Nahali Bible
2 कुरिंथीयो 8
खुसी से दान आपणु
एवी एय बाय बोणहा, जी बोगवानान गीण मकादुनियान मोंडल्यु पोर इयेल हे, तान खुबेर तुमूह आपतेह। काय मकादुनिया वाला माणहे तेकलीत माय मोटली पारेख माय तान खुसी एने जुलूम बारी गेरीबी माय तान उदारता जुलूम वोड़ गियी। तान बाराम मारी ज्यी गोवाय हे, काय ता आपणी ताकेतीह रेन बोरीन पुण ताकेताह रेन बी बाहेर मोन से आपेल। एने ज्या दानाह यहुदी मायवाला बोगवानान माणहान मोदेक केरनेन बागी एणेन केरता आमुह जाहार ताहार जुलूम विन्ता किरेल हेते। एने जिहकेरीन आमु आसा किरेल एता, तिहेस केरीन ता मालीकाह पोशा बोगवानान मोरजी से आमुह बी आपणे आपाह आप देना। तानकेरता आमु तीतुसाह विन्ता किरेल एता काय जिहकेरीन तो पेल सुरवात किरेल इतो, तिहेस केरीन तुमरी विची माय दान लेणेन गीणीन कामाह लागातार किरतेच रेय। 2तानकेरता जिहकेरीन तुमू आखी वातुम, मतलब बुरहो, वचन, इकेल एने आखी बातीन उत्साह केरने माय, एने ता मोंग माय जो आमु पोर मेलतेह वोदते जातेह, तिहेस केरीन ज्य दान आपणेन गीणीन काम माय बी वोदती जावो।
मी उकुमान रिती पोर ते नाह, पुण दिहराह आपणेन आसा एने तुमरा मोंगान खेरायीह पारेखणेन केरता केथु। तुमू आमरा मालीक यीशु मसीन गीणीन बाराम जाणतेह, काय तो देनी एन बी तुमरी केरता गेरीब बोण गीयो, काय तो गेरीब एणेसे तुमू देनी बोण जावो।
ज्यी वातुम मारी राय हे; ज्यो तुमरा केरता फायदु हे, जो काम तुमू गीये वोरीह चालु किरेल हेते, जाह केरने माय बी तुमूच पेल्ला एता। तानकेरता एवी ज्यो काम पुरो किरो जिहकेरीन आसा केरने माय तियार एता, तिहेस केरीन जो तुमू आप सेकतेह तोलोक तुमू आप सेकतेह। केदी तुमूह मोन से आपणेन मोरजी हे जो काय तुमू फाय हे, बोगवान ताह दानाह स्वीकार केरी, पुण तान गेत नाह जो तुमू फाय सोतोच नाह।
आमरी आसा ज्यी नाह सोती काय दिहराह आराम एने तुमूह दुख जुड़ी। पुण बाराबोरीन विचाराह रेन ज्यी टेम तुमरी वोड़ती तान कोमी माय काम आवी, काय तान वोड़ती बी तुमरी कोमी माय काम आवी काय बाराबोर एय जाय। जिहकेरीन देरेम पुस्तेक माय लिखेल हे, “जो मोकतोस टुलो किरेल तान काय बी होवटो नाह निकेलनो, एने जो थोड़ो टुलो किरेल तान काय बी कोमी नाह निकेलनो।”
तीतुसाह कुरिंथीयो माय मोकेलनो
बोगवानान दन्यवाद एय, काहाकाय तीतुस ने मोना माय ती उत्साह हे, जी आमुह मोदेक केरी। काय तीतुस आमरो सोमजाड़नो मान लियेल, एने जुलूम खुस एन तो उत्साह माय तान मोरजी से तुमू फाय आवो। आमु तीतुसा हेऱ्या ता बायाख बी मुकलेल हे, जान नाव हाजाली खोबरीन बाराम आखी मोंडली माय फेहली रेनोह। एने ओलोस नाह, पुण मोंडलीन द्वारे ठेराय बी गीयोह, काय ज्या दान ने सेवान कामान केरता आमरी हिऱ्यो जाय। आमु ज्य काम ज्यानकेरता केरतेह काय मालीकान बोड़ाय एय, एने आमरी मोनान तियारी देखाय जाय।
आमु ज्यी वातुम होमालीन रेतेह काय ज्या सोतान मोरजीन कामान बाराम जान सेवा आमु केरतेह, कुण बी आमु पोर गुनो नाय लागाड़ने जुवे। काहाकाय ज्यी वातु मालीकान आहने ओलीस नाह, पुण माणहान आहने बी हाजी हे काय आमु तान कालजी केरतेह।
आमु ता हेऱ्या आमरा बायाख बी मुकलेल हेते, जाह आमु जाहार ताहार पारखीन जुलूम वातु माय ईमोत वालो दिखेल हेते। पुण एवी तुमू पोर तान मुटलो बुरहो हे, ज्यीस कारेण माय तो उंजु बी दिहराह मोदेक केरनेन केरता होवटो तियार हे। केदी एगदो तीतुसान बाराम फुशी, ते तो मार हाती एने तुमरी केरता मारो गोवांद्यो हे; एने केदी आमरा बायाख ने बाराम फुशी, ते ता मोंडलीन मोकलायेल एने मसीन बोड़ाय हेते। तुमरो मोंग एने आमरो तो मोठाय जो तुमरी बाराम हे, मोंडल्युन ओंगाण ताह पुरो केरीन देखाड़ो।
Source notes (2)
- Cross-reference रोमीयो 15:26
- Footnote आमरे केरता तुमरो मोंग; थोड़ाक लेख माय तुमरी केरता आमरो मोंग हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.