2 Samuel 12

David kowi risi Nathan uang tüng pe atawi mih

1Naiawng rakowi CHAKRAMANG dow risi Nathan kowi David tut-e uang chin pe khai. Now risi Nathan dow maiawng David kowi lawp pe sangchia lowk khai, “Lowk mih marow kowi maru uowi pre ia. Lowk ia mih dow kurengma, now alowk mih dow ngaraima chekhai. 2Kurengma mih maru kowh dow chia tawn hai ruapur tawn uowi ahuma chekhai. 3Nachenganchepaw angaraima mih maru kowh dow cham ranah mih ruapur iia apumchow klen kowi tawngpaw uowi dowi chekhai. Aia dow nami ruapur iia kowi thumah khai, now nami ruapur iia dow aia kowh chauüa hown awr tawi iuksown khai. Aia dow aia chaah mih chakkham hownia nami ruapur iia kowi pela khai, tui paw aia khamah mih bia hownia pe khamah khai, now müi khe paw aia dow dawila reng chekhai. Naiawng hai aia dow nami ruapur iia kowi aia kowh chama iawng changla khai. 4Akat khe nami kurengma mih maru kim kowi pinsüa uang pün lowk ia khai. Nachenganchepaw nami maru dow aia kowh pinsüa vüi nachang pe kan kownkow aia kowh chia hai ruapur mih uam ngen dowi chekhai. Aia dow angaraima mih maru kowh ruapur iia apumchow mih kowpawta pe khai, now aia kowh pinsüa vüi changla pe kan khai,” pakhai.

5Nami laiklow tata hanow David mih nami kurengma mih maru luk kowi lainowmma kunmarau khai. Aia tek pe Nathan mih, “Masing CHAKRAMANG ming lüklau se ang tek khowk; naiawng chang mih maru kowi dow nakowngta kown takla. 6Aia dow ngaraima mih kowi saksing sanaah dowi kowi apumchow mih ruapur iia pawta pe khai. Naiawng rakowi apumchow mih takcha tali pum aia naiaw kown takla,” pakhai.

7Nakhowk khe Nathan tek pe David mih, “Nami maru dow en chowbowt! CHAKRAMANG Israeluüa kowh Thurai tek mih maiawng: Israeluüa luk kowi nachowm mang kownkow nümnap en mih dow ang chowtaih, now Sawl rut hownia lawng en mih paw ang chowtaih. 8En kowh kim iah kim dow ang pe en khai, now aia kowh masi hawmuüa paw ang pe en khai. En kowi dow Israel hai Juda krungchak luk kowi ang pe chowm en mang khai. Naiawngün en talawk dowi tak chepaw ang naplan pe en küng kown taih diah. 9Nachenganchepaw tawngplawng kowchow CHAKRAMANG kowh laiklow en nü en klowk dowi? Tawngplawng kowchow aia mik kowi angakma mih lup en tuk chang khai? Hit chenchap Uria kowi dow Amawnuüa kowi en pe saiah khai, now amasi kowi dow en changla en kowh masi khai. 10Naiawng rakowi en kimchakuüa mih tasen hown nakowng reng kown. Tawngplawng kowchow panow en dow nü ang klowk ang dowi chekhai. Hit chenchap Uria kowh masi kowi en changla en kowh masi khai.

11“En kimchak hownia dow ang nauang pawla en phih kown. En kowh masi hawmh kowi dow akeng mih maru lowk ia rut kowi en pur kowi ang napeah kown. Now en kowh masi hawmuüa kowi dow aia mih maru pur kowi naphua naiuaah kown. 12Nami lup ngak en chang mih dow kukpa chowtaih. Nachenganchepaw mami lup dow Israeluüa maten pur kowi ang nachangah kown,” pakhai.

13Nakhowk khe David tek pe Nathan mih, “CHAKRAMANG kowi kingküala mih angak ang changta khai,” pakhai.

Nathan klangah mih, “En kowh ngak dow CHAKRAMANG lawtta en khowk; en kowng dowi tham. 14Nachenganchepaw nami lup en chang mih dow CHAKRAMANG kowi en khareah mih iawng chekhai. Naiawng rakowi en kowh chapa mih nakowng ngengche kown,” pakhai.

David kowh chapa kowng mih

15Nami kung kowi dow Nathan mih kim prakowi mang khai bowt. Now CHAKRAMANG dow Uria masi hown kowh David kaah mih chapa kowi arau dikma pe phawah khai. 16Nami khin khe David dow achapa iung müa vüi CHAKRAMANG tut-e awr lü khai. Aia dow tawngpaw cha dowi kham dowi chekhai, now aia towklak kowi kowkup hanow uar prowt chi kimphai kowi aia mawk kunlun khai. 17Now aia kowh maru iukuüa dow aia kowi kowkrüngah kownkow aia re-e kowkowi khai. Nachenganchepaw aia dow rü pe dowi chekhai, now amatni hown tawi taiua cha hawm kan kown mih paw nau pe dowi chekhai.

18Arau uowi mih ranit ni kung kowi nami ngeuüa dow kowng khai bowt. Achapa kowng mih satang aia kowh maru-uüa mih David kowi kowuam tek pe dowi chekhai. Amatni tatek mih, “Achapa sing uowi reng tak khe khowm padow aia nau sünta a-i laiklow dowi chekhai. Nami kowi achapa kowng mih satang tawng iawng chow kawmat aia kowi a-i kowphowng pe kown? A-i che kowtek pe now aia mih natachang naklak ün tarawng,” pabüah khai.

19Nachenganchepaw aia kowh maru iukuüa naiawng tatek laisin mih khita hanow David mih achapa kowng khowk pami tuk khai bowt. Now amatni kowi aia lüntaah mih, “Ang kowh chapa kowng khai bowt bow?” pakhai.

Kowbüah klangah mih, “Ow, kowng khai bowt,” pabüah khai.

20Nakhowk khe dow David mih kimphai hownia awr rü now cham lu khai, now phawk unsi paingbawng ün hanow leta tawnguat khai. Aia dow CHAKRAMANG kim kowi kowkowi hanow kowkiow Thurai khai. Nami kung kowi dow aiamat kim kowi uang plan mang hanow aia kowi nauang then pe hawm kan kownkow aia mih lawt ana khai. Aia pur kowi uang then pe hawm kan hanow aia dow cha khai bowt. 21Aia kowh maru iukuüa lüntaah mih, “Naiawng en chang mih auan tawng chow? En chapa sing uowi reng tak khe dow tawngpaw cha dowi kham dowi kowi aia vüi en kar khai. Tawkche aia kowng kung kowi dow en awr rü hanow en cha en kham khai!” pabüah khai.

22David tek pe mih, “Ow, aia sing uowi reng tak khe dow tawngpaw cha dowi kham dowi kowi aia vüi ang kar khai. Tawngplawng kowchow panow CHAKRAMANG saksing sana ang hanow ang kowh chapa nasing kown taih padow ang ka tuak chekhai. 23Nachenganchepaw kawmat dow aia kowng khai bowt. Naiawng rakowi aia vüi cha dowi kham dowi kowi tawngplawng kowchow ang nauowi bowt kown? Aia kowi ang plan ia sing iawk kown bow? Pani dow aia tut-e ang nakowkowi kown. Tawkche aia dow ang tut-e nauang plan kown nadowi bowt,” pakhai.

Sawlawmawn uang dia mih

24-25David dow amasi Betseba kowi depah ruaah khai, now aia dow amasi hown kowplan taphua taiua khai bowt. Now amasi dow kum nau hanow ka chapa lowk ia khai. Achapa ming dow Sawlawmawn pahai David rük pe khai. Now risi Nathan mih David tut-e uangah hanow CHAKRAMANG ana pek iawng Jedidiah pahai nami ngiachow kowi uang rük pe ming khai. (Jedidiah pami dow “CHAKRAMANG sakrauah mih” pami chekhai). Tawngplawng kowchow panow nami ngiachow kowi dow CHAKRAMANG sakrauah khai.

David powngta pe Rabba marow kri mih

26Joab dow Amawnuüa kowh Rabba marow kri kowi kowsenah khai, now nami marow dow aia powngta pe khai. 27Now Joab dow David tut-e kowchin maru hanow krawi tek pe mih, “Rabba marow dow ang senta khowk, now amatni kala tui mih arah dow ang powngta pe khowk chekhai. 28Akeng mih siphaiuüa kowi kawmat en kuaah lawmah diah. Now marow mih uang rumah hanow uang powngta diah. Nadowi now marow mih ang nakrawi powngta kown. Nahanow marow ming dow ang kowh ming nachowng kown chekhai,” pakhai.

29Naiawng rakowi David mih siphaiuüa maten kowi kuaah lawmah now Rabba marow kowi kowkowi khai. Now amatni dow marow mih kowsenah hanow powngta büah khai. 30Aia dow nami marow kowi kowh mang lu hownia mang lukruk mih pawta pe khai, now aia lu kowi krukah khai. Nami lukruk dow kuh 34 set ngia hown kowh thawpah mih chekhai, now asung khakma mih hua ün paw dan pe khai. Aia dow nami marow hownia asung khakma mih uanh ahuma pawla khai. 31Aia dow marowchakuüa kowi uang lawtla hanow kür hown sawksak, lawngha tim hai marek hown pe changah lup khai. Now amatni kowi dow ipbawn paw pe thawpah khai. Amawnuüa kowh akeng mih marow maten kowi kowh maru-uüa kowi paw naiawng David pe changah khai. Nami kung kowi dow David mih aia kowh siphai hawmh maten kowi pawla now Jerusalem marow kowi kowplan mang khai bowt.