Nahali Bible
1 तीमुथीयुस 6
जोला बी माणहे पावोर ने जुवाला माय जोपाय रियेल हेते, ता तान मालक्याह आखी बातीन मान मेलनेन बाराबोर जाणे, काहाकाय बोगवानान नाव एने हिकवोणान चिहटा नाय एणे जुवे। एने जान मालीक बुरहो केरनार हे ताह ता बाहख हे केरीन तान ईजुत उड़ावणे नाय जुवे, पुण तान होवटीह सेवा चाकरी केरी, काहाकाय जा तान फायदो उखेलतेह ता बुरहो केरनारे एने मोंगाल्ला माणहे हेते, ज्यी वातुह हिकाड़ते एने सोमजाड़ते रे।
जुठी हिकवोण एने मालदेनान लोब
केदी एगदो दिहरी बातीन हिकवोण आपी, एने आपणा मालीक यीशु मसीन खेरली वातुह एने जो हाजाली बोगवानान हिकवोणान गेत, ताहार तो गोमेंड केरनार बोण जायेल हे, ताह खेरली बोक्तीन बाराम कायच बी नाह मालुम सोतो एने तो सोबदा पोर बोलाचाल केरनार कुयराय, राड़ चिहटा एने गेलेत सेंका केरनार बोण जायेल हे। एने ता माणहा माय फालतुक राड़ एत्युह, तान बुद्दी बिगेड़ जायेल हे, एने ता खेरायीह रेन सेटा एय गीयाह, जा सोमेजतेह काय बोक्ती कामाईन वाट हे। पुण खुसी माय बोक्ती केरने माय ने आखाम रेन मोटली कामाय हे। काहाकाय आपु नाह दुनिया माय काह लावाला, एने नाह काय ली जाय सेकतेह। केदी आपणी फाय खाणेन केरता रूटो एने पेरनेन केरता फाड़का एय, ते ज्यास पोर खुस रेणे जुवे। पुण जा देनी बोणनेन आसा केरतेह, ता पारेख माय, एने फासा माय एने मोकत्युस फालतुक नुकसान एय ओहली लालुस माय फोस जातेह, जो माणहाह बिगाड़ दिथे एने नासान देरीयाम बुड़ाव दिथे। काहाकाय पोयशान लोब ते आखी बातीन बुरायीन मुल हे, तान पासाण लागणारे कोलाक बुरहो केरनारे माणहे बोरहाम रेन बोटेक जायेल हेते, एने आखी बातीन बेमारी माय फोस रेनाह।
तीमुथीयुसाह व्यक्तिगत निर्देश
पुण एय बोगवानान बोकत्या तु ज्यु वातु से नाह, एने देरेम, बोक्ती, बुरहो, मोंग, दिर, एने गेरबोड़ायीन पासाण लाग। बोरहान एक हाजी दोवेड़; एने ता जेलेमक्या जीवणाह दिरले, जान केरता तुवाह बोगवान हादेल एतो एने मोकतास गोवान सामने हास केरीन मानेल ईतो। 1मी आखाह जीवाय आपणारा बोगवानाह एने मसी यीशुह आहने जाणीन, जो पुन्तियुस पिलातुसान ओंगाण हास केरीन मानेल ईतो, ज्यो उकुम आपथु। काय आपणो मसी यीशुन पोशो आवणे वोर ज्या उकुमाह निष्कलंक एने निर्दोस मेल। बोगवान ताह ठिख टेम पोर देखाड़ी, जो बोरकेतवालो एने एकुच आदिकारी एने राजान राजा एने मालीकान मालीक हे, एने जेलेमक्यो तास ने हे, एने जेलेमक्या उजाला माय रीथे, एने ताह नाह माणुह देख्यो एने नाय केदी देख सेकी। तास ने मान एने राज जेलेमक्यो रेय। आमेन।
ज्या दुनियान देनी माणहाह उकुम आप काय गोमेंडी नाय बोणी एने चंचल देना पोर आसा नाय मेली, पुण बोगवाना पोर आसा मेली, जो आमरे हुकान केरता आखो मोकतोस आपेह। ताह उकुम आप काय हाजा काम केरी, एने बोलायीन कामा माय देनी बोणी, एने उसन्यो आपणे, एने दिहरा माणहान मोदेक केरनेम कायेम तियार रेय। एने ओंगाण ने केरता एक हाजो पायो बांद मेली काय खेरला जीवणाह काबाम केर लेय।
एय तीमुथीयुस, ज्यी हिकवोण मी तुवाह आपेल तान राखवाली केर; जाह थोड़ाक माणहे इकेल केतेह, तान खाराब बोलाचाल एने विरोद केरनारी वातुह रेन सिटो रे। थोड़ाक माणहे पाको किरेल हेते काय ज्यी इकेल हे, तीबी ता बोरहाम रेन बोटकी जायेल हेते।
तुमू पोर बोगवानान गीण एती रेय।
Source notes (1)
- Cross-reference योहान 18:37
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.