Munda Bible
ନିହିମିୟା 6
ନିହିମିୟାରାଃ ବିରୁଧ୍ରେ ରଜୋଟ
ସନ୍ବଲ୍ଲଟ୍, ଟୋବିୟ, ଆରବ୍ରେନ୍ ଗେଶମ୍ ଓଡ଼ୋଃ ଆଲେୟାଃ ଏଟାଃ ବାଇରିକ ସାରିକେଦା ଯେ, ଆଇଙ୍ଗ୍ ନାଗାର୍ରେୟାଃ ପାଚ୍ରି କାମି ସବେନାଃ ବାଇ ଚାବାକେଦାଇଙ୍ଗ୍, ମେନ୍ଦ ଦୁଆର୍କରେ ଟାଟି କାଇଙ୍ଗ୍ ଲାଗାଅକାଦ୍ ତାଇକେନା। ଇମ୍ତା ସନ୍ବଲ୍ଲଟ୍ ଓଡ଼ୋଃ ଗେଶମ୍ ଆଇଙ୍ଗ୍ତାଃ ହଡ଼ କୁଲ୍କେଦ୍ତେ କାଜିକେଦା, “ଦେଲା ଆବୁ ମିଆଁଦ୍ ହାତୁରାଃ ଓନୋ ନୁତୁମ୍ ପିଡ଼ିରେବୁ ହୁଣ୍ଡିନା।” ମେନ୍ଦ ଇନ୍କୁ ଆଇଁୟାଃ ଏତ୍କାନାଃ ରିକାନାଙ୍ଗ୍ ଉହାଟ୍କାଦ୍ ତାଇକେନାକ।
ଏନାମେନ୍ତେ ଆଇଙ୍ଗ୍ କୁଲାକାନ୍ ହଡ଼କତାଃରେ କାଜିକୁଲ୍ କେଦାଇଙ୍ଗ୍, “ଆଇଙ୍ଗ୍ ମିଆଁଦ୍ ପୁରାଃ ମାରାଙ୍ଗ୍ କାମି ରିକାତାନାଇଙ୍ଗ୍, ଏନାମେନ୍ତେ ଆଇଙ୍ଗ୍ କାଇଙ୍ଗ୍ ସେନ୍ ଦାଡ଼ିୟା। କାମି ବାଗିକେଦ୍ତେ ଆପେତାଃ ସେନ୍କେଦ୍ତେ ଆଇଙ୍ଗ୍ ଚିନାଃମେନ୍ତେ କାମିକେଇଙ୍ଗ୍ ହକାଏୟା ?”
ଇନ୍କୁ ଉପୁନ୍ସା, ନେ'ଲେକା କାଜିକୁଲ୍କେଦାକ ଓଡ଼ୋଃ ଆଇଙ୍ଗ୍ ଇନ୍କୁକେ ଏନ୍ ମିଆଁଦ୍ କାଜିଗିଙ୍ଗ୍ କାଜିରୁହାଡ଼୍କେଦ୍କଆ।
ଏନ୍ତେ ସନ୍ବଲ୍ଲଟ୍ ଆୟାଃ ଦାସିରାଃ ତିଃଇରେ ଅନଲ୍ ଚିଠା ଏମ୍କେଦ୍ଲଃ ମଣେସାତେ ଏନ୍ ଲେକାଗି ଆଇଙ୍ଗ୍ତାଃତେ କାଜିକୁଲ୍କେଦା। ଚିଠାରେ ନେ'ଲେକା ଅଲାକାନ୍ ତାଇକେନା, “ଆମ୍ ଓଡ଼ୋଃ ଯିହୁଦୀ ହଡ଼କ ଲାଡ଼ାଇ ନାଗେନ୍ତେ ସେକାଡ଼ାକାନାପେ ମେନ୍ତେ ସବେନ୍ ହଡ଼କ କାଜିତାନା ଓଡ଼ୋଃ ଗେଶମ୍ ହଗି କାଜିତାନାଏ ଯେ ନେଆଁ ସାର୍ତିତାନାଃ ଓଡ଼ୋଃ ଏନାମେନ୍ତେ ଆପେ ପାଚ୍ରି ବାଇତାନାପେ ଓଡ଼ୋଃ ନେ ସବେନାଃ ହଡ଼କ କାଜିତାନ୍ ଲେକାଗି ଆମ୍ ଇନ୍କୁଆଃ ରାଜା ହବାଅଃ ନାଙ୍ଗ୍ ସାନାଙ୍ଗ୍ ତାନାମ୍। ଆଡଃଗି ଯିହୁଦାରେ ମିଆଁଦ୍ ରାଜା ମେନାଇୟା, ଆୟାଃ ବିଷାଏରେ ନେ କାଜି ଯୀରୁଶାଲେମ୍ରେ ଉଦୁବ୍ ନାଗେନ୍ତେ ଆମ୍ ନାବୀକକେ ସାଲାକାଦ୍କଆମେ। ନାହାଁଃ ନେ କାନାଜି ହାକିମ୍ତାଃରେ ସାର୍ତିଗି ସେଟେରା। ଏନାମେନ୍ତେ ଦେଲା, ଆବୁ ମିଦ୍ତାଃରେ ହୁଣ୍ଡିକେଦ୍ତେ ନେ ବିଷାଏରେ ରଜୋଟ ରିକାଏୟାବୁ।”
ଏନ୍ତେ ଆଇଙ୍ଗ୍ ସନ୍ବଲ୍ଲଟ୍ତାଃ କାଜିକୁଲ୍କେଦାଇଙ୍ଗ୍, “ଆମ୍ କାଜିତାନ୍ ଲେକା ଜେତ୍ନାଃ କା ରିକାଅଃତାନା। ନେ ସବେନ୍ କାଜିତାନ୍ତେୟାଃ ଆମ୍ଗି ବାଇବାଇତେ କାଜିତାନାମ୍।”
ନେ'ଲେକା ରିକାଲେରେ ଇନ୍କୁଆଃ କାମି ହକାକେନଃଆ, କା ଚାବା ଦାଡ଼ିଅଃଆ ମେନ୍ତେ ଇନ୍କୁ ଆଲେକେ ବର ବତଙ୍ଗ୍ ନାଙ୍ଗ୍ ସାନାଙ୍ଗ୍କେଦାକ। ଏନାତେ ଆଇଙ୍ଗ୍ ବିନ୍ତିକେଦାଇଙ୍ଗ୍, “ହେ ପାର୍ମେଶ୍ୱାର୍, ଆଇଙ୍ଗ୍କେ ପେଡ଼େଃ ଏମାଇଙ୍ଗ୍ !”
ଆଇଙ୍ଗ୍ ମୁସିଙ୍ଗ୍ ଶମୟିୟରାଃ ଅଡ଼ାଃତେ ସେନ୍କେନାଇଙ୍ଗ୍, ଇନିଃ ମହେଟବେଲ୍ରାଃ ଜାଇହନ୍ ଓଡ଼ୋଃ ଦଲାୟରାଃ ହନ୍ତେକଡ଼ା ତାଇକେନାଏ। ଇନିଃ ଆୟାଃ ଅଡ଼ାଃ ଭିତାର୍ରେ ହାଣ୍ଡେଦ୍କେଦ୍ତେ ତାଇନଃ ତାଇକେନାଏ। ଇନିଃ କାଜିକେଦାଏ, “ଦଲା, ଆବୁ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରାଃ ଦୁହାର୍କ ହାଣ୍ଡେଦେୟାବୁ ଓଡ଼ୋଃ ଏନ୍ତାଃରେ ଉକୁନାବୁ। ଚିଆଃଚି ଇନ୍କୁ ଆମ୍କେ ଗଗଏଃ ନାଙ୍ଗ୍ ହିଜୁଃଆକ, ଇନ୍କୁ ନୁବାଃରେଗି ଗଗଏଃତେ ହିଜୁଃଆକା।”
ମେନ୍ଦ ଆଇଙ୍ଗ୍ କାଜିକେଦାଇଙ୍ଗ୍, “ଆଇଙ୍ଗ୍ ଲେକା ହଡ଼ ଚିନାଃ ନିର୍ରାଃଏ ? ଆଇଙ୍ଗ୍ ଲେକାନ୍ ହଡ଼ ଚିନାଃ ଜୀଉବାଞ୍ଚାଅ ନାଙ୍ଗ୍ ବିନ୍ତିଅଡ଼ାଃ ଭିତାର୍ରେ ଉକୁନା ? କାହାଗି, ଆଇଙ୍ଗ୍ କାଇଙ୍ଗ୍ ଉକୁନା।” ଏନ୍ତେ ଆଇଙ୍ଗ୍ ଆଟ୍କାର୍ ଉରୁମ୍କେଦାଇଙ୍ଗ୍ ଯେ, ପାର୍ମେଶ୍ୱାର୍ ଇନିଃକେ କାଏ କାଜିକାଇ ତାଇକେନା, ଏନ୍ରେୟ ଇନିଃ ଆଇଁୟାଃ ବିରୁଧ୍ରେ ଆୟାର୍କାଜି କାଜିକେଦା। ଚିଆଃଚି ଟୋବିୟ ଓଡ଼ୋଃ ସନ୍ବଲ୍ଲଟ୍ ଇନିଃକେ ଟାକା ଏମ୍କେଦ୍ତେ ବର ବତଙ୍ଗ୍ ରିକା ନାଙ୍ଗ୍ କୁଲାକାଇ ତାଇକେନାଏ। ଆଇଙ୍ଗ୍ ଜେ'ଲେକା ବରକେଦ୍ଲଃ ଶିମୟିୟରାଃ କାଜି ଆୟୁମ୍କେଦ୍ତେ ବିନ୍ତିଅଡ଼ାଃ ଭିତାର୍ ବଲୟାନ୍ଲଃ ପାପ୍ ରିକାକେଦ୍ରେ, ଇନ୍କୁ ଆଇଁୟାଃ ବିଷାଏରେ ଏତ୍କାନାଃ କାଜି ନାଗେନ୍ତେ ସୁଯୋଗ୍ ନାମ୍କେଦ୍ତେୟାଃକ। ନେଆଁ ନାଗେନ୍ତେ ଇନିଃକେ ଟାକା ଏମାକାନ୍ ତାଇକେନା।
ହେ ଆଇଁୟାଃ ପାର୍ମେଶ୍ୱାର୍, ଟୋବିୟ ଓଡ଼ୋଃ ସନ୍ବଲ୍ଲଟ୍ ଆଇଁୟାଃ ବିରୁଧ୍ରେ ରିକାତାନ୍ତେୟାଃ ପାହାମେମେ। ଆଡଃଗି ନୋୟଦିୟା ଓଡ଼ୋଃ ଏଟାଃ ନାବୀକ ଆଇଙ୍ଗ୍କେ ବର ବତଙ୍ଗ୍ ନାଙ୍ଗ୍ ସାନାଙ୍ଗ୍ତାନାକ ଏନା ହଗି ପାହାମେମେ।
ପାଚ୍ରି ବାବାଇ କାମି ଚାବାୟାନା
ପୁରା ପାଚ୍ରି ବାବାଇ ନାଙ୍ଗ୍ ବାର୍ହିସି ଗେଲ୍ବାର୍ ହୁଲାଙ୍ଗ୍ ଜାକେଦ୍ ହବାୟାନା। ଏନା ଇଲୁଲ୍1 ମାହିନାରାଃ ମିଦ୍ହିସି ମଣେୟାଁ ହୁଲାଙ୍ଗ୍ରେ ପୁରା ପାଚ୍ରି ବାବାଇ କାମି ଚାବାୟାନା।
ଆଲେୟାଃ ବାଇରିକ ନେଆଁ ଆୟୁମ୍କେଦାକ ଓଡ଼ୋଃ ଆଲେୟାଃ ଚାରିଓସାଃରେନ୍ ହଡ଼କ ନେଲ୍କେଦାକ ଇମ୍ତା, ଇନ୍କୁଆଃ ଚେତା ଆଦ୍ୟାନା ଓଡ଼ୋଃ ବରକେଦାକ। ଚିଆଃଚି ନେ କାମି ପାର୍ମେଶ୍ୱାର୍ଆଃ ଦେଙ୍ଗାତେ ହବା ଦାଡ଼ିକାନା ମେନ୍ତେ ଇନ୍କୁ ଆଟ୍କାର୍ ଉରୁମ୍କେଦାକ।
ଏନ୍ ଦିପିଲିରେ ଯିହୁଦାରେନ୍ ଚିମିନ୍ ଆଗୁଆଇ ହଡ଼କ ଟୋବିୟତାଃ ପୁରାଃ ଚିଠି କୁଲ୍କେଦାକ ଓଡ଼ୋଃ ଟୋବିୟରାଃ ଚିଠି ଇନ୍କୁତାଃ ସେଟେର୍ ତାଇକେନା। ଚିଆଃଚି ଇନିଃ ଆରହରାଃ ହନ୍ତେକଡ଼ା ଶଖନିୟରାଃ ଆରାହନ୍ ତାଇକେନାଏ ଓଡ଼ୋଃ ଇନିୟାଃ ହନ୍ତେକଡ଼ା ଯିହୋହାନନ୍, ବେରିଖିୟରାଃ ହନ୍ତେକଡ଼ା ମଶୁଲ୍ଲମ୍ରାଃ ହନ୍ତେକୁଡ଼ିକେ ଆଣ୍ଦିକାନ୍ ତାଇକେନା। ଏନାତେ ଯିହୁଦାରେନ୍ ପୁରାଃ ହଡ଼କ ଏନ୍ କଡ଼ା ସାଃରେ ତାଇନ୍ ନାଙ୍ଗ୍ କିରିୟାକାଦ୍ ତାଇକେନାକ। ଇନ୍କୁ ଆଇଁୟାଃ ଆୟାର୍ରେ ଇନିୟାଃ ବୁଗିନ୍ କାମି ଉଦୁବ୍ ତାଇକେନାକ ଓଡ଼ୋଃ ଆଇଁୟାଃ କାଜି ଇନିଃକେ ଉଦୁବାଇ ତାଇକେନାକ। ଓଡ଼ୋଃ ଇନିଃ ଆଇଙ୍ଗ୍କେ ବର ବତଙ୍ଗ୍ ନାଙ୍ଗ୍ ଟୋବିୟ ପୁରାଃ ଚିଠିକ ଆଇଙ୍ଗ୍ତାଃ ଅଲ୍ ତାଇକେନାଏ।
Source notes (1)
- Footnote ଇଲୁଲ୍ ଅଗଷ୍ଟ ଓଡ଼ୋଃ ସେପ୍ଟେମ୍ବର ମାହିନା
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.