Nahali Bible
1 पतरस 4
बुदलेल जीवणो
ज्यानकेरता मसी जेवी सेरीर माय एन दुख वेठ्यो, ते तुमू बी तीस आसाह आथ्यारान गेत तियार किरो; काहाकाय जो सेरीर माय दुख वेठ्यो तो पापाह रेन सुट जायेल हे। ज्यानकेरता काय तुमू तुमरा उगरेल जीवणाम रेन वोय माणहान मोरजीम नाह, पुण बोगवानान मोरजीन गेत जीवे। काहाकाय ज्यु वातु बिगेर यहुदि माणहाह केरनेन हाजो लागतालो त्यु वातु एने लुच्चाय, खाराब लालुस, दारूड्यो, लीलाक्रिड़ा, एने मोज मोसती केरनारे एने मुरती पुजा माय जाहरी वोर आपु पेल्ला टेम माय गोवाड्या, तोस जुलूम एनो। ज्याकेरीन ता बोंगलातेह काय तुमू ओहली जेंगलीपोणान एने फालतुकान जीवणो जीवणे माय तान साथ नाह देती, केरीन ता तुमरी चिहटा केरतेह। पुण जो जीवतालान एने मुरेलान नियाव केरनेन तियार हे ता बोगवानाह ता ईसाब आपती। काहाकाय मुरेलाह बी हाजाली खुबेर ज्यास ने केरता होमलाड़ेल काय सेरीर माय तान नियाव माणहान गेत एय, पुण जीवा माय ता बोगवानान मोरजीन गेत जीवे।
बोगवानान हाजाला दानान कारबारी
आखी वातीन सेवेट आहने आव लागेल हे, केरीन सोमेजदार बोणीन एने विन्तान केरता चेकचेल्या रिवो काहाकाय तुमू विन्ता केर सेकहो। आखाम रेन हाजी वात ज्यी हे काय एका दिहराह जादा मोंग किरो, काहाकाय मोंग जुलूम पापाह डाप दिथे। कुरकुर नाह केरता एकमेकान पावणाय किरो। जाह जो वरदान जुड़ेल हे, तो ताह बोगवानान हाजाला कारबारीन गेत जो गीण तुमूह जुड़ेल हे, ताकेरीन एका दिहरान सेवा किरो। जो कुण पारचार केरी, तो बोगवानान वचनान पारचार केरी; केदी ईखेह सेवा केरी, ते ती ताकेत केरीन केरी जी बोगवान आपेह; ज्यानकेरता ज्यु आख्यु वातुम यीशु मसीन उगे रेन, बोगवानान बोड़ाय देखाय। बोड़ाय एने ताकेत आदिकार जेलेम ने जेलेम तास ने हे। आमेन।
मसी बोणनेन नाते दुख वेठणो
एय मोंगाल्ला बाय बोणहा, जेवी तुमरी आक्ठीन पारेख ईथे, ताहार ज्यो सोमजीन बोंगलाहो मा काय तुमरी पोर एगदी होपी गेटना एणे बाजरेनीह। पुण जीहे जीहे मसीन दुखाम बेचकातेह, खुसी मोणावो, ज्यानकेरता काय मसीन बोड़ाय देखाणे बुखेत बी तुमू खुस रिवो। केदी मसीन नावान केरता तुमरी चिहटा ईथे ताहार तुमू बोरकेतवाला हेते, काहाकाय बोड़ाय ने जीव, जो बोगवानान जीव हे, तुमरी पोर आवती रीथे। काल्ली बी बातीन तुमरे माय रेन कुण खुनी, चोर, खाराब काम केरनार, एने दिहरान कामा माय आथ टाकणेन वोजेसे दुख नाय बोगी। पुण केदी मसी बोणनेन वोजेसे दुख वेठणे पुड़ेह, ताहार लाजवाय नाय, पुण ज्यी वातीन केरता बोगवानान दन्यवाद किरो काहाकाय तुमू मसी नाव दारेण किरेल हेते।
काहाकाय तो टेम आव लागेल हे, काय पेल बोगवानान माणहास ने नियावान सुरवात एय। केरीन नियावान सुरवात आपणे फाय रेन एय ताहार तान सेवेट काय एय, जा बोगवानान हाजाली खोबरीह नाह मानते? एने वचन किथे,
“केदी देरमी माणुह केठीण माय रेन सुटकारो सापड़ावी;
ताहार बोक्ती नाह केरती, एने पापी माणहान काय एय?”
केरीन जा बोगवानान मोरजीन गेत दुख वेठतेह, ता हाजाला काम केरती लेन सोताह विश्वासयोग्य एने आखी चिजीह बाणावणारान आथाम होप दिवो।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.