Munda Bible
ବୁଗିନ୍ ଇନିତୁ 18:10
Verse 10 is marked below, with the whole chapter around it. Read from the start
ଅକଏ ଏଟାଃକତାଃ ହେତେ ଆପାନ୍କେ ବିନ୍ଗାଅ ରିକାଃଏ, ଇନିଃ ଆପ୍ନାଃ ବୁଗିନ୍ ନାଗେନ୍ତେ ରିକାଃଏ ଓଡ଼ୋଃ ସବେନ୍ ରାକାମ୍ରେନ୍ ବୁଗିନ୍ ସେଣାଁରେ ବିରୁଧ୍ ରିକାଃଏ।
ଡଣ୍ଡ ହଡ଼ ବୁଦ୍ଧିରେ ଜୀଉସୁକୁ କାଏ ନାମେୟା, ଆପ୍ନାଃ ମନ୍ରାଃ କାଜି ଉଦୁବ୍ରେ ଏସ୍କାର୍ ଜୀଉସୁକୁ ନାମେୟା।
ଏତ୍କାନ୍ଆଃ ହିଜୁଃ ହରାତେ ଗିହୁଃ ହିଜୁଃଆ ଓଡ଼ୋଃ ଏନାତେ ନିନ୍ଦାଲଃ ମାଇନ୍ କା ହିଜୁଃଆ।
ହଡ଼ରାଃ ମଚାରାଃ କାଜି ଇକିର୍ ଦାଆଃ ଲେକା ଓଡ଼ୋଃ ସେଣାଁଁରାଃ ସେତେଙ୍ଗ୍ ଲିଙ୍ଗିତାନ୍ ଲୋର୍ ଲେକା ତାନାଃ।
ଏତ୍କାନ୍ନିଃଆଃ ସାଃରେ ତିଙ୍ଗୁନ୍ ଓଡ଼ୋଃ ଧାର୍ମାନ୍ ଚେତାନ୍ରେ ଅନ୍ୟାୟ ରିକାତେୟାଃ କା ବୁଗିନାଃ।
ଡଣ୍ଡରାଃ କାଜିତେ ଏପେରାଙ୍ଗ୍ ହୁଇନାଃ ଓଡ଼ୋଃ ଇନିୟାଃ ମଚାତେ ଲାପ୍ଡ଼ାଇ ହିଜୁଃଆ।
ଡଣ୍ଡରାଃ ମେଦ୍ମୁହାଁଡ଼୍ତେଗି ଆୟାଃ ଜୀଅନ୍ ହୁଇନାଃ ଓଡ଼ୋଃ ଆୟାଃ ମଚାତେ ଆପ୍ନା ଜୀଉରାଃ ଜାଲମ୍ ଲେକା ତାନାଃ।
ଏଟାଃକଆଃ ଲୁତୁର୍ରେ କାଜି ଉଦୁବ୍ତାନ୍ ହଡ଼ରାଃ କାଜି ସିବିଲାନ୍ ଲେକ୍ନାଃ ତାନାଃ, ଏନ୍ କାଜି ଲାହିଦ୍ ଭିତାର୍ତେ ସେନଃ କଆଃ।
ଅକଏ ଆୟାଃ କାମିରେ ଆଲ୍ସି ତାନିଃ, ଇନିଃ କାମିକେ ବାଗ୍ଡ଼ାଅ ତାନ୍ନିୟାଃ ହାଗା ତାନିଃ।
ପ୍ରାଭୁଆଃ ନୁତୁମ୍ କେଟେଦ୍ ଗାଡ଼୍ ତାନାଃ, ଧାର୍ମାନ୍ ହଡ଼ ଏନ୍ତାଃ ସେନ୍ୟାନ୍ଲଃ ବାନ୍ଚାଅ କେଦ୍ତେ ତାଇନାଃ।
ମିଆଦ୍ କିସାଁଣ୍ ହଡ଼ରାଃ ଖୁର୍ଜି ଆୟାଃ କେଟେଦ୍ ନାଗାର୍ ତାନାଃ ଓଡ଼ୋଃ ଆୟାଃ କୁମୁରେ ମିଆଦ୍ ସାଲାଙ୍ଗି ପାଚ୍ରି ଲେକା ତାନାଃ।
ଜିୟନ୍ ସିଦାରେ ହଡ଼ରାଃ ମନ୍ରେ ଘାମାଣ୍ଡ୍ ହିଜୁଃଆ, ମେନ୍ଦ ଲେବେଃରେୟାଃ ଆୟାର୍ରେ ମାନାରାଙ୍ଗ୍ ତାଇନାଃ।
ଅକନ୍ ହଡ଼ ଆୟୁମ୍ ସିଦାରେ କାଜିରୁହାଡ଼୍ ତାନାଏ, ଏନା ଇନିଃ ନାଗେନ୍ତେ ଡଣ୍ଡ ଓଡ଼ୋଃ ଗିହୁଃ କାଜି ତାନାଃ।
ହଡ଼ରାଃ ଆତ୍ମା ଆୟାଃ ଦୁକୁକେ ସାହାତିଙ୍ଗ୍ ଦାଡ଼ିୟା, ମେନ୍ଦ ଦୁକୁଆକାନ୍ ଆତ୍ମାକେ ଅକଏ ସାହାତିଙ୍ଗ୍ ଦାଡ଼ିୟା।
ଆଟ୍କାର୍ଉରୁମ୍ ଦାଡ଼ିତାନ୍ ହଡ଼ ସେଣାଁଁ ନାମେ ସାନାଙ୍ଗ୍ତାନାଏ। ଓଡ଼ୋଃ ସେଣାଁନ୍ ହଡ଼ରାଃ ଲୁତୁର୍ ସେଣାଁ ଦାଣାଁଏ।
ହଡ଼ରାଃ ଭେଁଟ୍ ଆୟାଃ ନାଙ୍ଗ୍ ହରା ବାଇୟାଏ ଓଡ଼ୋଃ ଏନାକେ ଇନିଃ ମାପ୍ରାଙ୍ଗ୍ ହଡ଼କଆଃ ହେପାଦ୍ତେ ଆଉଇୟା।
ଅକନ୍ ହଡ଼ ସିଦାରେ ଆୟାଃ କାପ୍ଜି କାଜି ଉଦୁବ୍ ତାନାଏ, ଇନିଃ ଧାର୍ମାନ୍ ନେଲଃଆ, ମେନ୍ଦ ଆୟାଃ ହପୋର୍ଜାପାଃ ଇନିୟାଃ ହେପାଦ୍ତେ ହିଜୁଃକେଦ୍ତେ ଇନିଃକେ ବିଡ଼ାଅ ରିକାଃଏ।
ଚିଠା ସାଲା ହରାତେ ବିରୁଧ୍ରେୟାଃ ଏପେରାଙ୍ଗ୍ କାଜିକ ଟୁଣ୍ଡୁନାଃ, ଓଡ଼ୋଃ ପେଡ଼େୟାନ୍କକେ ବିନ୍ଗାଅକଆ।
ଆମାଃ ହୋପର୍ଜାପାଃନିଃକେ ଦେଙ୍ଗାଇମେ, ଇନିଃ ଆମ୍କେ ମିଆଦ୍ ନାଗାର୍ରେୟାଃ ପାଚ୍ରି ଲେକା ବାଞ୍ଚାଅମେୟାଁ। ମେନ୍ଦ ଇନ୍କୁଲଃ କାପ୍ଜିରେଦମ୍, ଇନ୍କୁ ଆମାଃ ନାଗେନ୍ତେ ଅର୍ଗଡ଼୍ ହାଣ୍ଡେଦ୍ତାଃକ।
ହଡ଼ରାଃ ଲାହିଦ୍ ଆୟାଃ ମଚାରାଃ ଜାଗାର୍ତେ ବିୟଃଆଃ ଓଡ଼ୋଃ ଆୟାଃ ଲାଚଡ଼ାହେତେ ଅଡଙ୍ଗ୍ଅଃତାନ୍ କାଜିତେ ଇନିୟାଃ ପୁରାଃ ହୁଇନାଃ।
ଆଲାଙ୍ଗ୍ରେୟାଃ ଆକ୍ତେୟାର୍ରେ ହଡ଼ରାଃ ଜୀଦାନ୍ ଓଡ଼ୋଃ ଗନଏଃ ମେନାଃ। ଓଡ଼ୋଃ ଅକନ୍ ହଡ଼ ଏନାକେ ଦୁଲାଡ଼ାଃଏ, ଇନିଃ ଏନାରେୟାଃ ବୁଗିନ୍ ଜ ନାମେୟା।
ଅକନ୍ ହଡ଼ କୁଡ଼ି ନାମାଃଏ, ଇନିଃ ବୁଗିନ୍ ଜିନିଷ୍ ନାମାଃଏ, ଓଡ଼ୋଃ ପ୍ରାଭୁତାଃଏତେ ଇନିଃ ଲିନିବୁଇ ନାମାଃଏ।
ଗାରିବ୍ ହଡ଼ ଦେଙ୍ଗା ନାମେ ନାଗେନ୍ତେ କାଜିଗହାର୍ ରିକାଃଏ, ମେନ୍ଦ କିସାଁଣ୍ ହଡ଼ କେଟେଃୟାନ୍ କାଜିକ କାଜିୟାଃ।
ଅକଏ ପୁରାଃ ଗାତି ବାଇୟାଃଏ, ଇନିଃ ଆପ୍ନାଃ ଜିୟନ୍ ନାଗେନ୍ତେ ଏନ୍ଲେକା ରିକାଃଏ। ମେନ୍ଦ ମିଆଦ୍ ଦୁଲାଡ଼୍ତାନ୍ନିଃ ମେନାଇୟାଃ ଇନିଃ ହାଗା ଏତେ ହଁଗି ଆପ୍ନାଃ ହେପାଦ୍ରେ ତାଇନାଃ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.