Leviuüa 10

Nadab hai Abihu iüah kowng mih

1Arawn kowh chapa Nadab hai Abihu iüah dow amatchi kowh mairing pawk müa puh hown pawla mairing hanow nami luk kowi nam iungma mih maikhük towk müa than prui pe khai, now CHAKRAMANG ana pek iawng nadowi hai nami maikhük CHAKRAMANG vüi kowi awr ap iüah khai. 2Naiawng rakowi CHAKRAMANG mih uang chin pe maih hanow amatchi kowi uang kamta khai, nahanow amatchi dow CHAKRAMANG pur kowi kowng khai. 3Nakhowk khe Mosi tek pe Arawn mih, “CHAKRAMANG tek mih maiawng, ‘Ang chimsaima pami ang tut-e kowh uang mih uamow maten nachün kown takla; nahanow maru maten pur kowi ang kowh kraingra mih ang natüngah kown. Now amatni dow naring nakaw ang kown,’ pakhai,” pape khai. Nami laiklow ta hanow Arawn mih tawngpaw tek dowi bowt chekhai.

4Misael hai Elzafan iüah kowi Mosi hawah now tek pe mih, “Mami re-e uang iüa diah; taklowp taklangra te viadawng hownia enchi kowh tainau chapa uak kawtla now tangbung khup rah uat kowi cham pawla iüa diah,” pakhai. Misael hai Elzafan iüah dow Arawn kowh pahi Uziel kowh chapa chekhai. 5Mosi tek pe iawng Nadab hai Abihu iüah kowh uak dow tawnguat kowi dowkla now tangbung khup rah uat kowi cham pawla iüah khai. Nakhowk khe paw Nadab hai Abihu iüah buk kowi dow uamow tawnguat uowi reng tak chekhai.

6Nakhowk khe Arawn hai achapa Eleazar hai Ithamar büah kowi Mosi tek pe mih, “Tawng iawng mih aprüa aiia paw enni uamowuüa naia tüng kown nadowi; sam paw enni naiiata nak kown nadowi, now tawnguat paw enni nathek kown nadowi. Naiawng che enni chang hanow enni nakowng kown, now Israel pachenma luk kowi paw CHAKRAMANG nakunmarau kown. Nachenganchepaw Israeluüa maten dow maih hown kowh CHAKRAMANG kamta mih maru vüi naia uowi uiting uangtak kown. 7Enni uamowuüa kowi dow CHAKRAMANG kowi naia chupiia kownkow lang krata enni khowk. Naiawng rakowi enni mih taklowp taklangra te plawt hownia cham ia lawt kown nadowi. Enni che cham lawt hanow enni nakowng kown,” pakhai. Now amatni dow Mosi tek iawng chün khai.

8Nakhowk khe CHAKRAMANG tek pe Arawn mih, 9“Taklowp taklangra te kowi enni uang kup mih khin khe grep tui lah, arak lah enni uang ia khamla kown nadowi; enni che kham hanow enni nakowng kown. Nami dow enni krungchakuüa vüi chowngchowng saksakma mih rirow chekhai. 10Chimsaima mih hai iawngpa mih lawnguan, now asür alawkma mih hai sürlawk dowi mih lawnguan kowi enni nakraah kaneu kown takla. 11Nami klen kowi Israeluüa vüi Mosi kowi CHAKRAMANG peah mih rirow maten paw amatni kowi enni natüng nasangah kown takla,” pakhai.

12Akung kowi Arawn hai achapa Eleazar hai Ithamar büah kowi Mosi tek pe mih, “CHAKRAMANG vüi chakkham uanap hownia kawmdi uanap kowi kowh ta lat mih srui chimsaima mih arah kowi nachaah büah kown takla. Naiawng rakowi taklowp taklangra te viadawng kowi chaah büa diah. Tawkche thawp kawm mih khin khe enni nathela pe tuah kown nadowi. 13Nami dow arah chimsaima mih kowi chowtaih enni nachaah kown. CHAKRAMANG vüi maih kowi kowh tikah mih kawmdi uanap hownia kowh ta lat mih dow en hai en chapauüa kowh vüi bak chekhai. Nami ana dow CHAKRAMANG hownia ang kaah mih chekhai. 14Tawkche CHAKRAMANG hown taking tasangra nauowila kownkow taking tasangra uanap kowi kowh Israeluüa uang ap-ah mih uanh hownia krowngah mih sakowuh hai athung dow en hai en chauüa kowi ang peta khowk. Naiawngün dow enni naiung cha kown. Tawkche tasür talawk dowi mih arah kowi enni nachaah kown takla. 15Chakkham uanap chang müa uang pawla sau mih khin khe CHAKRAMANG pur kowi athung hai sakowuh dow krowngah kown takla. Nami dow amülüngma mih uanap chekhai. Nami thung hai sakowuh dow CHAKRAMANG ana pek iawng en hai en chauüa kowh chowngchowng saksakma vüi bak chekhai,” pakhai.

16Now changla angak lawt lük müa uanap mih rua dow Mosi krawi chet hanow nami dow tikta tüng khowk pami tuk khai. Naiawng rakowi aia dow Arawn kowh chapa Eleazar hai Ithamar iüah luk kowi lainowmma kunmarau khai. Aia tek pe mih, 17“Tawngplawng kowchow angak lawt lük müa uanap kowi kowh chaknga taklowp taklangra te viadawng chimsaima kowi enchi chata dowi? Nami uanap dow achimsaima chekhai. Israeluüa kowh angak CHAKRAMANG pur kowi nachim nasaita pe hanow amatni kowh ripra hownia nalawngah kownkow nami uanh pe enchi mih chekhai. 18Nami rua vi dow arah chimsaima mih taklowp taklangra te lak kowi enni uang pawla dowi bowt chekhai; naiawng rakowi ang ana pek iawng nami chaknga mih arah chimsaima mih kowi enni nachata kown takla chowdiah,” pakhai.

19Arawn tek pe Mosi mih, “Ani mih CHAKRAMANG pur kowi angak lawt lük müa uanap hai tikah mih uanap pawi ki chang kung kowi ang kowh akeng mih chapa pre ia luk kowi tawng chow own mih sam tuak madiah! Naiawng phaw chepaw nami chaknga ang cha e dow CHAKRAMANG naawmrawm kown bow?” pakhai. 20Nami laiklow ta hanow Mosi sak-ih khai.