Meng Lai 27:14

CHAKRAMANG dow ang kowh anowi

David kowh meng.

1CHAKRAMANG dow ang kowh anowi hai ang kowh lawng miia chekhai;

naiawng rakowi mia kowi chow ang nakram kown?

CHAKRAMANG dow ang kowh akhawtma mih kangchawngra kim chekhai,

tawngplawng kowchow ang nakram kown?

2Maru ngakuüa dow nauang piak ang kownkow uang tarü reng;

nami khin khe amatni dow tatui hanow tim büah reng chekhai.

3Siphaiuüa rumta ang lut chepaw ang nakramah kown nadowi,

amatni uang sen ang chepaw Thurai luk kowi ang naowmsak reng kown.

4CHAKRAMANG tut-e ang lüah mih sia uowi pachap mih dow:

chownglawng prat CHAKRAMANG kim kowi ang naka uowi kown mih chekhai.

Nahanow aia klangiung mih krang ang naka mü kown towbowt,

now aia lawnguan kowi ang natuak reng kown towbowt.

5Tawngplawng kowchow panow ang kla phih mih khin khe aia dow nape tatung tanim ang kown;

aia dow aia kowh kim chimsaima mih kowi napet ang reng kown,

now singku huamang akroma mih luk kowi aia natow ang kown.

6Nakhowk khe dow rum ang reng mih ransu-uüa lak-e ang kowh ringkawra nalang hu kown,

awmrawmma hown aia kim kowi maiow maiow phuchua pawi ang nachang bowt kown.

CHAKRAMANG vüi kowi ang natek meng kown,

aia kiow müa meng ang natek reng kown.

7Aw CHAKRAMANG, ang haw en hanow sünta ang diah,

saksing sana ang diah, now uang klang ang reng diah.

8“Ang tut-e uang lü uang leng büa diah,” pahai en tekah mih laiklow ang sak kowi uowi reng.

Naiawng rakowi aw CHAKRAMANG, ang nahaw en reng kown.

9En kowh lumowr mih ang hownia hangkow cham dangta ang diah,

en kunmarau rakowi en kowh nar kowi hangkow nuata diah.

Khowng ang reng mih dow en chowtaih chekhai.

Aw CHAKRAMANG, ang kowh lawng miia,

hangkow powtta ang diah, now hauang nuata ang diah.

10Ang kowh u-pa nuata ang chepaw

en dow namingkhet ang reng kown.

11Aw CHAKRAMANG, ang kowh ransu-uüa dow akawmma chekhai.

Naiawng rakowi en kowh tiama tüng ang diah,

now tiama anowmma mih kowi kruila ang reng diah.

12Ang kowh ransu-uüa rut kowi hauang apta ang hüah diah,

amatni dow amatni nau iawng nachang ang kown chekhai.

Tawngplawng kowchow panow daila saksiuüa kingküa ang mih nowm khowk,

amatni dow nachang ang anowng apowng kown mih nau mih nowm chekhai.

13Ang chownglawng kowi en iung mih krang ang nakhila ngengche kown,

nami lawnguan kowi ang owm chekhai.

14CHAKRAMANG luk kowi sakowm büa diah,

sakkhawtma hai sakkraingma uowiah büa diah.

CHAKRAMANG luk kowi owmsak büa reng diah.