Munda Bible
ଯିଶାୟ 7
ଆହାସ୍ ରାଜା ନାଗେନ୍ତେ ମିଆଦ୍ କାଜି
ଉଜ୍ଜିୟରାଃ ଜାଇହନ୍ ଓଡ଼ୋଃ ଯୋଥାମ୍ରାଃ ହନ୍ତେକଡ଼ା ଆହାସ୍ ଯିହୁଦାରେନ୍ ରାଜା ତାଇକେନ୍ ଇମ୍ତା ଅରାମ୍ରେନ୍ ରାଜା ରେଜିନ୍ ଓଡ଼ୋଃ ଇସ୍ରାଏଲ୍ରେନ୍ ରାଜା ରେମାଲିୟରାଃ ହନ୍ତେକଡ଼ା ପେକ୍କା ଯୀରୁଶାଲେମ୍ ବିରୁଧ୍ରେ ଲାଡ଼ାଇ ନାଗେନ୍ତେ ବିରିଦ୍ୟାନା, ମେନ୍ଦ ଇନିଃ ଏନାକେ କାଏ ଜିତାଅ ଦାଡ଼ିୟାନା।
ଅରାମ୍ ଓଡ଼ୋଃ ଇଫ୍ରାଇମ୍ ମିଦ୍କାନାକିନ୍ ମେନ୍ତେ ଦାଉଦ୍ଆଃ କିଲିକକେ କାଜିୟାନା ଇମ୍ତା, ଆନ୍ଧିହୟରେ ବିର୍ରେୟାଃ ଦାରୁକ ଏକ୍ଲାଅଃତାନ୍ ଲେକା ଆହାସ୍ ଓଡ଼ୋଃ ଇନିୟାଃ ହଡ଼କଆଃ ମନ୍ସୁରୁଦ୍ ଥାର୍ଥାରାଅୟାନା।
ଏନ୍ତେ ପ୍ରାଭୁ ଯିଶାୟକେ କାଜିକିୟା, ଆମ୍ ଓଡ଼ୋଃ ଆମାଃ ହନ୍କଡ଼ା ଶେର୍ଯେଶୁବ୍, ଲିଜାଃ ସାଫାକଆଃ ପିଡ଼ିତେ ସେନାକାନ୍ ଚାକାର୍ ହରା ଗେନାରେୟାଃ ଦାଆଃ ଭାଣ୍ଡାର୍ ଚେତାନ୍ ସାଃତେ ସେନଃବେନ୍ ଓଡ଼ୋଃ ଏନାରାଃ ଟୁଣ୍ଡୁରେ ଆହାସ୍ ରାଜାଲଃ ନେପେଲ୍ବେନ୍। ଇନିଃକେ କାଜିବେନ୍, ଚିର୍ଗାଲ୍କେଦ୍ତେ ତାଇନ୍ମେଁ, ଆଲମ୍ ଆଡ଼ାଃଉଡ଼ୁଃ ରିକାନାଃ ଚାଏ ଆଲମ୍ ବରୟା। ନେ ସୁକୁଲଃତାନ୍ ସାହାନ୍ରାଃ ବାରିୟା ଚାଆଃଲମ୍ ମେନ୍ଲେରେ ରେଜିନ୍, ଅରାମ୍ ଓଡ଼ୋଃ ରେମାଲିୟରାଃ ହନ୍ତେକଡ଼ାରାଃ ପୁରାଃ ଖିସ୍ ହବାକାନ୍ ହରାତେ ଆଲମ୍ ବରୟା ଚାଏ ଆପ୍ନାଃ ମନ୍ସୁରୁଦ୍କେ ମନ୍ଦୁକ୍ ହବାଅଃ ନାଙ୍ଗ୍ ଆଲମ୍ ଏମାଃ। ଅରାମ୍, ଇଫ୍ରାଇମ୍ ଓଡ଼ୋଃ ରେମାଲିୟରାଃ ହନ୍ତେକଡ଼ା ଆମାଃ ବିରୁଧ୍ରେ ରଜୋଟ ରିକାକେଦ୍ତେ କାଜିତାନା, “ଦଲାବୁ, ଯିହୁଦା ବିରୁଧ୍ରେ ଲାଡ଼ାଇକେଦ୍ତେ ଜିତାଅଃଆବୁ ଓଡ଼ୋଃ ଏନାକେ ବିନ୍ଗାଅକେଦ୍ଲଃ ଆବୁଆଃ ଭିତାର୍ରେ ହାଟିଙ୍ଗ୍ ରିକାୟାବୁ। ଏନ୍ତେ ଟାବେଲ୍ରାଃ ହନ୍ତେକଡ଼ାକେ ଏନ୍ତାଃରେନ୍ ରାଜା ବାଇୟାବୁ।”
ମେନ୍ଦ ପେଡ଼େୟାନ୍ ପ୍ରାଭୁ କାଜିତାନାଏ, “ନେଆଁ କା ହବାଅଃଆ ଚି କାମିରେ କା ହିଜୁଃଆ। ଚିୟାଃଚି ଦମାସ୍କସ୍ ଅରାମ୍ରାଃ ମାରାଙ୍ଗ୍ ନାଗାର୍ ତାନାଃ ଓଡ଼ୋଃ ରେଜିନ୍ଏତେ ଦମାସ୍କସ୍ ମାରାଙ୍ଗ୍ କା ହବାଅଃଆ। ଆପିହିସି ମଣେୟାଁ ବାରାଷ୍ ଭିତାର୍ରେ ଇଫ୍ରାଇମ୍ ନେ'ଲେକା ଟୁକ୍ଡ଼ା ଟୁକ୍ଡ଼ା ହବାଅଃଆ ଯେ, ନେଆଁ ମିଆଦ୍ ରାଇଜ୍ ଲେକା କା ତାଇନାଃ। ଶାମରିୟା ଇଫ୍ରାଇମ୍ରାଃ ମାରାଙ୍ଗ୍ ନାଗାର୍ ତାନାଃ ଓଡ଼ୋଃ ରେମାଲିୟରାଃ ହନ୍ତେକଡ଼ା ଏସ୍କାର୍ ଶାମରିୟାରେନ୍ ମାରାଙ୍ଗ୍ ହବାଅଃଆଏ।
“ଆପେ ବିଶ୍ୱାସ୍ କା ରିକାଏରେଦ, ଜେତା ଲେକାତେ କାପେ ଠାହାରାଅ ଦାଡ଼ିଅଃଆ।”
ଇମ୍ମାନୁୟେଲ୍ ପାର୍ମେଶ୍ୱାର୍ଆଃ ଚିହ୍ନା
ପ୍ରାଭୁ ଆଡଃଗି ଆହାସ୍କେ କାଜିକିୟା, “ଆମ୍ ଆମାଃ ପ୍ରାଭୁ ପାର୍ମେଶ୍ୱାର୍ତାଃଏତେ ମିଆଦ୍ ଚିହ୍ନା ଆସିମେ, ଏନା ନେ ଅତେଦିଶୁମ୍ରାଃ ଇକିର୍ଏତେ ହବାଅଃ ଚାଏ ସିର୍ମା ଚେତାନ୍ଏତେ ହବାଅଃ, ଆମ୍ ଆସିମେ।”
ମେନ୍ଦ ଆହାସ୍ କାଜିକିୟାଏ, “ଆଇଙ୍ଗ୍ ଚିହ୍ନା କାଇଙ୍ଗ୍ ଆସିୟାଃ, ଚି ପ୍ରାଭୁକେ ବିନିଡ଼ାଅ କାଇଙ୍ଗ୍ ରିକାଃ।”
ଏନ୍ତେ ଯିଶାୟ କାଜିକିୟାଏ, “ହେ ଦାଉଦ୍ଆଃ କିଲିକ ନାହାଁଃ ଆୟୁମେପେ, ମାନୱାରାଃ ଧିରାଜ୍କେ ବିଡ଼ାଅ ରିକା ନାଗେନ୍ତେ ଚିନାଃ ପୁରାଃଗି କା ହବାକାନା ଯେ, ଆପେ ଆଇଁୟାଃ ପାର୍ମେଶ୍ୱାର୍ଆଃ ଧିରାଜ୍କେ ହଗି ବିଡ଼ାଅ ନାଙ୍ଗ୍ ସାନାଙ୍ଗ୍ତାନାପେ ? ଏନାମେନ୍ତେ ପ୍ରାଭୁ ଆଇଃଗି ଆପେକେ ମିଆଦ୍ ଚିହ୍ନା ଏମାପେୟାଏ, ମିଆଁଦ୍ ଡିଣ୍ଡାକୁଡ଼ି ହାମ୍ବାଲ୍ରୋୱା ହବାଅଃଆଏ ଓଡ଼ୋଃ କଡ଼ାହନ୍ ଜାନାମିଁୟାଏ, ଓଡ଼ୋଃ ହଡ଼କ ଇନିଃକେ ଇମ୍ମାନୁୟେଲ୍ ମେନ୍ଲେରେ ‘ଆବୁଲଃ ପାର୍ମେଶ୍ୱାର୍ ମେନାଇୟା’ ମେନ୍ତେକ ନୁତୁମିଁୟା। ଇନିଃ ବୁଗିନ୍ ଓଡ଼ୋଃ ଏତ୍କାନ୍ରାଃ ସେଣାଁ ନାମେ ଇମ୍ତାଙ୍ଗ୍ ଦହି ଓଡ଼ୋଃ ହୁରୁମ୍ସୁକୁ ଜମେୟାଁ। ମେନ୍ଦ ଇନିଃ ବୁଗିନ୍ ଓଡ଼ୋଃ ଏତ୍କାନ୍ରାଃ ସେଣାଁ ନାମ୍ ସିଦାରେ, ଆମ୍ ଅକନ୍ ଦିଶୁମ୍ରେନ୍ ରାଜାକିନ୍କେ ବରକିନ୍ ତାନାମେ, ଇନ୍କିନାଃ ରାଇଜ୍ ଜିୟନ୍କଆଃ।
“ପ୍ରାଭୁ ଆମାଃ ଚେତାନ୍ରେ, ଆମାଃ ହଡ଼କଆଃ ଚେତାନ୍ରେ ଓଡ଼ୋଃ ଆମାଃ କିଲିକଆଃ ଚେତାନ୍ରେ ନେ'ଲେକା ସାଙ୍କାଟ୍ ଆଉଇୟାଏ, ଅକ୍ନାଃଚି ଇଫ୍ରାଇମ୍ ଯିହୁଦା ତାଃଏତେ ବିନ୍ଗାଅ ହବାଅଃ ଜାକେଦ୍ ଚିଉଲାହ କା ହବାକାନା। ଇନିଃ ଆସେରିୟାରେନ୍ ରାଜାକେ ଆଉଇୟା।”
ଇମ୍ତା ପ୍ରାଭୁ ଆୟାଃ ସୁଗାଡ଼ାନ୍ ସିସ୍କାର୍ ସାଡ଼ିକେଦ୍ତେ ମିସାର୍ ଦିଶୁମ୍ରାଃ ସାଙ୍ଗିନ୍ ଗାଡାକଏତେ ରକକ ଲେକା ଓଡ଼ୋଃ ଆସେରିୟା ଦିଶୁମ୍ଏତେ ହୁରୁମ୍ସୁକୁ ରକକ ଲେକା ସିପାଇକକେ ଆଉକଆ। ଇନ୍କୁ ସେଟେର୍କେଦ୍ତେ ସାଲାଙ୍ଗି ବୁରୁରେ, ସେରେଙ୍ଗ୍ରାଃ ଲାପାଙ୍ଗା କରେ, ଜାନୁମ୍ ଚୁପାଦ୍ କରେ ଓଡ଼ୋଃ ତାସାଦ୍ ପିଡ଼ିକରେ ଦୁବାଃକ।
ଏନ୍ ଦିପିଲିରେ ପ୍ରାଭୁ ଫରାତ୍ ଗାଡ଼ା ହାନ୍ ପାରମ୍ଏତେ ଉବ୍ ହାଦ୍ତାନ୍ ମିଆଦ୍ ହଡ଼କେ ମେନ୍ଲେରେ ଆସେରିୟାରେନ୍ ରାଜାକେ ଭାଡ଼ାରେ ଆଉଇୟା। ଓଡ଼ୋଃ ଆପେୟାଃ ବହଃରାଃ, ହଡ଼୍ମରାଃ ଉବ୍କେ ଓଡ଼ୋଃ ଦାଢ଼ି ଉବ୍କେ ଲେସେର୍ ପାତିଛୁରାଲଃ ହାଦେୟାଏ।
ଏନ୍ ଦିପିଲିରେ ନେ'ଲେକା ହବାଅଃଆ ଯେ, ଜେତାଏ ମିଆଦ୍ ଅସାର୍ ଓଡ଼ୋଃ ଗୋଟ୍ରେନ୍ ବାରିୟା ମିଣ୍ଡି ଆସୁଲ୍କିନ୍ ରେଦ, ପୁରାଃଗି ତଆ ନାମେୟାଏ ଓଡ଼ୋଃ ଏନାତେ ଇନିଃ ଆୟାଃ ଲାଗାତିଙ୍ଗ୍ ଲେକା ପୁରାଃଗି ନାମେୟା, ଏନ୍ତେ ଦହି ଜମ୍ ଦାଡ଼ିୟାଏ। ଓଡ଼ୋଃ ଏନ୍ ଦିଶୁମ୍ରେନ୍ ସାରେଜାକାନ୍ ହଡ଼କ ଦହି ଓଡ଼ୋଃ ହୁରୁମ୍ସୁକୁକ ଜମେୟାଁ।
“ମୁସିଙ୍ଗ୍ ଏନ୍ ଦିଶୁମ୍ରାଃ ଠାୟାଦ୍ କରେ ହାଜାର୍ ରୁପା ସିକା ଗନଙ୍ଗ୍ରାଃ ଦାଖ୍ନାଡ଼ି ତାଇକେନା। ଏନ୍ ହୁଲାଙ୍ଗ୍ ଏନ୍ ଠାୟାଦ୍ରାଃ ପିଡ଼ିକରେ ଦଧାଡ଼ି ଓଡ଼ୋଃ ଜାନୁମ୍ ଚୁପାଦ୍ତେ ପେରେଜଃଆ। ଦିଶୁମ୍ରେ ଜାନୁମ୍ ଚୁପାଦ୍ତେ ପେରେଜଃ ହରାତେ ହଡ଼କ ଧାନୁ ଚିଆରି ସାବ୍କେଦ୍ତେ ଏନ୍ତାଃତେ ସାଙ୍ଗାର୍ ନାଙ୍ଗ୍ ସେନାକ। ସିଦା ଦିପିଲିରେ ଅକ ବୁରୁକ କୁଡିଲଃ ଉର୍କେଦ୍ତେ ହିତା ହେରଃ ତାଇକେନା। ଏନ୍ ସବେନାଃ ଜାନୁମ୍ ଓଡ଼ୋଃ ଦଧାଡ଼ି ଦାରୁ ପେରେଜଃ ହରାତେ, ଏନାରାଃ ବରତେ ଆପେ ଜେତାଏ ଏନ୍ ଠାୟାଦ୍ତେ କାପେ ସେନା। ଏନ୍ ଠାୟାଦ୍କ ଉରିକ୍ ଓଡ଼ୋଃ ମିଣ୍ଡିକଆଃ ଆତିଙ୍ଗ୍ ଠାୟାଦ୍ ହବାଅଃଆ।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.