2 Samuel 2

Juda krungchakuüa luk kowi David uown chowm mang mih

1Nami kung kowi CHAKRAMANG kowi David lüntaah mih, “Juda krungchakuüa kowh lowra mih marow kowi ang kowkowi kown bow?” pakhai.

CHAKRAMANG tek pe mih, “Ow, kowkowi bowt,” pape khai.

Now David lüntaah mih, “Tawng mih marow kowi chow ang kowkowi kown?” pakhai.

CHAKRAMANG tek pe mih, “Hebrawn marow kowi kowkowi bowt,” pape khai.

2Nahanow David dow aia kowh masi Ahinoam hai Abigail iüah kowi pawla now Hebrawn marow kowi kowkowi khai. Ahinoam dow Jezrel chenchap chekhai, now Abigail dow Karmel chenchap kowng mih Nabal kowh masi chekhai. 3Now aia tut-e kowh tawi uowi mih maru-uüa maten kowi dow kimchakuüa hailawm David pawla khai. Amatni dow Hebrawn marow riaret kowi kowh kua kowi krawi uowi büah khai. 4Nami khin khe Juda maru-uüa dow Hebrawn marow kowi uang büah khai. Now David kowi dow Juda krungchakuüa luk kowi nape chowmah mang kownkow nümnapah büah khai. Now David kowi tek pe büah mih, “Saul kowh uak dup miuüa dow Jabes-Gilead kowi kowh maru-uüa chekhai,” pape khai. 5Nakhowk khe aia dow Jabes-Gileaduüa tut-e kowchin maru khai. Now aia krawi tek pe mih, “Enni kowh chakramang Sawl kowi enni dup mih dow aia luk kowi kaah sakowm mih lup enni chang mih chekhai. Naiawng rakowi CHAKRAMANG mih enni luk kowi pacham pe enni prasi lah. 6CHAKRAMANG dow aia kowh achur uowi dowi mih sakraura hai kaah sakowmma mih rah pacham tüng enni lah. Now enni kowh nami lup rakowi ang paw aiungma naklowp naklang enni kown. 7Enni kowh mang Sawl dow kowng khai bowt. Nachenganchepaw sakkhawtma hai sakkraingma uowi büa diah. Tawngplawng kowchow panow amatni luk kowi nachowm mang kownkow Juda krungchakuüa dow nümnapta ang khowk chekhai,” pakhai.

Israel mang Isboset

8Nachenganchepaw Ner kowh chapa Abner dow Sawl kowh chapa Isboset kowi mih Jawrdan aw paipra pown kowi kowh Mahanaim pami arah kowi kowpawla khai. Abner dow Sawl kowh siphai aluchow chekhai. 9Now aia dow Isboset kowi mih Israeluüa maten luk kowi pe chowmah mang khai. Now Israeluüa nimkrüa kowi dow Gileaduüa, Asuruüa, Jezreluüa, Efraimuüa, Benjaminuüa hai akeng mih chenchapuüa paw tawi uowi chekhai. 10Sawl kowh chapa Isboset dow 40 ning khe Israeluüa luk kowi chowm mang khai, now aia dow pre ning mowr chowmla mang khai. Nachenganchepaw Juda krungchakuüa dow David nimkrüa kowi uowi büah khai. 11David mih Hebrawn marow hownia Juda krungchakuüa luk kowi ranit ning hown dawnglang mowr chowm mang khai.

Israeluüa hown Judauüa tasen mih

12Akat khe Ner kowh chapa Abner mih Sawl kowh chapa Isboset kowh maru-uüa kowi pawla now Mahanaim hownia Gibeawn marow kowi kowkowi khai. 13Nami khin khe Zerui kowh chapa Joab hai David kowh maru-uüa mih amatni hown nauang takrum kownkow uang tarü khai. Now nami pre thumchak maru-uüa dow Gibeawn kowi kowh kanh re-e uang takrum büah khai. Pathum mih maru-uüa dow kanh mapra pown kowi chowm khai, now alowk mih thumchakuüa dow kanh paipra pown kowi chowm khai.

14Nakhowk khe Abner tek pe Joab mih, “Pre thumchak hownia klanguüa pacham rü pre sum ia lah, now amatni mih a-i pur kowi saidawng hown pacham tadowk takhüm lah,” pakhai.

Joab klangah mih, “En tek iawng phaw kown taih,” pape khai.

15Now nape tadowkah takhüm kownkow Benjamin krungchak hai Sawl kowh chapa Isboset maru-uüa hownia 12 ia, now David kowh maru-uüa hownia 12 ia kloah büah khai. 16Nakhowk khe pre thumchak maru-uüa mih lowkkowlowk lu tadowk hanow betmaram kowi saichow hown tasawt büah khai, now amatni dow akrowksang taiua kowng büah bowk khai. Naiawng rakowi Gibeawn kowi kowh nami arah ming dow Helkat-Hazurim pahai chap pe khai. (Helkat-Hazurim pami dow “Saidawng dowm” pami chekhai).

17Nami ni khe amatni dow lainowmma tasen büah khai, now Abner hai Israeluüa dow David kowh maru-uüa tut-e sum khai. 18Nami tasenra kowi dow Zerui kowh chapa Joab, Abisai hai Asahel büah paw tawi uowi sum ia chekhai. Asahel dow kaurawng naki iawng iowm lenma chekhai. 19Aia dow Abner kowi kawikrawiah khai. Nami khin khe aia dow hawmlawm lakuai prakowi ngeu dowi chekhai; aia dow atengma Abner kowi kawikrawi khai. 20Now Abner dow iu dang now Asahel kowi tek pe mih, “En chowbowt bow Asahel?” pakhai.

Asahel tek pe mih, “Ow, ang chowbowt Asahel,” pape khai.

21Nakhowk khe Abner tek pe aia mih, “Hawmlawm lakuai prakowi krawi tang mü diah, now mami klanguüa hawmh hownia khümah lowk ia now aia kowh tasen tawnguat pawta pe diah,” pakhai. Nachenganchepaw Asahel dow aia kung kawikrawi rengreng chekhai.

22Asahel kowi Abner plan tek pe mih, “Iowng diah, hauang kawikrawi ang tham bowt. Sai en kown ang nau dowi. Ang che saita en hanow en taimow Joab tut-e ang kowh lumowr tawng iawng chow ang natüngah kown?” pape khai.

23Nachenganchepaw Asahel dow plan kown mih nauta dowi chekhai. Nakhowk khe Abner dow aia kowh reh iu howkah now reh pung hown Asahel mu kowi haisawtah khai, now nami reh pung dow Asahel kumlawng hownia uang towk plaik khai. Nahanow Asahel dow nami re-e tim now hing kowng khai. Asahel kowngra re-e kowh uang ting mih maru maten dow nami re-e iowng hüah khai. 24Nachenganchepaw Joab hai Abisai iüah dow Abner kowi kawikrawi rengreng tak chekhai. Now Amma hungh re-e uang ting iüah khe dow sat kup khai bowt. Nami Amma hungh uowi rah dow Gibeawn kowi kowh süngrüp süngkangma prakowi mangla mih tiama re-e kowh Giah pami arah hown tatingtang klowk chekhai. 25Benjamin krungchakuüa dow Abner tut-e uang takua talawm khai iawk, now amatni dow pathum sang hungh luk kowi kowiowng büah khai.

26Nakhowk khe Abner tek pe Joab mih, “Chowngchowng saksakma saidawng hown a-i natasai reng kown bow? Achur kowi angak chowtaih naphaw kown mih en tuk dowi bow? En tainau-uüa kowi nakawikrawi dowi bowt kown mih tawng khe tak chow en maru-uüa kowi en napeah ana kown?” pakhai.

27Abner kowi Joab klangah mih, “Masing Thurai ming hown ang takham khowk, en tek dowi e dow maru-uüa mih amatni kowh tainau-uüa kowi tharau rau-e mowr kawikrawi kown tak chowdiah,” pape khai. 28Naiawng tek hanow aia dow nataingta tasen kownkow tum baw khai. Nahanow maru kawmuüa dow taingta tasen khai bowt. 29Now Abner hai aia maru-uüa dow uar prowt Araba lawngrawi iawng mang büah hanow Jawrdan aw haipown büah khai, now Mahanaim kowi kowtowm büah khai.

30Joab dow Abner kung kawikrawi mih towta hanow kim prakowi plan khai bowt. Now aia dow aia kowh maru-uüa kowi arasang kuaah khai. Nakhowk khe aia dow Asahel hai David kowh maru 19 iachow taih tawi taküm dowi mih aia tuk khai. 31Tawkche Abner kowh maru-uüa kowi David kowh maru-uüa saita pe mih dow 360 ia chekhai. Naiawngün kowng miuüa dow Benjamin krungchak kangowh chekhai. 32Amatni dow Asahel kowh uak mih kawtla büah hanow Bethlehem marow kowi kowpawla khai, now aia kowi dow a-pa tadupra kowi kowdupah büah khai. Nami kung kowi Joab hai aia maru-uüa dow uar prowt mang büah hanow Hebrawn marow kowi rau-e kowtowm büah khai.