Leviuüa 9

Arawn hai achapauüa uown chang phuchua mih

1Ap pe arah mih pawi chur kung kowi raiat ni mih ni khe dow Arawn hai achapauüa hailawm Israel lawngtang aluchowuüa kowi Mosi hawah khai. 2Mosi tek pe Arawn mih, “En kowh angak lawt lük müa uanap chang müa uang pawla chiala chah apum diah, now tikah mih uanap chang müa paw uang pawla ruapurla apum diah. Nami chiala chah hai ruapurla dow aser auowk naia uowi kown nadowi. Nami dow CHAKRAMANG tut-e ap-ah diah. 3-4Now Israeluüa kowi en natek pe kown mih, ‘CHAKRAMANG vüi changla angak lawt lük müa uanap kownkow nauang pawla rua apum kown takla. Now changla taking tasangra uanap kownkow chia hai ruapurla paw nauang pawla apum chi kown takla. Nami klen kowi nachangla tikah mih uanap kownkow chia chah hai ruapur chah paw nauang pawla apum chi kown takla. Nami chia chah hai ruapur chah dow aningchow mih naown kown takla, now aser auowk paw naia uowi kown nadowi. Naiawngün tawncher klen kowi lawk pe sau mih kawmdi uanap paw CHAKRAMANG tut-e uang ap büa diah. Naiawngün maten dow enni naap ngengche kown takla. Tawngplawng kowchow panow ani dow enni pur kowi CHAKRAMANG nauang tatüng kown chekhai,’ pape diah,” pakhai.

5Now Israeluüa mih Mosi ana pek iawng naiawngün uanh maten taklowp taklangra te pur kowi uang pawla khai. Israeluüa mih akawm srui CHAKRAMANG pur kowi kowiowng khai. 6Nakhowk khe Mosi tek pe Israeluüa mih, “Enni pur kowi CHAKRAMANG kraingra nauang tatüngla kownkow naiawng nachang kown mih CHAKRAMANG pe enni ana khai,” pakhai.

7Nami kung kowi Mosi tek pe Arawn mih, “Phuchuara kowi kowkowi diah. Now angak lawt lük müa uanap hai tikah mih uanap pawi kowchang diah. Nahanow en hai maru kawmuüa kowh angak mih Thurai nalawtta enni kown towbowt. Maru kawmuüa uang pe mih uanh hown paw naiawngün uanap pawi chang pe diah. Nahanow amatni kowi mih CHAKRAMANG nalawtah kown towbowt. Nami dow CHAKRAMANG kowh ana pek chekhai,” pape khai.

8Now Arawn mih phuchuara kowi kowkowi hanow aiamat kowh angak lawt lük müa uanap kowi kowh chia chah kowngen khai bowt. 9Now achapauüa mih nami chia chah vi biatum hown pawla hanow Arawn kowi uang ap pe khai. Arawn mih nami vi kowi aia kowh rutchawk iu chimah hanow phuchuara luk kowi kowh anang maten kowi krawi plikah khai, now ta lat mih vi dow phuchuara daw kowi aia khükah khai. 10Mosi kowi kowh CHAKRAMANG peah ana iawng Arawn mih angak lawt lük müa uanap kowi kowh chia chah sau, akia pre buk hai plawng ram lang iuk mih phuchuara luk kowi tikah khai. 11Now anga hai apik dow tangbung uat kowi cham pawla hanow Arawn cham tikah khai.

12Now tikah mih uanap nachangla kownkow uang pawla mih ruapur dow Arawn ngenah khai. Now achapauüa mih nami vi pawla hanow Arawn kowi uang ap pe khai. Arawn dow nami vi mih phuchuara kowi tapat lut krawi patah khai. 13Achapauüa dow tikah mih uanap kowi kowh ap-ah mih ruapur lu hai anga aleia maten Arawn rut kowi uang ap pe khai. Now naiawngün dow phuchuara luk kowi Arawn tikah khai. 14Ruapur kawlakchak hai akhawk dow sauah hanow phuchuara luk kowi kowh tikah mih uanap luk kowi aia tikah khai.

15Nachangla angak lawt lük müa uanap kownkow Israeluüa uang pawla mih rua dow Arawn uang pawla khai. Nami rua dow maru kawmuüa kowh angak lawt müa kowi Arawn ngenah khai. Nami angak lawt lük müa uanap pawi dow rik chang khe kowh iawng changah khai. 16Nami kung kowi tikah mih uanap chang müa Israeluüa uang pawla mih chia chah hai ruapur chah dow CHAKRAMANG rirow iawng aia ap-ah khai. 17Now nachangla kawmdi uanap kownkow maru-uüa uang pawla mih uanh hownia chawmah achawm hanow rau-e kowh tikah mih uanap hown naiawngün dow phuchuara luk kowi Arawn tikah khai. 18Now nachangla taking tasangra uanap kownkow maru kawmuüa uang ap-ah mih chia hai ruapurla dow Arawn ngenah khai. Now achapauüa mih naiawngün vi pawla hanow Arawn rut kowi ap pe khai. Nami vi dow phuchuara kowi tapat lut Arawn krawi patah khai. 19Nami chia hai ruapurla kowh sau ün, amai tut hai riaklah sau ün, akia pre buk hai plawng ram lang iuk mih dow nami chia hai ruapurla sakowuh luk kowi krawi towah büah khai. 20Naiawngün maten dow pawla hanow phuchuara luk kowi Arawn tikah khai. 21Tawkche nami chia hai ruapurla kowh sakowuh hown athung nga dow CHAKRAMANG pur kowi Arawn krowngah khai; nami dow Mosi kowi kowh CHAKRAMANG peah mih ana iawng Arawn chang mih chekhai. Nami dow amülüngma mih uanap chekhai.

22Angak lawt lük müa uanap, tikah mih uanap hai taking tasangra uanap ki chang kung kowi dow maru kawmuüa prakowi par pe rut hanow Arawn peah prasi khai. Now phuchuara hownia aia mih uang iu dowm khai bowt. 23Mosi hai Arawn iüah dow taklowp taklangra te kowi kowkup khai. Amatchi dow uang lawt hanow maru kawmuüa kowi peah prasi khai. Now CHAKRAMANG kraingra dow maru maten pur kowi uang tatüng khai bowt. 24CHAKRAMANG dow uang chin pe maih hanow phuchuara luk kowi kowh tikah mih uanap hai sau maten mih uang kamta bowk khai. Naiawng phaw mih khi hanow maru kawmuüa dow awmrawm kowh how se krawng kowi tabawkah hanow CHAKRAMANG kowi chupah iiaah khai.