Munda Bible
ନିହିମିୟା 10
ଚୁକ୍ତିରେ ମୋହର୍ ଏମାକାଦ୍କଆଃ ଗାୱା
ଅକନ୍କ ମୋହର୍ ଏମ୍କେଦାକ, ଇନ୍କୁଆଃ ନୁତୁମ୍କ ହବାଅଃତାନା, ହଖଲିୟରାଃ ହନ୍ତେକଡ଼ା ନିହିମିୟା ଲାଟ୍ସାହେବ୍ ଓଡ଼ୋଃ ଯେଦିକିୟ, ସରାୟ, ଅସରିୟ, ଯିରିମିୟ, ପଶ୍ହୁର୍, ଅମରିୟ, ମଲ୍କିୟ, ହଟୁଶ୍, ଶବ୍ନିୟ, ମଲ୍ଲୁକ୍, ହାରିମ୍, ମରେମୋତ୍, ଓବଦିୟ, ଦାନିୟେଲ୍, ଗିନ୍ନଥୋନ୍, ବାରୁକ୍, ମଶୁଲ୍ଲମ୍, ଅବିୟ, ମିୟାମିନ୍, ମାସିୟ, ବିଲ୍ଗୟ, ଶମୟିୟ। ନେ ସବେନ୍କ ଯାଜାକ୍ ତାଇକେନାକ।
ଲେବୀ ହଡ଼କ ହବାଅଃତାନା, ଅସନିୟରାଃ ହନ୍ତେକଡ଼ା ଯେଶୁୟ, ହେନାଦାଦ୍ରାଃ ହନ୍କଆଃଏତେ ବେନୁୟି ଓଡ଼ୋଃ କଦ୍ମିୟେଲ୍। ନେ ହଡ଼କଲଃ କାମିତାନ୍କଆଃ ନୁତୁମ୍ ହବାଅଃତାନା, ଶବ୍ନିୟ, ହୋଦିୟ, କଲିଟ୍, ପଲାୟ, ହାନନ୍, ମୀକା, ରେହୋବ୍, ହଶ୍ବିୟ, ସକ୍କୁର୍, ଶେରେବିୟ, ଶବ୍ନିୟ, ହୋଦିୟ, ବାନି, ବନୀନୁ।
ହଡ଼କଆଃ ଆଗୁଆଇକଆଃ ନୁତୁମ୍ ହବାଅଃତାନା, ପାରୋଶ୍, ପହତ୍ ମୋୟାବ୍, ଏଲମ୍; ସତ୍ତୁର୍, ବାନି, ବୁନ୍ନି, ଅସ୍ଗଦ୍, ବେବୟ, ଅଦୋନୀୟ, ବିଗ୍ବୟ, ଆଦିନ୍, ଆଟେର୍, ହିଜକିୟ, ଅସୁର୍, ହୋଦିୟ, ହଶୁମ୍, ବେତ୍ସୟ, ହାରିଫ୍, ଅନାଥୋତ୍, ନୋବୟ, ମଗ୍ପୀୟସ୍, ମଶୁଲ୍ଲମ୍, ହେସିର୍, ମଶେଷ୍ବେଲ୍, ସାଦୋକ୍, ଯଦ୍ଦୁୟ, ପଲାଟୀୟ, ହାନନ୍, ଅନାୟ, ହୋଶେୟ, ହନାନିୟ, ହଶୁବ୍, ହଲୋହେଶ, ପିଲ୍ହ, ଶୋବେକ୍, ରେହୁମ୍, ହଶବ୍ନା, ମାସେୟ, ଅହିୟ, ହାନନ୍, ଅନାନ୍, ମଲ୍ଲୁକ୍, ହାରିମ୍, ବାନା।
ରାଜିନାମା
ବାକି ତାଇନ୍ୟାନ୍ ହଡ଼କ, ଯାଜାକ୍, ଲେବୀ, ଦୁଆର୍ହରକ, ଦୁରାଙ୍ଗ୍ହଡ଼କ, ବିନ୍ତିଅଡ଼ାଃ ସୁସାର୍ତାନ୍ ହଡ଼କ, ପାର୍ମେଶ୍ୱାର୍ଆଃ ଆନ୍ଚୁ ମାନାତିଙ୍ଗ୍ ନାଙ୍ଗ୍ ସାଅଁସାର୍ ହଡ଼କତାଃଏତେ ଆପାନ୍କେ ହିଗାଡ଼ାକାନ୍କ, ଇନ୍କୁଆଃ କୁଡ଼ିକ ଓଡ଼ୋଃ ସାରିଉରୁମ୍ ଦାଡ଼ିତାନ୍ ଆକଆଃ କଡ଼ାହନ୍କ, କୁଡ଼ିହନ୍କ ହଗି ଏନ୍ ଚୁକ୍ତିରାଃ ନିୟାମ୍ରେ ତଲ୍ୟାନାକ। ଇନ୍କୁ ଆକଆଃ ଜାତିକୁଟୁମ୍ ଓଡ଼ୋଃ ସେଣାଁନ୍ ହଡ଼କଲଃ ମେସାକେଦ୍ତେ, ପାର୍ମେଶ୍ୱାର୍ ଆୟାଃ ଦାସି ମୁଶାକେ ଏମାକାଇ ଆନ୍ଚୁ ଲେକା ଜୀଦାନ୍ ବିତାଅ ନାଙ୍ଗ୍ ଓଡ଼ୋଃ ଆବୁଆଃ ପ୍ରାଭୁ ପାର୍ମେଶ୍ୱାର୍ଆଃ ହୁକୁମ୍କାଦ୍ ସବେନ୍ ନିୟାମ୍ ଓଡ଼ୋଃ ବିଧିକକେ ମାନାତିଙ୍ଗ୍ ରିକାଏୟାଲେ, ଓଡ଼ୋଃ କାଲେ ମାନାତିଙ୍ଗ୍ ରେଦ ଆଲେୟାଃ ଲାଗାତିଙ୍ଗ୍ ଲେକା ସାଜାଇ ବିଚାର୍ ହବାଅଃକା ମେନ୍ତେ ସବେନ୍କ କାଜିକେଦ୍ଲଃ କିରିୟାକେଦାକ।
ଆଲେ ଆଲେୟାଃ ହନ୍କୁଡ଼ିକକେ ଏଟାଃ ଜାତିରେନ୍ ହନ୍କଡ଼ାକଲଃ କାଲେ ଆଣ୍ଦିକଆ ଚାଏ ଆଲେୟାଃ ହନ୍କଡ଼ା ନାଗେନ୍ତେ ଏଟାଃ ଜାତିରେନ୍ ହନ୍କୁଡ଼ିକକେ କାଲେ ଆଉକଆ।
ଏଟାଃ ଜାତିରେନ୍ ହଡ଼କ ରୁଡ଼ୁନ୍ ହୁଲାଙ୍ଗ୍ରେ ଚାଏ ଜେତା ପାବିତାର୍ ହୁଲାଙ୍ଗ୍ରେ ଜେତାନ୍ ଜିନିଷ୍ ଚାଏ ଜମେୟାଁଃ ଆଖ୍ରିଙ୍ଗ୍ ନାଙ୍ଗ୍ ଆଉଲେରେ, ଆଲେ ଏନା କାଲେ କିରିଙ୍ଗ୍ୟେଁଆ। ସବେନ୍ ଏୟା ବାରାଷ୍ ପୁରାଃଅଲଃଗି, ହଡ଼କଆଃ ସବେନ୍ ଲେକାନ୍ ରିଣି ବାଗିୟଃଆ ଓଡ଼ୋଃ ଏନ୍ ମିଦ୍ ବାରାଷ୍ ଲୟଙ୍ଗ୍କାମି କା ହବାଅଃଆ।
ଆଡଃଗି ଆଲେ ଆଲେୟାଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରାଃ ସୁନୁସାର୍ କାମି ରିକା ନାଙ୍ଗ୍ ସବେନ୍ ବାରାଷ୍ ମିପିଦ୍ ଶେକଲ୍ରାଃ ଆପିହିସା1 ଦାନ୍ ଏମେୟାଁଲେ ମେନ୍ତେ କାଜିକେଦାଲେ।
ମେଜ୍ ହଲଙ୍ଗ୍, ସବେନ୍ ହୁଲାଙ୍ଗ୍ ହିତାଜାଙ୍ଗ୍ରାଃ ଦାନ୍ ରାକାବ୍, ଉରୁବ୍ଦାଣେଁ ରାକାବ୍, ରୁଡ଼ୁନ୍ ହୁଲାଙ୍ଗ୍, ଆମାସ୍ ପାରାବ୍, ଏଟାଃ ଏଟାଃ ଠାହାରାଅକାନ୍ ପାରାବ୍, ଏଟାଃ ଏଟାଃ ପାବିତାର୍ ଦାନ୍, ଇସ୍ରାଏଲ୍ ହଡ଼କଆଃ ହେୟାତିଙ୍ଗ୍ରାଃ ପାପ୍ରେୟାଃ ଦାଣେଁ ଓଡ଼ୋଃ ଆଲେୟାଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରାଃ ସବେନ୍ କାମି ରିକାରାଃ ବାହାରମ୍ ଇଦିକେଦାଲେ।
ଆଇନ୍ରାଃ ଅନଲ୍ ଲେକାତେ ଆଲେୟାଃ ପ୍ରାଭୁ ପାର୍ମେଶ୍ୱାର୍ଆଃ ବେଦି ଚେତାନ୍ରେ ଉରୁବ୍କେଦ୍ତେ ଜୁଲ୍ ନାଙ୍ଗ୍ ଅକ ସାହାନ୍ ଲାଗାତିୟାଁଃ, ଏନା ଜଗାଅରେୟାଃ ବାହାରମ୍ ଗଅଃକେଦାଲେ। ଆଲେ, ଯାଜାକ୍କ, ଲେବୀ ଓଡ଼ୋଃ ହଡ଼କ ଆକଆଃ କିଲି ଲେକାତେ ବାରାଷ୍ରେ ଅକ ହୁଲାଙ୍ଗ୍ ପାର୍ମେଶ୍ୱାର୍ଆଃ ବିନ୍ତିଅଡ଼ାଃତେ ସାହାନ୍ ଆଉଃଆ, ଏନାରାଃ ଚିଠା ଉୟୁଃକେଦାଲେ।
ଆଲେ ରୟାକାଦ୍ ହିତାଜାଙ୍ଗ୍ରାଃ ପାହିଲା ଜ ଓଡ଼ୋଃ ସବେନ୍ ଲେକାନ୍ ଦାରୁରାଃ ପାହିଲା ଜ ବାରାଷ୍କେ ବାରାଷ୍ ପ୍ରାଭୁଆଃ ବିନ୍ତିଅଡ଼ାଃତେ ଆଉୱେରାଃ ବାହାରମ୍ ହଗି ଇଦିକେଦାଲେ।
ଆଇନ୍ରେ ଅଲାକାନ୍ ଲେକାଗି ଆଲେୟାଃ ମୁତ୍କୁଲ୍ ହନ୍ ଓଡ଼ୋଃ ଗୋଟ୍ରେନ୍ ଆସୁଲ୍ ଜାଁତୁକଆଃ ପାହିଲା ହନ୍କେ ଆଲେୟାଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରେ ସେୱା ରିକାତାନ୍ ଯାଜାକ୍ତାଃ ଆଉରାଃ ବାହାରମ୍ ଇଦିକେଦାଲେ।
ରୟାକାନ୍ ପାହିଲା ହିତାଜାଙ୍ଗ୍ରାଃ ବୁଗିନ୍ ମାଏଦା, ଏଟାଃ ଏଟାଃ ହିତାଜାଙ୍ଗ୍ରାଃ ଦାନ୍, ସବେନ୍ ରାକାମ୍ ଦାରୁରାଃ ଜ, ନାୱା ଦାଖ୍ରାସି ଓଡ଼ୋଃ ସୁନୁମ୍ ଆଲେୟାଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରାଃ ଭାଣ୍ଡାର୍ରେ ଦହ ନାଙ୍ଗ୍ ଯାଜାକ୍ତାଃ ଆଉରାଃ ଉହାଟ୍ ରିକାକେଦାଲେ। ଅତେରେ ଅମନ୍ ଜିନିଷ୍ରାଃ ଗେଲ୍ହିସା ଲେବୀ ହଡ଼କତାଃ ଆଉ ନାଙ୍ଗ୍ ଉହାଟ୍କେଦାଲେ, ଚିଆଃଚି ଆଲେ କାମିତାନ୍ ନାଗାର୍ରେ ଲେବୀ ହଡ଼କ ଗେଲ୍ହିସା ଇଦି ତାଇକେନାକ। ମେନ୍ଦ ଲେବୀ ହଡ଼କ ଗେଲ୍ହିସା ହାରମେ ଇମ୍ତା ହାରୁନ୍ ଯାଜାକ୍ଆଃ କିଲିରେନ୍ ମିଆଁଦ୍ ଯାଜାକ୍ ଇନ୍କୁଲଃ ସେନାଏ ଓଡ଼ୋଃ ହାରମ୍କାନ୍ ସବେନ୍ ଗେଲ୍ହିସାରାଃ ଗେଲ୍ହିସା ଲେବୀ ହଡ଼କ ପାର୍ମେଶ୍ୱାର୍ଆଃ ବିନ୍ତିଅଡ଼ାଃତେ ଆଉୱେକାକ।
ଅକ ଠାୟାଦ୍ରେ ବିନ୍ତିଅଡ଼ାଃରାଃ ଜିନିଷ୍କ ଦହଃତାନା ଓଡ଼ୋଃ ଯାଜାକ୍କ, ଦୁହାର୍ ହରହଡ଼କ ଓଡ଼ୋଃ ଦୁରାଙ୍ଗ୍ହଡ଼କ ତାଇନଃତାନା, ଏନ୍ ଅଡ଼ାଃତେ ଇସ୍ରାଏଲ୍ ହଡ଼କ ଓଡ଼ୋଃ ଲେବୀ ହଡ଼କ ଆକଆଃ ହିତାଜାଙ୍ଗ୍, ନାୱା ଦାଖ୍ରାସି ଓଡ଼ୋଃ ସୁନୁମ୍ରାଃ ଦାନ୍ ଆଉୟାକ ମେନ୍ତେ ଉହାଟ୍ୟାନା। ଆଲେ ଆଲେୟାଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃକେ କାଲେ ବାଗିୟା ମେନ୍ତେ ଉହାଟ୍ୟାନା।
Source notes (1)
- Footnote ମଣେୟାଁ ଗ୍ରାମ୍ ରୁପା
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.