Munda Bible
ଏନେଟେଦ୍ 44
ଆଦାକାନ୍ ରୁପାରାଃ କାଟୋରା
ଯୋଷେଫ୍ ଆୟାଃ ଅଡ଼ାଃ ଗୁସିୟାଁରାଃ ଦାସିକେ ହୁକୁମ୍କିୟା, “ନେ ହଡ଼କଆଃ ବସ୍ତାରେ ଚିମିନାଙ୍ଗ୍ ଜମେୟାଁଃ ସାବେୟାଏ ଇମିନାଙ୍ଗ୍ ପେରେଃକେଦ୍ତେ ଏମାକମେ। ଓଡ଼ୋଃ ସବେନ୍କଆଃ ବସ୍ତାରେ ଆକଆଃ ରୁପା ଟାକାକେ ହଁଗି ଦହତାମେ। ହୁଡିଙ୍ଗ୍ ହାଗାରାଃ ବସ୍ତାରେ ଆୟାଃ ଟାକାଲଃ ଆଇଁୟାଃ ରୁପାରାଃ କାଟୋରା ଦହତାମେ।” ଅଡ଼ାଃ ଗୁସିୟାଁରାଃ ଦାସି ଯୋଷେଫ୍ଆଃ କାଜିଲେକା ରିକାକେଦାଏ। ଏଟାଃ ହୁଲାଙ୍ଗ୍ ସେତାଃରେ ଇନ୍କୁ ଆକଆଃ ଗାଧାକଲଃ ସେନଃ ନାଙ୍ଗ୍ ଅଡଙ୍ଗ୍ୟାନାକ। ଇନ୍କୁ ନାଗାର୍ଏତେ ଅଡଙ୍ଗ୍ୟାନ୍ଲଃ କାଟିଃ ସାଙ୍ଗିନ୍ ସେନଃୟାନ୍ଚି, ଯୋଷେଫ୍ ଆୟାଃ ଅଡ଼ାଃ ଗୁସିୟାଁରାଃ ଦାସିକେ କାଜିକିୟା, “ଆମ୍ ଜାଲ୍ଦି ଏନ୍ ହଡ଼କଆଃ ଦୟା ଦୟା ନିର୍ ସେଟେର୍କେଦ୍ତେ କାଜିକମେ, ‘ଆପେ ବୁଗିନାଃ ରିକା ବାଦ୍ଲାରେ ଚିନାଃମେନ୍ତେ ଏତ୍କାନାଃ ରିକାକେଦାପେ ? ଆଇଁୟାଃ ଗମ୍କେ ଅକ କାଟୋରାରେ ନୁଁଏଃ ଓଡ଼ୋଃ ଆୟାର୍କାଜି ଉଦୁବାଃଏ, ଏନ୍ ରୁପାରାଃ କାଟୋରାକେ ଚିନାଃମେନ୍ତେ କୁମ୍ବୁଡ଼ୁ ଆଉକେଦାପେ ?’ ନେ'ଲେକା କାମି ରିକାକେଦ୍ତେ ଆପେ ଗୁହ୍ନାଁ ରିକାକାଦାପେ।”
ଅଡ଼ାଃ ଗୁସିୟାଁରାଃ ଦାସି ଇନ୍କୁତାଃ ସେଟେର୍କେଦ୍ତେ ଏନ୍ଲେକାଗି କାଜିକେଦ୍କଆ। ଇନ୍କୁ କାଜିରୁହାଡ଼୍କିୟାକ, “ଆଲେୟାଃ ଗମ୍କେ ଚିନାଃମେନ୍ତେ ନେ'ଲେକାଏ କାଜିତାନା ? ଆମାଃ ଦାସିକଆଃ ନେ'ଲେକାନ୍ କାମି ଆଲେତାଃଏତେ ସାଙ୍ଗିନ୍ରେ ତାଇନ୍କା। ନେଲେମେ, ସିଦା ଆଲେ ହିଜୁଃକେଦ୍ତେ କିନାନ୍ ଦିଶୁମ୍ତେ ରୁହାଡ଼୍ ତାଇକେନାଲେ ଇମ୍ତା ଆଲେୟାଃ ବସ୍ତାରେ ଅକ ରୁପା ଟାକା ନାମାକାଦ୍ ତାଇକେନାଲେ, ଏନା ହଗି ଆଲେ କିନାନ୍ ଦିଶୁମ୍ଏତେ ଆମାଃତାଃ ଆଉରୁହାଡ଼୍କାଦାଲେ। ତାବ୍ଦ ଆମାଃ ଗୁସିୟାଁରାଃ ଅଡ଼ାଃଏତେ ରୁପା ଚାଏ ସୋନା ଚିଲ୍କା କୁମ୍ବୁଡ଼ୁ ଇଦିୟାଲେ ?” ଏନାତେ ଆମାଃ ନେ ଦାସିକଆଃ ଭିତାର୍ଏତେ ଅକଏତାଃରେ ଏନା ନାମଃଆ, ଇନିଃକେ ଗନଏଃ ସାଜାଇ ନାମଃକା, ଓଡ଼ୋଃ ଆଲେ ସବେନ୍କ ଏନ୍ ଗମ୍କେୟାଃ ଦାସିଲେ ହବାଅଃକା।
ଏନ୍ତେ ଏନ୍ ହଡ଼ କାଜିକେଦାଏ, “ଠାଉକାଗିଆ, ଆପେୟାଃ କାଜି ଲେକାଗି ହବାଅଃକା। ଯେତାଏତାଃରେ କାଟୋରା ନାମଃଆ, ଇନିଃ ଆଇଁୟାଃ ଦାସି ହବାଅଃଆଏ, ମେନ୍ଦ ଏଟାଃକକେ ଗୁହ୍ନାଁ କା କାଜିୟଃଆ।” ଏନ୍ତେ ଇନ୍କୁ ଇମ୍ତାଗି ଆକଆଃ ଗାଧା ଚେତାନ୍ଏତେ ବସ୍ତା ଆଡ଼୍ଗୁକେଦ୍ଲଃ ରାଡ଼ାକେଦାକ।
ଅଡ଼ାଃ ଗୁସିୟାଁରାଃ ଦାସି ମାରାଙ୍ଗ୍ନିଆଃ ବସ୍ତାଏତେ ଏଟେଦ୍କେଦ୍ତେ ହୁଡିଙ୍ଗ୍ନିଆଃ ବସ୍ତା ଜାକେଦ୍ ଦାଣାଁକେଦାଏ। ଟୁଣ୍ଡୁରେ ହୁଡିଙ୍ଗ୍ ହାଗା ବେଞ୍ଜାମିନ୍ରାଃ ବାସ୍ତାଏତେ ଏନ୍ ରୁପାରେୟାଃ କାଟୋରା ନାମ୍ୟାନା।
ଏନା ନେଲ୍କେଦ୍ତେ ଇନ୍କୁ ଦୁକୁତେ ଆକଆଃ ଆପ୍ନାଃ ଆପ୍ନାଃ ଲିଜାଃ ଚେଚାଃକେଦାକ ଓଡ଼ୋଃ ଗାଧା ଚେତାନ୍ରେ ଲାଦିକେଦ୍ତେ ମିସାର୍ ନାଗାର୍ତେ ରୁହାଡ଼୍ୟାନାକ।
ଯିହୁଦା ଓଡ଼ୋଃ ଇନିୟାଃ ହାଗାକ ଯୋଷେଫ୍ଆଃ ଅଡ଼ାଃ ସେଟେର୍କେଦ୍ତେ ବଲ ଇମ୍ତା ଯୋଷେଫ୍ ଏନ୍ତାଃରେଗି ତାଇନ୍କେନା, ଓଡ଼ୋଃ ଇନ୍କୁ ସେନ୍କେଦ୍ତେ ଇନିୟାଃ ଆୟାର୍ରେ ଅମ୍ବାକେଦ୍ତେ ଉୟୁଃୟାନାକ। ଏନ୍ତେ ଯୋଷେଫ୍ ଇନ୍କୁକେ କାଜିକେଦ୍କଆ, “ଆପେ ନେଆଁ ଚିନାଃ ରିକାକେଦାପେ ? ଆଇଙ୍ଗ୍ ଲେକାନ୍ ହଡ଼ ଆୟାର୍କାଜି ସାରି ଦାଡ଼ିୟାଃକ, ଏନା ଚିନାଃ କାପେ ସାରିତାଇକେନା ?”
ଏନ୍ତେ ଯିହୁଦା କାଜିରୁହାଡ଼୍କେଦାଏ, “ଆଲେ ଗମ୍କେୟାଃ ଆୟାର୍ରେ ଚିନାଃଲେ କାଜିୟା ? ଚାଏ ଚିନାଃ କାଜିକେଦ୍ତେ ଆପାନ୍କେ ବୁଗିନ୍ ମେନ୍ତେ କାଜିୟାଲେ ? ପାର୍ମେଶ୍ୱାର୍ ଆମାଃ ଦାସିକଆଃ ଗୁହ୍ନାଁ ଉଦୁବ୍କାଦାଏ। ନେଲେମେ, ଅକଏତାଃରେ କାଟୋରା ନାମାକାନା, ଇନିଃ ଓଡ଼ୋଃ ଆଲେ ସବେନ୍କ ଆଲେୟାଃ ଗମ୍କେୟାଃ ଦାସିଲେ ହବାୟାନା।”
ଯୋଷେଫ୍ କାଜିକେଦାଏ, “କାହାଗି, ନେ ଲେକାନ୍ ଅନ୍ୟାୟ କାମି ଆଇଙ୍ଗ୍ କାଇଙ୍ଗ୍ ରିକାଏୟା ! ଅକଏତାଃରେ ନେ ରୁପାରେୟାଃ କାଟୋରା ନାମାକାନା, ଇନିଃ ଏସ୍କାର୍ ଆଇଁୟାଃ ଦାସି ହବାନାଃ। ବାକି ସବେନ୍କ ଆପେୟାଃ ଆପୁତାଃ ଜୀଉସୁକୁତେ ସେନଃପେ।”
ବେଞ୍ଜାମିନ୍ ନାଗେନ୍ତେ ଯିହୁଦାରାଃ କାଜିଗହାର୍
ଯିହୁଦା ଯୋଷେଫ୍ତାଃତେ ସେନ୍କେଦ୍ତେ କାଜିକିୟା, “ହେ ଗମ୍କେ, ଦାୟାକେଦ୍ତେ ଆଇଙ୍ଗ୍କେ କାଜି ଇଚିଙ୍ଗ୍ମେ, ଓଡ଼ୋଃ ଆଇଁୟାଃ ଚେତାନ୍ରେ ଆଲମ୍ ଖିସ୍ଅଃଆ, ଚିଆଃଚି ଆମ୍ଦ ଫାରୋ ରାଜା ଲେକାନିଃ ତାନ୍ମେ। ହେ ଗମ୍କେ ଆମ୍ ଆଲେକେ କୁଲିକାଦ୍ଲେ ତାଇକେନାମ୍, ‘ଆପେୟାଃ ଆପୁ ଚାଏ ଏଟାଃ ହାଗା ମେନାଇୟାଚି ?’ ଏନ୍ତେ ଆଲେ ଗମ୍କେକେ କାଜିରୁହାଡ଼୍କାଇ ତାଇକେନାଲେ, ‘ଆଲେୟାଃ ଆପୁ ମେନାଇୟା, ଇନିଃ ହାଡ଼ାମ୍ୟାନ୍ଗିୟାଏ ଓଡ଼ୋଃ ଆୟାଃ ହାଡ଼ାମ୍ ଦିପିଲିରେ ଜାନାମ୍କାନ୍ ମିଆଁଦ୍ ହନ୍ ମେନାଇୟା। ଏନ୍ ହନ୍ରାଃ ଆଡଃମିଆଦ୍ ହାଗା ତାଇକେନାଏ, ଇନିଃ ଟୁଣ୍ଡୁକେଦାଏ, ନାହାଁଃ ନିଃ ଏସ୍କାର୍ ଆୟାଃ ଏଙ୍ଗାତେୟାଃ ସାରେଜାକାନ୍ ହନ୍ ତାନିଃ, ଏନା ନାଙ୍ଗ୍ ଆପୁତେ ଇନିଃକେ ପୁରାଃଗି ଦୁଲାଡ଼ାଃଏ।’ ସିଦା ମିସା ହିଜୁଃକାନ୍ ତାଇକେନାଲେ ଇମ୍ତା ଆମ୍ ଆଲେକେ କାଜିକାଲେ ତାଇକେନାମ୍, ‘ଆପେ ଇନିଃକେ ଆଇଙ୍ଗ୍ତାଃ ଆଉଇପେ, ଆଇଙ୍ଗ୍ ଇନିଃକେ ଆପ୍ନାଃ ମେଦ୍ତେ ନେଲିୟାଇଙ୍ଗ୍।’ ଇମ୍ତା ଆଲେ ଆମ୍କେ କାଜିକାଦ୍ମେ ତାଇକେନାଲେ, ‘ହେ ଗମ୍କେ, ଏନ୍ ଧାଙ୍ଗ୍ଡ଼ା କଡ଼ା ଆୟାଃ ଆପୁତେକେ ବାଗି କାଏ ଦାଡ଼ିୟା। ଇନିଃ ଆପୁତେକେ ବାଗିକେଦ୍ତେ ହିଜୁଃରେ, ଆପୁତେ ଗଏଃକଆ।’ ମେନ୍ଦ ଆମ୍ ଆଲେକେ କାଜିକେଦ୍ଲେୟାମ୍, ‘ଆପେୟାଃ ହାଗା ଆପେଲଃ ଆପେୟାଃ ହୁଡିଙ୍ଗ୍ ହାଗା କାଏ ହିଜୁଃରେଦ, ଆପେ ଆଇଁୟାଃ ହେପାଦ୍ କାପେ ହିଜୁଃ ଦାଡ଼ିୟା।’
“ଆଲେ ରୁହାଡ଼୍କେଦ୍ତେ ଆଲେୟାଃ ଆପୁତାଃରେ ଗମ୍କେ ଆମାଃ ସବେନ୍ କାଜି ଉଦୁବ୍କେଦାଲେ। ଏନ୍ତେ ଆଲେୟାଃ ଆପୁ ଆଲେକେ କାଜିକେଦ୍ଲେୟା, ‘ଜୁ, ଆଡଃମିସା ସେନ୍ପେ ଓଡ଼ୋଃ ଆବୁନାଙ୍ଗ୍ ଜଜମାଃ କିରିଙ୍ଗ୍କେଦ୍ତେ ହିଜୁଃପେ।’ ଆଲେ କାଜିରୁହାଡ଼୍କିୟାଲେ, ‘ଆଲେ କାଲେ ସେନ୍ ଦାଡ଼ିୟା। ଆଲେଲଃ ହୁଡିଙ୍ଗ୍ ହାଗା ସେନ୍ ରେଦ, ସେନ୍ ଦାଡ଼ିୟାଲେ। ଚିଆଃଚି ହୁଡିଙ୍ଗ୍ ହାଗା ଆଲେଲଃ କାଏ ତାଇନ୍ ରେଦ ଆଲେ ଏନ୍ ହଡ଼ଆଃ ହେପାଦ୍ କାଲେ ସେନ୍ ଦାଡ଼ିୟା।’ ଏନ୍ତେ ଆଲେୟାଃ ଆପୁ ଆଲେକେ କାଜିକେଦ୍ଲେୟା, ‘ଆପେଦ ସାରିତାନାପେ, ଆଇଁୟାଃ କୁଡ଼ି ରାହେଲ୍ ତାଃଏତେ ବାରିୟାଗି ହନ୍ ଜାନାମ୍କାନ୍ ତାଇକେନାକିନ୍। ଇନ୍କିନାଃଏତେ ମିହୁଡ଼୍ ଆଇଙ୍ଗ୍କେ ବାଗିକେଦ୍ତେ ସେନଃୟାନା, ଇନିଃକେ ସାର୍ତିଗି ବିର୍ରେନ୍ ଜାଁତୁକ ଚାଗାଡ଼୍ ପଙ୍ଗାଡ଼୍କେଦ୍ତେ ଜମ୍କିୟାକ। ଏନ୍ ହୁଲାଙ୍ଗ୍ତାଃଏତେ ଆଇଙ୍ଗ୍ ଇନିଃକେ ଓଡ଼ୋଃ କାଇଙ୍ଗ୍ ନେଲ୍ ଦାଡ଼ିୟାନା। ନାହାଁଃ ଆପେ ନେ ହନ୍କେ ଆଇଁୟାଃତାଃଏତେ ଇଦିକିରେଦ, ଓଡ଼ୋଃ ଇନିୟାଃ ଚେତାନ୍ରେ ଜେତ୍ନାଃ ସାଙ୍କାଟ୍ ହବାକେନଃ ରେଦ, ଆପେ ଆଇଙ୍ଗ୍କେ ନେ ହାଡ଼ାମ୍ ଦିପିଲିରେ ଇନିୟାଃ ବିଷାଏରେ ପାହାମ୍ ଉଡ଼ୁଃତାନ୍ଲଃ ଦୁକୁତେ ଗଜିୟାଁପେ।’
“ଏନାମେନ୍ତେ ଆଲେ ଆଲେୟାଃ ଆପୁତାଃ ସେଟେର୍ ଇମ୍ତା ନେ ସେପେଡ଼େଦ୍ ଆଲେଲଃ କାଏ ତାଇନ୍ ରେଦ, ଓଡ଼ୋଃ ଆଲେଲଃ ଆପୁ ଇନିଃକେ କାଏ ନେଲ୍ନାମି ରେଦ, ଇମ୍ତାଗି ଜୀଉତାୟାଃ ଟୁଣ୍ଡୁକେନଃଆ। ଚିୟାଃଚି ଇନିୟାଃ ଜୀଉଦ ନେ ସେପେଡ଼େଦ୍ରାଃ ଜୀଉଲଃ ତଲାକାନା। ଏନାତେ ଏନ୍ ସେପେଡ଼େଦ୍କେ କାଲେ ଇଦିରେଦ, ଆଲେ ଆଲେୟାଃ ଆପୁକେ ହାଡ଼ାମ୍ ଦିପିଲିରେ ଦୁକୁ ଏମ୍କେଦ୍ତେ ଗଏଃକିୟାଲେ ଲେକା ହବାଅଃଆ। ଆଡଃଗି ଆଇଙ୍ଗ୍ ଆଇଁୟାଃ ଆପୁତାଃରେ ନେ ସେପେଡ଼େଦ୍ରାଃ ଜେତାନ୍ ନକ୍ସାନ୍ କା ହବାଅଃଆ ମେନ୍ତେ କାଜିତାନ୍ଲଃ କାଜି କାଦାଇଙ୍ଗ୍, ‘ଆଇଙ୍ଗ୍ ଇନିଃକେ ଆମାଃତାଃ କାଇଙ୍ଗ୍ ଆଉଇରେଦ, ଆଇଁୟାଃ ଗଟା ଜୀଦାନ୍ ଆମାଃ ଆୟାର୍ରେ ଗୁହ୍ନାଁ ହବାକେଦ୍ତେ ତାଇନାଇଙ୍ଗ୍।’ ଏନାମେନ୍ତେ ହେ ଗମ୍କେ ବିନ୍ତିମେ ତାନାଇଙ୍ଗ୍, ଦାୟାକେଦ୍ତେ ନେ ସେପେଡ଼େଦ୍ରାଃ ବାଦ୍ଲାରେ ଆଇଙ୍ଗ୍କେ ଦାସି ଦହଇଙ୍ଗ୍ମେ, ମେନ୍ଦ ନେ ସେପେଡ଼େଦ୍କେ ହାଗାକଲଃ ସେନ୍ ନାଙ୍ଗ୍ ଆଚୁଇମେ। ଚିୟାଃଚି ନେ ସେପେଡ଼େଦ୍ ଆଇଁୟାଃଲଃ କାଏ ତାଇନ୍ ରେଦ, ଆଇଙ୍ଗ୍ ଚିଲ୍କା ଆପୁଆଃ ହେପାଦ୍ତେ ସେନ୍ ଦାଡ଼ିୟାଇଙ୍ଗ୍ ? ଓଡ଼ୋଃ ଆଇଁୟାଃ ଆପୁଆଃ ଚେତାନ୍ରେ ଅକ ଦୁକୁରାଃ ସାଙ୍କାଟ୍ ହବାଅଃଆ, ଏନା ଚିଲ୍କାତେଇଙ୍ଗ୍ ନେଲ୍ ଦାଡ଼ିୟା ?”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.