Munda Bible
ନିହିମିୟା 8:10
Verse 10 is marked below, with the whole chapter around it. Read from the start
ଏଜ୍ରାରାଃ ଆନ୍ଚୁ ପାଢ଼ାଅ
ସବେନ୍ ହଡ଼କ ମିଆଁଦ୍ ଉଦ୍ଦେଶ୍ରେଗି ଦାଆଃ ଦୁହାର୍ ହେପାଦ୍ରେୟାଃ ଛାଉର୍ରେ ହୁଣ୍ଡିୟାନାକ। ପ୍ରାଭୁ ଇସ୍ରାଏଲ୍କେ ମୁଶାରାଃ ହରାତେ ଏମାକାଇ ଆନ୍ଚୁ ପୁଥିକେ ଆଉ ନାଗେନ୍ତେ ଇନ୍କୁ ଆଇନ୍ ଇତୁତାନ୍ ଏଜ୍ରାକେ କାଜିକିୟାକ। ଏନ୍ତେ ମିଦ୍ ହାପ୍ତାରାଃ ପାହିଲା ହୁଲାଙ୍ଗ୍ରେ, ଯାଜାକ୍ ଏଜ୍ରା ସାମାଜ୍ରେନ୍ ହୁଣ୍ଡିକାନ୍ କଡ଼ା, କୁଡ଼ି ସବେନ୍କ ଆୟୁମ୍କେଦ୍ତେ ଆଟ୍କାର୍ଉରୁମ୍ ଦାଡ଼ି ଲେକାନ୍ ହଡ଼କତାଃତେ ଏନ୍ ଆନ୍ଚୁ ପୁଥିକେ ଆଉକେଦା।
ଇନିଃ ଦାଆଃ ଦୁହାର୍ ହେପାଦ୍ରାଃ ଛାଉର୍ରେ ତିଙ୍ଗୁୟାନା ଓଡ଼ୋଃ ଆୟୁମ୍କେଦ୍ତେ ସାରିଉରୁମ୍ ଦାଡ଼ି ଲେକାନ୍ କଡ଼ା, କୁଡ଼ି ଓଡ଼ୋଃ ସବେନ୍ ହଡ଼କଆଃ ସାମ୍ନାଙ୍ଗ୍ରେ ସେତାଃଏତେ ହାଣେଁଜଃ ଜାକେଦ୍ ଏନ୍ ପୁଥିଏତେ ପାଢ଼ାଅକେଦା। ଓଡ଼ୋଃ ସବେନ୍ ହଡ଼କ ଏନ୍ ପାଢ଼ାଅତାନ୍ତେୟାଃ ବୁଗିଲେକା ଆୟୁମ୍କେଦାକ।
ଆଇନ୍ ଇତୁନିଃ ଏଜ୍ରା ନେ କାମି ନାଗେନ୍ତେଗି ସାହାନ୍ଲଃ ବାଇୟାକାନ୍ ମାଚେନ୍ ଚେତାନ୍ରେ ତିଙ୍ଗୁୟାନା। ଆୟାଃ ଗେନାରାଃ ଜମ୍ସାଃରେ ମାତ୍ତିଥିୟ, ଶେମା, ଅନାୟ, ଉରିୟ, ହିଲ୍କିୟ ଓଡ଼ୋଃ ମାସେୟ ହଡ଼କ ତାଇକେନା ଏନ୍ତେ ଆୟାଃ ଲେଙ୍ଗାସାଃରେ ପଦାୟ, ମୀଶାୟେଲ୍, ମଲ୍କିୟ, ହଶୁମ୍, ହଶ୍ବଦ୍ଦାନା, ଜିଖରିୟ ଓଡ଼ୋଃ ମଶୁଲ୍ଲମ୍ ହଡ଼କ ତାଇକେନା। ଏଜ୍ରା ସବେନ୍ ହଡ଼କଆଃ ନାଜେର୍ରେ ପୁଥିକେ ଅଟାଃକେଦାଏ। ଇନିଃ ମାଚେନ୍ ଚେତାନ୍ରେ ତିଙ୍ଗୁକାନ୍ ହରାତେ ସବେନ୍କ ଇନିଃକେ ନେଲ୍ ଦାଡ଼ିକିୟାକ। ଇନିଃ ପୁଥି ଅଟାଃକେଦ୍ ଇମ୍ତା ସବେନ୍କ ତିଙ୍ଗୁୟାନାକ।
ଏଜ୍ରା ମାରାଙ୍ଗ୍ ପ୍ରାଭୁ ପାର୍ମେଶ୍ୱାର୍ଆଃ ସାହାରାଅ ରିକାକେଦାଏ ଓଡ଼ୋଃ ସବେନ୍କ ଆକଆଃ ଆପ୍ନାଃ ତିଃଇ ରିମ୍କେଦ୍ତେ “ଆମେନ୍, ଆମେନ୍” ମେନ୍ତେ କାଜିକେଦାକ। ଏନ୍ତେ ଇନ୍କୁ ଅତେରେ ଅମ୍ବାକେଦ୍ତେ ପ୍ରାଭୁକେ ଜହାର୍କିୟାକ। ଲେବୀ ହଡ଼କଏତେ ଯେଶୁୟ, ବାନି, ଶେରେବିୟ, ଯାମୀନ୍, ଆକ୍କୁବ୍, ଶବ୍ବ୍ଥୟ, ହୋଦିୟ, ମାସେୟ, କଲିଟ୍, ଅସରିୟ, ଯୋଷାବଦ୍, ହାନନ୍ ଓଡ଼ୋଃ ପଲାୟ, ନେ ସବେନ୍କ ହଡ଼କ ଏନ୍ତାଃରେ ତିଙ୍ଗୁକାନ୍ ତାଇକେନ୍ ହଡ଼କକେ ନିୟାମ୍ ବୁଝାଅକେଦ୍କଆକ। ଇନ୍କୁ ବୁଗିଲେକା ପାର୍ମେଶ୍ୱାର୍ଆଃ ଆନ୍ଚୁ ପୁଥିଏତେ ପାଢ଼ାଅକେଦାକ ଓଡ଼ୋଃ ଇନ୍କୁ ଏନାରାଃ ମୁଣ୍ଡି ଉଦୁବ୍କେଦାକ, ଜେ'ଲେକାଚି ପାଢ଼ାଅଃତାନ୍ତେୟାଃ ହଡ଼କ ସାରିଉରୁମ୍ ଦାଡ଼ିୟାକ।
ହଡ଼କ ଆନ୍ଚୁ ଆୟୁମ୍କେଦ୍ତେ ହେୟାତିଙ୍ଗ୍ତାନ୍ଲଃ ରାଆଃ ଏଟେଃକେଦାକ। ଏନାତେ ଲାଟ୍ସାହେବ୍ ନିହିମିୟା, ଯାଜାକ୍ ଓଡ଼ୋଃ ଆଇନ୍ ଇତୁନିଃ ଏଜ୍ରା ଓଡ଼ୋଃ ହଡ଼କତାଃରେ ଆନ୍ଚୁ ବୁଗିଲେକା ଉଦୁବ୍ତାନ୍ ଲେବୀକ କାଜିକେଦା, “ତିସିଙ୍ଗ୍ ଆପେୟାଃ ପ୍ରାଭୁ ପାର୍ମେଶ୍ୱାର୍ଆଃ ଉଦ୍ଦେଶ୍ରେ ପାବିତାର୍ ତାନାଃ, ଏନାମେନ୍ତେ ଆଲପେ ଏୟମେୟା ଚି ଆଲପେ ରାଆଃଏୟା।” ନିହିମିୟା ଇନ୍କୁକେ କାଜିକେଦ୍କଆ, “ଜୁ' ଅଡ଼ାଃତେ ସେନଃପେ, ବୁଗିନ୍ତେୟାଃ ଜମ୍ ନୁଁ ରିକାଏପେ। ଜେତାଏ ଜେତ୍ନାଃ କାଏ ବାଇୟାକାଦ୍ ରେଦ, ଇନିଃତାଃ ହାଟିଙ୍ଗ୍କେଦ୍ତେ କୁଲେପେ। ଚିଆଃଚି ତିସିଙ୍ଗ୍ ଆବୁଆଃ ପ୍ରାଭୁଆଃ ଉଦ୍ଦେଶ୍ରେ ମିଆଁଦ୍ ପାବିତାର୍ ଦିନ୍ ତାନାଃ। ଆପେ ଆଲପେ ଦୁକୁନାଃ, ଚିଆଃଚି ପ୍ରାଭୁଆଃ ରାସ୍କା ଆପେୟାଃ ପେଡ଼େଃ ତାନାଃ।”
ଲେବୀ ହଡ଼କ ସବେନ୍ ହଡ଼କକେ ହାପା ଇଚିକେଦ୍ତେ କାଜିକେଦାକ, “ହାପାଅଃପେ, ତିସିଙ୍ଗ୍ ପାବିତାର୍ ଦିନ୍ ତାନାଃ ! ଆପେ ଆଲପେ ଦୁକୁନାଃ।”
ଏନ୍ତେ ହଡ଼କ ଆକତାଃରେ ଉଦୁବ୍କାନ୍ କାଜିକ ସାରିଉରୁମ୍ୟାନ୍ଲଃ ଜମ୍ ନୁଁ ନାଗେନ୍ତେ ଓଡ଼ୋଃ କାଟି କାଟି ହିସା କୁଲେ ନାଗେନ୍ତେ ଓଡ଼ୋଃ ପୁରାଃ ରାସ୍କାଅଃ ନାଗେନ୍ତେ ଆପାନ୍ ଆପାନ୍ ଠାୟାଦ୍ ସେନଃୟାନାକ।
ଝାମ୍ଡା ପାରାବ୍ ମାନାତିଙ୍ଗ୍
ମାହିଁନାରାଃ ଏଟାଃ ହୁଲାଙ୍ଗ୍ ସବେନ୍ ପାରିବାର୍ରେନ୍ ମୁଖ୍ୟା ହଡ଼କ ଯାଜାକ୍କ ଓଡ଼ୋଃ ଲେବୀ ହଡ଼କ ଆନ୍ଚୁରାଃ ଇନିତୁ ଇତୁନ୍ ନାଙ୍ଗ୍ ଏଜ୍ରାତାଃରେ ହୁଣ୍ଡିୟାନାକ। ଏୟା ମାହିଁନାରାଃ ଝାମ୍ଡା ପାରାବ୍ ଇମ୍ତା ଇସ୍ରାଏଲ୍ ହଡ଼କ ଆକଆଃ ତାଇନାଃ ଠାୟାଦ୍ରେ ଚିଲ୍କା ତାଇନାଃକ ମେନ୍ତେ ପ୍ରାଭୁ ମୁଶାକେ ଅକ ହୁକୁମ୍ ଏମାକାଇ ତାଇକେନାଏ, ଏନା ଇନ୍କୁ ଆନ୍ଚୁ ପୁଥିରେ ଅଲାକାନ୍ତେୟାଃ ନାମ୍କେଦାକ। ଆଡଃଗି ଇନ୍କୁ ସାରିକେଦାକ ଯେ, ଆନ୍ଚୁ ପୁଥିରେ ନେ ପାରାବ୍ ମାନାତିଙ୍ଗ୍ ବିଷାଏରେ ଅକ୍ନାଃ ଅଲାକାନା, ଏନା ଆକଆଃ ନାଗାର୍କରେ ଓଡ଼ୋଃ ଯୀରୁଶାଲେମ୍ରେ ଇନ୍କୁକେ ଉଦୁବ୍ ଲାଗାତିୟାଁ, ଏନ୍ ଅନଲ୍ତେୟାଃ ହବାଅଃତାନା, “ଆପେ ଝାମ୍ଡା ବାଇ ନାଙ୍ଗ୍ ବୁରୁତେ ସେନ୍ୟାନ୍ଲଃ ଏନ୍ତାଃଏତେ ଅଲିଭ୍ ଦାରୁ, ବିର୍ ଅଲିଭ୍ ଦାରୁ, ମେହେନ୍ଦିଦାରୁ, କିତାଦାରୁ ଓଡ଼ୋଃ ଝୁଣ୍ଡ୍କାନ୍ ଦାରୁରାଃ କତ ଆଉୱେପେ।”
ଏନ୍ତେ ହଡ଼କ ସେନ୍କେଦ୍ତେ କତକ ଆଉକେଦା ଓଡ଼ୋଃ ଆକଆଃ ଆପ୍ନାଃ ନାଙ୍ଗ୍ ଝାମ୍ଡା ବାଇକେଦାକ, ଚିମିନ୍ ହଡ଼କ ଆକଆଃ ଅଡ଼ାଃ ଛାତ୍ ଚେତାନ୍ରେ, ଆକଆଃ ରାଚାରେ, ପାର୍ମେଶ୍ୱାର୍ଆଃ ଅଡ଼ାଃ ରାଚାରେ, ଦାଆଃଦୁହାର୍ ହେପାଦ୍ରାଃ ଛାଉର୍ରେ ଓଡ଼ୋଃ ଇଫ୍ରାଇମ୍ ଦୁଆର୍ରାଃ ଛାଉର୍ରେ ଝାମ୍ଡା ବାଇକେଦାକ। ଦାସିୟଃ ନାଙ୍ଗ୍ ତଲ୍ ଇଦିକେଦ୍ତେ ରୁହାଡ଼ାକାନ୍ ସବେନ୍ ହଡ଼କ ଝାମ୍ଡା ବାଇକେଦ୍ତେ ଏନାରେ ତାଇନ୍ୟାନାକ। ନୁନ୍ରାଃ ହନ୍ତେକଡ଼ା ଯେଶୁୟରାଃ ଦିପିଲିହେତେ ଏନ୍ ହୁଲାଙ୍ଗ୍ ଜାକେଦ୍ ଇସ୍ରାଏଲ୍ ହଡ଼କ ନେ ପାରାବ୍କେ ନେ'ଲେକା ରାସ୍କାତେ କାକ ମାନାତିଙ୍ଗ୍କାଦ୍ ତାଇକେନା। ଇନ୍କୁ ପୁରାଃଗି ରାସ୍କାୟାନାକ। ଏଜ୍ରା ପାରାବ୍ରାଃ ପାହିଲା ହୁଲାଙ୍ଗ୍ଏତେ ଟୁଣ୍ଡୁ ହୁଲାଙ୍ଗ୍ ଜାକେଦ୍ ସବେନ୍ ହୁଲାଙ୍ଗ୍ ପାର୍ମେଶ୍ୱାର୍ଆଃ ଆନ୍ଚୁ ପୁଥିଏତେ ପାଢ଼ାଅକେଦା। ଓଡ଼ୋଃ ହଡ଼କ ଏୟା ହୁଲାଙ୍ଗ୍ ଜାକେଦ୍ ପାରାବ୍ ମାନାତିଙ୍ଗ୍କେଦାକ। ଅରେୟା ହୁଲାଙ୍ଗ୍ ନିୟାମ୍ ଲେକାତେ ମିଆଁଦ୍ ମାରାଙ୍ଗ୍ ସାମିଲାନ୍ ରିକାକେଦାକ।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.