Munda Bible
ଏନେଟେଦ୍ 1
ଦିଶୁମ୍ ବାବାଇରେୟାଃ କାଜି
ମୁନୁରେ, ଚିମ୍ତା ପାର୍ମେଶ୍ୱାର୍ ଅତେ ଓଡ଼ୋଃ ସିର୍ମାରେୟାଃ ସବେନାଃକେ ସିର୍ଜାଅକେଦା, ଇମ୍ତା ଅତେରେୟାଃ ସବେନାଃ ସାମାଗି ଓଡ଼ୋଃ ଏନାରେ ଜେତ୍ନାଃ କା ତାଇକେନା। ଇକିର୍ ଦରେୟାରାଃ ଦାଆଃ ଚେତାନ୍ରେ ନୁବାଃ ହାରୁବାକାନ୍ ତାଇକେନା ଓଡ଼ୋଃ ପାର୍ମେଶ୍ୱାର୍ଆଃ ଆତ୍ମା ଏନ୍ ଦାଆଃ ଚେତାନ୍ରେ ହନର୍ବାଡ଼ା ତାଇକେନା। ଏନ୍ତେ ପାର୍ମେଶ୍ୱାର୍ କାଜିକେଦାଏ, “ମାସ୍କାଲ୍ ହବାଅଃକା” ଏନ୍ତେ ମାସ୍କାଲ୍ ହବାୟାନା। ପାର୍ମେଶ୍ୱାର୍ ଏନାକେ ନେଲ୍କେଦ୍ତେ ସୁକୁୟାନା, ଏନ୍ତେ ମାସ୍କାଲ୍ଏତେ ନୁବାଃକେ ବିନ୍ଗାଅ କେଦା। ପାର୍ମେଶ୍ୱାର୍ ଏନ୍ ମାସ୍କାଲ୍ରେୟାଃ ନୁତୁମ୍ “ସିଙ୍ଗି” ଓଡ଼ୋଃ ନୁବାଃରେୟାଃ ନୁତୁମ୍ “ନିଦା” ମେନ୍ତେ ନୁତୁମ୍କେଦା। ନେ'ଲେକା ସିଙ୍ଗି ହାସୁର୍କେଦ୍ତେ ନୁବାଃୟାନା ଓଡ଼ୋଃ ସେତାଃୟାନା। ନେଆଁ ହବାଅଃତାନା ପାହିଲା ହୁଲାଙ୍ଗ୍।
ଏନ୍ତେ ପାର୍ମେଶ୍ୱାର୍ କାଜିକେଦାଏ, “ଦାଆଃରାଃ ଥାଲାରେ ମିଆଁଦ୍ ମାରାଙ୍ଗ୍ ଭିତ୍ ହବାଅଃକା ଓଡ଼ୋଃ ଦାଆଃ ବାର୍ ହିସାରେ ବିନ୍ଗାଅଃକା।” ଏନ୍ତେ ପାର୍ମେଶ୍ୱାର୍ ଦାଆଃକେ ଚେତାନ୍ ଓଡ଼ୋଃ ଲାତାର୍ ହିସାରେ ବିନ୍ଗାଅକେଦା ଓଡ଼ୋଃ ଏନ୍ଲେକାଗି ହବାୟାନା। ପାର୍ମେଶ୍ୱାର୍ ଏନ୍ ଚେତାନ୍କେ “ସିର୍ମା” ମେନ୍ତେ ନୁତୁମ୍କେଦା। ଏନ୍ତେ ସିଙ୍ଗି ହାସୁର୍କେଦ୍ତେ ନୁବାଃୟାନା ଓଡ଼ୋଃ ସେତାଃୟାନା। ନେ'ଲେକା ଏଟାଃହୁଲାଙ୍ଗ୍ ହବାୟାନା।
ଏନ୍ତେ ପାର୍ମେଶ୍ୱାର୍ କାଜିକେଦାଏ, “ସିର୍ମା ଲାତାର୍ରେୟାଃ ଦାଆଃ ମିଦ୍ତାଃରେ ହୁଣ୍ଡିୟଃକା ଓଡ଼ୋଃ ପିଡ଼ି ନେଲଃକା।” ଏନ୍ଲେକାଗି ହବାୟାନା। ଏନ୍ତେ ପାର୍ମେଶ୍ୱାର୍ ପିଡ଼ିରେୟାଃ ନୁତୁମ୍ “ଅତେ” ଓଡ଼ୋଃ ମିଦ୍ତାଃରେ ହୁଣ୍ଡିୟାକାନ୍ ଦାଆଃକେ “ଦରେୟା” ମେନ୍ତେ ନୁତୁମ୍କେଦା। ଏନ୍ତେ ପାର୍ମେଶ୍ୱାର୍ ଏନା ନେଲ୍କେଦ୍ତେ ସୁକୁୟାନା। ଏନ୍ତେ ପାର୍ମେଶ୍ୱାର୍ କାଜିକେଦାଏ, “ଅତେରେ ତାସାଦ୍, ହିତା ଆଡ଼ାଃସାକାମ୍ ଓଡ଼ୋଃ ଜ' ଜ'ଅଃତାନ୍ ସବେନ୍ ରାକାମ୍ ରାକାମ୍ ଦାରୁ ଅମନଃକା,” ଓଡ଼ୋଃ ଏନ୍ଲେକାଗି ହବାୟାନା। ଏନ୍ତେ ଅତେରେ ତାସାଦ୍ ଓଡ଼ୋଃ ସବେନ୍ ରାକାମ୍ ରାକାମ୍ରେୟାଃ ହିତା, ଆଡ଼ାଃସାକାମ୍, ଜ'ଅଃତାନ୍ ଦାରୁ ଅମନ୍ୟାନା, ଏନ୍ତେ ପାର୍ମେଶ୍ୱାର୍ ଏନା ନେଲ୍କେଦ୍ତେ ସୁକୁୟାନା। ନେ'ଲେକା ସିଙ୍ଗି ହାସୁର୍କେଦ୍ତେ ନୁବାଃୟାନା ଓଡ଼ୋଃ ସେତାଃୟାନା ଏନ୍ତେ ଆପି ହୁଲାଙ୍ଗ୍ ହବାୟାନା।
ଏନ୍ତେ ପାର୍ମେଶ୍ୱାର୍ କାଜିକେଦାଏ, “ସିଙ୍ଗି ଓଡ଼ୋଃ ନିଦା ବିନ୍ଗାଅ ନାଗେନ୍ତେ ସିର୍ମାରେ ମାସ୍କାଲ୍ ଏମ୍ତାନ୍କ ଅଡଙ୍ଗ୍ଅଃକା, ଓଡ଼ୋଃ ଇନ୍କୁଆଃ ହରାତେ ସାହା, ହୁଲାଙ୍ଗ୍, ଓଡ଼ୋଃ ବାରାଷ୍ ସାରିନାଙ୍ଗ୍ ଚିହ୍ନା ଲେକା ହବାଅଃକା। ଓଡ଼ୋଃ ଅତେରେ ମାସ୍କାଲେ ନାଗେନ୍ତେ ସିର୍ମାରେ ଏନ୍ ମାସ୍କାଲ୍ ଏମ୍ତାନ୍କ ତାଇନ୍କାକ,” ଓଡ଼ୋଃ ଏନ୍ଲେକାଗି ହବାୟାନା। ଏନ୍ତେ ପାର୍ମେଶ୍ୱାର୍ ବାରିୟା ମାରାଙ୍ଗ୍ ମାସ୍କାଲ୍ ଏମ୍ତାନ୍ କିନ୍କେ ବାଇକେଦ୍କିନା। ସେତାଃଏତେ ସିଙ୍ଗିସାଟୁବ୍ ଜାକେଦ୍ ମାସ୍କାଲେ ନାଗେନ୍ତେ ସିଙ୍ଗିକେ ବାଇକିୟା, ଓଡ଼ୋଃ ନୁବାଃରେ ମାସ୍କାଲେ ନାଗେନ୍ତେ ଚାଣ୍ଡୁଃ ଓଡ଼ୋଃ ଇପିଲ୍କକେ ହଁଗି ବାଇକେଦ୍କଆ। ଏନ୍ତେ ପାର୍ମେଶ୍ୱାର୍ ଅତେକେ ମାସ୍କାଲେ ନାଗେନ୍ତେ ଓଡ଼ୋଃ ନିଦା ସିଙ୍ଗିକେ ଆକ୍ତେୟାର୍ ନାଗେନ୍ତେ, ଓଡ଼ୋଃ ମାସ୍କାଲ୍କେ ନୁବାଃଏତେ ବିନ୍ଗାଅ ନାଙ୍ଗ୍ ସିର୍ମାରେ ଏନ୍ ମାସ୍କାଲ୍ ଏମ୍ତାନ୍କକେ ଦହକେଦ୍କଆ, ଓଡ଼ୋଃ ପାର୍ମେଶ୍ୱାର୍ ନେ ସବେନାଃ ନେଲ୍କେଦ୍ତେ ସୁକୁୟାନା। ନେ'ଲେକା ସିଙ୍ଗି ହାସୁର୍କେଦ୍ତେ ନୁବାଃୟାନା ଓଡ଼ୋଃ ସେତାଃୟାନ୍ତେ ଉପୁନିୟା ହୁଲାଙ୍ଗ୍ ହବାୟାନା।
ଏନ୍ତେ ପାର୍ମେଶ୍ୱାର୍ କାଜିକେଦାଏ, “ଦାଆଃରେ ପୁରାଃଗି ରାକାମ୍ ରାକାମ୍ ଜିହୀଦ୍ ଜାଁତୁକ ପେରେଜଃକାକ। ଚେଣେଁକ ଅତେ ଚେତାନ୍ରେ ଓଡ଼ୋଃ ସିର୍ମା ଲାତାର୍ରେ ଆଫିରଃକାକ।” ଏନ୍ତେ ପାର୍ମେଶ୍ୱାର୍ ଦାଆଃରେ ତାଇନ୍ତାନ୍ ରାକାମ୍ ରାକାମ୍ ଜାଁତୁକକେ ବାଇକେଦ୍କଆ, ଦରେୟାରେନ୍ ମାପ୍ରାଙ୍ଗ୍ ହୁପୁଡିଙ୍ଗ୍ ସବେନ୍ ଦାଆଃ ଜାଁତୁକକେ ଓଡ଼ୋଃ ରାକାମ୍ ରାକାମ୍ ଅଡ଼େ ଚେଣେଁକକେ ବାଇକେଦ୍କଆ। ଓଡ଼ୋଃ ପାର୍ମେଶ୍ୱାର୍ ନେ ସବେନାଃ ବୁଗିନ୍ ନେଲ୍କେଦା। ଏନ୍ତେ ପାର୍ମେଶ୍ୱାର୍ ଇନ୍କୁକେ ଆଶିଷ୍କେଦ୍ତେ କାଜିକେଦ୍କଆ, “ପୁରାଃଗି ହାରା ପସାକେଦ୍ତେ ଦରେୟାରେ ପେରେଜଃପେ, ଓଡ଼ୋଃ ଅତେରେ ପୁରାଃଗି ଚେଣେଁକ ପସାଇଦିୟଃପେ।” ନେ'ଲେକା ସିଙ୍ଗି ହାସୁର୍କେଦ୍ତେ ନୁବାଃୟାନା ଓଡ଼ୋଃ ସେତାଃୟାନ୍ତେ ମଣେଁୟା ହୁଲାଙ୍ଗ୍ ହବାୟାନା।
ଏନ୍ତେ ପାର୍ମେଶ୍ୱାର୍ କାଜିକେଦାଏ, “ଅତେରେ ରାକାମ୍ ରାକାମ୍ ହୁପୁଡିଙ୍ଗ୍ ମାରାଙ୍ଗ୍ ଜାଁତୁକ ପୁରାଃଗି ପସାଅଃକାକ, ଆସୁଲ୍ ଜାଁତୁ, ଅତେରେ ରେଙ୍ଗାଅଃ ଜାଁତୁ ଓଡ଼ୋଃ ବିର୍ରେ ତାଇନ୍ତାନ୍ ଜାଁତୁକ ପସାଇଦିଅଃକାକ।” ଏନ୍ତେ ଏନ୍ଲେକା ସବେନାଃ ହବାୟାନା। ଏନ୍ତେଦ ପାର୍ମେଶ୍ୱାର୍ ବିର୍ରେନ୍ ରାକାମ୍ ରାକାମ୍ ଜାଁତୁକକେ, ରାକାମ୍ ରାକାମ୍ ଆସୁଲ୍ ଜାଁତୁକକେ ଓଡ଼ୋଃ ଅତେରେ ରେଙ୍ଗାଅଃତାନ୍ ରାକାମ୍ ରାକାମ୍ ଜାଁତୁକକେ ବାଇକେଦ୍କଆ ଓଡ଼ୋଃ ପାର୍ମେଶ୍ୱାର୍ଆଃ ଆୟାର୍ରେ ଏନ୍ ସବେନାଃ ବୁଗିନ୍ ନେଲ୍ୟାନା।
ଏନ୍ତେ ପାର୍ମେଶ୍ୱାର୍ କାଜିକେଦାଏ, “ଆବୁ ନେଲଃତାନ୍ ଲେକା ଓଡ଼ୋଃ ଆପ୍ନାଃ ଲେକା ମାନୱାକେବୁ ବାଇୟା। ଓଡ଼ୋଃ ଇନ୍କୁ ହାକୁକଆଃ ଚେତାନ୍ରେ, ଚେଣେଁକଆଃ ଚେତାନ୍ରେ, ବିର୍ରେନ୍ ଜାଁତୁକଆଃ ଚେତାନ୍ରେ, ଆସୁଲ୍ ଜାଁତୁ ଚେତାନ୍ରେ ଓଡ଼ୋଃ ଅତେରେ ରେଙ୍ଗାଅଃତାନ୍ ହୁପୁଡିଙ୍ଗ୍ ମାପ୍ରାଙ୍ଗ୍ ସବେନ୍ ଜାଁତୁକଆଃ ଚେତାନ୍ରେ ଆକ୍ତେୟାର୍ ରିକାୟାକ।” ଏନ୍ତେ ପାର୍ମେଶ୍ୱାର୍ ଆୟାଃ ଆପ୍ନାଃ ଲେକାଗି ମାନୱାକେ ବାଇକିୟା। ପାର୍ମେଶ୍ୱାର୍ ଇନ୍କିନ୍କେ କଡ଼ା ଓଡ଼ୋଃ କୁଡ଼ି ଲେକା ବାଇକେଦ୍କିନା। ଏନ୍ତେ ପାର୍ମେଶ୍ୱାର୍ ଇନ୍କିନ୍କେ ଆଶିଷ୍କେଦ୍ତେ କାଜିକେଦ୍କିନା, “ଆବେନାଃ ପୁରାଃଗି ହନ୍ ହବାଅଃକାକ ଓଡ଼ୋଃ ଆବେନାଃ କିଲିକ ଅତେରେ ପୁରାଃଗି ପସାଇଦିତାନ୍ଲଃ ଆକ୍ତେୟାର୍ ରିକାଏକାକ। ଆଇଙ୍ଗ୍ ଇନ୍କୁକେ ହାକୁ, ଚେଣେଁ ଓଡ଼ୋଃ ବିର୍ରେନ୍ ଜାଁତୁକଆଃ ଚେତାନ୍ରେ ହଁଗି ଆକ୍ତେୟାର୍ ରିକା ନାଗେନ୍ତେ ଏମାକାଦ୍କଆଇଙ୍ଗ୍।” ପାର୍ମେଶ୍ୱାର୍ ଆଡଃଗି କାଜିକେଦ୍କିନାଏ, “ଆଇଙ୍ଗ୍ ଆବେନ୍କେ ଅତେରେୟାଃ ସବେନ୍ ରାକାମ୍ରାଃ ହିତା ଆଡ଼ାଃସାକାମ୍ ଓଡ଼ୋଃ ଜଅତାନ୍ ସବେନ୍ ରାକାମ୍ରାଃ ଦାରୁ ଆବେନ୍କେ ଏମାଦ୍ ବେନାଇଙ୍ଗ୍ ଏନା ଆବେନାଃ ଜମେୟାଃ ହବାଅଆଃ। ମେନ୍ଦ ଅତେରେୟାଃ ସବେନ୍ ହାରିୟାର୍ ତାସାଦ୍ ଓଡ଼ୋଃ ଦାରୁରେୟାଃ ହାରିୟାର୍ ସାକାମ୍, ସବେନ୍ ଜାଁତୁକ ନାଙ୍ଗ୍, ଚେଣେଁକ ନାଙ୍ଗ୍ ଓଡ଼ୋଃ ରେଙ୍ଗାଅଃତାନ୍ ଜାଁତୁକଆଃ ଜମ୍ ନାଗେନ୍ତେ ଏମେତାନାଇଙ୍ଗ୍।” ଏନ୍ତେ ଏନ୍ଲେକାଗି ହବାୟାନା। ପାର୍ମେଶ୍ୱାର୍ ଆୟାଃ ବାଇୟାକାଦ୍ ସବେନାଃକେ ନେଲ୍କେଦା, ଓଡ଼ୋଃ ଆୟାଃ ଆୟାର୍ରେ ସବେନାଃ ପୁରାଃ ବୁଗିନ୍ଗି ନେଲ୍ୟାନା। ନେ'ଲେକା ସିଙ୍ଗି ହାସୁର୍କେଦ୍ତେ ନୁବାଃୟାନା ଓଡ଼ୋଃ ସେତାଃୟାନ୍ତେ ତୁରିୟା ହୁଲାଙ୍ଗ୍ ହବାୟାନା।
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.