Tetkempet 33

1Pecai RAMPAUBE Moses de mpau, “Tetlu aikade, nang nah Egyptme deu gade nang ne minadung de ngngwa ke mpetme. Abraham, Isaac nah Jacob dage sampet tei kebeu deu ga miecu, Ih rang kecudau, ‘Ih cide n leuhme de peuzie.’ 2Ih tinggimgwame gede n dwa gage langgai beu zie, nah Ih Canaanme, Amoritme, Hittitme, Perizzitme, Hivitme, nah Jebusitme de gwa dizie. 3Cipau deu ga miecu, tungdui nah heliadui lwa kebam1 ga, dede Ih nnuide ngngwa tet lak, kedanemene mina nnui lung ketakdung gelu, Ih nnuide lampuiki gade ngkapti lubui lu.” 4Mina sam kehung aidungde siulu ge, penui sui siadi, nah mige de hetei heta net teu si tadi 5RAMPAUBE Moses dage rangdi, “Israelme dage paubeu, ‘Nnui lung ketak minadung. Magade Ih nnuide peting keduina ge de nnui kakga nzang mie cai, Ih nnuide ngkapti zie. Cine cu nnui gu hetei heta net lwak dilu ciude Ih nnuide teu daitei ziebi riem lu kerane.’” 6Cine Israelme Horeb2 deutu gade hetei heta net teu si tadi.

Pempau Paiki

7Israelme ramzeuki tei kecu dau, Moses kemci paiki pwalu delwe ramzeuki gwale ge liem lu, ramzeuki gade kemdei gega. Pa cide de kengkwa paiki de qulu. Keheibe de RAMPAUBE dade ma heteu kelame kengkwa paiki ga gwangla, ramzeuki gwale. 8Moses paiki gade tetpet kecudau, mina pelane kengkwa paiki kimui gade saplwe Moses pelung kiga nlütdi kemaktane pie bamla. 9Moses kengkwa paiki ga nlütdi kecudau, hemwa tsia paiki kimui ga hung eh sapbam dila, nah RAMPAUBE Moses de ngngwa mpaula. 10Mina pelane hemwa tsia paiki kimui ga sap kebam ngaulu ge, penui cuh lwe reca la, mina keheibe de pekatei paiki kimui gade. 11RAMPAUBE Moses de kezumok lwe kempau la, mige pe zangme gede keresiu kecu nzwa. Pecai Moses ramzeuki ga cailigwang dila, dede pe kilabe Nun napei Joshua, rehangpei, tet mene paiki ga bam dila.

Moses nah RAMPAUBE kendu

12Moses RAMPAUBE dage rangdi, “Pielo, nang a dage rang bam, ‘Mina aidungde de penui beu ga nzanglu,’ dede caude acu ngngwa langgai zie bi nang acu peu cima. Nang ranggai, ‘Ih hezi gade ncu cibam, nah a miakngau gade nang acu ngau nsui yi si lu.’ 13Magade cu n miakngau gade acu nsui liecai, n lampuidung acu saulia lo, ciude Ih ncu ci luzie nah n miakngau gade nsuibe tei jüja bamlu kerane. Heleuh aide n mina lie nsung lulo.” 14RAMPAUBE keligai, “Ih akatei ncu nzang gwang zie, nah Ih ncu kemtak peuzie.” 15Moses pe dage rangdi, “Magade nang anuide nzang mie lak cai, heni aikade anuide ngngwa hang tadi lo. 16Meliecai, dainzwa n miakngau gade Ih n suiyi teibam lie kecu Ih nah n minadung cilu laino? Magade nang anuide ngngwa la cai iciude Ih nah n minadung kideu reu ga kedame pelane dade tsam lak ni?”

17RAMPAUBE Moses dage rangdi, “Nang kie kecu de nzwa Ih aide de teibeu zie, a miakngau gade ncu ngau a suiyi kecune, nah Ih ncu hezi gade cibam.” 18Moses rangdi, “Kehereide n kendu de acu keulia lo.” 19RAMPAUBE rangdi, “Ih a keyi3 pelane n dwa gage lia gai beuzie, nah Ih n dwa gage a zi ‘RAMPAUBE’ mdu mci gai zie. Ih au ngaugia peu kerame de ngaugia peu zie, nah ngaugia keulia kerame de Ih ngaugia keulia zie.” 20Dede RAMPAUBE rangdi, “Nang a zu ngau me lubui, migede acu ngau eh ringbam gai lak kecune.” 21RAMPAUBE rangdi, “Pielo, heni ge aika a taiga bam, nang aipau tsura reu ga saplu zie. 22A kendu kahgwang kecudau, Ih ncu tsura kakki gage kai luzie nah Ih kahgwang di kemakta, a ba le ncu gum luzie. 23Pecai Ih a ba keu nzia dizie, nah nang a kedok ngau zie, dede a zu ngau lak.”