Munda Bible
ଯିଶାୟ 38
ହିଜିକିୟରାଃ ବେମାର୍ ବୁଗି ରୁହାଡ଼୍
ଏନ୍ ଦିପିଲିରେ ହିଜିକିୟ ପୁରାଃଗି ଦୁକୁତେ ଦୁକୁଃ ତାଇକେନା। ଏନ୍ତେ ଆମୋସ୍ରାଃ ହନ୍ତେକଡ଼ା ଯିଶାୟ ନାବୀ ହିଜିକିୟତାଃରେ ସେଟେର୍କେଦ୍ତେ କାଜିକିୟା, ପ୍ରାଭୁ ନେ କାଜି କାଜିତାନା, “ଆମ୍ ଆମାଃ ଅଡ଼ାଃରାଃ କାଜିକେ ବାଇୟେମେ, ଚିୟାଃଚି ଆମାଃ ଗନଏଃ ହବାଅଃଆ ଓଡ଼ୋଃ ଆମ୍ କାମ୍ ଜୀହିଦଃଆ।”
ଏନ୍ତେ ହିଜିକିୟ ଭିତ୍ ସାଃତେ ମେଦ୍ମୁହାଁଡ଼୍ କେଦ୍ତେ ପ୍ରାଭୁତାଃରେ ବିନ୍ତି କେଦା, ଓଡ଼ୋଃ କାଜିକେଦାଏ, “ହେ ପ୍ରାଭୁ, ଆଇଙ୍ଗ୍ ବିନ୍ତିମେ ତାନାଇଙ୍ଗ୍, ଆଇଙ୍ଗ୍ ଚିଲ୍କା ସାର୍ତି ହରାରେ ଓଡ଼ୋଃ ଫାର୍ଚି ମନ୍ରେ ଆମାଃ ଆୟାର୍ରେ ସେସେନ୍ କାଦାଇଙ୍ଗ୍, ଆମ୍ ଏନାକେ ପାହାମ୍ ରିକାଏମେ।” ଓଡ଼ୋଃ ହିଜିକିୟ କୁସୁଦ୍ କୁସୁଦ୍ ରାଆଃ ଏଟେଦ୍ କେଦାଏ।
ଇମ୍ତା ଯିଶାୟତାଃରେ ପ୍ରାଭୁଆଃ କାଜି ସେଟେର୍ୟାନା। ଆମ୍ ସେନ୍କେଦ୍ତେ ହିଜିକିୟକେ କାଜିମେ, “ପ୍ରାଭୁ ଆମାଃ ପୁର୍ଖା ହାଡ଼ାମ୍ ଦାଉଦ୍ଆଃ ପାର୍ମେଶ୍ୱାର୍ ନେ କାଜି କାଜିତାନା, ଆଇଙ୍ଗ୍ ଆମାଃ ବିନ୍ତି ଆୟୁମ୍କେଦାଇଙ୍ଗ୍, ଆମାଃ ମେଦ୍ଦାଆଃ ନେଲ୍କେଦାଇଙ୍ଗ୍, ନେଲେମେ, ଆଇଙ୍ଗ୍ ଆମାଃ ଜିନିଦ୍ ତାଇନଃ ରେୟାଃ ଦିପିଲି ଓଡ଼ୋଃ ଗେଲ୍ ମଣେୟାଁ ବାରାଷ୍ ଜାତ୍କା ରିକାୟାଇଙ୍ଗ୍। ଏନ୍ତେ ଆଇଙ୍ଗ୍ ଆମ୍କେ ଓଡ଼ୋଃ ଆମାଃ ନେ ନାଗାର୍କେ ଆସେରିୟା ରାଜାରାଃ ତିଃଇ ଏତେ ବାଞ୍ଚାଅମେୟାଁଇଙ୍ଗ୍ ଓଡ଼ୋଃ ଆଇଙ୍ଗ୍ ନେ ନାଗାର୍ ନାଗେନ୍ତେ ତିଙ୍ଗୁଃଆଇଙ୍ଗ୍।
“ଓଡ଼ୋଃ ପ୍ରାଭୁ ଆୟାଃ କାଜିକେ ପୁରାଏୟା, ଓଡ଼ୋଃ ଆମାଃ ନାଗେନ୍ତେ ପ୍ରାଭୁଆଃ ନେ ଚିହ୍ନା ହବାଅଃଆ। ନେଲେମେ, ସିଙ୍ଗିରେୟାଃ ଉମ୍ବୁଲ୍ ଅକଆଃଚି ଆହାସ୍ରାଃ ଘାଡ଼ିରେ ଆୟାର୍ତେ ସେସେନ୍ କାନା, ଏନାକେ ଆଇଙ୍ଗ୍ ଗେଲ୍ ଚାଣ୍ଡାଙ୍ଗ୍ ଦୟାତେ ରୁହାଡ଼୍ ଆଉଇୟା। ଏନାମେନ୍ତେ ଘାଡ଼ିରେ ସିଙ୍ଗି ଅକନ୍ ଗେଲ୍ ଚାଣ୍ଡାଙ୍ଗ୍ ଆୟାର୍ତେ ସେନାକାନ୍ ତାଇକେନା, ଇମ୍ନାଙ୍ଗ୍ ଦୟା ସାଃତେ ରୁହାଡ଼୍ୟାନା।”
ଏନ୍ତେ ଯିହୁଦାରେନ୍ ରାଜା ହିଜିକିୟ ଆୟାଃ ବେମାର୍ଏତେ ବୁଗିୟାନାଏ, ଓଡ଼ୋଃ ଇନିଃ ପ୍ରାଭୁକେ ମାଇନାନ୍ ନାଗେନ୍ତେ ନେଆଁ ଅଲ୍କେଦା,
ଆଇଙ୍ଗ୍ କାଜିକେଦା, ଆଇଁୟାଃ ଗନଏଃ ଦିପିଲି ରେୟାଃ ତିକିନ୍ ସିଙ୍ଗି ଇମ୍ତା,
ପାତାଲ୍ ରେୟାଃ ଦୁହାର୍ତାଃରେ ବଲଃଆ,
ଓଡ଼ୋଃ ଆଇଁୟାଃ ଆପ୍ନାଃ ସାରେଜାକାନ୍ ବାରାଷ୍ଏତେ ବାଞ୍ଚାଅଃଆ।
ଆଇଙ୍ଗ୍ ଉଡ଼ୁଃ କେଦା, ଆଇଁୟାଃ ପ୍ରାଭୁକେ ଓଡ଼ୋଃ କାଇଙ୍ଗ୍ ନେଲିୟା,
ଜିନିଦ୍ ତାଇନ୍ତାନ୍ ହଡ଼କଆଃ ଥାଲାରେ ପ୍ରାଭୁକେ କାଇଙ୍ଗ୍ ନେଲିୟା,
ଚାଏ ଦିଶୁମ୍ରେ ତାଇନ୍ତାନ୍ ହଡ଼କେ ଓଡ଼ୋଃ କାଇଙ୍ଗ୍ ନେଲ୍କଆ।
ମିଣ୍ଡିଗୁପିନିୟାଃ କୁମ୍ବା ବାଦ୍ଲାଅ ଲେକା ଆଇଁୟାଃ କୁମ୍ବାକେ ଆଇଁୟାଃତାଃ ଏତେ ଏଟାଃତାଃରେ ଇଦିୟାକାନା,
ଲିଜାଃ ବାବାଇନିଃ ଲିଜାଃକେ ଚିଲ୍କା କୁଡ଼ାଏୟାଏ, ଆଇଁୟାଃ ଜୀୱାନ୍ ଏନ୍ଲେକା ହବାକାନା।
ଓଡ଼ୋଃ ଲିଜାଃକେ ହାଦ୍ ରିକାତାନ୍ ଲେକା ଆଇଁୟାଃ ଜୀଉ ହବାକାନା।
ପ୍ରାଭୁ ମୁସିଙ୍ଗ୍ତେଗି ଆଇଁୟାଃ ଜୀଉକେ ଟୁଣ୍ଡୁରିକାଏୟା ମେନ୍ତେ ଆଟ୍କାର୍ କେଦା।
ମିଦ୍ନୁବାଃ ଆଇଙ୍ଗ୍ ହାସୁତେ ରାଆଃକେଦାଇଙ୍ଗ୍, ଜେ'ଲେକା ମିଆଦ୍ ଟେଡ଼ଃ ଆଇଁୟାଃ ଜାଙ୍ଗ୍କେ ଟୁକ୍ଡ଼ା ଟୁକ୍ଡ଼ା ଟହେଜ୍କେଦା
ଏନ୍ଲେକା ପ୍ରାଭୁ ମୁସିଙ୍ଗ୍ତେଗି ଆଇଁୟାଃ ଜୀଉକେ ଟୁଣ୍ଡୁଇୟା ମେନ୍ତେ ଆଟ୍କାର୍ କେଦା।
ଆଇଙ୍ଗ୍ ଚାଡୁ ଅଡ଼େ ଓଡ଼ୋଃ ହାଁସା ବାଙ୍କୁଲି ଅଡ଼େ ଲେକା ରାଆଃ କେଦାଇଙ୍ଗ୍।
ଆଇଙ୍ଗ୍ ଦୁଦୁମୁଲ୍ ଲେକା ଏୟମ୍ କେଦାଇଙ୍ଗ୍।
ଚେତାନ୍ ସାଃତେ ସାଙ୍ଗିଲ୍ କେଦ୍ତେ ମେଦ୍ ତାଇଁୟାଃ କା ନେଲ୍ ଦାଡ଼ି ଲେକା ହବାୟାନା।
ହେ ପ୍ରାଭୁ, ଆଇଙ୍ଗ୍ଦ ଦୁକୁରେ ମେନାଇଁୟାଃ ଆଇଙ୍ଗ୍କେ ଦେଙ୍ଗାଇମେଁ।
ମେନ୍ଦ ଆଇଙ୍ଗ୍ ଚିନାଃ ମେନ୍ତେ କାଜିୟାଇଙ୍ଗ୍ ? ନେଆଁଦ ପ୍ରାଭୁଗି ରିକାକାଦା।
ଆଇଁୟାଃ ମନ୍ସୁରୁଦ୍ ପୁରାଃଗି ମେହେର୍ତେ ପେରେୟାକାନ୍ ହରାତେ ଆଇଁୟାଃ ଜୀଉ ବାରାଷ୍ ଗଟା ମାଡ଼ି ମାଡ଼ିତେ ଜୀଦାନ୍ ବିତାଅଃଆ।
ହେ ପ୍ରାଭୁ ନେ ସବେନ୍ ସାସାତି ହରାତେ ହଡ଼କ ବାଞ୍ଚାଅଃତାନା ଓଡ଼ୋଃ ନେ ସବେନାଃରେ ଆଇଁୟାଃ ଆତ୍ମା ହଁ ଜୀନିଦ୍ ହବାଅଃତାନା।
ଆମ୍ ଆଇଙ୍ଗ୍କେ ବୁଗି କେଦିୟାଁମ୍ ଓଡ଼ୋଃ ବାଞ୍ଚାଅ କେଦିୟାଁମ୍।
ଆଇଁୟାଃ ଜୀଉସୁକୁ ନାଗେନ୍ତେ ପୁରାଃଗି ଦୁକୁ ନାମ୍କେଦାଇଙ୍ଗ୍।
ମେନ୍ଦ ଆମ୍ ଆଇଁୟାଃ ଜୀଉକେ ଜିୟନଃ ଏତେ ବାଞ୍ଚାଅଃ କେଦାମ୍।
ଚିୟାଃଚି ଆମ୍ ଆମାଃ ଦୟାସାଃରେ ଆଇଁୟାଃ ପାପ୍ ସବେନାଃକେ ଦୟାକୁଣ୍ଡାମ୍ କେଦାମ୍।
ଚିୟାଃଚି ଅତେ ଲାତାର୍ ଆମାଃ ସାହାରାଅ କାଏ ରିକା ଦାଡ଼ିୟାଃ, ଗନଏଃ ଆମାଃ ସାହାରାଅ କାଏ ରିକା ଦାଡ଼ିୟାଃ।
ଅତେ ଲାତାର୍ରେ ତାଇନଃତାନ୍କ ଆମାଃ ସାର୍ତି କାଜିକେ ଆସ୍ରା କାକ ଦାଡ଼ିୟାଃ।
ତିସିଙ୍ଗ୍ ଆଇଙ୍ଗ୍ ଚିଲ୍କା ଆମାଃ ସାହାରାଅ ରିକା ତାନାଇଙ୍ଗ୍,
ଜିନିଦ୍ ହଡ଼କ, ଜିନିଦ୍ ହଡ଼କ ଏସ୍କାର୍ ସାହାରାଅ ରିକାୟାକ।
ଆପୁ ହନ୍କକେ ଆମାଃ ସାର୍ତି କାଜିକେ ଉଦୁବାକଆକ।
ପ୍ରାଭୁ ଆଇଙ୍ଗ୍କେ ବାଞ୍ଚାଅ କେଦିୟାଁ।
ଆଇଙ୍ଗ୍ ବାଜା ସାଡ଼ି କେଦ୍ତେ ମାଇନାନ୍ ରେୟାଃ ଦୁରାଙ୍ଗ୍ ରିକାଏୟାଇଙ୍ଗ୍।
ଆଲେ ପ୍ରାଭୁଆଃ ମାନ୍ଦିର୍ ଅଡ଼ାଃରେ ଜାନାଅ ଜାକେଦ୍ ଦୁରାଙ୍ଗ୍ ରିକାଏୟାଲେ।
ଯିଶାୟ କାଜିକାଦ୍ ତାଇକେନାଏ, “ଲଆ ରେୟାଃ ସସେଃକ୍କେ ମାଲାମ୍ ଲେକା ଘାଅ ଚେତାନ୍ରେ ଲାଗାଅଃମେଁ। ଏନାରେ ପ୍ରାଭୁ ଆମ୍କେ ବୁଗିମେୟାଁ।” ଇମ୍ତା ହିଜିକିୟ କୁଲିକାଦ୍ ତାଇକେନାଏ, “ଆଇଙ୍ଗ୍ ବୁଗିକେଦ୍ତେ ପ୍ରାଭୁଆଃ ମାନ୍ଦିର୍ତେ ସେନ୍ ଦାଡ଼ିୟାଇଙ୍ଗ୍, ଏନା ରେୟାଃ ଚିହ୍ନା ଚିନାଃ ତାନାଃ।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.