Chanlai Lawng 11

1Kuanla maru mih set tawng mih maru kowi dow CHAKRAMANG suiah reng.

Tawkche athikma mih set tawng mih maru kowi dow CHAKRAMANG sak-ihah reng.

2Bawrira dow achur khe maru kowi pe rukraira reng,

now khamsum khamdaw mih dow ka chanlaira reng.

3Anowmma mih maru-uüa kowi dow amatni kowh lup nowm kruitownah reng.

Tawkche kaah sakowm dowi mih maru-uüa dow amatni kowh kiang ngak rakowi piak reng.

4Thurai kunmaraura ni uang ting khe dow dawngthawnguan mih tawngpaw tawi tauang dowi chekhai;

achinawmma mih chownglawng dow kowngra hownia maru kowi lawngah reng.

5Aiungma mih maru kowi dow tachi tanawmra mih tiama atengma chang pe reng.

Tawkche maru ngakuüa dow amatni kowh angak changra hownia piak reng chekhai.

6Achinawmma mih maru-uüa kowi dow amatni tachi tanawmra mih lawngah reng.

Tawkche kaah sakowm dowi miuüa dow amatni kowh lawphara kowi cham takhuowk reng.

7Maru ngak kowh dow kowng now aia kowh sakowmra paw tawi piak reng,

now dawngthawnguan luk kowi kowh aia kowh sakowmra paw tawi piak reng chekhai.

8Achinawmma mih maru dow akrat pusara hownia ka lawngra reng.

Tawkche nami akrat pusara mih maru ngakuüa luk kowi uang kla reng.

9Thurai kowi ringkaw dowi mih maru dow aia kowh nawr hown klowkchakuüa kowi piakah reng.

Tawkche Thurai kowi ringkaw mih maru dow aia kowh tukra hownia ka lawngra reng chekhai.

10Thurai kowi ringkaw miuüa ka iungra khe marow kowi kowh maru-uüa awmrawm reng,

now maru ngakuüa tut-e piakra uang ting khe paw maru kawmuüa awmrawm kowh how reng chekhai.

11Maru iunguüa dow marow vüi prasira chekhai.

Tawkche maru ngakuüa laiklow hown marow piak reng chekhai.

12Kowmatia klowkchak kowi nü dowi klowk dowi mih maru dow prengia uowi dowi chekhai.

Tawkche aiung angak tukra uowi miuüa dow aia kowh nawr mih khetah kaneu reng.

13Prawng maru reng mih maru dow itah kown mih laiklow paw phuangta reng;

kaah sakowm mih maru dow itah mih chap kowi krawi phuang dowi.

14Aiungma mih kruitown mih khawr rakowi chenchapuüa sum reng;

prengia pek mih akawmma now chenchapuüa ka lawngra reng chekhai.

15Tukah dowi mih maru kowh lowi thawk tawi takham mih maru dow nakawm ngengche kown.

Tawkche naiawng cham tawi takham dowi mih maru dow thaulang reng.

16Chowm krang uowi krang iungma mih masiuüa dow ka ringkawra reng.

Tawkche maru bawp dawma miuüa dow dawngthawnguan chowtaih ka reng.

17Saksing sana maru mih dow kowmatia iung müa thawp mih chekhai,

now saksing sana maru dowi mih dow kowmatia piak müa chang mih chekhai.

18Maru ngakuüa kramah mih dawngthawnguan dow kham dowi chekhai.

Tawkche chang kawngmu lup miuüa dow akhamma mih awmrawm sung ka reng.

19Achi anawmma atungma uowi mih maru dow ka singra reng.

Tawkche angak kowi krawi mih maru dow kowng reng chekhai.

20Saktuak ngak atekma mih maru kowi dow CHAKRAMANG sui reng.

Tawkche achinawmma sun chownglawng mih maru kowi dow aia sak-ih reng chekhai.

21Maru ngakuüa dow naka ripra ngengche kown mih enni tuk chekhai,

now achinawmma miuüa dow tawng iawng mih ripra paw naka kown nadowi.

22Pak param kowi ü pe kuh ramseng chepaw pak tut-e dow tawngpaw asung uowi dowi,

nami iawng apowm klangiungma chepaw aiung angak tuk dowi mih masiuüa dow asung uowi dowi.

23Achinawmma mih maru kowh sak naura hownia dow iungra uang ting reng.

Tawkche maru ngakuüa sak naura hownia dow maru kunmaraura uang ting reng.

24Ngan dowi kowi pe miuüa dow peta mih lak-e ka reng chekhai.

Tawkche tating tataing iawng pe kown nau dowi miuüa dow khawr reng chekhai.

25Ngan dowi kowi pe mih maru dow iuksown reng,

maru kowi pe duah mih maru dow aia paw du reng.

26Asung khakma khe sumah kownkow lawt luprak dowi mih kowi dow maru peah piati reng.

Tawkche asung tanchow chepaw sum luprak mih maru kowi dow maru peah prasi reng.

27Aiung cham mih maru dow ka saksing sanara reng.

Tawkche angak cham mih maru luk kowi dow angak uang ting reng.

28Dawngthawnguan luk kowi neplawng nesak mih maru dow singh ram min iawng dowh reng.

Tawkche achinawmma mih maru dow asingma mih singh ram iawng uowi reng.

29Kowmatia kimchak luk kowi uang pawla kratra mih maru kowh dow achur kowi tawngpaw nauowi kown nadowi,

now bualama mih maru-uüa dow chanlaima miuüa kowh nar nachowng kown.

30Achinawmma mih maru dow pe singra mih singh iawng,

chanlaima mih maru dow maru naukrang iawng tuk uowi rakowi maru nauah reng.

31Achinawmma miuüa dow mami lusa kowi amatni kowh lup sung ka reng,

nami iawng maru ngakuüa paw amatni kowh lup sung naka ngengche kown.