड़ेल हे, ताह देखाडु।
“बोगवान बोंगलाय ओहलोह चोमेत्कार किरेल हे!
बोगवानान राज कायेम टिकीन रिथे;
एने तान राज पिढीन पिढ़ी वोर बोणीन रिथे।”
“मी नबुकदनेस्सर मारा गेराम हुकेह एने मारा राजवाड़ाम खुसी माय रेतालो। मी एक होपनो देखीन बिय गीयो; मी मारा आथरोणाम हुवणे बाजरियेल इतो, एने जा विचार मारा मोनाम आवा, एने ज्यु वातु मी दिख्यो, तान वोजेसे मी बिय जायेल इतो। केरीन मी उकुम आप्यो, काय बाबेल ने आखा एकलीदार माणहे, मारा होपनान मतलब केणेन केरता मार फाय हादिन लावे। जेवी जादुगेर एने कसदी माणहे मार फाय आवा, ते मी ताह मारा होपनान बाराम केयो, पुण ता माणहे माहु मारा होपनान मतलब नाह केय सेक्या। सेवली बुखेत दानिएल मार फाय आवो, मी मारा देवताह मान आपणेन केरता दानिएलाह बेलतशस्सर नाव आपेल इतो, एने जा माय चोखाला बोगवानान जीव रिथे; एने मी ताह मारो होपनो केय होमलायो। मी ताह केयो, एय बेलतशस्सर, तु ते आखा जादुगेरान मुखी हे, माहु मालुम हे काय तार माय चोखाला बोगवानान जीव रिथे, मी जाणथो काय काल्ली बी लिकायेल वातुह सोमेजणे तार केरता केठीण नाह सोतो; केरीन जो होपनो मी दिखेल हे ताह मतलबा बेल माहु केन सोमजाड़ दे।”
“जो देरसेन मी मारा पोलांगा पोर हुवतालोन दिखेल तो ज्य हे : मी दिख्यो, काय देरतीन विचीम एक जाड़ उब रेनोह; तो जाड़ जुलूम उचो हे। तो जाड़ मोठो एन मोजबुत एय गीयो, एने तान उचाय जुगाम वोर पोचनी, एने तो जाड़ देरती पोर काहरी रेन बी देखातालो। तान पाला होबाता, एने ता जाड़ा पोर जुलूम फोले लाग रियेल एता, एने ता जाड़ा पोर आखान केरता बोरपुर खाणो जुड़तालो। जाड़ान बुंदे आखा जेंगली जेनवेराह सावलो जुड़तालो, एने जाड़ान डालख्यु पोर चिड़ा रेताला, एने आखा चिड़ा, जेनवेराह ता जाड़ा सेस खाणो जुड़तालो।”
जेवी मी पोलांगा पोर लोट लोट्यो देरसेन माय त्यु चिजुह देखणे बाजरियेल इतो, तेवी एक चोखालो हेरोगदुताह हेरगाम रेन नेचो उतेरतालो दिख्यो। तो मोठेस केयो, “जाड़ाह काट दिवो, तान डालख्युह साट दिवो, तान पाला आबड़ी दिवो, एने तान फोलाह कावदेन फाकेर दिवो; ज्या जाड़ान बुंदे आसरो सापड़ायेल जेनवार जुलूम सेटा नाह जाती, ज्यान डालख्यु पोर बुहेल चिड़ा सेटा उड़ जाती। पुण ज्यान थुड़ाह मुला बेल बुयी माय रेणे दिवो, एने कावदेन लोड़ान एने पितलान जाला लागाड़ो।”
“तान आहने पाहने उगेल खेड़ा हेर्य ज्यान थुड़ एने ज्यान मुल बुयी माय रेय। तो जुगान ओहटा केरीन बिज्या केरी एने बुयीन खेड़ खाणे माय चोवगानान जेनवारा हेर्य बागी एय। तान मोन बोदले एने माणहान गेत नाय रेय, पुण जेनवेरान गेत बोण जाय; इहकेरीन ताह सात वोरीह काड़ने पोड़ी। ज्यो उकुम चोखालो हेरोगदुत ज्या देन्डान गोसणा मोठेस होमलायो, काहाकाय जा जीवताला हेते ता जाण जाय काय आखाम रेन मोटलो बोगवान माणहान राज्याम राज किरेह, बोगवान तान मोरजी पारमाणे ज्या राज्याह ताह पोटी ता माणहान आथाम हुपेह। ता राज्या पोर राज केरनेन केरता तो आत्याम रेन आत्या माणहाह आदिकारी ठेराव दिथे।”
मी नबुकदनेस्सर राजा होपना माय ज्योस दिखेल हे। केरीन “एय बेलतशस्सर, तु ज्यान मतलब के, काहाकाय मारा राज्यान काल्लो बी एकलीदार माणुह ज्या होपनान मतलब माहु सोमजाड़ नाह सिक्यो, पुण तार माय ते चोखाला बोगवानान जीव रिथे, केरीन तु होपनो केय सिकेह।”
दानिएल ने द्वारा होपनान मतलब केणो
तेवी दानिएल जान नाव बेलतशस्सर बी एतो, थोड़ीक वार ने केरता एकदोम ठावकोस एय गीयो। तो ज्यु वातुन तान मोनाम विचार किरते रिनो तो देखीन राजा केयो, “बेलतशस्सर माहु होपनान मतलब केणे बुखेत बिय मा।”
ओवतो बेलतशस्सर राजाह केयो, “एय मारा मालीक, ज्य होपनो तारा दुसमोना पोर पोड़ी, एने ज्यान फोल, जा तारा विरोदी हेते, ताह जुड़ी!” जा जाड़ाह तु दिखेल, तो मोठो एन मोजबुत एय गीयो, जा जाड़ान सिगो जुगाह टेकतालो, एने जाह आखी देरती पोर रेन देख सेकताला। जान पाला होबाता एने फोले जुलूम एता, एने जा माय आखान केरता खाणो एतो; जान नेचा जेंगलान आखा जेनवारे रेताला, एने जान डालख्यु पोर जुगान आखा चिड़ा बोह्या केरताला,
“एय राजा, तो जाड़ तुस हे। तु मोठो एन ताकेतवोर बोण जायेल हे, तारी बोड़ाय जुगाम वोर पुचेल हे, एने तारो राज देरतीन काने कोपरे वोर पोसरेल हे। एने एय राजा, तु जो एक चोखाला हेरोगदुताह हेरगाम रेन उतेरतालो एने ज्य केतालो दिख्यो काय जाड़ाह काट दिवो एने ताह खेतेम केर दिवो, पुण थुड़ एने मुले रेणे दिवो। तान कावदेन लोड़ो एने पितलान जाल बांदिन ताह निल्ला खेड़ान विचीम रेणे दिवो; तो जुगान ओहटा केरीन बिज्या केरी, एने ताह चोवगानान जेनवारा हेऱ्याच ईसो जुड़ी; एने जाह वोर सात वोरह्या ता पोर विते नाय, ताह वोर तान ओहलीस देशा रेय।
“एय राजा, ज्यान मतलब एने जो उकुम आखाम रेन मोटलो बोगवान राजान केरता ठेरायेल हे, तो ज्य हे, एय नबुकदनेस्सर राजा तुवाह माणहान विचीम रेन सेटो जाणु पोड़ी, एने तु जेंगली जेनवारा हिऱ्यो रिहे; डोरान गेत तुवाह चारो खाणे पोड़ी; एने जुगान ओहटा केरीन बिज्या किरहे, एने सात वोरह्या वोर तारी ज्यीस देशा रेय, जाह वोर काय तु जाण नाय जाहे काय माणहान राज्या माय बोगवानुस आदिकार मिलेह, एने तो जाह पसन किरेह ताह आप दिथे। एने ता जाड़ान थुड़ाह मुला बेल बुयीम सोड़नेन उकुमान मतलब ज्य हे काय तारो राज्य तुवाह पोशो जुड़ जाय; पुण ज्य तुलबुखे एय, जेवी तु ज्य जाण जाहे काय तारा राज्या पोर बोगवानास ने आदिकार हे। केरीन एय राजा, मारे होमेल पाप केरनेन सोड़ दे, एने जो हाजो तोस केर; खाराब काम मा केरी, गेरब्या पोर गीण केर। तेवीस तु सफल बोणीन रेय सिकहे।”
ज्यु आख्यु वातु नबुकदनेस्सर राजा हेर्यु एन्यु। बारा मोयना वितणेन बाद जेवी नबुकदनेस्सर राजा बाबेल माय तान किल्लान साजा पोर फिरने बाजरियेल इतो, तेवी तो केणे बाज गीयो, “बाबेलाह दिखो! ज्या मोटला हेयरान बाणावोट मी किरेल हे। ज्य किल्लो मारो हे! मी मारी ताकेत केरीन ज्यी मोटली राजदानीन बाणावोट किरेल हे। ज्या जागान बाणावोट मी ज्य देखाड़नेन केरता किरेल हे काय मी कोलोक मोठो हे।”
राजा ज्यी वात केणेस बाजरियेल इतो, तेवी हेरगाम रेन आवाज आवो, “एय राजा नबुकदनेस्सर, तार बाराम ज्यो उकुम निकलेह काय राज तारा आथाम रेन निकली गीयो, एने तु माणहान विचीम रेन निकालाय जाहे, एने जेंगली जेनवारा हिऱ्यो रिहे; एने डोरान गेत खेड़ खाहे। एने सात वोरीह तार पोर वित्ती, जाह वोर तु ज्य नाय जाण जाहे काय माणहान राज्याम बोगवान आदिकार मिलेह, एने तो तान मोरजी पारमाणे माणहान आथाम राज हुपेह!”
एने नबुकदनेस्सर ने बाराम कियेल वचन चालोच पुरो एनो। नबुकदनेस्सराह माणहाह रेन सेटो जाणे पोड़नो, ताह डोरान गेत खेड़ खाणे पोड़नो तो ओहटाम बिजनो। तान लेट्या मोराग्यान फिसान गेत तान लेट्या लांबा वोद गीया, एने नेखे चिड़ान नेखान गेत वोद गीया।
नबुकदनेस्सरान द्वारा बोगवानान बोड़ाय केरनो
“हात वोरह्या वितणे बाद,” मी नबुकदनेस्सर उपेर हेरगान उगे दिख्यो, ओवतो मी हास केरीन सोच विचार केरने बाज गीयो; तेवी मी आखाम रेन मोठो बोगवानान बोड़ाय किऱ्यो जो जेलेम जीवतालो हे तान बोड़ाय ज्य केन केरने बाज गीयो :
“बोगवानान राज कायेम ने हे,
एने तान राज पिढीन पिढ़ी वोर रेणार हे।
ज्यी देरतीन आखा रेणारे माणहे खेरीच मोहत्वान नाह सोता,
एने तो हेरगान सेना एने देरती पोर वाला
माणहान विचीम तान मोरजी पारमाणे काम किरेह;
एने कुण ताह रोकीन ताह नाह केन सिकेत,
तु ज्य काय किरेल हे?”
तुलेच बुखे, बोगवान माहु मारी ईकेल पोशी आप देनी; एने तो एक राजान वेहाम मारो मान एने ताकेत बी पोशी आप दिनो। मारा मोंत्री एने मारा राजवाड़ान माणहे पोशा मार फाय आवणे बाज गीया, मी पुशो राजा बोण गीयो। मी पेल रेन बी जुलूम मोटलो एने ताकेतवोर एय जायेल इतो।
“एवी मी नबुकदनेस्सर हेरगावाला राजान बोड़ाय केरथु, ताह मान एने बोड़ाय आपथु। तो जो काय किरेह, ठिक किरेह, एने तान आखा वेवार नियावान हेते; एने गोमेंडी माणहाह गेरबोड़ा केरनेन ताकेतवोर हे।”
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.