Munda Bible
ଏନେଟେଦ୍ 19
ସଦୋମ୍ ଓଡ଼ୋଃ ଗମ୍ରା ନାଗାର୍ରାଃ ଜିଅନଃ
ସିଙ୍ଗିହାସୁର୍ୟାନ୍ ଇମ୍ତା ଲୁଟ୍ ସଦୋମ୍ ନାଗାର୍ରେୟାଃ ବଲଃ ଦୁଆର୍ତାଃରେ ଦୁବାକାନ୍ ତାଇକେନା, ଇମ୍ତା ସିର୍ମାରେନ୍ ଏନ୍ ବାରିୟା ଦୁଁତ୍ ସଦୋମ୍ତେ ସେଟେର୍ୟାନା। ଇନିଃ ଇନ୍କିନ୍କେ ନେଲ୍କେଦ୍ତେ ଆକିନ୍ଲଃ ନେପେଲ୍ ନାଙ୍ଗ୍ ବିରିଦ୍ୟାନାଏ, ଏନ୍ତେ ଅମ୍ବାକେଦ୍ତେ ଜହାର୍ତାନ୍ଲଃ କାଜିକେଦ୍କିନାଏ, “ହେ ଆଇଁୟାଃ ମାଇନାନ୍କିନ୍, ଆଇଙ୍ଗ୍ ବିନ୍ତିବେନ୍ ତାନାଇଙ୍ଗ୍, ଦାୟାକେଦ୍ତେ ଆବେନ୍ ଆଇଁୟାଃ ଅଡ଼ାଃ ହିଜୁଃବେନ୍ ଓଡ଼ୋଃ ତିସିଙ୍ଗ୍ ନେ ଦାସିଆଃ ଅଡ଼ାଃରେ କାଟା ଆବୁଙ୍ଗ୍କେଦ୍ତେ ମିଦ୍ନୁବାଃ ତାଇନ୍ବେନ୍ ଓଡ଼ୋଃ ଇଦାନ୍ତେ ବିରିଦ୍ୟାନ୍ଲଃ ଆବେନ୍ ଆବେନାଃ ହରାରେ ସେନଃବେନ୍।”
ଏନ୍ତେ ଇନ୍କିନ୍ କାଜିକିୟାକିନ୍, “କାହାଗି, ଆଲିଙ୍ଗ୍ ନାଗାର୍ରେୟାଃ ଛାଉର୍ରେ ମିଦ୍ନୁବାଃ ତାଇନାଃଲିଙ୍ଗ୍।”
ମେନ୍ଦ ଲୁଟ୍ ପୁରାଃଗି କାଜିକେଦ୍କିନ୍ ହରାତେ, ଇନ୍କିନ୍ ଇନିୟାଃ ଅଡ଼ାଃତେ ବଲୟାନାକିନ୍। ଇନିଃ ଇନ୍କିନାଃ ନାଗେନ୍ତେ ବେଗାର୍ ସୋଢ଼ାରାଃ ହଲଙ୍ଗ୍ ଓଡ଼ୋଃ ଜଜମାଃକ ବାଇକେଦାଏ, ଏନ୍ତେ ଇନ୍କିନ୍ ଜମ୍ କେଦାକିନ୍।
ଇନ୍କିନ୍ ଦୁଡ଼ୁମ୍ ସେନଃ ସିଦାରେ, ସଦୋମ୍ ନାଗାର୍ରେନ୍ ସେପେଡ଼େଦ୍ ଓଡ଼ୋଃ ହାଡ଼ାମ୍ ହଡ଼କ ହିଜୁଃକେଦ୍ତେ ଲୁଟ୍ରାଃ ଅଡ଼ାଃକେ ଚାରିଓସାଃ କେସେଦ୍ ବିହୁର୍କେଦାକ। ଇନ୍କୁ ଲୁଟ୍କେ ହାକାଅକେଦ୍ତେ କାଜିକିୟାକ, “ଆମାଃ ଅଡ଼ାଃତେ ଅକନ୍ ହଡ଼କିନ୍ ହିଜାକାନା, ଇନ୍କିନ୍ କତାଃରେ ମେନାକିନା ? ଇନ୍କିନ୍କେ ଆଲେତାଃ ଆଉକେଦ୍ତେ ହିଜୁଃମେଁ। ଆଲେ ସବେନ୍କ ଇନ୍କିନ୍ଲଃ ହଡ଼୍ମରାଃ ଏତ୍କାନ୍ କାମି ରିକାୟାଲେ।”
ଲୁଟ୍ ଅଡ଼ାଃରାଃ ବଲ ଦୁଆର୍ ହାଣ୍ଡେଦ୍କେଦ୍ତେ ବାହାରିତେ ଅଡଙ୍ଗ୍ୟାନା, ଓଡ଼ୋଃ ଇନ୍କୁକେ କାଜିକେଦ୍କଆ, “ହେ ହାଗାକ, ଆଇଙ୍ଗ୍ ବିନ୍ତିପେ ତାନାଇଙ୍ଗ୍, ଦାୟାକେଦ୍ତେ ନେ'ଲେକାନ୍ ଏତ୍କାନ୍ କାମି ଆଲପେ ରିକାୟା। ନେଲେପେ, ଜେତାନ୍ କଡ଼ାଲଃ ହଡ଼୍ମରାଃ ଏତ୍କାନ୍ କାମି କା ରିକାକାଦ୍ ଆଇଁୟାଃ ବାରିୟା ହନ୍କୁଡ଼ି ମେନାକିନା, ଆଇଙ୍ଗ୍ ଇନ୍କିନ୍କେ ଆପେତାଃ ଆଉକିନ୍ ତାନାଇଙ୍ଗ୍, ଆପେୟାଃ ଇଛା ସାନାଙ୍ଗ୍ ଲେକାଗି ଇନ୍କିନ୍କେ ରିକାକିନ୍ପେ। ମେନ୍ଦ ନେ ହଡ଼କିନ୍କେ ଜେତ୍ନାଃ ଆଲପେ ରିକାକିନା, ଚିୟାଃଚି ଇନ୍କିନ୍ ଆଇଁୟାଃ ଅଡ଼ାଃତେ ପେଡ଼ାଃଅ ହିଜାକାନାକିନ୍ ଓଡ଼ୋଃ ଆଇଁୟାଃ ଅଡ଼ାଃରେ ମେନାକିନା।”
ଇମ୍ତା ଇନ୍କୁ କାଜିକେଦାକ, “ଦୟା ସାଃତେ ରୁହାଡ଼୍ମେଁ, ଆଡଃଗି କାଜିକେଦାକ, ‘ନେ ହଡ଼ ଏଟାଃ ଦିଶୁମ୍ଏତେ ନେତାଃ ହିଜୁଃକାନାଏ ଓଡ଼ୋଃ ନାହାଁଃ ଆବୁଆଃ ବିଚାର୍ନିଃ ହବାଅଃ ନାଙ୍ଗ୍ ସାନାଙ୍ଗ୍ତାନାଏ ! ନାହାଃଁଦ ଆଲେ ଆମ୍କେ ଇନ୍କିନ୍ଏତେ ପୁରାଃଗି ସିଗିଦ୍ମେୟାଁଲେ।’” ଏନ୍ତେ ଇନ୍କୁ ଲୁଟ୍କେ ଉଦୁର୍ ଗେନାକେଦ୍ତେ ଦୁହାର୍ ହାଦୁଡ଼୍ ଏଟେଃକେଦାକ। ମେନ୍ଦ ଏନ୍ ବାରାନ୍କିନ୍ ତିଃଇ ଜିଲିଙ୍ଗ୍କେଦ୍ତେ ଲୁଟ୍କେ ଅଡ଼ାଃ ଭିତାର୍ତେ ଆଉକିୟାକିନ୍ ଓଡ଼ୋଃ ଦୁଆର୍ ହାଣ୍ଡେଦ୍ କେଦାକିନ୍। ଏନ୍ତେ ଦୁହାର୍ ହେପାଦ୍ରେ ତାଇକେନ୍ ହୁଡିଙ୍ଗ୍ ମାରାଙ୍ଗ୍ ସବେନ୍କକେ ଆନ୍ଧା କେଦ୍କଆକିନ୍ ଓଡ଼ୋଃ ଇନ୍କୁ ଦୁହାର୍ କାକ ଦାଣାଁନାମ୍ ଦାଡ଼ିକେଦା।
ଲୁଟ୍ ସଦୋମ୍ ନାଗାର୍କେ ବାଗିକେଦା
ଏନ୍ ବାରାନ୍ ହଡ଼କିନ୍ ଲୁଟ୍କେ କୁଲିକିୟାକିନ୍, “ନେ ନାଗାର୍ରେ ଆମାଃ ଆପ୍ନାଃ ଓଡ଼ୋଃ ଅକଏ ମେନାକଆ ! ହନ୍କଡ଼ା, ହନ୍କୁଡ଼ି ଚାଏ ଆରାହନ୍, ନେ ସବେନ୍କକେ ନେତାଃଏତେ ଇଦିକେଦ୍ତେ ସେନଃମେ। ଆଲିଙ୍ଗ୍ ନେ ନାଗାର୍କେ ଜିଅନ୍ ରିକା ନାଙ୍ଗ୍ ସେନ୍ତାନାଲିଙ୍ଗ୍। ଚିୟାଃଚି ନେ ନାଗାର୍ରେନ୍ ହଡ଼କଆଃ ପାପ୍ ନାଗେନ୍ତେ ପ୍ରାଭୁଆଃ ଆୟାର୍ରେ ପୁରାଃଗି ରାନାଃ ଆୟୁମଃତାନା, ଏନାତେ ପ୍ରାଭୁ ନେ ନାଗାର୍କେ ଜିଅନ୍ ରିକାନାଙ୍ଗ୍ ଆଲିଙ୍ଗ୍କେ କୁଲାକାଦ୍ଲିୟାଁ।”
ଏନ୍ତେ ଲୁଟ୍ ସେନ୍କେଦ୍ତେ ଆୟାଃ କୁଡ଼ିହନ୍କିନ୍ଲଃ ଅକନ୍ କଡ଼ାକିନ୍କେ ଆଣ୍ଦି ନାଗେନ୍ତେ ସାଲାକାଦ୍ ତାଇକେନାଏ, ଇନ୍କିନ୍କେ କାଜିକେଦ୍କିନା, “ଜାଲ୍ଦି ନେ ନାଗାର୍ଏତେ ଅଡଙ୍ଗ୍ୟାନ୍ଲଃ ହିଜୁଃବେନ୍, ଚିଆଃଚି ପ୍ରାଭୁ ନେ ନାଗାର୍କେ ଜିଅନେୟା।” ମେନ୍ଦ ଇନ୍କିନ୍ ଏନ୍ କାଜିକେ ବେଦାତାନାଏ ମେନ୍ତେ ଆଟ୍କାର୍ କେଦାକିନ୍।
ଏଟାଃ ହୁଲାଙ୍ଗ୍ ଆଙ୍ଗ୍ୟାନ୍ଚି, ଦୁଁତ୍କିନ୍ ଲୁଟ୍କେ ଜାଲ୍ଦି ଉସ୍ରାଅ ନାଗେନ୍ତେ କାଜିକିୟାକିନ୍, “ମାର୍ ବିରିଦ୍ମେ, ଆମାଃ କୁଡ଼ି ଓଡ଼ୋଃ ବାରାନ୍ କୁଡ଼ିହନ୍କିନ୍କେ ନେ ଠାୟାଦ୍ଏତେ ଇଦିକେଦ୍ତେ ସେନଃମେ। କା'ରେଦ ନେ ନାଗାର୍ ଚେତାନ୍ରେ ସାଜାଇ ହବାଅଃ ଇମ୍ତା ଆପେୟଃଗି ଜିଅନଃଆପେ।” ଏନ୍ରେହ ଲୁଟ୍ ଜାଲ୍ଦି କାଏ ସେକାଡ଼୍ୟାନା, ଏନାତେ ଏନ୍ ଦୁଁତ୍କିନ୍ ଲୁଟ୍, ଆୟାଃ କୁଡ଼ି ଓଡ଼ୋଃ କୁଡ଼ିହନ୍କଆଃ ତିଃଇ ସାବ୍କେଦ୍ତେ ନାଗାର୍ ବାହାରିତେ ଇଦିକେଦ୍କଆକିନ୍, ଚିଆଃଚି ଲୁଟ୍ରାଃ ଚେତାନ୍ରେ ପ୍ରାଭୁଆଃ ଲିନିବୁଇ ତାଇକେନା। ଇନ୍କୁକେ ନାଗାର୍ଏତେ ବାହାରି ଅଡଙ୍ଗ୍ ଆଉକେଦ୍କ ତାୟମ୍ତେ, ମିଆଁଦ୍ ଲୁଟ୍କେ କାଜିକିୟା, “ନାହାଁଃ ଜୀଉ ବାଞ୍ଚାଅ ନାଗେନ୍ତେ ନିର୍ପେ, ଦୟାସାଃତେ ଆଲପେ ନେଲ୍ ରୁହାଡ଼େୟା ଓଡ଼ୋଃ ସାମାନ୍ ପିଡ଼ିରେ ଆଲପେ ତାଇନାଃ, ବୁରୁ ସାଃତେ ନିର୍ପେ, କା'ରେଦ ଆପେ ଜିଅନଃଆପେ।”
ମେନ୍ଦ ଲୁଟ୍ ଇନ୍କିନ୍କେ କାଜିକେଦ୍କିନା, “କାହାଗି ପ୍ରାଭୁ, ଏନ୍ଲେକା ଆଲକା ହବାଅଃକା। ଆବେନ୍ ନେ ଦାସିକେ ସାୟାଦ୍ ଓଡ଼ୋଃ ପୁରାଃଗି ଦାୟାକେଦ୍ତେ ଜୀଉତାୟାଃ ବାଞ୍ଚାଅକାଦାବେନ୍। ମେନ୍ଦ ବୁରୁକ ପୁରାଃ ସାଙ୍ଗିନ୍ରେ ମେନାଃ, ଏନାମେନ୍ତେ ଆଇଙ୍ଗ୍ ନିର୍ ସେଟେର୍ କାଇଙ୍ଗ୍ ଦାଡ଼ିୟାଃ, ହବାସାକାଅଃଆ, ସାଙ୍କାଟ୍ ସେଟେର୍କେନଃଆ ଓଡ଼ୋଃ ଆଇଁୟାଃ ଗନଏଃ ହବାକେନଃଆଃ। ନେଲେବେନ୍, ଜାଲ୍ଦି ସେନ୍ ସେଟେର୍ ନାଙ୍ଗ୍ ହେପାଦ୍ରେ ଏନ୍ ହୁଡିଙ୍ଗ୍ ନାଗାର୍ ନେଲଃତାନାଃ। ଆଇଙ୍ଗ୍କେ ଏନ୍ ହୁଡିଙ୍ଗ୍ ସାହାର୍ତେ ନିର୍ତେବାଃ ନାଙ୍ଗ୍ ଆଚୁଇଙ୍ଗ୍ବେନ୍, ତାବ୍ଦ ଆଇଁୟାଃ ଜୀଉ ବାଞ୍ଚାଅଃଆ।”
ଦୁଁତ୍ ଇନିଃକେ କାଜିକିୟା, “ଠାଉକାଗିୟା, ଆଇଙ୍ଗ୍ ଆମାଃ ଏନ୍ କାଜିହଗି ଆୟୁମ୍କେଦାଇଙ୍ଗ୍, ଆମ୍ ଅକ ନାଗାର୍ ବିଷାଏରେ କାଜିକେଦାମ୍ ଏନାକେ ଆଇଙ୍ଗ୍ କାଇଙ୍ଗ୍ ଜିଅନେୟା। ମେନ୍ଦ ଜାଲ୍ଦି ଏନ୍ତାଃତେ ସେନଃମେ,
“ଚିଆଃଚି ଆମ୍ ଏନ୍ତାଃତେ ଆଉରି ସେଟେର୍ ଜାକେଦ୍ ଆଇଙ୍ଗ୍ ଜେତ୍ନାଃ କାଇଙ୍ଗ୍ ରିକା ଦାଡ଼ିୟା।” ଏନାମେନ୍ତେ ଏନ୍ ନାଗାର୍ରାଃ ନୁତୁମ୍ ସୋୟର୍1 ହବାୟାନା।
ସଦୋମ୍ ଓଡ଼ୋଃ ଗମ୍ରାରାଃ ଜିଅନଃ
ଏନ୍ତେ ସିଙ୍ଗିତୁର୍ୟାନ୍ ଇମ୍ତାଲଃ ଲୁଟ୍ ଏନ୍ ସୋୟର୍ ସାହାର୍ତେ ବଲୟାନା। ଏନ୍ତେ ପ୍ରାଭୁ ଇମ୍ତାଗି ରିମିଲ୍ଏତେ ସଦୋମ୍ ଓଡ଼ୋଃ ଗମ୍ରା ଚେତାନ୍ରେ ଗାନ୍ଧାକ୍ ଓଡ଼ୋଃ ସେଙ୍ଗେଲ୍ ଦାଆଃ ଗାମାକେଦାଏ। ଏନ୍ତେ ସବେନ୍ ନାଗାର୍, ସାମାନ୍ ପାର୍ଗାନ୍, ଏନ୍ତାଃରେ ତାଇନ୍ତାନ୍ ସବେନ୍ ହଡ଼କକେ ଓଡ଼ୋଃ ଅତେରେ ଅମନ୍କାନ୍ ସବେନାଃକେ ଜିଅନ୍କେଦା। ମେନ୍ଦ ଲୁଟ୍ଆଃ କୁଡ଼ିତେ ଦୟାସାଃତେ ନେଲ୍ ରୁହାଡ଼୍କେଦ୍ ହରାତେ ଇନିଃ ବୁଲୁଙ୍ଗ୍ରେୟାଃ ଖୁଣ୍ଟୁ ହବାୟାନାଏ।
ଏନ୍ ହୁଲାଙ୍ଗ୍ ଆବ୍ରାହାମ୍ ସେତାଃ ଇଦାନ୍ରେ ବିରିଦ୍କେଦ୍ତେ ପ୍ରାଭୁଆଃ ସାମ୍ନାଙ୍ଗ୍ରେ ସିଦା ଅକ ଠାୟାଦ୍ତାଃ ତିଙ୍ଗୁକାନ୍ ତାଇକେନାଏ, ଏନ୍ ଠାୟାଦ୍ତାଃତେ ସେନଃୟାନା। ଇନିଃ ସଦୋମ୍, ଗମ୍ରା ଓଡ଼ୋଃ ଗଟା ସାମାନ୍ ପାର୍ଗାନ୍କେ ନେଲ୍କେଦା ଓଡ଼ୋଃ ଏନ୍ ଠାୟାଦ୍ଏତେ ଭାଟିରାଃ ସୁକୁଲ୍ ଲେକା ସୁକୁଲ୍ ଅଡଙ୍ଗ୍ଅଃତାନ୍ ନେଲ୍କେଦାଏ। ନେ'ଲେକାତେ ପାର୍ମେଶ୍ୱାର୍ ଅକ ହୁଲାଙ୍ଗ୍ ସବେନ୍ ନାଗାର୍କକେ ଜିଅନ୍କେଦା, ଇମ୍ତା ଇନିଃ ଆବ୍ରାହାମ୍କେ ପାହାମ୍କିୟା ଓଡ଼ୋଃ ଲୁଟ୍ ଅକ ନାଗାର୍ରେ ତାଇକେନା, ଏନ୍ ନାଗାର୍କେ ଜିଅନ୍ ଇମ୍ତା ଲୁଟ୍କେ ଅଡଙ୍ଗ୍କେଦ୍ତେ ଆୟାଃ ଜୀଉକେ ବାଞ୍ଚାଅକେଦା।
ମୋୟାବ୍ ଓଡ଼ୋଃ ଅମ୍ମୋନୀୟ ହଡ଼କଆଃ ଉପାନ୍ନଃ।
ଲୁଟ୍ ଜୋଆର୍ରେ ତାଇନଃ ନାଗେନ୍ତେ ବରକେଦା, ଏନାତେ ଆୟାଃ ବାରାନ୍ କୁଡ଼ିହନ୍ଲଃ ସୋୟର୍ ବାଗିକେଦ୍ତେ ବୁରୁ ଓଡ଼ୋଃ ଲାପାଙ୍ଗାରେ ତାଇନ୍ୟାନା। ମୁସିଙ୍ଗ୍ ହୁଲାଙ୍ଗ୍ ଆୟାଃ ମାରାଙ୍ଗ୍ ହନ୍ତେକୁଡ଼ି ମିଶି ତାୟାଃକେ କାଜିକିୟା, “ଆଲାଙ୍ଗ୍ଆଃ ଆପୁ ହାଡ଼ାମ୍ୟାନ୍ଗିୟାଏ, ଦିଶୁମ୍ରାଃ ରିତିରିୱାଜ୍ ଲେକା ଆଲାଙ୍ଗ୍ଲଃ ଆଣ୍ଦିନ୍ ନାଗେନ୍ତେ ଜେତା କଡ଼ା ବାଙ୍କଆ। ଏନାମେନ୍ତେ ଦଲା, ଆଲାଙ୍ଗ୍ ଆପୁକେ ଇଲିଆର୍ଖି ଆନୁକେଦ୍ତେ, ଇନିଃଲଃ ହଡ଼୍ମରାଃ ଏତ୍କାନ୍ କାମି ରିକାଏୟାଲାଙ୍ଗ୍ ଓଡ଼ୋଃ ଆୟାଃ ହରାତେ ବାଂଶ୍କେ ବାଞ୍ଚାଅୟାଲାଙ୍ଗ୍।” ଏନ୍ତେ ଏନ୍ ନିଦାଗି ଆପୁତେକେ ଆନୁ ବୁଲ୍କିୟାକିନ୍ ଓଡ଼ୋଃ ମାରାଙ୍ଗ୍ ହନ୍ତେକୁଡ଼ି ସେନ୍କେଦ୍ତେ ଆପୁତେଲଃ ହଡ଼୍ମରାଃ ଏତ୍କାନ୍ କାମି ରିକାକେଦାଏ, ମେନ୍ଦ ଆପୁତେ ଏନ୍ ସବେନାଃ ଜେତ୍ନାଃ କାଏ ସାରି ଦାଡ଼ିକେଦା।
ଏଟାଃ ହୁଲାଙ୍ଗ୍ ମାରାଙ୍ଗ୍ ହନ୍ତେକୁଡ଼ି ମିଶିତେକେ କାଜିକିୟା, “ସେନଃୟାନ୍ ନିଦା ଆଇଙ୍ଗ୍ ଆବାଲଃ ହଡ଼୍ମରାଃ ଏତ୍କାନ୍ କାମି ରିକାକେଦାଇଙ୍ଗ୍। ଦଲା, ତିସିଙ୍ଗ୍ ନିଦା ହଁଗି ଆବାକେ ଦାଖ୍ରାସିଲଃ ଆନୁ ବୁଲ୍ତାଇୟାଲାଙ୍ଗ୍ ଓଡ଼ୋଃ ଆମ୍ ସେନ୍କେଦ୍ତେ ଆବାଲଃ ହଡ଼୍ମରାଃ ଏତ୍କାନ୍ କାମି ରିକାଏମେ, ତାବ୍ଦ ଆଲାଙ୍ଗ୍ ଆୟାଃ ହରାତେ ବାଂଶ୍ ବାଚାଅ ଦାଡ଼ିୟାଲାଙ୍ଗ୍।” ଇନ୍କିନ୍ ଏନ୍ ନିଦା ହଁଗି ଆପୁତେକେ ଆନୁ ବୁଲ୍କିୟାକିନ୍ ଓଡ଼ୋଃ ଆୟାଃ ହୁଡିଙ୍ଗ୍ ହନ୍ତେକୁଡ଼ି ସେନ୍କେଦ୍ତେ ଆପୁତେଲଃ ହଡ଼୍ମରାଃ ଏତ୍କାନ୍ କାମି ରିକାକେଦାଏ, ମେନ୍ଦ ଆପୁତେ ଏନ୍ ସବେନାଃ ଜେତ୍ନାଃ କାଏ ସାରି ଦାଡ଼ିକେଦା। ନେ'ଲେକାତେ ଲୁଟ୍ଆଃ ବାରାନ୍ କୁଡ଼ିହନ୍କିନ୍ ଆପୁତେୟାଃ ହରାତେ ହାମ୍ବାଲ୍ରୋୱା ୟାନାକିନ୍। ଏନ୍ତେ ମାରାଙ୍ଗ୍ ହନ୍ତେକୁଡ଼ିରାଃ କଡ଼ାହନ୍ ହବାୟାନାଏ ଓଡ଼ୋଃ ଏଙ୍ଗାତେ ଇନିୟାଃ ନୁତୁମ୍ ମୋୟାବ୍ ଏମ୍କିୟାଏ। ଇନିଃ ମୋୟାବ୍ ହଡ଼କଆଃ ପୁର୍ଖାଆପୁ ହବାୟାନାଏ। ହୁଡିଙ୍ଗ୍ ହନ୍ତେକୁଡ଼ିରାଃ ହଁଗି ମିଆଁଦ୍ କଡ଼ାହନ୍ ହବାୟାନାଏ ଓଡ଼ୋଃ ଏଙ୍ଗାତେ ଇନିୟାଃ ନୁତୁମ୍ ବେନ୍ଆମି ଏମ୍କିୟାଏ। ଇନିଃ ଅମ୍ମୋନ୍ରେନ୍ ହଡ଼କଆଃ ପୁର୍ଖାଆପୁ ହବାୟାନାଏ।
Source notes (1)
- Footnote ହୁଡିଙ୍ଗ୍
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.