Munda Bible
ଯିଶାୟ 39
ବାବିଲୋନ୍ରେନ୍ କାଜି ଇଦିସେଟେର୍ ହଡ଼କ
ଏନ୍ ଦିପିଲିରେ ବାଲ୍ଦାନ୍ରାଃ ହନ୍ତେକଡ଼ା ବାବିଲୋନ୍ରେନ୍ ରାଜା ମେରୋଦକ୍ ବାଲ୍ଦାନ୍ ହିଜିକିୟ ହେପାଦ୍ତେ ଅନଲ୍ ଚିଠା ଓଡ଼ୋଃ ଦାନ୍ କୁଲ୍କେଦା, ଚିୟାଃଚି ଇନିଃ ହିଜିକିୟରାଃ ଦୁକୁ ଓଡ଼ୋଃ ବୁଗିୟଃ ବିଷାଏ ଆୟୁମାକାଦ୍ ତାଇକେନାଏ। ହିଜିକିୟ ରାଇଜ୍ରେନ୍ କାଜି ଇଦିସେଟେର୍ ହଡ଼କକେ ଦାରମ୍କେଦ୍କଆ ଓଡ଼ୋଃ ଇନିୟାଃ ଭାଣ୍ଡାର୍ ଅଡ଼ାଃରେ ତାଇକାନ୍ ଜିନିଷ୍ ସୋନା, ରୁପା, ବୁଗିନ୍ ସହାନ୍ ଜିନିଷ୍କ, ଗନଙ୍ଗାନ୍ ସୁନୁମ୍ ଓଡ଼ୋଃ ଇନ୍କୁଆଃ ତାରାଉଡ଼ି ଅଡ଼ାଃ, ଅକଆଃ ଗନଙ୍ଗାନ୍ ବିଷାଏକ ତାଇନ୍କେନା ଏନା ସବେନାଃ ଉଦୁବାଦ୍କଆଏ। ଆକଆଃ ରାଇଜ୍ରେ ଚାଏ ରାଜ୍ମାହାଲ୍ରେ ଅକଆଃ ତାଇନ୍କେନା ସବେନାଃ ଉଦୁବ୍ କେଦ୍କଆଏ। ଏନ୍ ତାୟମ୍ତେ ଯିଶାୟ ନାବୀ ରାଜା ହିଜିକିୟତାଃତେ ସେନ୍କେଦ୍ତେ କୁଲିକିୟାଃ, “ଏନ୍ ହଡ଼କ ଚିନାଃ କାଜି ତାଇନ୍କେନାକ ? ଇନ୍କୁ କତାଃଏତେ ହିଜାକାନ୍ ତାଇନ୍କେନାକ ?”
ହିଜିକିୟ କାଜିରୁହାଡ଼୍କିୟା, “ଇନ୍କୁ ପୁରାଃ ସାଙ୍ଗିନ୍ ଦିଶୁମ୍ ବାବିଲୋନ୍ ଏତେ ହିଜାକାନ୍ ତାଇକେନାକ।”
ଏନ୍ତେ ନାବି କୁଲିକିୟାଃ, “ଇନ୍କୁ ଆମାଃ ଅଡ଼ାଃରେୟାଃ ଚିନାଃକ ନେଲ୍କେଦା ?”
ଏନ୍ତେ ହିଜିକିୟ କାଜିରୁହାଡ଼୍ କେଦ୍କଆ, “ଆଇଁୟାଃ ଅଡ଼ାଃରେ ଅକଆଃକ ମେନା ଏନ୍ ସବେନାଃ ଇନ୍କୁ ନେଲ୍କେଦା, ଅକଆଃ ଇନ୍କୁ କାକ ନେଲ୍, ଏନ୍ଲେକା ଜେତାନ୍ ବିଷାଏ ବାନଆଃ, ସବେନାଃ ନେଲାକାଦା।”
ଏନ୍ତେ ଯିଶାୟ ହିଜିକିୟକେ କାଜିକିୟାଃ, “ସବେନାଃତେ ପେଡ଼େୟାନ୍ ପ୍ରାଭୁଆଃ କାଜି ଆୟୁମେମେ। ନେଲେମେ, ତିସିଙ୍ଗ୍ ଜାକେଦ୍ ଆମାଃ ପୁର୍ଖା ହାଡ଼ାମ୍ ଆପୁକଆଃ ଦହ ହୁଣ୍ଡିୟାକାନ୍ ସବେନାଃ ଜିନିଷ୍କ ଓଡ଼ୋଃ ଆମାଃ ଅଡ଼ାଃ ରେୟା ସବେନାଃ ଜିନିଷ୍କ ବାବିଲୋନ୍ତେ ଇଦିୟଃ ରେୟାଃ ଦିପିଲି ସେଟେର୍ତାନା। ପ୍ରାଭୁ କାଜିତାନାଏ, ଜେତ୍ନାଃ କା ବାଗିୟଃଆ। ଓଡ଼ୋଃ ଆମାଃ ହନ୍କଆଃ ଥାଲାରେ ଅକନ୍କ ଜାନାମ୍ ଇଦିୟା ଓଡ଼ୋଃ ଆମାଃ କିଲିରେ ଅକନ୍କ ଉନୁଦୁବ୍ ରିକାନାଃ, ଏନ୍ ସବେନ୍କକେ ତଲ୍କେଦ୍ତେ ଇଦିକଆକ ଓଡ଼ୋଃ ଇନ୍କୁ ବାବିଲୋନ୍ରେନ୍ ରାଜାରାଃ ରାଜ୍ମାହାଲ୍ରେ ଚାକୁରା ଲେକା ତାଇନାଃ।”
ହିଜିକିୟ ଯିଶାୟକେ କାଜି ରୁହାଡ଼୍କିୟା, “ଆମ୍ ପ୍ରାଭୁଆଃ କାଜି କାଜିକେଦା ଏନା ବୁଗିନ୍ ତାନାଃ।” ଇନିଃ ଆଡଃଗି କାଜିକିୟା, “ଚିୟାଃଚି ଆଇଁୟାଃ ଦିପିଲିରେ, ଜୀଉସୁକୁ ଓଡ଼ୋଃ ସାନାର୍ତିରାଃ ବିଷାଏ ସେଟେରାଃ।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.