Munda Bible
ଯିଶାୟ 46
“ବାଲ୍ ମାହାପୁରୁ ଅମ୍ବାଃକାନାଏ ଓଡ଼ୋଃ ନବୋ ଅମ୍ବାଃକାନାଏ, ଇନ୍କୁଆଃ ମୁରୁତ୍କ ବିର୍ ଜାଁତୁ
ଓଡ଼ୋଃ ଆସୁଲ୍ ଜାଁତୁକଆଃ ଚେତାନ୍ରେ ଲାଦି ଇଦିୟଃତାନାକ।
ଅକ ଜିନିଷ୍କ ଆପେ ଗଅଃକେଦ୍ତେ ହନର୍ ତାଇକେନାପେ,
ଏନା ହାମ୍ବାଲାକାନା, ଲାଗାକାନ୍ ଜାଁତୁକ ନାଗେନ୍ତେ ପୁରାଃଗି ହାମ୍ବାଲାକାନା।
ଏନ୍ ମୁରୁତ୍କ ଅମ୍ବାଗଃଆକ, ଇନ୍କୁ ମିସାତେ ଅମ୍ବାଗଃଆକ।
ଇନ୍କୁ ଆପ୍ନାଃ ହାମ୍ବାଲ୍ ଗଅଃ ନାଗେନ୍ତେ କାକ ଦାଡ଼ିକେନା ମେନ୍ଦ ଆକଗି ତଲାକାନାକ।
“ହେ ଯାକୁବ୍ଆଃ କିଲି, ହେ ଇସ୍ରାଏଲ୍ କିଲିରେନ୍ ସାରେଜାକାନ୍ ସବେନ୍କ, ଆଇଁୟାଃ କାଜି ଆୟୁମେପେ,
ଆପେ ଲାହିଦ୍ରେ ତାଇନ୍ ଇମ୍ତାଏତେଗି ଆଇଙ୍ଗ୍ ଆପେୟାଃ ବାହାରମ୍ ଗଅଃ କାଦାଇଙ୍ଗ୍
ଓଡ଼ୋଃ ଜାନାମ୍ ତାୟମ୍ତେ ଆପେୟାଃ ଯାତାନ୍ ଇଦିକାଦାଇଙ୍ଗ୍।
ଆପେୟାଃ ହାଡ଼ାମ୍ ଦିପିଲି ଜାକେଦ୍ ଓଡ଼ୋଃ ବହଃରେୟାଃ ଉବ୍ ପୁଣ୍ଡିୟଃ ଜାକେଦ୍ ଆଇଙ୍ଗ୍ ଇନିଃଗି ତାନିଙ୍ଗ୍
ଓଡ଼ୋଃ ଆପେୟାଃ ଯାତାନ୍ ଇଦିୟାଇଙ୍ଗ୍, ଆଇଙ୍ଗ୍ ଆପେକେ ବାଇକାଦ୍ ପେୟାଇଙ୍ଗ୍
ଓଡ଼ୋଃ ଆପେକେ ଗଅଃ ଇଦି ପେୟାଇଙ୍ଗ୍, ଆପେୟାଃ ଯାତାନ୍ ଇଦିୟାଇଙ୍ଗ୍
ଓଡ଼ୋଃ ଆପେକେ ବାଞ୍ଚାଅ ପେୟାଇଙ୍ଗ୍।
“ଆପେ ଆଇଙ୍ଗ୍କେ ଅକଏଲଃ ଜକାଇଁୟାପେ,
ଚାଏ ଅକଏଲଃ ମିଦ୍ ସାମାନ୍ ମେନ୍ତେ କାଜିୟାଁପେ ?
ହଡ଼କ ଆକଆଃ ଥାଇଲାଏତେ ସୋନା
ଓଡ଼ୋଃ ରୁପା ଅଡଙ୍ଗ୍କେଦ୍ତେ ତାରାଜୁରେ ତାଉଲାଅ ରିକାଃକ।
ଇନ୍କୁ ସୋନାରିକେ ଗନଙ୍ଗ୍ ଏମ୍କେଦ୍ତେ ମୁରୁତ୍ ବାଇୟାଃକ
ଓଡ଼ୋଃ ଏନ୍ ମୁରୁତ୍କେ ଜହାର୍ କେଦ୍ତେ ସେୱା ରିକାଃକ।
ଇନ୍କୁ ଇନିଃକେ ତେଙ୍ଗଃକେଦ୍ତେ ଇଦିୟାଃକ
ଓଡ଼ୋଃ ଗଅଃ ଇଦିକେଦ୍ତେ ଆୟାଃ ଠାୟାଦ୍ରେ ଦହଆଃକ, ଏନ୍ତେ ଇନିଃ ତିଙ୍ଗୁଃଆଏ।
ଇନିଃ ଆୟାଃ ଠାୟାଦ୍ଏତେ କା ନେତେହେନ୍ତେ ଦାଡ଼ିୟା,
ଜେତାଏ ଇନିଃକେ କେଡ଼ାଲେରେ ହଗି ଇନିଃ ଜେତ୍ନାଃ କାଜିରୁହାଡ଼୍ କାଏ ଏମ୍ ଦାଡ଼ିୟା
ଚାଏ ସାଙ୍କାଟ୍ ଏତେ ବାଞ୍ଚାଅ ରିକା କାଏ ଦାଡ଼ିୟା।
“ହେ ଗୁହ୍ନାଁ ରିକାକାଦ୍ ହଡ଼କ, ଆଇଙ୍ଗ୍ ଅକ୍ନାଃ ରିକାକାଦାଇଙ୍ଗ୍,
ଏନା ପାହାମେପେ ଓଡ଼ୋଃ ଉଡ଼ୁଃ ରିକାଏପେ।
ମାରି ବିଷାଏକ ପାହାମେପେ, ଚିୟାଃଚି ଆଇଙ୍ଗ୍ଗି ପାର୍ମେଶ୍ୱାର୍ ତାନିଙ୍ଗ୍,
ଆଇଙ୍ଗ୍କେ ବାଗିକେଦ୍ତେ ଏଟାଃ ଜେତାଏ ବାଙ୍ଗାଇୟା।
ଆଇଙ୍ଗ୍ ପାର୍ମେଶ୍ୱାର୍, ଆଇଁୟାଃ ଲେକା ଜେତାଏ ବାଙ୍ଗାଇୟା।
ଆଇଙ୍ଗ୍ ଟୁଣ୍ଡୁ ବିଷାଏ ମୁନୁଏତେ ଉଦୁବ୍ କାଦାଇଙ୍ଗ୍।
ଓଡ଼ୋଃ ଅକ୍ନାଃ ପୁରା କା ହବାକାନା ଏନା ନାଙ୍କ ପାରିୟାଏତେ କାଜି ଆଉକାଦାଇଙ୍ଗ୍।
ଆଇଁୟାଃ ଉହାଟ୍ କାଜି କା ଟାସ୍କାଅଃଆ
ଓଡ଼ୋଃ ଆଇଙ୍ଗ୍ ଆଇଁୟାଃ ସବେନ୍ ମନ୍ରାଃ ଇଛାକ ପୁରା ରିକାୟାଇଙ୍ଗ୍।
ଆଇଙ୍ଗ୍ ସିଙ୍ଗିତୁର୍ ସାଃଏତେ ମିଆଁଦ୍ ମାସ୍ ଜମ୍ ଅଡ଼େକେ ସାଙ୍ଗିନ୍ ଦିଶୁମ୍ଏତେ ଆଇଁୟାଃ ଉହାଟ୍କେ ପୁରାଏ ନାଙ୍ଗ୍ ମିଆଦ୍ ହଡ଼କେ କେଡ଼ାଆଉ କାଜାଇଙ୍ଗ୍।
ଆଇଙ୍ଗ୍ ଅକଆଃ କାଜି କାଦାଇଙ୍ଗ୍, ଏନାକେ ପୁରାଏୟା,
ଅକଆଃ ଉହାଟ୍ ରିକା କାଦାଇଙ୍ଗ୍ ଏନାକେ ପୁରାଏୟା।
“ଧାର୍ମାନ୍ ଏତେ ସାଙ୍ଗିନ୍କାନ୍ କେଟେଃଦ୍ ମନ୍ରେନ୍ ପେଡ଼େୟାନ୍ ହଡ଼କ,
ଆଇଁୟାଃ କାଜି ଆୟୁମେପେ।
ଆଇଙ୍ଗ୍ ଆଇଁୟାଃ ଧାର୍ମାନ୍ ହଡ଼କେ ହେପାଦ୍ତେ ଆଉୱେ ତାନାଇଙ୍ଗ୍,
ଏନା କା ସାଙ୍ଗିନ୍ଅଃଆ
ଓଡ଼ୋଃ ଆଇଁୟାଃ ପାରିତ୍ରାଣ୍ ବିଲାମ୍ କା ହବାଅଃଆ।
ଆଇଁୟାଃ ମାନାରାଙ୍ଗ୍ ଲେକାନ୍ ଇସ୍ରାଏଲ୍ ନାଗେନ୍ତେ
ଆଇଙ୍ଗ୍ ସିୟୋନ୍ରେ ପାରିତ୍ରାଣ୍ ବାଇୟାଇଙ୍ଗ୍।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.