Munda Bible
ଯିଶାୟ 47
ବାବିଲ୍ରାଃ ବିଚାର୍
ହେ ବାବିଲୋନ୍ରେନ୍ ଡିଣ୍ଡାକୁଡ଼ି, ଆମ୍ ଆଡ଼୍ଗୁ କେଦ୍ତେ ଧୁଡ଼ିରେ ଦୁବ୍ମେଁ, ରାଜ୍ଗାଦି ବାଗିକେଦ୍ତେ ଧୁଡ଼ିରେ ଦୁବ୍ମେଁ।
ହେ କଲ୍ଦିୟରେନ୍ କୁଡ଼ି ଆମ୍ ବୁଗିନାଃ ଓଡ଼ୋଃ ଡିଣ୍ଡା ମେନ୍ତେ କାମ୍ କାଜିନାଃ।
ଜାତା ଦିରି ଇଦିକେଦ୍ତେ ଗହମ୍ ପିସାଏପେ, ଆମାଃ ଗୁଗ୍ଲୁ ଆତମ୍ତାମେ,
ଆମାଃ କାଟା ଏତେ ଲିଜାଃ ସାକୁରାଅ କେଦ୍ତେ ଗାଡାରେୟାଃ ଦାଆଃରେ ପାରମ୍ ମେଁ।
ଆମାଃ ହଡ଼୍ମ ସାମାଡେଣ୍ଡେଗି ତାଇନାଃ
ଓଡ଼ୋଃ ଆମାଃ ଗିହୁଃ ଉଦୁବଃଆ।
ଆଇଙ୍ଗ୍ ବାଦ୍ଲା ଇଦିୟା, ଜେତାଏନିୟାଃ କାଜି କାଇଙ୍ଗ୍ ଆୟୁମେୟା।
ଆବୁଆଃ ବାଞ୍ଚାଅନିଃ ଇସ୍ରାଏଲ୍ରେନ୍ ପାବିତାର୍ ପ୍ରାଭୁ ତାନିଃ,
ଇନିୟାଃ ନୁତୁମ୍ ସବେନାଃତେ ପେଡ଼େୟାନ୍ ସାଲାଙ୍ଗିଉତାର୍ ପାର୍ମେଶ୍ୱାର୍ ତାନାଃ।
ହେ କଲ୍ଦିୟରେନ୍ କୁଡ଼ିକ,
ଆମ୍ ନୁବାଃରେ ସେନ୍କେଦ୍ତେ ହାପା ହାପା ଦୁବ୍ମେଁ
ଆମ୍ ସବେନ୍ ରାଇଜ୍ରେନ୍ ରାନୀ ମେନ୍ତେ ଓଡ଼ୋଃ କାମ୍ କାଜିୟଃଆ।
ଆଇଙ୍ଗ୍ ଆଇଁୟାଃ ହଡ଼କଆଃ ଚେତାନ୍ରେ ଖିସ୍କେଦ୍ତେ ଆପ୍ନାଃ ଆକ୍ତେୟାର୍ ସତ୍ରା କେଦାଇଙ୍ଗ୍
ଓଡ଼ୋଃ ଇନ୍କୁକେ ପାପ୍ରେ ଉୟୁଗଃ ନାଗେନ୍ତେ ଆମାଃ ତିଃଇରେ ଜିମାକେଦ୍କଆ,
ଆମ୍ ଇନ୍କୁକେ କାମ୍ ଦାୟା କେଦ୍କଆ।
ନେ'ଲେକାଚି ହାଡ଼ାମ୍ ହଡ଼କଆଃ ଚେତାନ୍ରେ ଆଡ଼୍ନା ଲାଦିକେଦାମ୍।
ଆମ୍ କାଜିକେଦା, “ଆଇଙ୍ଗ୍ ଜାନାଅଗି ରାନୀ କୁଡ଼ି ଲେକା ତାଇନାଃ।”
ମେନ୍ଦ ଆମାଃ ମନ୍ ସୁରୁଦ୍ରେ କାଟିକାନ୍ ହଁ କାମ୍ ଉଡ଼ୁଃ ପାହାମ୍କେଦା।
ଚାଏ ନେଆଁରା ଦାସା ଚିନାଃ ହବାଅଃଆ କାମ୍ ପାହାମ୍ କେଦା।
ହେ ରିଜ୍ରାଙ୍ଗ୍ ରିକାନିଃ, ନାହାଁଃଦ ଆୟୁମେମେ,
ଆମ୍ ବେଗାର୍ ବରତେ ତାଇନ୍ କେଦ୍ତେ ମନ୍ ଭିତାର୍ରେ କାଜିକେଦା,
ଆଇଙ୍ଗ୍ଗି ଏନ୍ ରାନି କୁଡ଼ି, ଆଇଙ୍ଗ୍କେ ବାଗିକେଦ୍ତେ ଏଟାଃ ଜେତାଏ ବାଙ୍ଗାଇୟାଃ।
ଆଇଙ୍ଗ୍ ଟଣିଟ୍ କାଇଙ୍ଗ୍ ହବାଅଃଆ ଚାଏ ରାଣ୍ଡିକୁଡ଼ି କାଇଙ୍ଗ୍ ହବାଅଃଆ।
ମେନ୍ଦ ରାଣ୍ଡିକୁଡ଼ି ଓଡ଼ୋଃ ଟଣିଟ୍ ନେ ବାର୍ନାଃ ମିସାତେଗି ହିଜୁଆଃ, ମୁସିଙ୍ଗ୍ତେଗି ହବାନାଃ।
ଆମାଃ ଯାଦୁଟଣା କାମି ଓଡ଼ୋଃ ଦେଅଁଣା କାମି ପୁରାଃ ତାଇନ୍ ରେହ
ଆମାଃ ଚେତାନ୍ରେ ଏନ୍ ବାରାନ୍ ଦୁକୁ ହିଜୁଆଃ।
ଆମ୍ ଆମାଃ ଏସ୍କାର୍ ଏତ୍କାନ୍ କାଜିକାମିରେ ଆସ୍ରା ଦହକାଦା,
ଆମ୍ କାଜିକେଦା, “ଆଇଙ୍ଗ୍କେ ଜେତାଏ କାକ ନେଲ୍ତାନା।”
ଆଇଁୟାଃ ସେଣାଁ ଓଡ଼ୋଃ ବୁଦ୍ଧି ଆଇଙ୍ଗ୍କେ ତିହିର୍ବିହିର୍ କେଦିୟାଁ,
ଆମ୍ ଚିମ୍ତା କାଜିକେଦାମ୍, “ଆଇଙ୍ଗ୍ଗି ଏନ୍ ରାନି କୁଡ଼ି,
ଆଇଙ୍ଗ୍କେ ବାଗିକେଦ୍ତେ ଏଟାଃ ଜେତାଏ ବାଙ୍ଗାଇୟା।”
ଏନାମେନ୍ତେ ଆମାଃ ଚେତାନ୍ରେ ସାଙ୍କାଟ୍ ହିଜୁଃଆ
ଓଡ଼ୋଃ ଏନାଏତେ ଚିଲ୍କା ବାଞ୍ଚାଅଃଆମ୍, ଏନା କାମ୍ ସାରି ଦାଡ଼ିୟା।
ଆମାଃ ଚେତାନ୍ରେ ପୁରାଃଗି ଦୁକୁ ହିଜୁଃଆ ଯେ ଆମ୍ ହେୟାତିଙ୍ଗ୍ ରିକାଏରେୟଗି ଏନାଏତେ କାମ୍ ବାଞ୍ଚାଅ ଦାଡ଼ିଅଃଆ।
ସିଦାରେ ଅକଆଃ ଆମ୍ କାମ୍ ନେଲ୍ ଦାଡ଼ିୟା, ନେ'ଲେକାନ୍ ମିଆଦ୍ ସିଗିଦ୍ ଆମାଃ ଚେତାନ୍ରେ ହିଜୁଃଆ।
ଆମ୍ ସିଟିଆ ଦିପିଲି ଏତେ ଅକ ଯାଦୁଟଣା
ଓଡ଼ୋଃ ମାନ୍ତାର୍ ଇତୁଆକାନା, ଏନାରେ ମାତାଅକାନ୍ମେ।
ହବାସାକାଅଃଆ ଏନା ଆମ୍କେ ଦେଙ୍ଗା ରିକାୟା
ଓଡ଼ୋଃ ଏଟାଃକଆଃ ମନ୍ରେ ବର ଉନୁଦୁବ୍ ହବାଅଃଆ।
ଆମ୍ ଅକ ଚେତାଅ କାଜିକ ଉହାଟ୍ ରିକାକାଦା, ଏନା ଆମ୍କେ ଲାଗା କାଦ୍ମେୟାଁ।
ଆମାଃ ଅକନ୍ ପାଣ୍ଡିତ୍କ ମାହିନା ତାୟମ୍ତେ ମାହିନା ଲେକାକେଦ୍ତେ ଆମାଃ ବୁଗିନା
ଓଡ଼ୋଃ ଏତ୍କାନାଃ ହବାଅଃଆ ମେନ୍ତେ କାଜିମେତାନା, ଏନ୍ ସବେନ୍କ ହିଜୁଃକାକ
ଓଡ଼ୋଃ ଆମାଃ ଚେତାନ୍ରେ ଅକ ସିଗିଦ୍ ସବେନାଃ ହୁଇନାଃ ଏନା ଏତେ ବାଞ୍ଚାଅମେକାକ।
“ମେନ୍ଦ ଇନ୍କୁ ପେଟେଃ ଲେକାନ୍କ ତାନ୍କ, ଇନ୍କୁ ସେଙ୍ଗେଲ୍ରେ ଅଣ୍ଡରଅଃଆକ।
ଓଡ଼ୋଃ ଇନ୍କୁ ଆପାନ୍କେ ଏନ୍ ସେଙ୍ଗେଲ୍ ଏତେ କାକ ବାଞ୍ଚାଅ ଦାଡ଼ିୟା।
ନେଆଁ ଜୁରୁବ୍ତାନ୍ ଚାଏ ହଡ଼୍ମକେ ସୁକୁ ଏମ୍ତାନ୍ ସେଙ୍ଗେଲ୍ ନାହାଁଲାଃ।
ଆମ୍ ଅକ ସବେନାଃ ନାଗେନ୍ତେ କାମିୟାକାଦା, ଏନା ନେ ଲେକା ହବାନାଃ।
ଆମାଃ ଧାଙ୍ଗ୍ଡ଼ା ଦିପିଲି ଏତେ ଅକନ୍କ ଆମାଃଲଃ କିରିଙ୍ଗ୍ ଆଖ୍ରିଙ୍ଗ୍ ରିକାକାଦା,
ଇନ୍କୁ ସବେନ୍କ ଆପାନ୍ ଆପାନ୍ ଠାୟାଦ୍ତେକ ସେନଃଆ,
ଜେତାଏ ଆମ୍କେ କାକ ବାଞ୍ଚାଅ ଦାଡ଼ିମେୟା।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.