Munda Bible
ଏନେଟେଦ୍ 42
ଯୋଷେଫ୍ଆଃ ହାଗାକ ମିସାର୍ତେ ସେନଃ
ମିସାର୍ ଦିଶୁମ୍ରେ ହିତା ନାମଃତାନା ମେନ୍ତେ ଯାକୁବ୍ ଆୟୁମ୍କେଦ୍ଚି ଆୟାଃ ହନ୍କକେ କାଜିକେଦ୍କଆ, “ଚିନାଃ ମେନ୍ତେ ମିହୁଡ଼୍ ଆଡଃମିହୁଡ଼୍ରାଃ ମେଦ୍ମୁହାଁଡ଼୍ ନେଲ୍ତାନାପେ ?” ଇନିଃ ଆଡଃଗି କାଜିକେଦ୍କଆ, “ଆଇଙ୍ଗ୍ ଆୟୁମ୍କାଦାଇଙ୍ଗ୍ ମିସାର୍ ଦିଶୁମ୍ରେ ହିତା ନାମଃତାନା। ଏନାମେନ୍ତେ ଆପେ ଏନ୍ତାଃ ସେନଃପେ ଓଡ଼ୋଃ ଆବୁଆଃ ନାଙ୍ଗ୍ ହିତା କିରିଙ୍ଗ୍ ଆଉୱେପେ, ତାବ୍ଦ ଆବୁ କା ଗଏଃକେଦ୍ତେ ଜୀନିଦ୍ ତାଇନାଃବୁ।”
ଏନ୍ତେ ଯୋଷେଫ୍ଆଃ ଗେଲେୟା ହାଗାକ ହିତା କିରିଙ୍ଗ୍ ନାଗେନ୍ତେ ମିସାର୍ ଦିଶୁମ୍ତେ ସେନଃୟାନାକ। ମେନ୍ଦ ଯାକୁବ୍ ଯୋଷେଫ୍ଆଃ ହୁଡିଙ୍ଗ୍ ହାଗାତେକେ ଇନ୍କୁଲଃ କାଏ କୁଲ୍କିୟା, ଚିୟାଃଚି ଇନିଃ ବେଞ୍ଜାମିନ୍ଆଃ ଚେତାନ୍ରେ ଜେତ୍ନାଃ ସାଙ୍କାଟ୍ ହବାକେନଃଆ ମେନ୍ତେ ବରକେଦା।
ଯାକୁବ୍ଆଃ ହନ୍କ ଏଟାଃ ହଡ଼କଲଃ ହିତା କିରିଙ୍ଗ୍ ନାଗେନ୍ତେ ସେନଃୟାନାକ, ଚିୟାଃଚି କିନାନ୍ ଦିଶୁମ୍ରେ ହଁଗି ରିଙ୍ଗା ହବାକାନ୍ ତାଇକେନା। ଏନ୍ ଦିପିଲିରେ ଯୋଷେଫ୍ ମିସାର୍ ଦିଶୁମ୍ରେନ୍ ଲାଟ୍ସାହେବ୍ ତାଇକେନାଏ ଓଡ଼ୋଃ ଦିଶୁମ୍ରେନ୍ ସବେନ୍ ହଡ଼କତାଃରେ ହିତା ଆଖ୍ରିଙ୍ଗ୍ ତାଇକେନା। ଏନାତେ ଯୋଷେଫ୍ଆଃ ହାଗାକ ହିଜୁଃୟାନ୍ଲଃ ଇକ୍ଡ଼ୁମ୍କେଦ୍ତେ ଜହାର୍କିୟାକ। ଯୋଷେଫ୍ ଆୟାଃ ହାଗାକକେ ନେଲ୍କେଦ୍କଚି ନେଲ୍ଉରୁମ୍ କେଦ୍କଆଏ, ମେନ୍ଦ କା ସାରିକାଦ୍କ ଲେକା ଇନ୍କୁଲଃ ଜାଗାର୍କେଦାଏ, ଓଡ଼ୋଃ ଇନ୍କୁଲଃ ଖିସ୍କାନ୍ ଲେକା କାଜିକେଦ୍କଆଏ, “ଆପେ କତାଃଏତେ ହିଜାକାନାପେ ?”
ଇନ୍କୁ କାଜିରୁହାଡ଼୍କିୟାକ, “ହିତା କିରିଙ୍ଗ୍ ନାଙ୍ଗ୍ କିନାନ୍ ଦିଶୁମ୍ଏତେ ହିଜାକାନାଲେ।”
ଯୋଷେଫ୍ ଆୟାଃ ହାଗାକକେ ନେଲ୍ଉରୁମ୍ କେଦ୍କଆଏ, ମେନ୍ଦ ଇନ୍କୁ ଇନିଃକେ କାକ ନେଲ୍ଉରୁମ୍ ଦାଡ଼ିକିୟା। ଇମ୍ତା ଯୋଷେଫ୍ ଇନ୍କୁଆଃ ବିଷାଏରେ କୁମୁ ନେଲାକାଦ୍ ତାଇକେନାଏ, ଏନା ଇନିଃ ପାହାମ୍କେଦାଏ ଓଡ଼ୋଃ କାଜିକେଦ୍କଆଏ, “ଆପେ ସବେନ୍କ କୁମ୍ବୁଡ଼ୁ ତାନ୍ପେ, ଆଲେୟାଃ ଦିଶୁମ୍ରାଃ ନାରାଦୁରା ଠାୟାଦ୍କ ଦାଣାଁନାମ୍ ନାଗେନ୍ତେ ହିଜାକାନାପେ।”
ଇନ୍କୁ କାଜିରୁହାଡ଼୍କିୟାକ, “କାହାଗି ଗମ୍କେ, ଏନ୍ ଲେକା କାହାଗି, ଆମାଃ ନେ ଦାସିକ ଜଜମାଃ କିରିଙ୍ଗ୍ ନାଗେନ୍ତେ ହିଜୁଃକାନାକ। ଆଲେ ସବେନ୍କ ମିଆଁଦ୍ ଆପୁଆଃ ହନ୍କ ତାନ୍ଲେ। ଆମାଃ ନେ ଦାସିକ ବୁଗିନ୍ ହଡ଼କ ତାନ୍କ, କୁମ୍ବୁଡ଼ୁକ ନାହାଁଲାଃକ।”
ଇନିଃ ଇନ୍କୁକେ କାଜିକେଦ୍କଆ, “କାହାଗି, ଆପେ ଆଲେୟାଃ ଦିଶୁମ୍ରାଃ ଅକ ଠାୟାଦ୍କ ନାରାଦୁରା ମେନାଃ, ଏନା ଦାଣାଁନାମ୍ ନାଗେନ୍ତେ ହିଜୁଃକାନାପେ।”
ଇନ୍କୁ କାଜିକିୟା, “ଆମାଃ ନେ ଦାସିକ ଗେଲ୍ବାର୍ ହାଗିୟା ମେନାକଆ, କିନାନ୍ ଦିଶୁମ୍ରେ ତାଇନ୍ତାନ୍ ମିଆଁଦ୍ ହଡ଼ରାଃ ହନ୍କ ତାନ୍କ। ସବେନ୍କଆଃଏତେ ହୁଡିଙ୍ଗ୍ ହାଗା ଆପୁତାଃରେ ମେନାଇୟା, ଆଡଃମିହୁଡ଼୍ ହାଗା ଟୁଣ୍ଡୁକେଦାଏ।”
ଯୋଷେଫ୍ ଇନ୍କୁକେ କାଜିକେଦ୍କଆ, “ଆଇଙ୍ଗ୍ ଆପେକେ କୁମ୍ବୁଡ଼ୁକ ମେନ୍ତେ ଅକଆଃ କାଜିକେଦାଇଙ୍ଗ୍, ଏନା ଆପେ ସାର୍ତିଗି କୁମ୍ବୁଡ଼ୁକ ତାନ୍ପେ।” ଆଇଙ୍ଗ୍ ଫାରୋରାଃ ନୁତୁମ୍ତେ କିରିୟାତାନ୍ଲଃ କାଜିପେ ତାନାଇଙ୍ଗ୍, “ଆଇଙ୍ଗ୍ ବିଡ଼ାଅପେ ନାଙ୍ଗ୍ ଆପେୟାଃ ହୁଡିଙ୍ଗ୍ ହାଗା ନେତାଃତେ ଆଉରି ହିଜୁଃ ଜାକେଦ୍ ଆପେ ନେତାଃଏତେ କାପେ ସେନ୍ ଦାଡ଼ିୟା। ଆପେକଏତେ ମିହୁଡ଼୍କେ କୁଲିପେ, ଇନିଃ ଆପେୟାଃ ହୁଡିଙ୍ଗ୍ ହାଗାକେ ଆଉରି ଆଉଇ ଜାକେଦ୍ ଏଟାଃ ସବେନ୍କ ନେତାଃରେ ତଲ୍କେଦ୍ତେ ତାଇନ୍ପେ। ତାବ୍ଦ ଆପେ ସାର୍ତି କାଜି ତାନାପେଚି କାହା, ଏନା ସାରିଅଃଆ କା'ରେଦ ଆଇଙ୍ଗ୍ ଫାରୋରାଃ ନୁତୁମ୍ତେ କିରିୟାତାନ୍ଲଃ କାଜିତାନାଇଙ୍ଗ୍, ଆପେ କୁମ୍ବୁଡ଼ୁକ ତାନ୍ପେ ମେନ୍ତେ ସାରିୟଃଆ।” ଏନ୍ତେ ଯୋଷେଫ୍ ଇନ୍କୁକେ ଆପି ମାହା ଜେହେଲ୍ରେ ତଲ୍କେଦ୍ତେ ଦହକେଦ୍କଆ।
ଆପି ହୁଲାଙ୍ଗ୍ରେ ଯୋଷେଫ୍ ଇନ୍କୁକେ କାଜିୟାଦ୍କଆ, “ଆଇଙ୍ଗ୍ ପାର୍ମେଶ୍ୱାର୍କେ ବରଆଃଇଙ୍ଗ୍। ଏନାତେ ଆପେ ମିଆଁଦ୍ କାମି ରିକାଏପେ ତାବ୍ଦ ବାଞ୍ଚାଅପେ ନାମେୟା। ଆପେ ବୁଗିନ୍ ହଡ଼ ତାନ୍ପେ ରେଦ, ଆପେକଏତେ ମିହୁଡ଼୍ ହାଗାକେ ନେ ଜେହେଲ୍ରେ ବାଗିତାଇପେ ଓଡ଼ୋଃ ରିଙ୍ଗାକାନ୍ ହରାତେ ଜଜମାଃ ସାବ୍କେଦ୍ଲଃ ଅଡ଼ାଃତେ ସେନଃପେ। ମେନ୍ଦ ଆପେ ଆପେୟାଃ ହୁଡିଙ୍ଗ୍ ହାଗାକେ ଆଇଙ୍ଗ୍ତାଃ ଆଉଇପେ, ତାବ୍ଦ ଆପେୟାଃ କାଜି ସାର୍ତି ହବାଅଃଆ ଓଡ଼ୋଃ ଆପେ କାପେ ଗଜଃଆ।” ଏନ୍ତେ ଇନ୍କୁ ଏନ୍ଲେକାଗି ରିକାକେଦାକ।
ଇନ୍କୁ ଆକ ଆକରେ କାଜିୟାନାକ, “ଆବୁ ଆବୁଆଃ ହାଗା ଯୋଷେଫ୍ ବିରୁଧ୍ରେ ଗୁହ୍ନାଁ ରିକାକେଦାବୁ, ଇନିଃ ଆବୁତାଃରେ କାଜି ଗହାର୍କେଦ୍ ଇମ୍ତା ଆବୁ ଇନିୟାଃ ଜୀଉରେୟାଃ ବିଲ୍କାଅ ନେଲ୍କେଦ୍ରେୟ କାବୁ ଆୟୁମ୍କେଦା। ଏନାମେନ୍ତେ ତିସିଙ୍ଗ୍ ନେ ଦୁକୁ ଆବୁଆଃ ଚେତାନ୍ରେ ହିଜୁଃତାନା।”
ରୁବେନ୍ ଇନ୍କୁକେ କାଜିକେଦ୍କଆ, “ଆପେ ଏନ୍ ସିଟିୟାରାଃ ବିରୁଧ୍ରେ ପାପ୍ କାମି ଆଲ୍ପେ ରିକାଇୟା ମେନ୍ତେ ଚିନାଃ ଆଇଙ୍ଗ୍ ଆପେକେ କାଇଙ୍ଗ୍ କାଜିକାଦ୍ପେ ତାଇକେନା ? ଏନ୍ରେହ ଆପେ କାପେ ଆୟୁମ୍କେଦା, ଏନାମେନ୍ତେ ନେଲେପେ, ନାହାଁଃ ଆବୁ ଇନିୟାଃ ମାୟୋମ୍ରାଃ ବାଦ୍ଲା ନାମେତାନାବୁ।” ଯୋଷେଫ୍ ଇନ୍କୁଆଃ ଜାଗାର୍ତାନ୍ତେୟାଃ ଆଟ୍କାର୍ ଉରୁମ୍କେଦାଏ, ଇନ୍କୁ କାକ ସାରି ଦାଡ଼ିକେଦା, ଚିୟାଃଚି ଇନିଃ ଇନ୍କୁଲଃ ବାରାନ୍ ଜାଗାର୍ ସାରିକାଦ୍ନିଆଃ ହରାତେ ଜାଗାର୍ ତାଇକେନା। ଯୋଷେଫ୍ ଇନ୍କୁତାଃଏତେ ସେନଃୟାନ୍ଲଃ ରାଆଃକେଦାଏ, ଏନ୍ତେ ଆଡଃମିସା ହିଜୁଃରୁହାଡ଼୍କେଦ୍ତେ ଇନ୍କୁଲଃ ଜାଗାର୍କେଦାଏ। ଇନିଃ ଇନ୍କୁଏତେ ଶିମିୟୋନ୍କେ ସାବ୍କେଦ୍ତେ ଇନ୍କୁଆଃ ଆୟାର୍ରେ ତଲ୍କିୟା।
ଯୋଷେଫ୍ଆଃ ହାଗାକଆଃ କିନାନ୍ ଦିଶୁମ୍ତେ ରୁହାଡ଼୍
ଯୋଷେଫ୍ ଇନ୍କୁଆଃ ବସ୍ତାରେ ହିତା ପେରେଃକେଦ୍ତେ ସବେନ୍କଆଃ ବସ୍ତାରେ ଟାକା ପାଏସା ରୁହାଡ଼୍ ନାଙ୍ଗ୍ ଓଡ଼ୋଃ ହରାରେ ଇନ୍କୁ ଜମେକାକ ମେନ୍ତେ ଜଜମାଃକ ପେରେଃ ନାଙ୍ଗ୍ ଆଚୁକେଦ୍କଆଏ। ଇନ୍କୁ ନାଗେନ୍ତେ ଏନ୍ ଲେକାଗି ରିକାକେଦାକ। ଏନ୍ତେ ଇନ୍କୁ ଆକଆଃ ଗାଧାକଆଃ ଚେତାନ୍ରେ ହିତା ଲାଦିକେଦ୍ତେ ଏନ୍ତାଃଏତେ ଅଡଙ୍ଗ୍ୟାନାକ। ଇନ୍କୁ ମିଦ୍ ନୁବାଃ ବିତାଅନାଙ୍ଗ୍ ମିଆଁଦ୍ ଠାୟାଦ୍ତାଃରେ ତାଇନ୍ୟାନାକ ଓଡ଼ୋଃ ଗାଧାକେ ଜଜମାଃ ଏମ୍ ନାଙ୍ଗ୍ ମିହୁଡ଼୍ ଆୟାଃ ବସ୍ତା ରାଡ଼ା ଇମ୍ତା ଟାକା ପାଏସାକେ ନେଲ୍କେଦା। ବସ୍ତା ରାଡ଼ାଲଃଗି ଆୟାଃ ଟାକା ପାଏସା ଦହାକାନ୍ ନେଲ୍କେଦାଏ। ଇନିଃ ଆୟାଃ ହାଗାକକେ କାଜିକେଦ୍କଆ, “ନେଲେପେ, ଆଇଁୟାଃ ଟାକା ପାଏସାଦ ଆଇଙ୍ଗ୍ତାଃଗି ରୁହାଡ଼୍କାନା, ନେ ବସ୍ତା ଭିତାର୍ରେ ମେନାଃ।” ନେଆଁ ଆୟୁମ୍କେଦ୍ତେ ଇନ୍କୁ ହାଏକାଟ୍ୟାନାକ ଓଡ଼ୋଃ ଇନ୍କୁ ବରତେ ମିହୁଡ଼୍ ଆଡଃମିହୁଡ଼୍ଆଃ ମେଦ୍ମୁହାଁଡ଼୍ ନେଲ୍କେଦ୍ତେ କାଜିକେଦାକ, “ପାର୍ମେଶ୍ୱାର୍ ଆବୁଲଃ ନେଆଁ ଚିନାଃ ରିକାକେଦାଏ ?”
ଏନ୍ତେ ଇନ୍କୁ କିନାନ୍ ଦିଶୁମ୍ରେ ତାଇନ୍ତାନ୍ ଆପୁ ଯାକୁବ୍ତାଃ ସେଟେର୍ୟାନା ଓଡ଼ୋଃ ଆକଲଃ ଅକ କାଜିକ ହବାକାନ୍ ତାଇକେନା, ଏନ୍ ସବେନାଃ ଆପୁତେକେ ଉଦୁବ୍କେଦ୍ତେ କାଜିକିୟାକ, “ଏନ୍ ଦିଶୁମ୍ରେନ୍ ଲାଟ୍ସାହେବ୍ ଆଲେକେ ଆକଆଃ ଦିଶୁମ୍ରେନ୍ ରେରେଃକ ମେନ୍ତେ ଆଟ୍କାର୍କେଦ୍ତେ କେଟେଦ୍ ମଚାତେ କାଜିକେଦ୍ଲେୟା।” ଆଲେ ଇନିଃକେ କାଜିକିୟାଲେ, “ଆଲେ ବୁଗିନ୍ ହଡ଼ ତାନ୍ଲେ, କୁମ୍ବୁଡ଼ୁକ ନାହାଁଲାଃଲେ। ଆଲେ ଗେଲ୍ବାର୍ ହାଗାକ ମେନାଲେୟା, ସବେନ୍କ ମିଆଁଦ୍ ଆପୁରେନ୍ ହନ୍କ ତାନ୍ଲେ। ଆଲେଏତେ ମିହୁଡ଼୍ ଟୁଣ୍ଡୁକେଦାଏ ଓଡ଼ୋଃ ସବେନ୍କଆଃଏତେ ହୁଡିଙ୍ଗ୍ ହାଗା କିନାନ୍ ଦିଶୁମ୍ରେ ଆପୁତାଃରେ ମେନାଇୟା।” ଏନ୍ତେ ଏନ୍ ଦିଶୁମ୍ରେନ୍ ଲାଟ୍ସାହେବ୍ ଆଲେକେ କାଜିକେଦ୍ଲେୟା, “ଆପେ ମିଆଁଦ୍ କାମି ରିକାଏ ରେଦ, ଆଇଙ୍ଗ୍ ଆପେକେ ବୁଗିନ୍ ହଡ଼କ ତାନ୍ପେ ମେନ୍ତେଇଙ୍ଗ୍ ସାରି ଦାଡ଼ିୟା। ଆପେଏତେ ମିହୁଁଡ଼୍ ହାଗାକେ ଆଇଙ୍ଗ୍ତାଃରେ ବାଗିତାଇପେ ଓଡ଼ୋଃ ଜଜମାଃ ଜାଞ୍ଜିଅଃତାନ୍ ହରାତେ ଆପେୟାଃ ଅଡ଼ାଃ ନାଙ୍ଗ୍ ହିତା ଇଦିକେପେ। ଆପେ ଆପେୟାଃ ହୁଡିଙ୍ଗ୍ ହାଗାକେ ଆଇଙ୍ଗ୍ତାଃ ଆଉକେଦ୍ତେ ହିଜୁଃ ରେଦପେ, ଆପେ ବୁଗିନ୍ ହଡ଼ ତାନ୍ପେ ଓଡ଼ୋଃ କୁମ୍ବୁଡ଼ୁକ ନାହାଁଲାଃପେ, ଏନା ଆଇଙ୍ଗ୍ ସାରି ଦାଡ଼ିୟାଇଙ୍ଗ୍। ଏନ୍ତେ ଆଇଙ୍ଗ୍ ଆପେୟାଃ ହାଗାକେ ରୁହାଡ଼୍ତାଇୟାଇଙ୍ଗ୍ ଓଡ଼ୋଃ ନେ ଦିଶୁମ୍ରେ ତାଇନ୍କେଦ୍ତେ କିରିଙ୍ଗ୍ ଆଖ୍ରିଙ୍ଗ୍ ଦାଡ଼ିୟାପେ।”
ଏନ୍ତେ ଇନ୍କୁ ଆକଆଃ ବସ୍ତା ସବେନାଃ ରାଡ଼ାକେଦାକ ଓଡ଼ୋଃ ସବେନ୍କ ଆକଆଃ ବସ୍ତା ଭିତାର୍ଏତେ ଥାଇଲାରେ ଟାକା ପାଏସା ଦହକାନ୍ ନାମ୍କେଦାକ। ଏନ୍ ଟାକା ପାଏସା ନେଲ୍କେଦ୍ତେ ଇନ୍କୁ ଓଡ଼ୋଃ ଆକଆଃ ଆପୁ ପୁରାଃଗି ବରକେଦାକ। ଇନ୍କୁଆଃ ଆପୁ ଯାକୁବ୍ ଇନ୍କୁକେ କାଜିକେଦ୍କଆ, “ଆପେ ଆଇଙ୍ଗ୍କେ ହନ୍ଗାଁଣା ବାଙ୍କ ଲେକା ବାଇଙ୍ଗ୍ ତାନାପେ, ଯୋଷେଫ୍ ବାଙ୍ଗାଇୟା, ଶିମିୟୋନ୍ ବାଙ୍ଗାଇୟା ଓଡ଼ୋଃ ନାହାଁଃ ବେଞ୍ଜାମିନ୍କେ ହଗି ଇଦି ନାଙ୍ଗ୍ ସାନାଙ୍ଗ୍ ତାନାପେ। ନେ ସବେନାଃ ଆଇଁୟାଃଲଃ ଚିନାଃ ହବାଅଃତାନା ?”
ଏନ୍ତେ ରୁବେନ୍ ଆପୁତେକେ କାଜିକିୟା, “ଆଇଙ୍ଗ୍ ବେଞ୍ଜାମିନ୍କେ ଆମାଃତାଃ କାଇଙ୍ଗ୍ ଆଉରୁହାଡ଼ି ରେଦ, ଆମ୍ ଆଇଁୟାଃ ବାରାନ୍ ହନ୍କିନ୍କେ ଗଏଃକିନ୍ମେ। ବେଞ୍ଜାମିନ୍କେ ଆଇଁୟାଃ ଜିମାରେ ବାଗିତାଇମେ, ଆଇଙ୍ଗ୍ ଇନିଃକେ ଆଡଃମିସା ଆମାଃତାଃ ଆଉରୁହାଡ଼ିୟାଇଙ୍ଗ୍।”
ମେନ୍ଦ ଯାକୁବ୍ କାଜିକିୟାଏ, “ଆଇଁୟାଃ ହନ୍ ଆପେଲଃ କାଏ ସେନାଃ, ଇନିୟାଃ ହାଗାତେ ଗୟାକାନାଏ, ଇନିଃ ଏସ୍କାର୍ ଜୀନିଦ୍ ମେନାଇୟା। ଆପେୟାଃ ସେନଃ ହରାରେ ଇନିୟାଃ ଜେତ୍ନାଃ ହବାକେନଃ ରେଦ, ଆଇଙ୍ଗ୍ ନେ ହାଡ଼ାମ୍ ଦିପିଲିରେ ଇନିୟାଃ ବିଷାଏରେ ଏୟମ୍ତାନ୍ଲଃ ଜୀଉତାଇୟାଁଃ ଟୁଣ୍ଡୁଃଆ।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.