Leidung 66

N Batadung miswakegah zulie

Kenlang leibungkekwame ziemne. Lei ge, ketwalei ge.

1Kideu pelane, Tinggwang da suiyi kwa tei gai;

2Pezi kendu lei tei pet gai;

pe hetwa kendu teigai.

3Tinggwang dage rang eh, “N tadung au daikenzwa ge gede hing no!

N kengkieng kedi ziemne n ngauraumedung nda keumie zie.

4Kideu pelane ncu reca zie

nah nda lei teigai zie;

penui n zi de ketwalei teizie.” Selah

5Gwang eh pielo Tinggwang batadung;

minadung dage pe batadung pa tei kegai au ngau kehing ge.

6Tinggwang Kegie Jaaidi de hangdeu kecang ge teidi;

penui hepi le kereuki tetkah gwang;

cika anui peda renga bamla.

7Pa pe kengkieng ne kelungta kedih teigwang;

pe miak heleuhdung de pieling bam;

Peu migede de penuide kemmau tei diso. Selah

8Tinggwang de samlam peu lu, nnui minadung,

pecu hetwa kepeu kwa de peu siu lo.

9Pa anui de keringme kak gage kainzeu,

nah pa anui pidung de peu dauzeu kera peu lama.

10N ziemne, Tinggwang, anui de kedei pie;

rangkanggeu kedei pie kegai nzwa nang anui de kedei pie.1

11Nang anui de helang ge ga ngngwa gai;

nang anui caidung ga hepüt kerüt ge kaigai.

12Nang anui peudung reu ga peu minadung de tet nggwa;

anui mih nah dui de tetka gwang,

dede nang anui de heni kemza gage ngngwa mpet beu.

13Ih n kiga keru recadung teu eh gwang zie;

Ih a sampetdung ncu rui beu zie

14a muileukung ne sampet kegai

nah Ih teei keherei kebam dau a mui gade rang kegaide.

15Ih makaunedung pelui keyibe teu ncu keru recadung pwapeu zie

meurünseudung perim kehengui teu eh;

Ih hetumseudung nah hemeudung pwapeu zie. Selah

16Gwang eh kingnei lu, nnui pelane Tinggwang de hing kelame,

nah pa a keringria ziemne tei kegai Ih ndugai zie.

17Ih a mui le pe dage hap gai,

nah a mleu le pecu hetwa peugai.

18Ih a nlung gade kemau ngaulu liecai,

Rampaube a kekie kingneibeu tadi lubui.2

19Dede Tinggwang siu kesang lu da;

pa sünne eh a kekie kwa kingnei beuda.

20Samlam Tinggwang da bamlu,

a kekie

mede pe samkak kesamsangbe ada de teunreu dila kemakpe.