Munda Bible
ନିହିମିୟା 7
ପାଚ୍ରି ବାବାଇ କାମି ଚାବାୟାନା ଓଡ଼ୋଃ ଦୁଆର୍ରାଃ ଟାଟିକ ଲାଗାଅୟାନ୍ ତାୟମ୍ତେ, ଆଇଙ୍ଗ୍ ଦୁଆର୍ ହରକକେ, ଦୁରାଙ୍ଗ୍ ହଡ଼କକେ ଓଡ଼ୋଃ ଲେବୀ ହଡ଼କକେ ସାଲାକେଦ୍କଆଇଙ୍ଗ୍। ଆଇଙ୍ଗ୍ ଆଇଁୟାଃ ହାଗା ହନାନିକେ ଓଡ଼ୋଃ ଗାଡ଼୍ ହରକଆଃ ଆଗୁଆଇ ହନାନିୟକେ ଯୀରୁଶାଲେମ୍ରାଃ ଲାଟ୍ସାହେବ୍ ଲେକାଇଙ୍ଗ୍ ସାଲାକେଦ୍କିନା। ଚିଆଃଚି ହନାନିୟ ମିହୁଡ଼୍ ପାତିୟାର୍ରଃ ଲେକାନ୍ ହଡ଼ ତାଇକେନାଏ ଓଡ଼ୋଃ ପାର୍ମେଶ୍ୱାର୍କେ ବରୱାଇ ତାଇକେନା।
ଆଇଙ୍ଗ୍ ଇନ୍କୁକେ କାଜିକେଦ୍କଆଇଙ୍ଗ୍, “ସିଙ୍ଗିରାଃ ରାଁପ୍ ତେଜ୍ ଆଉରି ହବାଅଃ ଜାକେଦ୍ ଯୀରୁଶାଲେମ୍ରାଃ ଦୁଆର୍ ଆଲକା ନିଜଃକା। ହରହଡ଼କ ହରକାତେୟାଃକ ଇମ୍ତାଗି ଦୁଆର୍କ ହାଣ୍ଡେଦ୍କେଦ୍ତେ ଏନାରେ ଅର୍ଗଡ଼୍ ଏମେପେ। ଆଡଃଗି ଯୀରୁଶାଲେମ୍ରେନ୍ ହଡ଼କକେ ହରନାଙ୍ଗ୍ ସାଲାକପେ। ଇନ୍କୁଏତେ ଚିମିନ୍ ହଡ଼କ ହର ଠାୟାଦ୍ତାଃରେ ଓଡ଼ୋଃ ଏଟାଃକ ଆପ୍ନାଃ ଆପ୍ନାଃ ଅଡ଼ାଃ ସାମ୍ନାଙ୍ଗ୍ରେ ହର ରିକାକପେ।”
ଦାସିୟଃ ନାଙ୍ଗ୍ ତଲ୍ ଇଦିକେଦ୍ତେ ରୁହାଡ଼ାକାନ୍ ହଡ଼କଆଃ ତାଲିକା
ଯୀରୁଶାଲେମ୍ ନାଗାର୍ ପୁରାଃ ମାରାଙ୍ଗ୍ ଓଡ଼ୋଃ ଚାକାର୍ଗି ତାଇକେନା। ମେନ୍ଦ ହଡ଼କ ହୁଡିଙ୍ଗ୍ଗି ତାଇକେନାକ ଓଡ଼ୋଃ ଇନ୍କୁଆଃ ଅଡ଼ାଃକ କା ବାଇରୁହାଡ଼୍କାନ୍ ତାଇକେନା।
ଏନାତେ ଆଇଁୟାଃ ପାର୍ମେଶ୍ୱାର୍ ଆଇଙ୍ଗ୍କେ ଅକଆଃ କାଜିକେଦିୟାଁଏ, ଏନ୍ ଲେକାଗି ଆଗୁଆଇକକେ, କାମି ହଡ଼କକେ ଓଡ଼ୋଃ ଏଟାଃ ହଡ଼କକେ କେଡ଼ା ହୁଣ୍ଡିକେଦ୍ତେ ଆକଆଃ କିଲିକଆଃ ଅନଲ୍ ତାଲିକା ବାଇକେଦାଇଙ୍ଗ୍। ଅକନ୍କ ଦାସିୟଃ ତନଲ୍ହେତେ ପାହିଲା ରୁହାଡ଼୍କାନ୍ ତାଇକେନାକ, ଇନ୍କୁଆଃ କିଲିକଆଃ ଅନଲ୍ ତାଲିକା ନାମ୍କେଦାଇଙ୍ଗ୍। ଏନାରେ ନେ'ଲେକା ଅଲାକାନ୍ ତାଇକେନା : ବାବିଲୋନ୍ରେନ୍ ରାଜା ନେବୁଖଦ୍ନେଜର୍ ତଲ୍ ଇଦିକାଦ୍ ହଡ଼କଏତେ ଅକନ୍କ ରୁହାଡ଼୍କାନ୍ ତାଇକେନାକ, ଇନ୍କୁ ଯୀରୁଶାଲେମ୍ ଓଡ଼ୋଃ ଯିହୁଦାରେ ତାଇକାନ୍ ଆପ୍ନାଃ ନାଗାର୍ତେ ସେନଃୟାନାକ।
ଇନ୍କୁଆଃ ଆଗୁଆଇକ ହବାଅଃତାନା, ଯେରୁବାବେଲ୍, ଯେଶୁୟ, ନିହିମିୟା, ଅସରିୟ, ରୟମା, ନହମାନି, ମର୍ଦ୍ଦଖୟ, ବିଲ୍ଶନ୍, ମିସ୍ପର୍, ବିଗ୍ବୟ, ନହୁମ୍ ଓଡ଼ୋଃ ବାନା। ତନଲ୍ହେତେ ରୁହାଡ଼ାକାନ୍ ଇସ୍ରାଏଲ୍ରେନ୍ କିଲିକ ଓଡ଼ୋଃ ଇନ୍କୁଆଃ ହଡ଼କ ହବାଅଃତାନା : ପାରୋଶ୍ କିଲିରେନ୍ ହଡ଼କ ୨,୧୭୨ ଝାନ୍। ଶେଫାତିୟ କିଲିରେନ୍ ହଡ଼କ ୩୭୨ ଝାନ୍। ଆରହ କିଲିରେନ୍ ହଡ଼କ ୬୫୨ ଝାନ୍। ଯେଶୁୟ ଓଡ଼ୋଃ ଯୋୟାବ୍ କିଲିକଏତେ ପହତ୍ ମୋୟାବ୍ କିଲିରେନ୍ ହଡ଼କ ୨,୮୧୮ ଝାନ୍। ଏଲମ୍ କିଲିରେନ୍ ହଡ଼କ ୧,୨୫୪ ଝାନ୍। ସତ୍ତୁର୍ କିଲିରେନ୍ ହଡ଼କ ୮୪୫ ଝାନ୍। ସକ୍କୟ କିଲିରେନ୍ ହଡ଼କ ୭୬୦ ଝାନ୍। ବେନୁୟି କିଲିରେନ୍ ହଡ଼କ ୬୪୮ ଝାନ୍। ବେବୟ କିଲିରେନ୍ ହଡ଼କ ୬୨୮ ଝାନ୍। ଅସ୍ଗଦ୍ କିଲିରେନ୍ ହଡ଼କ ୨,୩୨୨ ଝାନ୍। ଅଦୋନିକାମ୍ କିଲିରେନ୍ ହଡ଼କ ୬୬୭ ଝାନ୍। ବିଗ୍ବୟ କିଲିରେନ୍ ହଡ଼କ ୨,୦୬୭ ଝାନ୍। ଆଦିନ୍ କିଲିରେନ୍ ହଡ଼କ ୬୫୫ ଝାନ୍। ହିଜକିୟ କିଲିଏତେ ଆଟେର୍ଆଃ କିଲିରେନ୍ ହଡ଼କ ୯୮ ଝାନ୍। ହଶୁମ୍ କିଲିରେନ୍ ହଡ଼କ ୩୨୮ ଝାନ୍। ବେତ୍ସୟ କିଲିରେନ୍ ହଡ଼କ ୩୨୪ ଝାନ୍। ହାରିଫ କିଲିରେନ୍ ହଡ଼କ ୧୧୨ ଝାନ୍। ଗିବିୟୋନ୍ କିଲିରେନ୍ ହଡ଼କ ୯୫ ଝାନ୍। ବେଥ୍ଲେହେମ୍ ଓଡ଼ୋଃ ନଟୋଫାର୍ରେନ୍ ହଡ଼କ ୧୮୮ ଝାନ୍। ଅନାଥୋତ୍ରେନ୍ ହଡ଼କ ୧୨୮ ଝାନ୍। ବେଥ୍ଅସ୍ମାବତ୍ରେନ୍ ହଡ଼କ ୪୨ ଝାନ୍। କିରିୟତ୍ ଯିୟାରିମ୍, କଫିରା ଓଡ଼ୋଃ ବେରୋତ୍ରେନ୍ ହଡ଼କ ୭୪୩ ଝାନ୍। ରାମା ଓଡ଼ୋଃ ଗେବାରେନ୍ ହଡ଼କ ୬୨୧ ଝାନ୍। ମିକ୍ମସ୍ରେନ୍ ହଡ଼କ ୧୨୨ ଝାନ୍। ବେଥେଲ୍ ଓଡ଼ୋଃ ଅୟରେନ୍ ହଡ଼କ ୧୨୩ ଝାନ୍। ଏଟାଃ ନେବୋରେନ୍ ହଡ଼କ ୫୨ ଝାନ୍। ଏଟାଃ ଏଲମ୍ରେନ୍ ହଡ଼କ ୧,୨୫୪ ଝାନ୍। ହାରିମ୍ କିଲିରେନ୍ ହଡ଼କ ୩୨୦ ଝାନ୍। ଯିରିହୋ କିଲିରେନ୍ ହଡ଼କ ୩୪୫ ଝାନ୍। ଲୋଦ୍, ହାଦିଦ୍ ଓଡ଼ୋଃ ଓନୋ କିଲିରେନ୍ ହଡ଼କ ୭୨୧ ଝାନ୍। ସନାୟା କିଲିରେନ୍ ହଡ଼କ ୩,୯୩୦ ଝାନ୍।
ତନଲ୍ହେତେ ରୁହାଡ଼ାକାନ୍ ଯାଜାକ୍ କିଲିରେନ୍ ହଡ଼କ, ଯେଶୁୟ କିଲିଏତେ ଯିଦୟିୟ କିଲିରେନ୍ ହଡ଼କ ୯୭୩ ଝାନ୍। ଇମ୍ମେର୍ କିଲିରେନ୍ ହଡ଼କ ୧,୦୫୨ ଝାନ୍। ପଶ୍ହୁର୍ କିଲିରେନ୍ ହଡ଼କ ୧,୨୪୭ ଝାନ୍। ହାରିମ୍ କିଲିରେନ୍ ହଡ଼କ ୧,୦୧୭ ଝାନ୍। ତନଲ୍ହେତେ ରୁହାଡ଼ାକାନ୍ ଲେବୀ ହଡ଼କ ହବାଅଃତାନା, ହୋଦାବିୟ କିଲିଏତେ ଯେଶୁୟ ଓଡ଼ୋଃ କଦ୍ମିୟେଲ୍ କିଲିରେନ୍ ହଡ଼କ ୭୪ ଝାନ୍। ଦୁରାଙ୍ଗ୍ ହଡ଼କଏତେ ଆସଫ୍ କିଲିରେନ୍ ହଡ଼କ ୧୪୮ ଝାନ୍। ବିନ୍ତିଅଡ଼ାଃ ହର ହଡ଼କଏତେ ଶଲ୍ଲୁମ୍, ଆଟର୍, ଟଲ୍ମୋନ୍, ଆକ୍କୁବ୍ ହାଟିଟା ଓଡ଼ୋଃ ଶୋବୟ କିଲିରେନ୍ ହଡ଼କ ୧୩୮ ଝାନ୍। ବିନ୍ତିଅଡ଼ାଃ ସୁସାର୍ ହଡ଼କଏତେ ଜିହା, ହସୁଫା, ଓଡ଼ୋଃ ଟବାୟୋତ୍, କେରୋସ୍, ସିୟା, ପାଦୋନ୍, ଲେବାନା, ହଗାବ୍, ଶମ୍ଲୟ, ହାନନ୍, ଗିଦ୍ଦେଲ୍ ଓଡ଼ୋଃ ଗହର୍, ରୟା, ରେଜିନ୍, ନେକୋଦା, ଗଜମ୍, ଉଜ୍ଜା, ପାସେହ, ବେଷୟ, ମିୟୁନିମ୍, ନେଫୁସିମ୍, ବକ୍ବୁକ୍, ହାକୁଫା, ହର୍ହୁର୍, ବଜ୍ଲୁତ୍, ମେହିଦା, ହର୍ଶା, ବାର୍କୋଶ୍, ସିସେରା, ତେମହ, ନେଜିହ, ହଟିଫା।
ସୁଲିମାନ୍ରାଃ ଦାସିକଆଃ କିଲିରେନ୍ ହଡ଼କ ହବାଅଃତାନା, ସୋଟୟ, ସୋଫେରତ୍, ପେରିଦା, ଯାଲା, ଦର୍କୋଣ୍, ଗିଦ୍ଦେଲ୍, ଶେଫାତିୟ, ହାଟିଲ୍, ପୋଖେରତ୍ ହତ୍ସବାୟିମ୍, ଆମୋନ୍।
ବିନ୍ତିଅଡ଼ାଃ ସୁସାର୍ ହଡ଼କ ଓଡ଼ୋଃ ସୁଲିମାନ୍ରାଃ ଦାସିକଆଃ କିଲିକ ହବାଅଃତାନା, ୩୯୨ ଝାନ୍।
ତେଲ୍ମେଲହ, ତେଲ୍ହର୍ଶା, କରୁବ୍, ଅଦ୍ଦନ୍ ଓଡ଼ୋଃ ଇମ୍ମେର୍ ନାଗାର୍କଏତେ ମିଦ୍ ଝୁଣ୍ଡ୍ ହଡ଼କ ଆସିକାନ୍ ତାଇକେନା। ମେନ୍ଦ ଇନ୍କୁ ଆପାନ୍କେ ଇସ୍ରାଏଲ୍ ହଡ଼ତାନ୍ଲେ ମେନ୍ତେ ଗାୱା କାକ ଏମ୍ ଦାଡ଼ିୟାନା। ଇନ୍କୁ ଦଲାୟ, ଟୋବିୟ ଓଡ଼ୋଃ ନେକୋଦା କିଲିରେନ୍ ହଡ଼କ ୬୪୨ ଝାନ୍। ଯାଜାକ୍କଏତେ ହୋବିୟ, ହକୋସ୍ ଓଡ଼ୋଃ ଗିଲିୟାଦ୍ରେନ୍ ବର୍ସିଲ୍ଲୟରାଃ ମିଆଁଦ୍ ହନ୍ତେକୁଡ଼ିକେ ଆଣ୍ଦିକାଇ ହରାତେ ଇନିୟାଃ ନୁତୁମ୍ ଲେକାତେ ସାରିକାନ୍ ତାଇକେନା। ଇନ୍କୁ ଆକଆଃ ଆପ୍ନାଃ କିଲି ଆଦାକାଦ୍ ହରାତେ ସତ୍ରାକାନ୍କ ମେନ୍ତେ ନୁତୁମ୍ୟାନାକ ଓଡ଼ୋଃ ଯାଜାକ୍ କାମିଏତେ ଅଡଙ୍ଗ୍ୟାନାକ। ଇନ୍କୁ ସାର୍ତିଗି ଯାଜାକ୍ କିଲିରେନ୍ ତାନ୍କ ଚି ନାହାଁଲାକ, ଏନା ଉରିମ୍ ଓଡ଼ୋଃ ଥୁମିମ୍ ସାବାକାଦ୍ ଜେତା ଯାଜାକ୍ ହରାତେ ଆଉରି ସାରିୟଃ ଜାକେଦ୍ ଇନ୍କୁ ପୁରାଃ ପାବିତାର୍ ଠାୟାଦ୍ରେ ଦାନ୍ ରାକାବ୍କାନ୍ ଜମେୟାଁଃ କାକ ଜମ୍ ଦାଡ଼ିୟା ମେନ୍ତେ ଲାଟ୍ସାହେବ୍ ଆଚୁକାଦ୍ ତାଇକେନାଏ।
ସବେନ୍ ହଡ଼କ ମେସାକେଦ୍ତେ ୪୨,୩୬୦ ଝାନ୍ ତାଇକେନାକ। ଇନ୍କୁଆଃ ଦାସିକ ଓଡ଼ୋଃ କାମ୍ଡ଼ିକ ହବାୟାନା ୭,୩୩୭ ଝାନ୍। ଓଡ଼ୋଃ ଇନ୍କୁଲଃ ହିଜୁଃକାନ୍ ଦୁରାଙ୍ଗ୍ ହଡ଼କ ହବାଅଃତାନା ୨୪୫ ଝାନ୍। ଇନ୍କୁଲଃ ୭୩୬ ସାଦମ୍, ୨୪୫ ଗାଧା ଲେକା ନେଲଃତାନ୍ ଉଁଟ୍, ୪୩୫ ଉଁଟ୍, ୬,୭୨୦ ଗାଧା ତାଇକେନାକ।
ଚିମିନ୍ ଅଡ଼ାଃରେନ୍ ମୁଖିଆକ ବିନ୍ତିଅଡ଼ାଃ ଆଡଃମିସା ବାଇରୁହାଡ଼୍ରାଃ କାମି ନାଙ୍ଗ୍ ଦାନ୍ ଏମ୍କେଦାକ। ଲାଟ୍ସାହେବ୍ ଆୟାଃ ଭାଣ୍ଡାର୍ଏତେ ୧,୦୦୦ ଡାରିକ୍1 ସୋନା, ୫୦ ଠୁ ଡୁଭା ଓଡ଼ୋଃ ୫୩୦ ଠୁ ଯାଜାକ୍କଆଃ ତୁସିଙ୍ଗ୍ଅଃ ଲିଜାଃ ଏମ୍କେଦାଏ। ଚିମିନ୍ ଅଡ଼ାଃରେନ୍ ମୁଖିଆକ ଆକଆଃ ଭାଣ୍ଡାର୍ଏତେ ୨୦,୦୦୦ ଡାରିକ୍ ସୋନା ଓଡ଼ୋଃ ୨,୨୦୦ ମିନା2 ରୁପା ବିନ୍ତିଅଡ଼ାଃ ବାଇରୁହାଡ଼୍ କାମି ନାଙ୍ଗ୍ ଦାନ୍ ଏମ୍କେଦାକ। ଏଟାଃ ହଡ଼କ ମେସାକେଦ୍ତେ ୨୦,୦୦୦ ଡାରିକ୍ ସୋନା, ୨,୦୦୦ ମିନା ରୁପା ଓଡ଼ୋଃ ଯାଜାକ୍କଆଃ ନାଗେନ୍ତେ ୬୭ ଠୁ ତୁସିଙ୍ଗ୍ ଲିଜାଃ ଏମ୍କେଦାକ। ଯାଜାକ୍, ଲେବୀକ, ଦୁହାର୍ ହରହଡ଼କ, ଦୁରାଙ୍ଗ୍ ହଡ଼କ ଓଡ଼ୋଃ ବିନ୍ତିଅଡ଼ାଃ ସୁସାର୍ ହଡ଼କ, ଏନ୍ତେ ଇସ୍ରାଏଲ୍ରେନ୍ ହଡ଼କ ଆକଆଃ ଆକଆଃ ନାଗାର୍ରେ ତାଇନ୍ୟାନାକ। ଏୟା ମାହିନା ହବାଅଃ ଇମ୍ତାଲଃ ସବେନ୍କ ଆକଆଃ ଆପ୍ନାଃ ନାଗାର୍ରେ ତାଇକେନାକ।
Source notes (2)
- Footnote ଅରେୟା କେଜି
- Footnote ୧.୨୫ ଟନ୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.