Munda Bible
ଯିଶାୟ 21
ବାବିଲୋନ୍ ଜିଅନଃରେୟାଃ ଦାର୍ଶାନ୍
ଦରେୟା ହେପାଦ୍ରାଃ ଗିତିଲ୍ପିଡ଼ି ବିଷାଏରେ ଆୟାର୍କାଜି,
“ଏନା ଦାକ୍ଷିଣ୍ସାଃରେ ଜୋର୍ସେ ହିଜୁଃତାନ୍ ହୁର୍ଲାସି ହୟ ଲେକା ଗିତିଲ୍ପିଡ଼ିଏତେ, ମିହୁଡ଼୍ ବରୱାନ୍ ଦିଶୁମ୍ଏତେ ହିଜୁଃତାନାଏ।” ମିଆଦ୍ ବରୱାନ୍ ଦୁକୁରେୟାଃ ଦାର୍ଶାନ୍ ଆଇଁୟାଃ ନାଗେନ୍ତେ ଉଦୁବାକାନା, ଆପାନ୍ କାଜିତେୟାଃ କାଏ ରିକାଏନିଃ ଆଡଃଗି ଆଲକାଏ ରିକାଏକା ଓଡ଼ୋଃ ରେରେଃକ୍ନିଃ ରେଃକ୍ କାମିକ ରିକାଏକା।
ହେ ଏଲମ୍ରେନ୍ ହଡ଼କ, ଆକ୍ତେୟାର୍ ରିକାଏପେ, ହେ ମିଦିୟନ୍ରେନ୍ ହଡ଼କ କେସେଦ୍ ବିୟୁରେପେ। ବାବିଲୋନ୍ ନାଗେନ୍ତେ ଅକଆଃ ରାନାଃ ହବାଅଃ ତାଇକେନା, ଆଇଙ୍ଗ୍ ଏନ୍ ସବେନାଃଇଙ୍ଗ୍ ଟୁଣ୍ଡୁଇୟା।
ଆଇଁୟାଃ ମାୟାଙ୍ଗ୍ ହାସୁ ପୁରାଃଗି ହବାକାନା। ହନ୍ ଜାନାମିତାନ୍ କୁଡ଼ିରାଃ ଦୁକୁ ଲେକା ଆଇଁୟାଃ ପୁରାଃଗି ଦୁକୁ ହବାକାନା। ଆଇଙ୍ଗ୍ ନେ'ଲେକା ଦୁକୁରେ ଉୟୁଗାକାନାଇଙ୍ଗ୍ ଯେ, ଆୟୁମ୍ କାଇଙ୍ଗ୍ ଦାଡ଼ିତାନା। ଆଇଙ୍ଗ୍ ନେ'ଲେକା ବର ଭିନାଅକାନାଇଙ୍ଗ୍ ଯେ, ଜେତ୍ନାଃ ନେଲ୍ କାଇଙ୍ଗ୍ ଦାଡ଼ିତାନା। ଆଇଁୟାଃ ମନ୍ସୁରୁଦ୍ ପୁରାଃଗି ଥାର୍ଥାରାଅଃତାନା। ଆଇଙ୍ଗ୍ ପୁରାଃଗି ବରତେ ଏକ୍ଲାଅଃ ତାନାଇଙ୍ଗ୍। ଆଇଙ୍ଗ୍ ଅକ ସିଙ୍ଗି ହାସୁର୍ ଦିପିଲିକେ ସାନାଙ୍ଗ୍ ତାଇକେନାଇଙ୍ଗ୍, ଏନା ଆଇଁୟାଃ ନାଗେନ୍ତେ ବରଏତାନ୍ ଲେକାନାଃ ହବାକାନା।
ଇନ୍କୁ ଜମ୍ ନାଗେନ୍ତେ ଜଜମାଃ ସେକାଡ଼େ ତାନାକ, ଚାଟାଇ ବିଲ୍ତାନାକ। ଓଡ଼ୋଃ ଇନ୍କୁ ଜମ୍ ନୁଁ ରିକାତାନାକ। ଇମ୍ତାଗି କାଜି ଆୟୁମ୍ୟାନା, “ହେ ସିପାଇକଆଃ ଆଗୁଆଇକ, ଏଲା ବିରିଦ୍ପେ, ଦାଗିକାନ୍ ଢାଲ୍ରେ ସୁନୁମ୍ ଦୁଲ୍କେଦ୍ତେ ସେକାଡ଼େପେ।”
ଚିୟାଃଚି ପ୍ରାଭୁ ଆଇଙ୍ଗ୍କେ ନେ କାଜି କାଜିକାଦିୟାଁ, “ଜୁ, ସେନ୍କେଦ୍ତେ ମିଆଦ୍ ହରନିଃକେ ସାଲାଇମେ, ଇନିଃ ଅକଆଃ ନେଲେୟାଏ, ଏନାକ ଉଦୁବେକାଏ। ଓଡ଼ୋଃ ଇନିଃ ଚିମ୍ତା ସାଦମ୍ଗାଡ଼ି, ବାବାରିୟା ଜଡ଼ା ସାଦମ୍ରେ ଦୁବାକାନ୍, ଗାଧା କରେ ଓଡ଼ୋଃ ଉଁଟ୍କଆଃ ଚେତାନ୍କରେ ଦୁବାକାନ୍ ନେଲ୍କଆଏ, ଇମ୍ତା ଇନିଃ ଚିହୁଲ୍ତେ ଜାତ୍ନାଅ ତାନ୍ଲଃ ଆୟୁମେକାଏ।”
ଏନ୍ତେ ଏନ୍ ହରନିଃ ଟେଡ଼ଃ ଲେକା କାଉରିକେଦ୍ତେ କାଜିକେଦା, “ହେ ପ୍ରାଭୁ, ଆଇଙ୍ଗ୍ ପୁରାଃ ଦିପିଲି ଜାକେଦ୍ ନିଦାସିଙ୍ଗି ହରତାନ୍ ଅଡ଼ାଃରେ ତିଙ୍ଗୁକେଦ୍ତେ ହର ତାନାଇଙ୍ଗ୍ ଓଡ଼ୋଃ ଗଟା ନୁବାଃ ଆଇଁୟାଃ ହର ଠାୟାଦ୍ରେ ମେନାଇୟାଁ।”
ଇନ୍କୁ ନେଲଃତାନାକ, ମିହୁଡ଼୍ ସାଦମ୍ଗାଡ଼ି ଝୁଣ୍ଡ୍ଲଃ ହିଜୁଃତାନାକ। ଓଡ଼ୋଃ ପାର୍ମେଶ୍ୱାର୍ଆଃ ଦୁଁତ୍ କାଜିରୁହାଡ଼୍ତାନ୍ଲଃ କାଜିକେଦାଏ, “ବାବିଲୋନ୍ ଉୟୁଃୟାନା, ଉୟୁଃୟାନା ଓଡ଼ୋଃ ଆୟାଃ ବାଇୟାକାନ୍ ମୁରୁତ୍ ସବେନାଃ ଉୟୁଃକେଦ୍ତେ ଟୁକ୍ଡ଼ା ଟୁକ୍ଡ଼ାୟାନ୍ଲଃ ଧୁଡ଼ିରେ ମେସାୟାନା।”
ହେ, ଆଇଁୟାଃ ଇସ୍ରାଏଲ୍ ହଡ଼କ, ଆପେ ଜ ଇର୍କେଦ୍ତେ କଲମ୍ରେ ମାଡ଼େନ୍କାନ୍ ଜ ଲେକା ହବାକାନାପେ, ଆଇଙ୍ଗ୍ ପେଡ଼େୟାନ୍ ପ୍ରାଭୁ, ଇସ୍ରାଏଲ୍ରେନ୍ ପାର୍ମେଶ୍ୱାର୍ତାଃଏତେ ଅକନ୍ କାଜି ଆୟୁମାକାଦାଇଙ୍ଗ୍, ଏନା ଆପେକେ ଉଦୁବାପେ ତାନାଇଙ୍ଗ୍।
ଦୁମା ଓଡ଼ୋଃ ଆରବ୍ ବିଷାଏରେ ଆୟାର୍କାଜି
ଦୁମା ବିରୁଧ୍ରେ ଆୟାର୍କାଜି।
ମିହୁଡ଼୍ ସେୟିର୍ଏତେ ଆଇଙ୍ଗ୍କେ ହାକାଅକେଦ୍ଲଃ କାଜିତାନା, “ଏ ହରନିଃ, ଚିମିନ୍ ନୁବାଃକାନା ? ଏ ହରନିଃ, ଚିମିନ୍ ନୁବାଃ ହବାକାନା ?”
ହରନିଃ କାଜିକେଦାଏ, “ସେତାଃ ହିଜୁଃତାନା ଓଡ଼ୋଃ ନୁବାଃ ହଁ ସେଟେର୍ ତାନା। ଆପେ କୁଲି ସାନାଙ୍ଗ୍ତାନ୍ ରେଦ କୁଲି ଦାଡ଼ିୟାଃପେ, ଆପେ ହିଜୁଃରୁହାଡ଼୍ପେ।”
ଆରବ୍ ବିଷାଏରେ ଆୟାର୍କାଜି,
“ହେ, ଦଦାନ୍ରେନ୍ ସେନ୍ହରାତାନ୍ ହଡ଼କ, ଆପେ ଆରବ୍ରେୟାଃ ବିର୍ରେ ମିଦ୍ନୁବାଃ ତାଇନାଃପେ।” ଟେମା ପାର୍ଗାନ୍ରେ ତାଇନ୍ତାନ୍ ହେ ହଡ଼କ, ତେତାଙ୍ଗ୍ତାନ୍ନିଃକେ ଦାଆଃ ଆଉକେଦ୍ତେ ଏମାଇପେ ଓଡ଼ୋଃ ଉକୁକେଦ୍ତେ ନିରାକାନ୍ ହଡ଼କତାଃ ହଲଙ୍ଗ୍ ସାବ୍କେଦ୍ତେ ନେପେଲ୍ ନାଗେନ୍ତେ ସେନଃପେ। ଚିୟାଃଚି ଇନ୍କୁ ତାରାଉଡ଼ିଏତେ, ଲେସେର୍ ତାରାଉଡ଼ିଏତେ, ଧାନୁରେ ଟାନାଅକେଦ୍ତେ ଦହକାନ୍ ଚିଆରିଏତେ ଓଡ଼ୋଃ ପୁରାଃ ବରୱାନ୍ ଲାପ୍ଡ଼ାଇ ଏତେକ ନିର୍ୟାନା।
ଚିୟାଃଚି ପ୍ରାଭୁ ଆଇଙ୍ଗ୍କେ କାଜିକାଦିୟାଁ, “ନାଲାନାମ୍ ନାଙ୍ଗ୍ ଦାସିକାନ୍ ହଡ଼ ଆୟାଃ କାମିରାଃ ବାରାଷ୍ ପୁରାଅଃ ଦିପିଲିକେ ଲେକା ଇଦିୟା, ଏନ୍ଲେକାଗି କେଦାର୍ରାଃ ମିଦ୍ ବାରାଷ୍ କା ପୁରାଅଃ ଭିତାର୍ରେ ଆୟାଃ ସବେନ୍ ମାନାରାଙ୍ଗ୍ ଜିୟନ୍ ରିକାଅଃଆ। ଓଡ଼ୋଃ କେଦାର୍ କିଲିରେନ୍ ଲାଡ଼ାଇତାନ୍ ହଡ଼କଏତେ କାଟିଃଲେକାଗି ଧାନୁ ଚିଆରିଲଃ ଲାଡ଼ାଇତାନ୍ ହଡ଼କ ସାରେଜଃଆ, ଚିୟାଃଚି ପ୍ରାଭୁ ଇସ୍ରାଏଲ୍ରେନ୍ ପାର୍ମେଶ୍ୱାର୍ ନେ କାଜି କାଜିକାଦା।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.