Munda Bible
ବୁଗିନ୍ ଇନିତୁ 20
ଦାଖ୍ରାସି ଗିହୁଃ ରିକାଃଏ, ବୁଲଃ ତେୟାଃ ଏପେରାଙ୍ଗ୍ ରିକାଃଏ, ଅକନ୍ ହଡ଼ ନେଆଁତେ ବେଦାଅଃତାନା, ଇନିଃ ସେଣାଁନ୍ନିଃ ନାହାଁଲିଃ।
ରାଜାରାଃ ବରୱାନ୍ ଜାୱାନ୍ ଟେଡ଼ଃରାଃ କାଉରି ଲେକା ତାନାଃ, ଅକନ୍ ହଡ଼ ରାଜାରାଃ ରିସ୍ମିକେ ଉସ୍କୁର୍ ରିକାଃଏ, ଇନିଃ ଆୟାଃ ଜୀଉକେ ଆଦେୟା।
ଏପେରାଙ୍ଗ୍ କାଜିରେ କା ତାଇନ୍ରେ ହଡ଼ ନାଙ୍ଗ୍ ମାନାରାଙ୍ଗ୍ କାଜି ତାନାଃ, ଡଣ୍ଡ ହଡ଼ ସବେର୍ ଇମ୍ତା ଏପେରାଙ୍ଗ୍ ରିକାଃଏ।
କୁଢ଼ି ଚାଷି ରାବାଙ୍ଗ୍ ହରାତେ ସିହୁଃ କାଏ ରିକାଃ, ଏନାମେନ୍ତେ ଇନିଃ ଇରଃ ସାମାଏରେ ଦାଣାଁଁଲେରେୟ ଇନିଃତାଃରେ ଜେତ୍ନାଃ କାଏ ନାମେୟା।
ହଡ଼ରାଃ ମନ୍ରେ ମିଆଦ୍ ରଜୋଟ ଇକିର୍ ଦାଆଃ ଲେକା ତାନାଃ, ମେନ୍ଦ ସାରିଉରୁମ୍ ହଡ଼ ଏନା ହେତେ ବାହାରି ଅଡଙ୍ଗ୍କଆଃଏ।
ପୁରାଃ ହଡ଼କ ଆପ୍ନାଃ ଆପ୍ନାଃ ଲିନିବୁଇରେୟାଃ କାମିକ ଉଦୁବାଃ, ମେନ୍ଦ ପାତିୟାରଃ ହଡ଼ ଅକଏ ନାମ୍ ଦାଡ଼ିୟା ?
ଧାର୍ମାନ୍ ହଡ଼ ଆୟାଃ ସାନାର୍ତିରେ ସେନେୟା, ଏନାରାଃ ତାୟମ୍ତେ ଆୟାଃ ହନ୍କ ଧାଇନ୍ ହବାଅଃଆକ।
ମିଆଦ୍ ରାଜା ବିଚାର୍ରେୟାଃ ରାଜ୍ଗାଦିରେ ଦୁବାଃ, ଇନିଃ ଆପ୍ନାଃ ମେଦ୍ରାଃ ସବେନ୍ ଏତ୍କାନ୍ ବିଷାଏକ ଗୁମ୍କେଦ୍ତେ ଅଟାଙ୍ଗ୍ୟେଁଆ।
ଅକଏ କାଜି ଦାଡ଼ିୟାଏ, ଆଇଙ୍ଗ୍ ଆଇଁୟାଃ ମନ୍ସୁରୁଦ୍ ଫାର୍ଚି କାଦାଇଙ୍ଗ୍, ଆଇଙ୍ଗ୍ ଆଇଁୟାଃ ପାପ୍ ହେତେ ଫାର୍ଚି କାଦାଇଙ୍ଗ୍ ?
ତାରାଜୁ ଓଡ଼ୋଃ ଅଜାନ୍ ବାରାନାଃ ପ୍ରାଭୁ ପାର୍ମେଶ୍ୱାର୍ଆଃ ଆୟାର୍ରେ ହିଲାଙ୍ଗ୍ ତାନାଃ।
ମିଆଦ୍ ହନ୍ରାଃ ଆୟାଃ କାମିତେ ସାରି ଦାଡ଼ିନାଃ, ଚି ଇନିୟାଃ କାମି ବୁଗିନ୍ ତାନାଃ ଚି ନାହାଁଲାଃ।
ଆୟୁମ୍ ନାଙ୍ଗ୍ ଲୁତୁର୍ ଓଡ଼ୋଃ ନେଲ୍ ନାଙ୍ଗ୍ ମେଦ୍, ନେ ବାରାନାଃ ପ୍ରାଭୁ ପାର୍ମେଶ୍ୱାର୍ ବାଇୟାକାଦା।
ଦୁଡ଼ୁମ୍କେ ଆଲମ୍ ଦୁଲାଡ଼ାଃ, କାରେଦ ଆମ୍ ଗାରିବ୍ ହବାୱା, ଆମାଃ ମେଦ୍ ନେଲେମେ ଓଡ଼ୋଃ ଆମ୍ ଲାଦ୍ତେ ପେରେଃ କଆଃ।
କିରିଙ୍ଗ୍ନିଃ କିରିଙ୍ଗ୍ ସାମାଏରେ କାଜିୟା, ଜିନିଷ୍ ବୁଗିନ୍ ବାନଃଆ, ମେନ୍ଦ ଆୟାଃ ହରାରେ ସେନ୍ ଇମ୍ତା ଇନିଃ ଆପାନ୍କେ ମାରାଙ୍ଗ୍ ମେନ୍ତେ କାଜିନା।
ସୋନା ଓଡ଼ୋଃ ହିରା ପୁରାଃ ମେନାଃ, ମେନ୍ଦ ସେଣାଁନ୍ କାଜିକ ପୁରାଃ ଗନଙ୍ଗ୍ଆଁନ୍ ତାନାଃ।
ମିଆଦ୍ କା ଚିହ୍ନାର୍ ହଡ଼ ନାଙ୍ଗ୍ ଅକଏ ଆପାନ୍କେ ଜିମାଅଃ ତାନାଏ, ଇନିୟାଃ ଲିଜାଃ ଗାହାଁନା ଲେକା ଇଦିମେ, ଓଡ଼ୋଃ ଜେତାଏ ଏଟାଃ ଦିଶୁମ୍ରେନ୍ ହଡ଼କ ନାଙ୍ଗ୍ ଆପାନ୍କେ ଜିମାଅଃ ତାନାଏ, ରେଦ ଇନିଃକେ ଗାହାଁନା ଲେକା ଦହିମେ।
ବେଦାତେ କାମିଆକାନ୍ ଲାଦ୍ ହଡ଼କେ ହେଡ଼େମ୍ଇୟା, ମେନ୍ଦ ହୁଡିଙ୍ଗ୍ ସାମାଏ ତାୟମ୍ତେ ଇନିୟାଃ ମଚା ରୁଗ୍ଡ଼ିତେ ପେରେଃ କଆଃ।
ସବେନ୍ ଉଡ଼ୁ ରଜୋଟତେ ପକ୍ତା ହବାୱା ଓଡ଼ୋଃ ବୁଗିନ୍ ହରା ଉଦୁବ୍କେଦ୍ତେ ଲାଡ଼ାଇ ହବାୱା।
ଅକଏ ବେଦା କାଜି ହଡ଼ ଲେକା ହନର୍ ତାନାଏ, ଇନିଃ ଉକୁଆକାନ୍ କାଜି ଉଦୁବ୍ ରିକାଏ, ଏନାମେନ୍ତେ ଅକଏ ଆପ୍ନାଃ ମଚା କାଏ ହାପା ତାନା, ଇନିୟାଃ ସାଙ୍ଗାତିରେ ଆଲମ୍ ରିକାଏ।
ଅକଏ ଆୟାଃ ଏଙ୍ଗା ଆପୁକିନ୍କେ ସାର୍ପାଅ କିନ୍ତାନାଏ, ଇନିୟାଃ ଦିଆ ନୁବାଃରେ ଇଣିକ୍ କଆଃ।
ଏନେଟେଦ୍ରେ ଜେତା ଆକ୍ତେୟାର୍ ଇମ୍ତାଗି ନାମଃଆ, ମେନ୍ଦ ଏନାରାଃ ଟୁଣ୍ଡୁରେ ଆଶିଷ୍ କା ତାଇନାଃ।
“ଆଇଙ୍ଗ୍ ଏତ୍କାନ୍ ରେୟାଃ ବାଦ୍ଲା ଇଦିୟା ମେନ୍ତେ ଆଲମ୍ କାଜିୟା,” ମେନ୍ଦ ପ୍ରାଭୁ ପାର୍ମେଶ୍ୱାର୍ରେ ବିଶ୍ୱାସ୍ ଦହେମେ, ଇନିଃଗି ଆମ୍କେ ଦେଙ୍ଗାମେୟାଁ।
ପ୍ରାଭୁ ପାର୍ମେଶ୍ୱାର୍ ସବେନ୍ ତାରାଜୁକେ ହିଲାଙ୍ଗ୍ ରିକାଏ ଓଡ଼ୋଃ ବେଦା ତାରାଜୁ ବୁଗିନ୍ କା ତାନାଃ।
ହଡ଼ରାଃ ସବେନ୍ ସେସେନ୍ ହରା ପ୍ରାଭୁଗି ଚାଲାଅ ତାନାଏ, ତାବ୍ଦ ହଡ଼ ଆପ୍ନାଃ ହରା ଚିଲ୍କା ସାରିଉରୁମ୍ ଦାଡ଼ିୟା ?
ନେଆଁ ପାବିତାର୍ ତାନାଃ ମେନ୍ତେ ଇମ୍ତାଗି କାଜି ନାଙ୍ଗ୍ ଓଡ଼ୋଃ କିରିୟା ରିକା ତାୟମ୍ତେ ବିଚାର୍ ରିକା ହଡ଼ ନାଗେନ୍ତେ ଫାଁସ୍ରି ଲେକା ତାନାଃ।
ସେଣାଁନ୍ ରାଜା ଏତ୍କାନ୍ ହଡ଼କକେ ଗୁମ୍କେଦ୍ତେ ଏଟାଃରେ ଦହ କଆଃ ଓଡ଼ୋଃ ଇନ୍କୁଆଃ ଚେତାନ୍ରେ ଚାକାକ ଚାଲାଅଏୟା।
ହଡ଼ରାଃ ଆତ୍ମା ପ୍ରାଭୁଆଃ ଦିଆ ତାନାଃ, ଏନା ହଡ଼୍ମ ଭିତାର୍ରେୟାଃ ସବେନ୍ ହିସାକ ଦାଣାଁ ଅଡଙ୍ଗ୍ୟେଁଆ।
ଦାୟା ଓଡ଼ୋଃ ସାର୍ତି ରାଜାକେ ବାନ୍ଚାଅ ରିକାଃଏ ଓଡ଼ୋଃ ଦାୟା ହରାତେ ଆୟାଃ ରାଜ୍ଗାଦି ଜାନାଅଗି ତାଇନାଃ।
ସେପେଡ଼େଦ୍କଆଃ ପେଡ଼େଃ ଇନ୍କୁଆଃ ମାନାରାଙ୍ଗ୍ ତାନାଃ ଓଡ଼ୋଃ ହାଡ଼ାମ୍କଆଃ ପୁଣ୍ଡି ଉବ୍ ଇନ୍କୁଆଃ ସିଙ୍ଗାର୍ ତାନାଃ।
ଘାଅଃ ଲେକା ଦାଲ୍ତେୟାଃ ଏତ୍କାନ୍କେ ଫାର୍ଚି ରିକାଃଏ ଓଡ଼ୋଃ ଏନ୍ ଦାଲ୍ ଘାଅତେୟାଃ ହଡ଼୍ମରାଃ ସବେନ୍ ହିସାରେ ବଲଆ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.