Meng Lai 91:1

Thurai dow ang kowh tatung tanimra

1Lang kri lang kraing mih Thurai nimkrüa kowi uowi mih kowi dow Thurai peah thaulangra khai;

amatni kowi dow lowra nowng chang mih Thurai mih thaulangma pe uowiah reng chekhai.

2CHAKRAMANG lawnguan kowi maiawng ang natek kown,

“Ang kowh tatung tanimra hai ang kowh akhawtma mih kimkrowng dow aia chowtaih;

ang neplawng nesak reng mih ang kowh Thurai dow aia chowtaih,” napa kown.

3Aia dow chakta hüah mih leng hownia nalawng en kown,

now makowng hawi hownia natowkala en kown.

4Alap hown uakling takhula chauüa iawng aia nakhula en kown,

now aia tut-e athaulangma en naka tatung tanimra kown.

Aia kowh kaah sakowm mih rah dow kawngma hai tasen tawnguat iawng natowkala en reng kown.

5Iak-e khe phih nauang ting kown mih kowi hangkow kram diah,

ni-e khe salangba hown nauang sen en kown mih kowi hangkow kram diah.

6Iak-e khe makowng hawi nauang ting kown mih kowi hangkow kram diah,

now ni ür thüm khe piakra uang ting kown mih kowi paw hangkow kram diah.

7En ria kowi maru kowng 1,000 ia chepaw naia kown,

now akeng prakowi maru kowng 10,000 ia chepaw naia kown.

Nachenganchepaw nami piakra dow en tut-e nauang ting kown nadowi.

8Krawi tang mü diah;

nahanow maru ngakuüa ka ripra mih en nakhi kown.

9CHAKRAMANG tut-e en tatung tanim khai hanow,

lang kri lang kraing mih Thurai tut-e en uowi khai hanow,

10tawng iawng mih piakra paw en luk kowi nauang ting kown nadowi,

tawng iawng mih hawi paw en kim kowi nauang kla kown nadowi.

11Tawngplawng kowchow panow CHAKRAMANG dow aia kowh kramamu-uüa kowi napeah ana kown;

nahanow amatni dow en cham kowi rah towng kowi nakrawi takhula en reng kown.

12Amatni dow amatni kowh rut hown nadowk en kown;

nahanow en kowh klowng dow hua kowi naka arau kown nadowi bowt.

13Krangsi iawng akürma mih en kowh ransu-uüa kowi dow en nanowngta kown,

rua iawng kramra uowima mih ransu-uüa kowi paw en nanowngta kown.

14CHAKRAMANG tek mih, “Sakrau ang miuüa kowi dow ang natakhula kown,

ang kowh ming tuk miuüa kowi dow phih hownia ang natowkala kown.

15Amatni haw ang khai hanow amatni kowi ang naklangah kown,

amatni kla phih mih khin khe amatni tut-e ang natawi uowila reng kown.

Amatni kowi dow ang takhula reng kown,

now ang napeah ringkawra reng kown.

16Chowngdawng sakklangma ang pe singah mih hownia amatni kowi dow ang nape sak-ihah kown,

amatni kowi dow ang kowh lawngra lup ang nape khi-ah kown,” pakhai.