2 Krungchakuüa 7:14

Mukuang hownia maih uang kla mih

1Sawlawmawn ki chup Thurai hown krowksang mukuang pren hownia maih uang kla hanow tikah mih uanap hai akeng mih uanap kowi kowh uanh uang kamta bowk khai, now Thurai chup kim kowi dow CHAKRAMANG kraingra atekma uang uowi khai. 2Naiawng rakowi uamowuüa dow Thurai chup kim lak kowi kownowng kup büah dowi chekhai. 3Mukuang hownia maih uang kla mih hai Thurai chup kim kowi CHAKRAMANG kraingra uang uowi mih khita hanow Israeluüa dow krawng kowi tabawk krawm se CHAKRAMANG kowi chupiiaah khai, now aia kowi tek pe awmrawm lai büah khai. Amatni tek mih,

“Aia dow aiungma,

aia kowh achur uowi dowi mih sakraura dow chowngchowng saksakma anikma chekhai!” pabüah khai.

Ap Thurai chup kim mih

4Nami kung kowi dow mang Sawlawmawn hai aia hown kowh Israeluüa maten mih CHAKRAMANG pur kowi chang phuchua pawi khai. 5Nami khin khe mang Sawlawmawn mih chia 22,000 pum hai ruapur 120,000 pum hown chang uanap pawi khai. Naiawng hai mang Sawlawmawn hown Israeluüa maten mih ap Thurai chup kim khai. 6Nakhowk khe uamowuüa dow amatni iowngra kowi iowng khai, now Leviuüa paw CHAKRAMANG vüi nachang tünteu kownkow tünteu chang müa uanh dowkma hown amatni iowngra kowi iowng khai. Leviuüa hown tatang klowk iowng hanow uamowuüa tum baw khai, now Israeluüa dow iowngla rim khai. Naiawngün tünteu chang müa uanh dow narowsila CHAKRAMANG kownkow Leviuüa kowi David pe thawpah mih chekhai. Now naiawngün tünteu chang müa uanh dow, “CHAKRAMANG kowh achur uowi dowi mih sakraura dow chowngchowng saksakma anikma chekhai,” pahai aia kiow CHAKRAMANG mih khin khe tawngah reng mih chekhai.

7Ap Thurai chup kim mih ni khe mang Sawlawmawn mih Thurai chup kim pur kowi kowh kimpuk dawnglang kowi CHAKRAMANG vüi chimsaiah parah khai. Nami aia lang kraah mih arah kowi aia dow tikah mih uanap hai taking tasangra uanap chang pe khai, now taking tasangra uanap kowi kowh tawncher sau dow changla phuchua müa khai. Tawngplawng kowchow panow CHAKRAMANG pur kowi kowh uowi mih kri hown kowh phuchuara dow naiawngün phuchua maten nachang kownkow arah sowmchow chekhai.

8Now mang Sawlawmawn hai Israeluüa maten dow ranit ni mowr chang Te Pawi khai. Nakhowk khe amatni dow maru iun lainowmma kawm khai; amatni dow Hamat süng hownia Aigupta pren kowi kowh tui kangma mih aw mowr süng maten hownia kowh uang mih chekhai. 9Now ranit ni mowr amatni ap phuchuara mih kung kowi paw plan chang Te Pawi ranit ni khai iawk. Now pawi chur ni khe dow amatni chang Taprai Pawi khai. 10Now pawi chur kowh auai ni dow mang Sawlawmawn mih maru maten kowi pe mangta khai bowt. Anar David kowi hai aia kowh maru Israeluüa luk kowi CHAKRAMANG iungra maten peah rakowi maru maten mang Sawlawmawn kowi tekla pe awmrawm lai now awmrawmma hai apiawma kim prakowi mang büah khai bowt.

Sawlawmawn tut-e CHAKRAMANG uang tatüng pe mih

11Naiawng hai mang Sawlawmawn dow Thurai chup kim, aia kowh kim hai aia nau iawng nathawpah kown mih maten ki thawpta khai bowt. 12Nami kung kowi akat khe CHAKRAMANG dow Sawlawmawn tut-e uang tatüng pe khai. Nakhowk khe CHAKRAMANG tek pe mih, “Ang tut-e en uang lü uang leng mih ang ta khowk chekhai. Now mami chup kim dow naphuchuala ang kown mih arah ang lang ruita khowk.

13“Ang taingta uang mih khin khe lah, nauang piak luprak kownkow ang uang chin plawng hawmh mih khin khe lah, ang maru-uüa pungmadawng kowi ang uang chin makowng hawi mih khin khe lah, 14ang kowh maru-uüa che khamsum khamdaw khai, ang prakowi mü hai ang tut-e awr lü awr leng khai, now angak hownia tarip büah khai hanow mukuang pren hownia ang iu sünta pe kown. Nahanow amatni kowh angak ang nalawtta pe kown, now amatni kowh pren mih auown khe kowh iawng aiungma ang naplan chang pe kown. 15Mami chup kim kowi kowh awr lü awr leng mih dow kaneuma ang nasünta pe kown. 16Tawngplawng kowchow panow mami chup kim dow ang lang kloah mih chekhai, now chowngchowng saksakma nauang chupiiala ang kownkow ang lang krata mih chekhai. Mami chup kim luk kowi dow ang kowh mik hai ang kowh sak mih atungma nauowi kown.

17“En che en pa David iawng kaah sakowmma hown ang tiama kowi en mang khai, now ang kowh ana pek maten, ari arow hai ari aiang chün khai hanow 18Israeluüa luk kowi en kowh mang chowm rah mih chowngchowng saksakma ang natow en kown. Tawngplawng kowchow panow mami lawnguan kowi en pa David hown ang tatow sangbowk laitawm khowk. Nami sangbowk laitawm kowi ang tek pe mih, ‘Israel pren mang chowm rah kowi nachowm mang kown mih maru en krungchak hownia mapaw nakhawr kown nadowi,’ pakhai.

19“Nachenganchepaw enni che powtta ang khai, ang kowh ana pek hai ari arow chün dowi, now akeng mih thuraiuüa kowh lup cham tawi chang hai cham tawi chupiia khai hanow 20enni Israeluüa kowi kowh ang pe enni mih pren hownia ang naprütta enni kown. Now mami chup kim ang kowh uowi rah ang vüi ang lang klota khowk mih paw ang mik hownia ang namata pe kown. Nakhowk khe dow Israeluüa mih akeng chenchapuüa tut-e kharera hai rensi kau nachowng kown. 21Now mami chup kim mih kawmat kri kraingma chepaw nakhowk khe dow mami ria iawng mang miuüa mih natakrow kown, now khareah se natek kown mih, ‘Tawngplawng kowchow mami pren hai mami Thurai chup kim luk kowi naiawng CHAKRAMANG tuk changah khai chow?’ napa kown. 22Nakhowk khe akeng mih maru-uüa naklangah kown mih, ‘Naiawng CHAKRAMANG changah mih auan dow amatni pipu-uüa kowi kowh Aigupta pren hownia uang lawtla mih CHAKRAMANG amatni pipu-uüa kowh Thurai kowi nuata büah rakowi chekhai. Amatni dow akeng thuraiuüa kowi cham chupiia hai tawi chang pe lup khai. Naiawngün piakra amatni luk kowi CHAKRAMANG uang pawla pe mih dow naiawng rakowi chowbowt,’ napape kown,” pakhai.