Munda Bible
ଏନେଟେଦ୍ 17
ରାଜିନାମାରେୟାଃ ଚିହ୍ନାଁ ଖାତ୍ନାଅ
ଆବ୍ରାମ୍କେ ଉପୁନ୍ହିସି ଗେଲ୍ଅରେୟା ବାରାଷ୍ ପୁରାୟାନ୍ ଇମ୍ତା ପ୍ରାଭୁ ଇନିଃକେ ଦାର୍ଶାନ୍ ଏମ୍କେଦ୍ତେ କାଜିକିୟା, “ଆଇଙ୍ଗ୍ ପୁରାଃ ପେଡ଼େୟାନ୍ ପାର୍ମେଶ୍ୱାର୍ ତାନିଙ୍ଗ୍। ଆଇଁୟାଃ କାଜି ମାନାତିଙ୍ଗ୍ମେ ଓଡ଼ୋଃ ଅକଆଃ ଠାଉକା ତାନାଃ ଏନାକେ ରିକାଏମେ। ଆଇଙ୍ଗ୍ ଆମାଃଲଃ ଆଇଁୟାଃ ରାଜିନାମାକେଇଙ୍ଗ୍ ବାଇୟା ଓଡ଼ୋଃ ଆମାଃ କିଲିକ ପୁରାଃଗିକ ହବାଅଃଆ।” ଏନ୍ତେ ଆବ୍ରାମ୍ ଅତେରେ ଇକ୍ଡ଼ୁମ୍ୟାନ୍ଲଃ ଅମ୍ବାକେଦ୍ତେ ଜହାର୍କିୟା ଓଡ଼ୋଃ ପାର୍ମେଶ୍ୱାର୍ ଆୟାଃଲଃ ଜାଗାର୍କେଦ୍ତେ କାଜିକିୟା, “ଆଇଙ୍ଗ୍ ଆମାଃଲଃ ନେ ରାଜିନାମାଇଙ୍ଗ୍ ବାଇତାନା, ଆମ୍ ପୁରାଃ ଜାତିରେନ୍ ପୁରାଖା ଆପୁମ୍ ହବାଅଃଆ। ଆମାଃ ନୁତୁମ୍ ଓଡ଼ୋଃ ଆବ୍ରାମ୍ କା ତାହିନାଃ, ମେନ୍ଦ ଆବ୍ରାହାମ୍ ହବାଅଃଆ, ଚିୟାଃଚି ଆଇଙ୍ଗ୍ ଆମ୍କେ ପୁରାଃ କିଲିରେନ୍ ପୁର୍ଖାଆପୁ ବାଇୟାକାଦ୍ମାଇଙ୍ଗ୍। ଆଇଙ୍ଗ୍ ଆମ୍କେ ପୁରାଃ କିଲିକଇଙ୍ଗ୍ ଏମାମେୟା, ଆମାଃତାଃଏତେ ପୁରାଃଗି କିଲିକ ହବାଅଃଆ, ଓଡ଼ୋଃ ଆମାଃତାଃଏତେ ରାଜାକ ଅଡଙ୍ଗ୍ଅଃଆ।
“ଆଇଙ୍ଗ୍ ଆମାଃଲଃ ଓଡ଼ୋଃ ଆମାଃ ହିଜୁଃ ପିଢ଼ିରେନ୍ କିଲିକଲଃ ରିକାକାଦ୍ ରାଜିନାମାକେ ଜାନାଅ ଜାନାଅଗିଙ୍ଗ୍ ଦହୟା। ତାବ୍ଦ ଆଇଙ୍ଗ୍ ଆମାଃ ଓଡ଼ୋଃ ଆମାଃ କିଲିକଆଃ ପାର୍ମେଶ୍ୱାର୍ ହବାଅଃଆଇଙ୍ଗ୍। ଆମ୍ ନାହାଃଁ ନେ ଅକ କିନାନ୍ ଦିଶୁମ୍ରେ ତାଇନ୍ ତାନାମ୍, ଏନାରେୟାଃ ସବେନ୍ ଅତେ ଆମ୍କେ ଓଡ଼ୋଃ ଆମାଃ ହିଜୁଃ ପିଢ଼ିରେନ୍ କିଲିକକେ ଜାନାଅ ଜାନାଅ ଆକ୍ତେୟାର୍ରେ ନାଗେନ୍ତେଇଙ୍ଗ୍ ଏମାକଆ ଓଡ଼ୋଃ ଆଇଙ୍ଗ୍ ଇନ୍କୁଆଃ ପାର୍ମେଶ୍ୱାର୍ ହବାଅଃଆଇଙ୍ଗ୍।”
ପାର୍ମେଶ୍ୱାର୍ ଆବ୍ରାହାମ୍କେ କାଜିକିୟା, “ଆଇଙ୍ଗ୍ ଆମାଃଲଃ ରିକାକାଦ୍ ରାଜିନାମାକେ ମାନାତିଙ୍ଗ୍ମେ, ଆମ୍ ଓଡ଼ୋଃ ଆମାଃ ହିଜୁଃ ପିଢ଼ିରେନ୍ କିଲିକ, ଏନାକେ ବୁଗି ଲେକାତେ ମାନାତିଙ୍ଗ୍ ରିକାଏପେ। ଆମ୍ ଓଡ଼ୋଃ ଆମାଃ ହିଜୁଃ ପିଢ଼ିରେନ୍ କିଲିକଲଃ ଅକ ରାଜିନାମାରାଃ କାଜି ତଲାକାନା, ଏନା ହବାଅଃତାନା, ଆପେୟାଃ ସବେନ୍ କଡ଼ାହନ୍କ ଖାତ୍ନାଅ ରିକାନ୍କାକ। ଆପେ ସବେନ୍କ ଖାତ୍ନାଅଃପେ, ଓଡ଼ୋଃ ଏନା ଆପେଲଃ ଆଇଁୟାଃ ରାଜିନାମାରେୟାଃ ଚିହ୍ନାଁ ହବାଅଃଆ। ଆପେୟାଃ ସବେନ୍ କଡ଼ାହନ୍କ ଜାନାମଃରାଃ ଇରାଲିୟା ହୁଲାଙ୍ଗ୍ ହବାଅଃରେ ଖାତ୍ନାଅକପେ, ନେ ନିୟାମ୍କେ ଆପେୟାଃ ପୁରା ପିଢ଼ି ମାନାତିଙ୍ଗ୍ପେ। ଓଡ଼ୋଃ ଅକନ୍କ ଆପେୟାଃ ଅଡ଼ାଃରେ ଜାନାମ୍କାନ୍ ଚାଏ ଏଟାଃ ଦିଶୁମ୍ଏତେ କିରିଙ୍ଗ୍ ଆଉକାନ୍ ଦାସିକ, ଇନ୍କୁ ଆମାଃ କିଲିରେନ୍ କାକ ତାଇନ୍ ରେୟ ଖାତ୍ନାଅଃକାକ। ଓଡ଼ୋଃ ଆପେୟାଃ ଅଡ଼ାଃରେ ଜାନାମ୍କାନ୍ନିଃ ଚାଏ ରୁପାତେ କିରିଙ୍ଗ୍କାନ୍ ଦାସିରାଃ କଡ଼ାହନ୍, ସବେନ୍କ ସାର୍ତିଗି ଖାତ୍ନାଅଃଆକ। ତାବ୍ଦ ଜାନାଅ ହୁଲାଙ୍ଗ୍ ଜାକେଦ୍ ଆପେୟାଃ ହଡ଼୍ମରେ ଆଇଁୟାଃ ରାଜିନାମାରେୟାଃ ଚିହ୍ନାଁ ତାଇନା। ମେନ୍ଦ ଜେତା ହଡ଼ କା ଖାତ୍ନାଅଃ ରେଦ, ଇନିଃକେ ଆୟାଃ ଆପ୍ନାଃ ହଡ଼କତାଃଏତେ ବିନ୍ଗାଅ ରିକା ଲାଗାତିୟାଁଃ, ଚିୟାଃଚି ଇନିଃ ଆଇଁୟାଃ ରାଜିନାମାକେ କା ମାନାତିଙ୍ଗ୍ କେଦା।”
ଏନ୍ତେ ପାର୍ମେଶ୍ୱାର୍ ଆବ୍ରାହାମ୍କେ କାଜିକିୟା, “ଆମ୍ ଆମାଃ କୁଡ଼ି ସାରିକେ ଓଡ଼ୋଃ ସାରି ମେନ୍ତେ ଆଲମ୍ କେଡ଼ାଇ, ଚିୟାଃଚି ନାହାଃଁଏତେ ଇନିୟାଃ ନୁତୁମ୍ ସାରା1 ମେନ୍ତେ ହବାୟାନା। ଆଇଙ୍ଗ୍ ସାରାକେ ଆଶିଷ୍ ଏମାଇୟାଇଙ୍ଗ୍ ଓଡ଼ୋଃ ଇନିୟାଃ ହରାତେ ଆମ୍କେ ମିଆଁଦ୍ କଡ଼ାହନ୍ ଏମାମେୟାଇଙ୍ଗ୍। ଆଇଙ୍ଗ୍ ସାରାକେ ଆଶିଷ୍ ଏମାଇୟାଇଙ୍ଗ୍ ଓଡ଼ୋଃ ଇନିଃ ପୁରାଃ କିଲିରେନ୍ ପୁର୍ଖା ଏଙ୍ଗା ହବାଅଃଆଏ। ଇନିୟାଃ କିଲିଏତେ ପୁରାଃ ରାଜାକ ଜାନାମଃଆ।”
ଇମ୍ତା ଆବ୍ରାହାମ୍ ଅତେରେ ଅମ୍ବାକେଦ୍ତେ ଲାନ୍ଦା ତାନ୍ଲଃ ଆୟାଃ ମନ୍ ସୁରୁଦ୍ରେ କାଜିକେଦା, “ମିଦ୍ ଶାଅ ବାରାଷ୍ରେ ଚିନାଃ ମିହୁଡ଼୍ ଆପୁ ହବାଅଃଆଏ ? ଉପୁନ୍ହିସି ଗେଲ୍ ବାରାଷ୍ରେ ଚିନାଃ ସାରା କଡ଼ାହନ୍ ଜାନାମିଁୟାଏ ?” ଏନ୍ତେ ଆବ୍ରାହାମ୍ ପାର୍ମେଶ୍ୱାର୍କେ କାଜିକିୟା, “ଇଶ୍ମାଏଲ୍ ଏସ୍କାର୍ ଆମାଃ ଆଶିଷ୍ତେ ଜୀନିଦ୍ ତାଇନ୍କାଏ।”
ମେନ୍ଦ ପାର୍ମେଶ୍ୱାର୍ କାଜିକେଦାଏ, “କାହାଗି, ଆମାଃ କୁଡ଼ି ସାରାଗି ଆମାଃ ନାଗେନ୍ତେ କଡ଼ାହନ୍ ଜାନାମିଁୟାଏ, ଓଡ଼ୋଃ ଇନିଃକେ ଇସାକ୍ ମେନ୍ତେ ନୁତୁମିମେ। ଆଇଙ୍ଗ୍ ଆୟାଃଲଃ ଓଡ଼ୋଃ ଆୟାଃ କିଲିକଲଃ ଆଇଁୟାଃ ରାଜିନାମାକେଇଙ୍ଗ୍ ଦହଏୟା, ଏନା ଜାନାଅ ଜାନାଅରେୟାଃ ରାଜିନାମା ହବାଅଃଆ। ଆଇଙ୍ଗ୍ ଇଶ୍ମାଏଲ୍ ନାଗେନ୍ତେ ଆମାଃ ବିନ୍ତିକେଇଙ୍ଗ୍ ଆୟୁମ୍କେଦା, ଆଇଙ୍ଗ୍ ଇନିଃକେ ଆଶିଷ୍ ଏମାଇୟାଇଙ୍ଗ୍ ଓଡ଼ୋଃ ଇନିୟାଃ କିଲିକକେ ପସାକେଦ୍ତେ ପୁରାଃଗିଙ୍ଗ୍ ହବାକଆ। ଆୟାଃ କିଲିରେ ଗେଲ୍ବାର୍ ରାଜାକ ହବାଅଃଆ ଓଡ଼ୋଃ ଆଇଙ୍ଗ୍ ଇନିୟାଃ କିଲିକେ ମିଆଁଦ୍ ମାରାଙ୍ଗ୍ ଝୁଣ୍ଡ୍ ବାଇୟାଇଙ୍ଗ୍। ମେନ୍ଦ ହିଜୁଃତାନ୍ ବାରାଷ୍ରାଃ ନେ ଦିପିଲିରେ ସାରାରାଃ ଅକ କଡ଼ାହନ୍ ଜାନାମଃଆଏ, ଏନ୍ ଇସାକ୍ଲଃ ଆଇଙ୍ଗ୍ ଆଇଁୟାଃ ରାଜିନାମା ବାଇୟାଇଙ୍ଗ୍।” ନେ'ଲେକାତେ ପାର୍ମେଶ୍ୱାର୍ ଆବ୍ରାହାମ୍ଲଃ ଜାଗାର୍ ଚାବାକେଦ୍ତେ ସେନଃୟାନା।
ଏନ୍ତେ ଆବ୍ରାହାମ୍ ଆୟାଃ ହନ୍ତେକଡ଼ା ଇଶ୍ମାଏଲ୍କେ, ଆୟାଃ ଅଡ଼ାଃରେନ୍ ଦାସିକକେ ଓଡ଼ୋଃ ରୁପା ସିକାତେ କିରିଙ୍ଗ୍କାନ୍ ଦାସିକକେ ପାର୍ମେଶ୍ୱାର୍ଆଃ ଆନାଚୁ ଲେକା ଏନ୍ ହୁଲାଙ୍ଗ୍ଗି ଖାତ୍ନାଅକେଦ୍କଆଏ। ଆବ୍ରାହାମ୍କେ ଉପୁନ୍ହିସି ଗେଲ୍ଅରେୟା ବାରାଷ୍ ହବାଅଃ ତାଇକେନ୍ ଇମ୍ତା ଆୟାଃ ଖାତ୍ନାଅ ହବାୟାନାଏ। ଓଡ଼ୋଃ ଆୟାଃ ହନ୍ତେକଡ଼ା ଇଶ୍ମାଏଲ୍କେ ଗେଲ୍ ଆପି ବାରାଷ୍ ହବାଅଃ ତାଇକେନା। ନେ'ଲେକାତେ ମୁସିଙ୍ଗ୍ତେଗି ଆବ୍ରାହାମ୍ ଓଡ଼ୋଃ ଆୟାଃ ହନ୍ତେକଡ଼ା ଇଶ୍ମାଏଲ୍ରାଃ ଖାତ୍ନାଅ ହବାୟାନା। ଓଡ଼ୋଃ ଏନ୍ ହୁଲାଙ୍ଗ୍ଗି ଆୟାଃ ଅଡ଼ାଃରେନ୍ ଦାସିକଆଃ ଓଡ଼ୋଃ ରୁପା ସିକାତେ କିରିଙ୍ଗ୍କାନ୍ ଦାସିକଆଃ ଖାତ୍ନାଅ ହବାୟାନା।
Source notes (1)
- Footnote ରାନୀ
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.