Nahali Bible
1 पतरस 3
एदमी एने बायकु
एय बायकु, तुमू बी तुमरा एदम्यान ताबाम रिवो, काहाकाय ज्याम रेन एगदो बोगवानान वचन पोर बुरहो नाह किरेत ताहार तुमरा वेवारा केरीस ने तुमू ता बोरहा केरीन जिक सेकतेह ज्यानकेरता तुमूह ता हेऱ्या वातु केरनेन बी जोरेवरी ना सोती। काहाकाय ता देखती काय तुमरो वेवारो चोखो एने बोक्ती माय एय। 2तुमरी होबा फोक्तो बाहेर रेन देखाड़नो नाय जुवे, जिहकेरीन लेट्या गुथणे, एने होनान गेयणो पेरने, एने बात बातीन फाड़का पेरने, केरीन ज्यो तुमरो मायवालो व्यक्तिगत जुवे, जा गेरबोड़ा एने मोनान गेरबोड़ायीन खेतेम नाह एणार होबा केरीन हिंगारेल जुवे, काहाकाय बोगवानान नेजरी माय ज्यान किमोत मोठो हे। काहाकाय पेल्ला काला माय बोगवाना पोर आसा मेलनार्यु बोक्ती केरनार्यु बायकु बी त्यु आप आपणा एदम्यान ताबाम रेयीन सोताह इहीचकेरीन हिंगारताल्यु। जिहकेरीन सारा तीन एदमी अब्राहाम ने उकुम मानताली। तिहेच केरीन तुमू बी हाजो किरो एने बिवो मा, ते तुमू सारान बेट्युख ठेराहो। 3
तिहेच केरीन एय एदमी, तुमू बी तुमर्यु बायकु हेऱ्या सोमेजदारी केरीन जीवणो जीवो, एने बायकुह कोमजोर ठामलो सोमजीन तीन मान मीलो, ज्यो सोमजीन काय आमु दुय जीवणान वरदानान वोस हेते, ज्यानकेरता काय तुमरी विन्ता माय एड़थेड़ो नाय आवी।
हाजो केरनेन कारेण तेकलीत
केरीन तुमू आखा मोना माय दोस्तीदार बोणीन रिवो, गीण एने एका दिहरा पोर मोंग किरो, किव केरनार एने गेरीब बुणो। बुराय ने बोदले बुराय एने हारापान बोदले हाराप इहकेरीन मा किरो; पुण ज्यान उलटा बोरकेतुस आपो, काहाकाय तुमू बोरकेत ने वारीस बोणनेन केरता हादाड़ाय जायेल हेते। काहाकाय पुस्तेक माय लिखेल हे:
“जो कुण जीवणान आसा मिलेह,
एने हाजा दिह देखणे हुदेह,
तो तान जिबीह बुरायीह रेन, एने तान ओठाह कोपेट ने वातु केरने से रोकीन मीले।
तो बुरायीह सोड़ी एने हाजो तो केरी;
एने तो पुरा मोना केरीन सान्ती होदणेन केरता कोसीत केरी।
काहाकाय मालीकान डोला न्यायी माणहा पोर लागेल रेतेह,
एने तान कान तान विन्तान उगे लागेल रेतेह;
पुण मालीक बुराय केरनारान उगे रेन मुय फिराव लिथे।”
केदी तुमू हाजो केरनेन केरता कायेम तियार रिहो ताहार तुमूह नुकसान कुण पोचाड़ सिकेह? 4केदी तुमू खेराय ने केरता दुख बी विठहो, ताहार बोरकेतवाला हेते! पुण माणहान बिगाड़े ते मा बिहो, एने मा गाबराहो। पुण मसीह मालीक जाणीन आप आपणा मोना माय मान सम्मान मीलो। जो कुण तुमूह तुमरी आसान बाराम काह फुसी, ताह जापाप आपणेन केरता कायेम तियार रिवो, पुण गेरबोड़ाय एने बिते लेन जापाप आपो; एने मोन बी चोखो मीलो, ज्यानकेरता काय जी वातुन बाराम तुमरी ईजुत वेराह तान बाराम ता, जा मसी माय तुमरा हाजा वेवारान अपमान केरतेह, ता लाजवाती। काहाकाय बोगवानान मोरजी ज्यीस हे काय बुराय केरनेन बोदले हाजो केरीन दुख विठो ज्यीस बोगवानान मोरजी हे। 5ज्यानकेरता मसी बी आखा पापान केरता एकुस वार मुरेल काय आपुह बोगवानान आहने खेरला बोणावीन पोचाड़ी एने तो सेरीरा केरीन ते माराय गीयो, पुण जीवा माय जीवाड़ाय गीयो। ता जीवान उगे रेन यीशु जाईन कोंडायेल जीवाह पारचार किऱ्यो, ता ज्या जीव हेते जा ती टेम बोगवानान उकुम नाह मान्नारे एता जेवी नुहान डोंडह्यो बोणने बाजरियेल एतो एने बोगवान दिर देरीन वाट जोवतालो। ता डोंडह्याम फोक्तो आठ जाणे पाण्याह रेन वोच गीया। ज्यो ता बपतीस्मान गेत हे, जाकेरीन एवी तुमरो सुटकारो ईथे। ज्या माय सेरीरान मोयेल दोवणे नाह सोतो, पुण चोखाला मोनान केरता बोगवाना हेऱ्यो हाजो वायदो हे, एवी ते तुमूह यीशु मसीन जीव उठणेन द्वारा वोचाड़ेह। यीशु हेरगा माय जाईन बोगवानान जीवड़े उगे बुहेल हे; एने हेरोगदुत एने हेरगावाला आदिकारी एने ताकेत तान ताबाम केराय जायेल हेते।
Source notes (5)
- Cross-reference इफिसीयो 5:22; कुलीसियो 3:18
- Cross-reference 1 तीमुथीयुस 2:9
- Cross-reference इफिसीयो 5:25; कुलीसियो 3:19
- Cross-reference मत्ती 5:10
- Footnote मुरेल; थोड़ाक लेख माय तेकलीत सेहेन किरेल लिखेल हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.