Munda Bible
ହରାସେନ୍ପୁଥି 33:14
Verse 14 is marked below, with the whole chapter around it. Read from the start
ସିନାଇ ବୁରୁ ହେତେ ରୁହାଡ଼୍ ନାଗେନ୍ତେ ଆନ୍ଚୁ
ଏନ୍ତେ ପ୍ରାଭୁ ପାର୍ମେଶ୍ୱାର୍ ମୁଶାକେ କାଜିକିୟା, “ଆମ୍ ମିସାର୍ ଦିଶୁମ୍ଏତେ ଅଡଙ୍ଗ୍ଆଉ ହଡ଼କକେ ଇଦିକେଦ୍ତେ ଏନ୍ ଦିଶୁମ୍ତେ ସେନଃମେ, ଅକନ୍ ଦିଶୁମ୍ ଆବ୍ରାହାମ୍, ଇସାକ୍ ଓଡ଼ୋଃ ଯାକୁବ୍କେ ବାନାର୍ସା କେଦ୍ତେ କାଜିକାଦ୍କ ତାଇକେନାମେ ଯେ, ଆଇଙ୍ଗ୍ ଆପେୟାଃ କିଲିରେନ୍କକେ ଏମ୍କଆଇଙ୍ଗ୍। ଆଇଙ୍ଗ୍ ଆମାଃ ଆୟୁର୍ରେ ମିଆଁଦ୍ ଦୁଁତ୍କେଇଙ୍ଗ୍ କୁଲିୟା ଓଡ଼ୋଃ କିନାନିୟ, ଇମୋରିୟ, ହିତ୍ତିୟ, ପିରିଷିୟ, ହିବ୍ବୀୟ, ଓଡ଼ୋଃ ଯିବୁଷିୟ ହଡ଼କକେ ହାର୍ ଅଡଙ୍ଗ୍କଆ। ଆପେ ତଆ ହୁରୁମ୍ସୁକୁ ଲିଙ୍ଗିୟଃତାନ୍ ଦିଶୁମ୍ତେ ସେନଃପେ, ମେନ୍ଦ ଆଇଙ୍ଗ୍ ଆପେୟାଃଲଃ କାଇଙ୍ଗ୍ ସେନା, ଚିଆଃଚି ଆପେ କେଟେଃଦ୍ ମନ୍କ ତାନ୍ପେ, ଏନାତେ ହବାସାକାଅଃଆ ହରାରେ ଆପେକେ ଜିଅନ୍ତାପେୟାଇଙ୍ଗ୍।”
ନେ ଦୁକୁ କାଜି ଆୟୁମ୍ କେଦ୍ତେ ହଡ଼କ ଏୟମ୍କେଦା ଓଡ଼ୋଃ ଜେତାଏ କାକ ସିଙ୍ଗାର୍ୟାନା। ପ୍ରାଭୁ ମୁଶାକେ କାଜିକାଇ ତାଇକେନା, ଇସ୍ରାଏଲ୍ ହନ୍କକେ ଆଇଁୟାଃ ନେ କାଜି କାଜିୟାକମେ, “ଆପେ କେଟେଃଦ୍ ମନ୍ରେନ୍ ହଡ଼କ ତାନ୍ପେ, ଆଇଙ୍ଗ୍ ଆପେଲଃ ମିସାତେ ସେନ୍ରେ ହବାସାକାଅଃଆ, ଆଇଙ୍ଗ୍ ଆପେକେ ଜିଅନ୍ପେୟାଇଙ୍ଗ୍। ଏନାତେ ନାହାଁଃ ଆପେ ଆପେୟାଃ ସୋନା ରୁପାକ ବାଗିତାପେ, ଆପେକେ ଚିନାଃ ଚିକାପେୟାଇଙ୍ଗ୍ ଏନା ଉହାଟ୍ ରିକାଏୟାଇଙ୍ଗ୍।” ଏନାମେନ୍ତେ ଇସ୍ରାଏଲ୍କ ହୋରେବ୍ ବୁରୁ ହେତେ ଆୟୁର୍ତେ ଆକଆଃ ସିଙ୍ଗାର୍ତେୟାଃ ହଲେକ୍କେଦା।
ନେପେଲ୍ କୁମ୍ବା
ମୁଶା କୁମ୍ବାକେ ଡେରାରାଃ ବାହାରିତେ ଇଦିକେଦ୍ଲଃ ସାଙ୍ଗିନ୍ରେ ବାଇ ତାଇକେନା ଓଡ଼ୋଃ ଏନାକେ ନେପେଲ୍ କୁମ୍ବା କାଜିୟଃ ତାଇକେନା ଓଡ଼ୋଃ ଜେତାଏ ପ୍ରାଭୁକେ ଦାଣାଁ ତାନ୍ଲଃ ହିଜୁଃତାନ୍ରେ ଡେରାରାଃ ଆୟାର୍ରେ ତାଇନଃ ନେପେଲ୍ କୁମ୍ବାତାଃ ଅଡଙ୍ଗ୍ ତାଇକେନାଏ। ମୁଶା ଚିମ୍ତାଙ୍ଗ୍ ଏନ୍ କୁମ୍ବା ହେପାଦ୍ ସେନ୍ ତାଇକେନାଏ ଇମ୍ତାଙ୍ଗ୍ ହଡ଼କ ଆପ୍ନାଃ ଡେରାତାଃ ତିଙ୍ଗୁଃ ତାଇକେନାକ ଓଡ଼ୋଃ ଚିମ୍ତାଙ୍ଗ୍ ଜାକେଦ୍ କୁମ୍ବାରେ କାଏ ବଲଃ ଇମ୍ତାଙ୍ଗ୍ ଜାକେଦ୍ ଆୟାଃସାଃ ନେଲ୍ତାନ୍ ତାଇକେନାକ। ଚିମ୍ତାଙ୍ଗ୍ ମୁଶା କୁମ୍ବାରେ ବଲଃ ତାଇକେନା ଇମ୍ତାଗି ରିମିଲ୍ରାଃ ମିଆଦ୍ ଖୁଣ୍ଟୁ ହିଜୁଃ କେଦ୍ତେ ଦୁହାର୍ତାଃରେ ତିଙ୍ଗୁକ ତାଇକେନା ଓଡ଼ୋଃ ପାର୍ମେଶ୍ଵାର୍ ମୁଶାଲଃ ଜାଗାର୍ ତାଇକେନା। ଓଡ଼ୋଃ ଦୁହାର୍ତାଃ ରିମିଲ୍ରେୟାଃ ଖୁଣ୍ଟୁ ତିଙ୍ଗୁ ନେଲ୍କେଦ୍ତେ ହଡ଼କ ଆପ୍ନାଃ ଆପ୍ନାଃ ଦୁହାର୍ ହେତେ ଜହାର୍ ତାଇକେନା। ଓଡ଼ୋଃ ପ୍ରାଭୁ ନେ'ଲେକାଗି ମୁଶାଲଃ ଗାତିଲେକା ସାମ୍ନାଙ୍ଗ୍ରେଗି ଜାଗାର୍ତାନ୍ ତାଇକେନା ଓଡ଼ୋଃ ମୁଶା ଡେରାତେ ରୁହାଡ଼୍ ତାଇକେନା ମେନ୍ଦ ଯିହୋଶୁୟ ନୁତୁମ୍ ମିଆଁଦ୍ ସେପେଡ଼େଦ୍ ନୁନ୍ରାଃ ହନ୍ ଓଡ଼ୋଃ ମୁଶାରାଃ ଦାସି ତାଇକେନା ଇନିଃ କୁମ୍ବାହେତେ କାଏ ଅଡଙ୍ଗ୍ ତାଇକେନା।
ମୁଶାରାଃ ବିନ୍ତି
ମୁଶା ପ୍ରାଭୁକେ କାଜିକିୟା, “ନେ ହଡ଼କକେ ସୁତୁଃ ଇଦିକ ନାଗେନ୍ତେ ଆମ୍ ଆଇଙ୍ଗ୍କେ କାଜିଙ୍ଗ୍ତାନାମ୍, ମେନ୍ଦ ଆଇଁୟାଃଲଃ ଅକଏକେମ୍ କୁଲିୟା, ଏନା କାମ୍ କାଜିକାଦା। ଏନ୍ରେହ ଆମ୍ କାଜିକାଦାମେ, ଆଇଙ୍ଗ୍ ଆମ୍କେ ଆମାଃ ନୁତୁମ୍ଲଃ ସାରିକାଦ୍ମାଇଙ୍ଗ୍ ଓଡ଼ୋଃ ଆମ୍ ଆଇଁୟାଃ ଲିବୁଇ ନାମାକାଦାମ୍। ଆଇଙ୍ଗ୍ ଆମାଃ ନେପେଲ୍ରେ ଲିବୁଇ ନାମାକାଦ୍ ରେଦ, ଆମାଃ ହରା ଆଇଙ୍ଗ୍କେ ଉଦୁବାଇଙ୍ଗ୍ମେ, ଏନ୍ରେଦ ଆମ୍କେ ସାରିୟାଇଙ୍ଗ୍ ଓଡ଼ୋଃ ଆମାଃ ନେପେଲ୍ରେ ଲିବୁଇ ନାମାକାତେୟାଃଇଙ୍ଗ୍। ଆଡଃଗି ନେ ଜାତି ଆମାଃ ହଡ଼ତାନ୍କ ଏନା ପାହାମେମେ।”
ପାର୍ମେଶ୍ୱାର୍ କାଜିକାଦା, “ଆଇଙ୍ଗ୍ ଆମାଃଲଃ ସେନାଃ ଓଡ଼ୋଃ ଆମ୍କେ ରୁଡ଼ୁନ୍ ଏମାମେୟାଇଙ୍ଗ୍।”
ଓଡ଼ୋଃ ମୁଶା କାଜିକିୟା, “ଆମ୍ କାମ୍ ସେନ୍ରେଦ ନେତାଃଏତେ ଆଲମ୍ ଇଦିଲେୟା। ଆମ୍ ଆଲେଲଃ କାମ୍ ସେନ୍ରେଦ ଆଇଙ୍ଗ୍ ଓଡ଼ୋଃ ନେ ହଡ଼କ ଆମାଃ ଲିବୁଇ ନାମାକାଦାକ ମେନ୍ତେ ଚିଲ୍କା ସାରିୟାକ ? ଆଇଙ୍ଗ୍ ଓଡ଼ୋଃ ଆମାଃ ହଡ଼କ ନେ ଅତେଦିଶୁମ୍ରେନ୍ ଏଟାଃ ସବେନ୍ ହଡ଼କତାଃଏତେ ଆପାନ୍ତାନ୍କ ଏନା ଚିଲ୍କା ସାରିୟାଃକ ?”
ପ୍ରାଭୁ ମୁଶାକେ କାଜିକିୟା, “ଆମାଃ କାଜିଲେକା ଆଇଙ୍ଗ୍ ରିକାଏୟାଇଙ୍ଗ୍, ଚିଆଃଚି ଆମ୍ ଆଇଁୟାଃ ନେପେଲ୍ରେ ଲିବୁଇ ନାମାକାଦାମ୍, ଓଡ଼ୋଃ ଆଇଙ୍ଗ୍ ଆମ୍କେ ଆମାଃ ନୁତୁମ୍ ହରାତେ ସାରିକାଦ୍ମାଇଙ୍ଗ୍।”
ମୁଶା କାଜିକେଦା, “ଆମ୍ ଆମାଃ ମାନାରାଙ୍ଗ୍ ଉଦୁବାଇଙ୍ଗ୍ମେ।”
ପ୍ରାଭୁ କାଜିରୁହାଡ଼୍କିୟାଏ, “ଆଇଙ୍ଗ୍ ଆମାଃ ଆୟାର୍ରେ ଆଇଁୟାଃ ସବେନ୍ ବୁଗିନାଃ ଉଦୁବେୟାଇଙ୍ଗ୍ ଓଡ଼ୋଃ ପ୍ରାଭୁଆଃ ନୁତୁମ୍ ଆମାଃ ଆୟାର୍ରେ ଉଦୁବେୟାଇଙ୍ଗ୍। ଆଇଁୟାଃ ଇଛାସାନାଙ୍ଗ୍ଲେକା ଆଇଙ୍ଗ୍ ଅକଏକେ ସାଲାଃଇଙ୍ଗ୍ ଇନିଃକେ ସାୟାଦ୍ ଏମାଃଇଙ୍ଗ୍, ଓଡ଼ୋଃ ଅକଏକେ ସାନାଙ୍ଗ୍ଇଙ୍ଗ୍ ଇନିଃକେ ଦାୟା ରିକାଃଇଙ୍ଗ୍। ଓଡ଼ୋଃ ଇନିଃ କାଜିକେଦା, ଆମ୍ ଆଇଁୟାଃ ମେଦ୍ମୁହାଁଡ଼୍ କାମ୍ ନେଲ୍ ଦାଡ଼ିୟା, ଚିୟାଃଚି ହଡ଼ ଆଇଁୟାଃ ମେଦ୍ମୁହାଁଡ଼୍ ନେଲ୍ କେଦ୍ତେ କାଏ ଜୀହିଦଃଆ। ପ୍ରାଭୁ କାଜିକେଦା, ଆଇଙ୍ଗ୍ତାଃ ମିଆଦ୍ ଠାୟାଦ୍ ମେନାଃ, ଆମ୍ ଏନ୍ ସେରେଙ୍ଗ୍ରେ ତିଙ୍ଗୁନ୍ମେ। ଆଇଁୟାଃ ମାନାରାଙ୍ଗ୍ ପାରମ୍ ଇମ୍ତାଙ୍ଗ୍ ଆମ୍କେ ସେରେଙ୍ଗ୍ ଲାତାର୍ରେ ଦହମେୟାଁ ଓଡ଼ୋଃ ଆଉରି ପାରମଃ ଜାକେଦ୍ ତିଃଇତେ ଦାପାଲ୍ମେୟାଁ। ଏନ୍ତେ ଆଇଁୟାଃ ତିଃଇ ଆତମେୟାଁ ଓଡ଼ୋଃ ଆମ୍ ଆଇଁୟାଃ ଦୟାକେ ନେଲେୟା, ଆଇଁୟାଃ ମେଦ୍ମୁହାଡ଼୍ କାମ୍ ନେଲ୍ ଦାଡ଼ିୟା।”
Munda Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.