Jeremia 7

Thurai chup kim kowi Jeremia tek lai mih

1Jeremia tut-e CHAKRAMANG kowh laiklow uang ting khai: 2Thurai chup kim kimplawt kowi hawt iowng hanow en nahawt phuang kown mih, “Aw Juda maru-uüa, CHAKRAMANG kowi nauang chupiia kownkow mami kimplawt iawng enni uang kup miuüa maten CHAKRAMANG laiklow sünta büa diah. 3Mukuang siphaiuüa kowh CHAKRAMANG Israeluüa kowh Thurai tek mih, ‘Enni che ang nau iawng enni kowh chowm krang uowi krang hai lup chang khai hanow enni kowh pren kowi ang nape uowi enni kown. 4Mami re-e CHAKRAMANG kowh kim uowi rakowi thaulangra nauowi kown pahai krawi tek miuüa kowh laiklow hangkow owm büa diah. Naiawng krawi dai miuüa kowh laiklow owm mih hownia hang thu büa diah. 5Enni kowh chowm krang uowi krang hai lup chang krang che klangiungma takling taklai khai, lowkkowlowk klangiungma enni taklowp taklang khai, 6prenlang maru, saratchowuüa hai mamaimowuüa kowi ün chang nowng dowi, mami pren kowi kowh aprek uowi dowi mih maru kowi krawi sai dowi, now akeng thuraiuüa kowi ün enni cham tawi chupiia dowi 7hanow enni pipu-uüa kowi chowngchowng saksakma nauowila kownkow ang peah mih pren kowi ang nape uowi enni kown.

8“‘Hang thukla büah! Mami re-e Thurai chup kim uowi khai pache enni luk kowi akrat pusara nauang ting kown nadowi bowt pami hangkow ka tuak büa diah. Nami dow daila chowtaih. 9Enni dow cham ku khai, cham sai maru khai, cham chang iang hai dai lai hown cham kham sawi khai, now Baal thurai vüi kowi nam iungma mih maikhük cham towk khai. Nami klen kowi enni tukah dowi mih thurai kung kowi paw enni cham tawi krawi khai. 10Nami kung kowi ang kim kowi enni uang kup hanow ang pur kowi iowng se enni tek mih, “Anging dow thaulangma,” pakhai. Tawkche enni powt hanow enni changah reng mih angak enni chang khai iawk. 11Ang kowh kim mih kuk miuüa kowh tapetra bow enni nüla? Ang CHAKRAMANG tek khowk, naiawng enni chang mih ang khi chekhai.

12“‘Silo marow kowi kowh ang rik uowiah mih arah kowi kowkowi büa diah. Nakowi dow ang kowh maru Israeluüa chang ngak rakowi tawng iawng chow ang changah mih kowmü büa diah. 13Plan plan ang hang enni chepaw enni dow naiawngün lup ngak maten tawi chang khai. Ang haw enni khowk chepaw enni klang ang dowi chekhai. 14Naiawng rakowi Silo kowi kowh ang changah mih iawng nami ang kowh kim dow enni kowh neplawng nesakra ang nachangah kown. Mami enni pipu-uüa hai enni vüi ang pe enni mih arah kowi Silo kowi ang changah iawng ang nachangah kown. 15Enni kowh tainau Efraimuüa kowi ang prütah iawng enni kowi paw ang pur hownia ang naprüt enni kown,’ pape diah,” pakhai.

Juda maru-uüa chün lai dowi mih

16Jeremia kowi CHAKRAMANG tek pe mih, “Juda maru-uüa vüi kowi ang tut-e hauang lü khowng diah, now kar paw hauang kar diah; tawng iawng mih akhowng paw ang tut-e hauang awr lü awr leng diah. Tawngplawng kowchow panow ang dow en kowh laiklow nasünta kown nadowi. 17Amatni kowh marow kowi ün hai Jerusalem tiama kowi ün tawng iawng chow amatni chang angak mih en khi dowi bow? 18Amatni kowh chauüa dow changla phuchua kownkow krawi kua sawp khai, now pauüa dow hawt chang maih khai. Amatni kowh masi hawmh dow hawt lawk kawmdi khai, now mukuang kowi kowh masiuüa mang vüi kowi thawp kawmpah büah khai. Amatni dow towk ang kunmarau kownkow akeng mih thurai vüi kowi hüngah mih uanap pawi cham chang khai. 19Naiawng amatni chang mih dow amatni pe ang arau kownkow pe bow? Nadowi. Nami dow amatni matia kowi tape arau mih chekhai, now amatni luk kowi uang pawla rukrai mih chekhai,” pakhai.

20Naiawng rakowi CHAKRAMANG Thurai tek mih, “Ang kowh kunmaraura mami pren luk kowi ang nauang pe tingah kown. Mami pren kowi kowh maru, tawncher, singh kau hai luprak mih ang napiakta kown. Nami ang kowh kunmaraura dow maih iawng nalün hüah kown; katpaw namit kown nadowi,” pakhai.

21Mukuang siphaiuüa kowh CHAKRAMANG Israeluüa kowh Thurai tek mih, “Akeng mih phuchua hown changla tikah mih uanap pawi mih ngar paw enni chala prang e lang iung nadowi bow? 22Aigupta pren hownia enni pipu-uüa kowi ang uang lawt mih khin khe amatni kowi dow tawng iawng mih phuchua paw nachang kown mih ang tek pe dowi chekhai. Tikah mih uanap hai akeng mih phuchua paw nachang kown mih ang tek pe dowi chekhai. 23Tawkche enni pipu-uüa kowi ang peah ana mih, ‘Ang tek iawng uowi büa diah. Nahanow ang dow enni kowh Thurai nachowng kown, now enni dow ang kowh maru nachowng kown. Ang tek enni iawng chang büa diah; nahanow lowra sia enni vüi naiung kown,’ pakhai. 24Tawkche amatni dow ang laiklow sünta dowi chekhai, now nami prakowi pe ching büa dowi chekhai. Pe ching lak dow amatni low iawng saktuak khawtma uowi khai. Amatni dow naiung ngamlam lak dow uang nga ngamlam khai. 25Aigupta pren hownia enni pipu-uüa kowi ang uang lawtla hownia kawmat mowr pat ni towng ang nar risiuüa kowi ang uang chin enni khai. 26Tawkche enni dow ang laiklow sünta dowi chekhai, now ching paw pe dowi chekhai. Enni dow enni kowh pipu-uüa lak-e saktuak khawt khai, now amatni lak-e enni lang chang ngak khai.

27“Jeremia, naiawngün laiklow amatni kowi en tek pe mih khin khe amatni dow nasünta en kown nadowi, now amatni kowi en hawah mih khin khe paw amatni naklang en kown nadowi. 28Naiawng rakowi Judauüa kowi en natek pe kown mih, ‘Enni Juda chenchap dow CHAKRAMANG nau iawng chang dowi chekhai, now aia pringhawi enni mih khin khe paw enni sünta dowi chekhai. Enni pungmadawng hownia dow anowm tama khai bowt, now enni nawr hownia paw lainowm tama bowk khowk chekhai,’ pape diah.

29“Aw Jerusalem maru-uüa, enni uowila uiting uangtak mih natüngla kownkow kepta sam büa diah,

now singh kau uowi dowi mih hungh kowi cham krawi kar büa diah.

Tawngplawng kowchow panow CHAKRAMANG dow aia kunmarauah mih maru-uüa kowi nuata khai bowt,” pakhai.

Asak saira lawngrawi

30CHAKRAMANG tek mih, “Juda maru-uüa dow ang pur kowi chang angak khai. Amatni dow ang kim kowi suiiai kaniaima mih arup aren ün tow büah khai. Naiawng hai amatni dow ang kowh kim sürlawkah büah khai. 31Amatni dow amatni kowh chauüa kowi maih kowi natikah kownkow Ben-Hinawm lawngrawi kowi kowh Tofet pami arah kroma mih kowi chupiiara thawp lowk khai. Tawkche naiawng nachang kown mih ang peah ana dowi chekhai. Naiawng napeah ana kown mih ang sak kowi khowm uowi dowi chekhai. 32Naiawng rakowi sünta diah! Maiawng mih khin nauang ting kown. Nami khin khe dow maru kawmuüa mih nami arah kowi Tofet hai Ben-Hinawm lawngrawi pahai natek kown nadowi bowt; nami dow Sak Saira Lawngrawi pahai natek bowt kown. Tawngplawng kowchow panow Tofet kowi mih tadupra uowi dowi bowt mowr kowng miuüa kowi nadup büah kown. 33Nami kung kowi naiawngün maru-uüa uak dow uakling hai kaurawng uaramchak hawmh kowh chakkham nachowng kown. Naiawngün uakling hai kaurawng uaramchak hawmh kowi dow naprütah kown mih maru amiapaw nauowi kown nadowi. 34Judauüa marow kowi hai Jerusalem tiama kowi kowh piaw sawmlawm mih klow dow ang narimta pe kown, now masi huaiu sar asowrchow talawp talai mih klow paw ang narimta pe kown. Tawngplawng kowchow panow pren dow apiaknama naphaw bowt kown,” pakhai.