Munda Bible
ଯିଶାୟ 22
ଯୀରୁଶାଲେମ୍ ବିଷାଏରେ ଆୟାର୍କାଜି
ବୁରୁବେଡ଼ାରେୟାଃ ଦାର୍ଶାନ୍ ବିଷାଏରେ ଆୟାର୍କାଜି,
ନାହାଁଃଦ ଆପେୟାଃ ଚିନାଃ ହବାକାନା ଯେ, ସବେନ୍କ ଅଡ଼ାଃରାଃ ଛାତ୍ ଚେତାନ୍ତେ ରାକାବାକାନାପେ ? ହେ ରାସ୍କାତେ ପେରେଜାକାନ୍ ନାଗାର୍, ପୁରାଃ କାଉରିତେ ପେରେଜାକାନ୍ ନାଗାର୍,
ଆପେୟାଃ ମାଆଃକାନ୍ ହଡ଼କ, ତାରାଉଡ଼ିତେ କାକ ମାଆଃ ଗଏଃକାନା ଚାଏ ଲାଡ଼ାଇରେ କାକ ଗଏଃକାନା। ଆପେୟାଃ ରାଇଜ୍ ଚାଲାଅତାନ୍କ ମିସାତେ ନିରାକାନାକ ଓଡ଼ୋଃ ଇନ୍କୁକେ ଧାନୁ ଚିଆରି ସାବ୍କାଦ୍ ହଡ଼କ ତଲ୍କେଦ୍କଆକ। ଆପେ ସାଙ୍ଗିନ୍ତେ ନିରାକାନ୍ ତାଇକେନାପେ, ମେନ୍ଦ ଅକନ୍କ ସାନାବ୍ୟାନାକ, ଇନ୍କୁ ଥାଲାରେ ଲାଗ୍ଭାଗ୍ ସବେନ୍ ହଡ଼କ ମିସାତେ ତଲ୍ୟାନାକ। ଏନାମେନ୍ତେ ଆଇଙ୍ଗ୍ କାଜିକେଦାଇଙ୍ଗ୍, “ଆଇଙ୍ଗ୍କେ ଆଲପେ ନେଲିୟାଁ, ଆଇଁୟାଃ ହଡ଼କଆଃ ଦୁକୁକେ ନେଲ୍ କେଦ୍ତେ ରାଆଃ ନାଗେନ୍ତେ ବାଗି ତାଇଙ୍ଗ୍ପେ, ଆଇଙ୍ଗ୍କେ ଜୀଉରାଡ଼େଃ ଏମ୍ନାଙ୍ଗ୍ କୋସିସ୍ ଆଲପେ ରିକାଏୟା।” ପ୍ରାଭୁ, ପେଡ଼େୟାନ୍ ପ୍ରାଭୁଆଃ ହରାତେ ମିଆଦ୍ ହୁଲାଙ୍ଗ୍ ସାଲାକାନା, ଚିମ୍ତା ଗାଡ଼ାବେଡ଼ାରେୟାଃ ଦାର୍ଶାନ୍, ପୁରାଃ ହାଲାଗୁଲା, ହାରାଅ ଓଡ଼ୋଃ ଆଡ଼ାଃଉଡ଼ୁଃ ରେୟାଃ ବରୱାନ୍ କାଜିକ ସେଟେରା, ଏନ୍ ହୁଲାଙ୍ଗ୍ ନାଗାର୍ରେୟାଃ ପାଚ୍ରି ହାଦୁଡ଼ଃଆ ଓଡ଼ୋଃ ବୁରୁରେ ରାନାଃ ରିକାତାନ୍ ଆୟୁମଃଆ।
ଏଲମ୍ ନାଗାର୍ରେନ୍ ସିପାଇକ, ସାଦମ୍ ଗାଡ଼ିରେ ଓଡ଼ୋଃ ସାଦମ୍ ଚେତାନ୍ରେ ଦୁବାକାନ୍ ସିପାଇକଲଃ ତିଃଇରେ ଧାନୁ ଚିଆରି ସାବ୍କେଦ୍ତେ ହିଜୁଃତାନାକ। କିର୍ ନାଗାର୍ରେନ୍ ସିପାଇକ ଢାଲ୍ ସାବ୍କେଦ୍ତେ ସେକାଡ଼୍କାନାକ। ଯିହୁଦାରାଃ ପୁରାଃ ବୁଗିନ୍ ବୁରୁବେଡ଼ାକ ସାଦମ୍ ଗାଡ଼ିତେ ପେରେଜାକାନା। ଯୀରୁଶାଲେମ୍ ନାଗାର୍ରେୟାଃ ଦୁହାର୍ତାଃରେ ସାଦମ୍ରେ ଦୁବାକାନ୍ ସିପାଇକ ସେକାଡ଼୍କେଦ୍ତେ ତିଙ୍ଗୁକାନାକ। ପ୍ରାଭୁ ଯିହୁଦାରାଃ ସବେନ୍ ବାଞ୍ଚାଅ ହରାକେ ହାଣ୍ଡେଦ୍କେଦା।
ଏନ୍ ହୁଲାଙ୍ଗ୍ ଆପେ ବିର୍ରେ ତାଇନ୍ ହାଁତେୟାର୍ ଅଡ଼ାଃରାଃ ତାରାଉଡ଼ିକେ ନେଲ୍କେଦ୍ତେ ଆଉକେଦାପେ। ଆପେ ଦାଉଦ୍ଆଃ ନାଗାର୍ରାଃ ହାଦୁଡ଼ାକାନ୍ ପାଚ୍ରିକ ପୁରାଃଗି ମେନାଃ, ଏନା ନେଲ୍କେଦାପେ ଓଡ଼ୋଃ ଲାତାର୍ରେୟାଃ ବାନ୍ଦାଏତେ ଦାଆଃକ ମିଦ୍ତାଃରେ ହୁଣ୍ଡିକେଦାପେ। ଓଡ଼ୋଃ ଆପେ ଯୀରୁଶାଲେମ୍ ନାଗାର୍ରେୟାଃ ଅଡ଼ାଃକ ଲେକାକେଦାପେ ଓଡ଼ୋଃ ନାଗାର୍ରେୟାଃ ପାଚ୍ରିକେ କେଟେଦ୍ ଦହ ନାଗେନ୍ତେ ଅଡ଼ାଃକ ହାଦୁଡ଼୍ କେଦାପେ। ଆପେ ମାରି ବାନ୍ଦାରେ ଦାଆଃ ତାଇନ୍କା ମେନ୍ତେ ବାରିୟା ପାଚ୍ରି ଥାଲାରେ ଦାଆଃ ଦହହୁଣ୍ଡି ନାଗେନ୍ତେ ଦାଆଃଭାଣ୍ଡାର୍ ବାଇକେଦାପେ। ଅକଏ ନେ ସବେନାଃ ବାଇକେଦାଏ, ଇନିଃକେ ଆପେ କାପେ ନେଲ୍କିୟା ଚାଏ ଇନିଃ ପୁରାଃ ମାହାଏତେ ଏନାକେ ଉହାଟ୍କାଦ୍ ତାଇକେନା, ଇନିଃକେ କାପେ ମାଇନ୍କିୟା।
ଏନ୍ ହୁଲାଙ୍ଗ୍ ପ୍ରାଭୁ, ପୁରାଃ ପେଡ଼େୟାନ୍ ପ୍ରାଭୁ ଆପେକେ ରାଆଃ, ଏୟମ୍, ବହଃରାଃ ଉବ୍ କାତ୍ରାଅ ନାଙ୍ଗ୍, ମାୟାଙ୍ଗ୍ରେ ବାସ୍ତାରେୟାଃ ଲିଜାଃ ତୁସିଙ୍ଗ୍ ନାଙ୍ଗ୍ ଆପେକେ ନାଡ଼େଃତେ କେଡ଼ାକେଦ୍ପେୟା। ମେନ୍ଦ ନେଲେପେ, ଏନାରାଃ ବାଦ୍ଲାରେ ଆପେ ରିଜ୍ରାଙ୍ଗ୍କେଦ୍ତେ ଗୋଟ୍ରେନ୍ ଜାଁତୁକକେ ଗଏଃକେଦ୍ତେ ଇନ୍କୁଆଃ ମାସ୍ ଜମ୍ତାନ୍ଲଃ ଇଲିଆର୍ଖି ନୁଁକେଦାପେ। ଆପେ କାଜିତାନାପେ, “ଏଲା ହିଜୁଃପେ, ଜମ୍ ନୁଁକେଦ୍ତେ ଜୀୱାନ୍ବୁ ବିତାଅୟା, ଚିୟାଃଚି ହିଜୁଃ ହୁଲାଙ୍ଗ୍ଦ ଆବୁକେ ଗଜଃ ଲାଗାତିଙ୍ଗ୍ୟାଁଃ।”
ମେନ୍ଦ ପୁରାଃ ପେଡ଼େୟାନ୍ ପ୍ରାଭୁ ଆଇଙ୍ଗ୍ତାଃରେ ନେ କାଜି କାଜିକେଦା, “ନେଆଁଦ ସାର୍ତିତାନାଃ ଯେ, ଆପେୟାଃ ଗନଏଃ ହୁଲାଙ୍ଗ୍ ଜାକେଦ୍ ନେ ପାପ୍ କାମିରେୟାଃ ଛାମା ବାନଃଆ,” ପ୍ରାଭୁ ପୁରାଃ ପେଡ଼େୟାନ୍ ପ୍ରାଭୁ ନେ କାଜି କାଜିତାନା।
ଶିବ୍ନକେ ଚେତାଅ
ପ୍ରାଭୁ ପୁରାଃ ପେଡ଼େୟାନ୍ ପ୍ରାଭୁ ନେ କାଜି କାଜିତାନା, ଜୁ, ଖାଜାନ୍ଚି ଶିବ୍ନ ହେପାଦ୍ତେ ସେନଃମେ, ଇନିଃ ରାଜ୍ଦାର୍ବାର୍ରାଃ ସବେନ୍ ବିଷାଏ ଦେଖ୍ରେଖ୍ ରିକାତାନାଏ, ଇନିଃକେ କାଜିମେ, ଆମ୍ ନେତାଃରେ ଚିନାଃ ରିକାତାନାମ୍ ? ନେ ଠାୟାଦ୍ରେ ଆପ୍ନାଃ ନାଗେନ୍ତେ ତପାଗାଡ଼ା ଉର୍ ନାଙ୍ଗ୍, ସାଲାଙ୍ଗି ଠାୟାଦ୍ରେ ଆମାଃ ତପାଗାଡ଼ାକେ ସେକାଡ଼େ ନାଙ୍ଗ୍ ଓଡ଼ୋଃ ସେରେଙ୍ଗ୍ ହାଦ୍କେଦ୍ତେ ଆମାଃ ନାଗେନ୍ତେ ମିଆଦ୍ ରୁଡ଼ୁନ୍ ଠାୟାଦ୍ ବାଇ ନାଙ୍ଗ୍ ଆମ୍କେ ଅକଏ ଆଚୁକାଦ୍ମେୟାଁ ? ହେ ପୁରାଃ ପେଡ଼େୟାନ୍ନିଃ, ଚିର୍ଗାଲ୍କାନ୍ ତାଇନ୍ମେ। ପ୍ରାଭୁ ଆୟାଃ ପେଡ଼େଃତେ ଆମ୍କେ ହୁରାଙ୍ଗ୍ ଏଣ୍ଡାଃମେୟାଁ। ସାର୍ତିଗି ମିଆଦ୍ ବଲ୍ ବିୟୁର୍ ବିୟୁର୍ କେଦ୍ତେ ସେନଃ ଲେକା ଇନିଃ ଆମ୍କେ ମିଆଦ୍ ମାରାଙ୍ଗ୍ ଦିଶୁମ୍ତେ ହୁରାଙ୍ଗ୍ମେୟାଁ ଓଡ଼ୋଃ ଏନ୍ତାଃରେ ଆମାଃ ଗନଏଃ ହବାଅଃଆ, ଏନ୍ତାଃରେଗି ଆମାଃ ମାଇନାନ୍ରେୟାଃ ସାଦମ୍ ଗାଡ଼ିକ ତାଇନାଃ। ଆମ୍ଦ ଆମାଃ ଗୁସିୟାଁରାଃ ଅଡ଼ାଃରେନ୍ ହିଲାଙ୍ଗ୍ଅଃନିଃ ଲେକାନ୍ନିଃ ତାନ୍ମେ। ପ୍ରାଭୁ ଆମ୍କେ ଆମାଃ ମାରାଙ୍ଗ୍ ଠାୟାଦ୍ଏତେ ଗେନାମେୟାଁ ଓଡ଼ୋଃ ଲାତାର୍ତେ ତାହିଜ୍ ଆଡ଼୍ଗୁମେୟାଁ।
ପ୍ରାଭୁ କାଜିତାନାଏ, “ଏନ୍ ହୁଲାଙ୍ଗ୍ ଆଇଙ୍ଗ୍ ହିଲ୍କିୟରାଃ ହନ୍କଡ଼ା ଆଇଁୟାଃ ଦାସି ଇଲିୟାକିମ୍କେ କେଡ଼ାଇୟାଇଙ୍ଗ୍। ଆଇଙ୍ଗ୍ ଇନିଃକେ ଆମାଃ ଲିଜାଃ ଓଡ଼ୋଃ ମାୟାଙ୍ଗ୍ରେ ତଲଃତାନ୍ କାସ୍ନା ତୁସିଙ୍ଗ୍ ଓଡ଼ୋଃ ଆମାଃ ଆକ୍ତେୟାର୍ ଇନିଃକେ ଏମାଇୟାଇଙ୍ଗ୍। ଇନିଃ ଯୀରୁଶାଲେମ୍ରେନ୍ ଓଡ଼ୋଃ ଯିହୁଦା କିଲିରେନ୍ ଆପୁ ଲେକା ହବାଅଃଆଏ। ଆଇଙ୍ଗ୍ ଦାଉଦ୍ଆଃ କିଲିରେୟାଃ କୁଞ୍ଚି ଆୟାଃ ତାରାନ୍ରେ ଦହୟାଇଙ୍ଗ୍। ଇନିଃ ଅକଆଃ ନିଜେୟାଏ, ଏନା ଜେତାଏ ହାଣ୍ଡେଦ୍ କାକ ଦାଡ଼ିୟା, ଇନିଃ ଅକଆଃ ହାଣ୍ଡେଦେୟାଏ, ଏନା ଜେତାଏ ନିଜ୍ କାକ ଦାଡ଼ିୟା। ଆଇଙ୍ଗ୍ ଇନିଃକେ ମିଆଦ୍ କେଟେୟାନ୍ ଠାୟାଦ୍ରେ ଖିଲା ଲେକା ବିଦିୟାଇଙ୍ଗ୍ ଓଡ଼ୋଃ ଇନିଃ ଆୟାଃ ଆପୁକଆଃ କିଲିକ ନାଗେନ୍ତେ ମିଆଦ୍ ମାନାରାଙ୍ଗ୍ ଲେକାନ୍ ରାଜ୍ଗାଦିରେ ଦୁବା।
“ଆୟାଃ ଆପୁକଆଃ କିଲିକ ନାଗେନ୍ତେ ସବେନ୍ ମାନାରାଙ୍ଗ୍, ଆୟାଃ ହନ୍, ଜାଇନାତିକ ନାଗେନ୍ତେ ଓଡ଼ୋଃ ଡୁବ୍ନିଏତେ ଚାଟୁ ଜାକେଦ୍ ସବେନ୍ ହୁଡିଙ୍ଗ୍ ମାରାଙ୍ଗ୍ ଜିନିଷ୍କ ଆୟାଃ ଚେତାନ୍ରେ ଲାଦିୟଃଆ। ପୁରାଃ ପେଡ଼େୟାନ୍ ପ୍ରାଭୁ କାଜିତାନାଏ, ଏନ୍ ହୁଲାଙ୍ଗ୍ ଅକନ୍ ଖିଲା ବିଦାକାନ୍ ତାଇକେନା ଏନା ଏନ୍ତାଃଏତେ ଗେନାକଆଃ ଓଡ଼ୋଃ ଉର୍କେଦ୍ତେ ଲାତାର୍ରେ ଉୟୁଃକଆଃ ଏନ୍ତେ ଇନିୟାଃ ଚେତାନ୍ରେ ଅକନ୍ ବାହାରମ୍ ଲାଦିକାନ୍ ତାଇକେନା, ଏନା ଜିୟନ୍କଆଃ, ଚିଆଃଚି ପ୍ରାଭୁ ନେ କାଜି କାଜିକାଦା।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.