Jeremia 6

Jerusalem maru-uüa nauowi kaneu kown mih vüi achur laiklow

1CHAKRAMANG tek pe mih, “Aw Benjamin maru-uüa,

asak naplai kownkow Jerusalem marow hownia powt büa diah.

Tekoa marow kowi tum baw büa diah,

now Bet-Hakerem marow kowi nauowi kaneu kownkow ruang tamkhuown büa diah.

Tawngplawng kowchow panow tawngphak hownia phih uang tarü khowk;

akürma mih ransu siphaiuüa uang tarü khowk chekhai.

2Zaiawn chama dow klangiungma chekhai;

nachenganchepaw aia kowi dow ang napiakah kown.

3Jerusalem marow tapat lut ruapur thing miuüa krawi khup tangbung reng.

Nami iawng manguüa mih amatni kowh siphaiuüa kowi nauang pawla kown,

now marow tapat lut nakrawi khup tangbung büah kown.

Naiawngün siphaiuüa dow amatni chowlowkkow tangbung kowi nauowi büah kown.

4Manguüa natek kown mih, ‘Tasen kownkow kamrüt büa diah,

chu, sat downg khe Jerusalem maru-uüa kowi a-i kowsen bowt lah,’ napa kown.

Tawkche nami kung kowi amatni natek kown mih, ‘A-i dow kra khai bowt,

ni kowi kowh aiiu dow uang takuak khai bowt.

5Naiawng rakowi rü bowt, iak-e khe amatni kowi a-i kowsen bowt lah,

now amatni kowh akhawtma mih kangchawngra kim ün a-i kowpiakta pe bowt lah,’ napa kown,” pakhai.

6Akeng pren manguüa kowi mukuang siphaiuüa kowh CHAKRAMANG tek pe mih,

“Enni mih Jerusalem marow riaret kowi kowh singh maten kripta bowk diah,

now naklawla tap kownkow nami singh hown thawp dawng büa diah.

Tawngplawng kowchow panow nami marow kowi dow angak kangowh chekhai.

Naiawng rakowi nami marow kowi naripah kown takla.

7Tuikuam hownia tui uang lawt reng chekhai;

nami iawng Jerusalem hownia paw angak uang lawt reng chekhai.

Aia kowh marow kowi dow nowng chang powng chang klow hai piakra klow kangowh chekhai,

aia arau uowi mih hai ma dow ang pur kowi ang khi reng chekhai.

8Aw Jerusalem, ang pringhawi en mih laiklow sünta diah;

en che sünta dowi hanow ang napowtta en kown.

En kowh pren mih ang napiakta en kown,

now akhaw aklaima ang natowta en hüah kown,” pakhai.

9Mukuang siphaiuüa kowh CHAKRAMANG tek mih,

“Grep krum hownia maru krawi howngta grep uih prowng reng;

nami iawng ransu-uüa mih Jerusalem maru-uüa kowi nahowngta prowng kown.

Ta lat mih grep uih krawi ta lüng mih iawng

ta lat mih maru-uüa kowi paw ransu-uüa nachangah kown,” pakhai.

Amowt uowi dowi Thurai kowi Juda kingküaah mih

10Amia iawng miuüa hown chow ang nataklang kown?

Amia iawng miuüa kowi chow nauowi kaneu kown mih laiklow ang natek pe kown?

Amia iawng miuüa chow ang kowh laiklow nasünta ang kown?

Israeluüa kowh dow param pitma;

naiawng rakowi amatni dow ta dowi chekhai.

Amatni dow CHAKRAMANG kowh laiklow changla rensi küakau khai,

amatni dow aia kowh laiklow sünta kown nau dowi chekhai.

11Naiawng rakowi CHAKRAMANG kowh kunmaraura dow ang kowh kow tek khai bowt.

Nami dow ang ia tow dowi bowt chekhai.

CHAKRAMANG tek ang mih, “En kowh kunmaraura maru-uüa luk kowi sunah diah;

nami dow tiama kowi kowh ngeuüa luk kowi sunah diah.

Arasang takua talawm mih klanguüa hawmh luk kowi sunah diah,

now masi huaiu hai lawngtang matanguüa luk kowi sunah diah.

12Amatni kowh kim dow amatni ransu-uüa kowh nachowng kown,

amatni kowh üa hai masi paw amatni ransu-uüa kowh nachowng kown.

Tawngplawng kowchow panow mami pren kowi ang nakingküaah kown;

mami prenchakuüa luk kowi ang kowh rut akürma mih ang napar pe kown.

Ang CHAKRAMANG mami laiklow ang tek khowk.

13“Amatni dow aiuk hai asowm bowkbowk lawpha khai,

nami klen kowi risi hai uamowuüa paw maru kowi krawi kuan khai.

14Risi hai uamowuüa dow ang maru-uüa kowh kramra uowima mih ma iawng mih angak iungta pe dowi chekhai;

iungta pe lak dow amatni daiah mih, ‘Iung kown taih, iung kown taih’ pakhai.

Tawkche amatni tek iawng iung dowi chekhai.

15Amatni dow amatni kowh naiawngün suiiai kaniaima mih lup ngak rakowi mapaw rukrai dowi chekhai,

amatni dow rukrai pami hing tawn büah dowi chekhai.

Naiawng rakowi ang saiah mih maru ngakuüa pungmadawng kowi amatni paw natawi uowi kown.

Nakhowk khe amatni kowi dow ang nape khamah sum kown.

Ang CHAKRAMANG mami laiklow ang tek khowk,” pakhai.

Thurai tiama kowi Judauüa mang kown nau dowi mih

16Aia maru-uüa kowi CHAKRAMANG tek pe mih,

“Tiama krum kowi kowkowi hanow krawi tang mü büa diah;

tawng mih chow tiama iung hai tiama ngak mih krawi lünta büa diah,

now tiama iung prakowi mang büa diah.

Aiungma mih tiama kowi dow thaulangra uowi reng chekhai.

Tawkche enni tek mih, ‘Tiama iung kowi anging mang kown nadowi,’ pakhai.

17Enni luk kowi ang tow enni kangchawng mih hanow ang tek enni mih,

‘Enni mih baw tün sünta büa diah,’ pakhai.

Tawkche enni tek mih,

‘Anging sünta kown nadowi,’ pakhai.

18“Naiawng rakowi aw akeng chenchapuüa, sünta büa diah,

now tawng iawng chow ang maru-uüa napiak kown mih mü büa diah.

19Aw lusa maru-uüa, sünta büa diah,

Judauüa luk kowi ang nauang pawla pe ripra kown.

Nami dow amatni kowh sangkrangra ngak sung chekhai.

Tawngplawng kowchow panow amatni dow ang laiklow sünta dowi chekhai,

now ang kowh ari aiang paw nuata büah khai.

20Aw ang kowh maru-uüa, Seba pren hownia kowh nam iungma mih maikhük ang lakke dowi,

now alakma mih pren hownia enni uang pawla mih nam iungma mih chap paw ang lakke dowi chekhai.

Enni kowh tikah mih uanap dow ang awmrawm dowi,

now enni kowh tawncher phuchua nam paw ang nauta dowi,” pakhai.

21Naiawng rakowi CHAKRAMANG tek mih,

“Judauüa kowi maiow maiow ang natow pe krat pusara kown;

nami krat pusara kowi dow pa hai chapauüa paw natawi takla kown,

now kimping namkhetuüa hai auiua paw napiak kown,” pakhai.

Tawngphak hownia kowh ransu-uüa

22CHAKRAMANG plan tek mih, “Sünta büa diah!

Tawngphak hownia siphai uang pathum khowk,

now prenchur nammowt hownia aiukma mih chenchap nauang sen enni kownkow süngürma uang tarü khowk.

23Amatni tut-e dow salangba hai reh uowi chekhai,

amatni dow kunma ngakma hai saksing sana maru dowi chekhai.

Kawrnga hown uang tarü khe amatni kowh klow dow nowk rumrum khai,

nami klow dow sata tui talowng phunglung mih klow iawng chekhai.

Aw Jerusalem, en kowi nauang sen en kownkow

amatni dow tasen miuüa iawng kamrütma uang tarü khowk,” pakhai.

24Jerusalem maru-uüa tek mih, “Anging kowh ransu-uüa lawnguan kowi anging ta khowk chekhai.

Naiawng rakowi anging dow kram lai bowt kowh rut ün uaklakma towbowt.

Krat pusara dawng kowi anging hing uowi hüah towbowt,

anging kowh raura dow masiuüa penchow kimuowi mu rau iawng towbowt,” pakhai.

25CHAKRAMANG tek mih, “Prang kowi hang cham lawt büa diah,

now tiama kowi paw hang cham mang büa diah.

Lowra mih arah kowi a-i kowh ransu-uüa uowi chekhai,” pakhai.

26Aw ang kowh maru-uüa, khup sala uan büa diah,

now plawi dawng kowi taiua büa diah.

Chapa uowi lowkchow mih kowng khe kowh uowila uiting uangtak mih maru iawng kar büah nguk büa diah.

Tawngplawng kowchow panow piakra dow a-i luk kowi linlanma nauang ting kown.

27Jeremia kowi CHAKRAMANG tek pe mih,

“En kowi dow ang maru-uüa kowi nachaingla kownkow ang thawp en mih chekhai.

Lawngha iung mih iung dowi mih chaingah iawng ang maru-uüa kowi en nachaingah kown.

28Amatni dow lai üa kürma chekhai,

amatni kowh saktuak dow kri hai lawngha iawng akhawtma chekhai.

Amatni dow daila hown atekma chekhai,

now amatni kowh daila dow arah maten kowi krawi uetah khai.

29-30Tai kowi dow lün pluplup mih maih hown achangma changah reng.

Tawkche ang maru-uüa kowi dow achangma nowng changah dowi bowt chekhai.

Tawngplawng kowchow panow amatni kowh dow angak hu lai bowt;

naiawng rakowi amatni kowi dow ang nuata khai bowt,” pakhai.