Skip to content
BibleKenya

Mpoto Bible Version

Utumbulilu 47

Bhela, Yusufu akapiti kwaka Falao, na kumpwaghila, “Tati wangu na bhalongu bhangu bhahikiki kuhuma ku inchi ja Kanaani papamu na mabhongelu gha mambelele, imbuhi, ng'ombi na kila chindu chebhakabhi nachu, na sajenu bhabhi ku Gosheni.” Akabhahawili bhalongu bhaki nhwanu, na kubhalangiha kwaka Falao. Falao akabhalaluki bhalongu habha, “Bho, lihengu linu kike?”

Bhakayangiki, “Bhatumika bhaku nde bhadima bha hinyama, ngati akatati bhitu mobhakabhelile.” Kabhete bhakumpwaghi Falao, “Tuhikiki kutama kongoni kwa chikahi chijipe, maghambu injala nde ngolongwa ku inchi ja Kanaani, na hinyama ya bhatumika bhaku ngacheibhili na chilebhe cha kuleha hinyama hitu. Bhela, bambo, tukulobha, tepani bhatumika bhaku, utujetakyaje tukatama ku Gosheni.” Falao akumpwaghi Yusufu, akapwaghaje, “Tati waku na bhalongu bhaku bhahikiki kwako, na inchi jokapi ja Misili jibhi palongi jako, ubhapekya tati waku na bhalongu bhaku pandu panyahi nakanope pa inchi jenu. Walekaje bhatama ku inchi ja Gosheni. Na ngati anaubhamanyi bhandu bhabhabhi na uwezu ukolongwa pachilanda jabhu, ubhabheka bhakubha bhandu bha kujemalela hinyama yango.”

Panihapa Yusufu akundetiki Yakobo tati waki na kumbeka palongi jaka Falao, na Yakobo akumpengali Falao. Falao akundaluki Yakobo, “Bho, ubhi na hyaka ilenga?”

Yakobo akamuyangiki Falao, “Hyaka yemi nayu mu mwanja wangu nde hyaka mia jimu na selasini. Hyaka yangu ibhi ichoku na ya mang'ahiko, wala ngachemili na hyaka yamaheli ngati akatati bhangu mobhakatamile.” Yakobo akumpengali Falao, na kubhoka palongi jaka Falao. Bhela, Yusufu akabhatamiki tati waki na bhalongu bhaki pambipi na Lamisesi, papabhi panyahi nakanope mu inchi ja Misili, pakubha mali ghabhu, nabhombi bhakatami konihoku ngati moakapwaghi Falao. Yusufu akabhi abhajangatila chilebhi tati waki, bhalongu bhaki na bhandu bhokapi bha munyumba jaka tati waki kulengana na ubhalangiku wa bhana bhabho.

Cheakahengiki Yusufu mu chikahi cha injala ngolongwa

Hata bhela, ngachepabhili na chilebhi mu inchi jokapi, kwa kubha injala jakabhi ngolongwa namaa, bhandu bha ku Misili na bha ku Kanaani bhakakombili kwa ndandi ja injala ngolongwa. Yusufu akabhongini mbija yokapi yeyapatakini mu inchi ja Misili na Kanaani, kubhokana na ilebhi yebhalombise, na kuipeleka mbija heyi munyumba jaka nkolongwa Falao. Chikahi bhandu bhokapi bha Misili na Kanaani pabhakajomwi kutumila mbija yabhu yokapi, Bhamisili bhokapi bhakunhiki Yusufu na kumpwaghila, “Utupekya chilebhe! Bho, maghambu ja kiki tepani tupotila palongi ja mihu ghako? Mbija hitu ijomwike.”

Yusufu akapwaghike, “Ndetaje hinyama hino, nanatu ananumpekya chilebhe kwa kung'anambulana na hinyama hino, ngati ana mbija hinu ijomwike.” Bhela bhakaletiki hinyama yabhu kwaka Yusufu, najombi Yusufu akabhapeki chilebhe kwa kung'anambulana na falasi yabhu, mambeleli ghabhu, imbuhi yabhu, ng'ombi yabhu, na maponda ghabhu. Na mu chaka chenihechi chokapi Yusufu akabhapeki chilebhe kwa kung'anambulana na hinyama yabhu yokapi.

Chaka chenichela pachajomwiki, bhakunhikili chaka chechijengalyaje na kumpwaghila, “Ngachetuweza kunhiya uchakaka bambo witu, kubha mbija hitu ijomwike, na mabhongelu gha hinyama yokapi nde yaku wehapa, sajenu ngachetubhi na chindu chokapi chela kwa ndandi jaka bambo witu, nambu pela hyegha hitu na mighonda jito. Bho, maghambu kiki tepani tupotilaje palongi ja mihu ghako, tepani papamu na mighonda jito kuyonangeka? Utuhemala tepani papamu na mighonda jito kwa kung'anambulana na chilebhe, na tepani na mighonda jito anatukubha bhatumwa bhaka Falao. Utupekya tepani imbeju nahuli tuweza kubha tabhomi wala ngatwipotela, na inchi jitu ngajihighali ukebha.”

Bhela Yusufu akunhemali Falao inchi jokapi ja Misili. Maghambu Bhamisili bhakalombisi mighonda jabhu jokapi, ndandi injala jakabhi ngolongwa namaa kwabho, na inchi jokapi jakabhi mali ghaka Falao. Yusufu akabhatendiki bhandu bhokapi kubha bhatumwa, kutumbula upambala ghumu wa inchi ja Misili mbaka upambala ghonge. Hata bhela, ngacheakahemili inchi ja bhapenganyambiku, maghambu bhapenganyambiku bhapatiki ghokapi ghabhaghapala kuhuma kwaka Falao, bhombi bhakabhi na chilebhi chamaheli chebhakapekiwi na Falao. Nde ndandi ngachebhalombisi inchi jabho. Yusufu akabhapwaghi bhandu, “Ndingalyaje, kwa kubha lalenu nunhemi mwehapa na mighonda jinu kubha mali ghaka Falao, bhela imbeju hinu yepambane, mpandaje mu mighonda jino. Nambu mahunu paghikubha ghakomike, mwampekya Falao pandu pamu pa kahanu, na pandu pa kachechi anapakubha mali ghinu mabhete, kubha imbeju ya mighonda jinu, na chilebhi chinu, na chilebhi cha bhandu bha munyumba hinu, na chilebhi cha bhana bhino.”

Bhombi bhakumpwaghile, “Ukengalili matamu ghito. Bhela kwa kubha utulangihi wamboni wako, tepani anatukubha bhatumwa bhaka Falao.” Panihapa Yusufu akabhekiki shelia jimu jejibhi mbaka lalenu mu inchi ja Misili, kubha pandu pamu pa kahanu pa mahunu nde mali ghaka Falao. Nambu inchi ja bhapenganyambiku pela nde nga mali ghaka Falao.

Lilobhu la kujomulela laka Yakobo

Bhela, Bhaizilaeli bhakatami ku Misili mu inchi ja Gosheni. Bhakapatiki mali ghamaheli konihoko, bhakaneng'anili na kujonjukeka kubha bhamaheli namaa. Yakobo akatami mu inchi ja Misili hyaka komi na saba, bhela hyaka ya matamu ghaka Yakobo yakabhi hyaka mia jimu na alobaini na saba. Chikahi cha kupotela kwaki Izilaeli pachaheghalile, akundohiki Yusufu mwana waki, na kumpwaghila, “Ngati anambatiki chihomu pamihu jaku, ubhekaje chibhoku chaku pahi ja lipaja lango na unapilaje, kubha anaundendila ulongwana na kunhengela ghambone. Nukulobha, chondi ngawindagha mu inchi ja Misili. Nambu panikubha mbotile papamu na akatati bhangu, undolaje kuhuma mu Misili, ukandaghaje ku litengeli labho.”

Yusufu akayangike, “Ananhengaje ngati moupwaghila.”

Yakobo akumpwaghile, “Unapilaje.” Yusufu akundapile. Panihapa Izilaeli akajojabhile, na kujinamisha mmutu waki upambala wa kumutu ja chitanda chake kwa utopelu.

Mpoto Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.