Mpoto Bible Version
Utumbulilu 46
Yakobo ajenda ku Misili
Bhela, Izilaeli akabhokiki papamu na hindu yokapi yeakabhi nayu, na paakahikiki ku Beeli Sheba, akumbokili nyambiku Chapanga waka Isaka tati waki. Chapanga akalongili na Izilaeli mu mabhono ikilu na kupwagha, “Yakobo! Yakobo!”
Akayangike, “Naam, nepani pambane.”
Chapanga akumpwaghile, “Nepani nde Chapanga, Chapanga waka tati waku, ngawijoghopa kuhelela ku Misili, maghambu ananukutenda kubha litaifa likolongwa konihoko. Nepani ananhelala ku Misili papamu na wehapa, nanatu ananukukwehaje kabhete ku Kanaani, na pawipotilaje mabhoku ghaka Yusufu nde ghaghiyekaje mihu ghako.”
Bhela, Yakobo akabhokiki ku Beeli Sheba, na bhana bhaka Izilaeli bhakuntoliki tati wabhu Yakobo, na bhana bhabhu, na akabhahanu bhabhu, mu magali gha kuhutakika ghaakaghapeliki Falao nahuli kuntola. Bhelabhela bhakatoliki hinyama yabhu, na hindu yokapi yebhakabhi bhapatiki mu inchi ja Kanaani, na kujenda ku Misili, Yakobo papamu na bhabhelakeka bhaki bhokapi. Akabhatoliki bhana bhaki bha chikambaku na bha chimbomba, bhachokolu bhaki bha chikambaku na bha chimbomba, yani lubheleku lwaki lwokapi mbaka ku Misili.
Aghagha nde mahina gha bhana bha chikambaku bhaka Izilaeli bhabhakapiti ku Misili, Yakobo na bhana bhaki, Leubeni mbelakeka wa kutumbula waka Yakobo. Bhana bha chikambaku bhaka Leubeni bhakabhi Hanoki, Palu, Hesiloni na Kalimi. Bhana bha chikambaku bhaka Simeoni bhakabhi Yemueli, Yamini, Ohadi, Yakini, Sohali, na Shauli, mwana waka mbomba Mkanaani. Bhana bha chikambaku bhaka Lawi bhakabhi Gelishomu, Kohati na Melali. Bhana bha chikambaku bhaka Yuda bhakabhi Eri, Onani, Shela, Pelesi, Zela, nambu Eri na Onani bhakapotili mu inchi ja Kanaani. Na bhana bha chikambaku bhaka Pelesi bhakabhi nde Hesiloni na Hamuli. Bhana bha chikambaku bhaka Isakali bhakabhi Tola, Puva, Yashubu na Shimiloni. Bhana bha chikambaku bhaka Zabuloni bhakabhi Seledi, Eloni na Yaleeli. Abhabha nde bhana bha chikambaku bhaka Lea bhaakumbelaki Yakobo ku Padani Alamu papamu na Dina, mwali waki. Ubhalangiku wa bhana bhaki bha chikambaku na akakamwali bhaki bhakabhi selasini na bhatatu.
Bhana bha chikambaku bhaka Gadi bhakabhi Sefoni, Hagi, Shuni, Esiboni, Eri, Alodi na Aleli. Bhana bha chikambaku bhaka Asheli bhakabhi Imina, Ishiva na Belia, na Sela, ndombu wabhu. Na bhana bha chikambaku bhaka Belia bhakabhi nde Hebeli na Malikieli. Abhabha nde bhana bha chikambaku bhaka Zilipa, mtumika ambaju Labani akumpeki Lea, mwali waki, na kumbelakela Yakobo bhana komi na sita.
Bhana bha chikambaku bhaka Laheli nhwanu waka Yakobo bhakabhi Yusufu na Benyamini. Ku Misili hoku, Asenati mwali waka Potifela, joakabhi mpenganyambiku wa muchi wa Oni, akumbelaki Yusufu bhana bhabheli bha chikambaku, Manase na Efulaimu. Bhana bha chikambaku bhaka Benyamini bhakabhi Bela, Bekeli, Ashibeli, Gela, Naamani, Ehi, Loshi, Mupimu, Hupimu na Alidi. Bhanihabha nde bhana bha chikambaku bhaka Laheli, bhaakumbelaki Yakobo, bhana komi na ncheche.
Mwana wa chikambaku waka Dani akabhi Hushimu. Bhana bha chikambaku bhaka Nafutali bhakabhi Yaseeli, Guni, Yaseli na Shilemu. Bhanihabha nde bhakabhi bhana bha chikambaku bhaka Biliha, bhaakumbelaki Yakobo, mtumika ambaju Labani akabhi ampeki Laheli mwali waki, bhakabhi bhana saba.
Bhandu bhokapi habha bhakapiti ku Misili papamu na Yakobo, bhabhakabhi lubheleku lwaki, panga kubhabhalanga akabhakohanu bhaki, bhakabhi bhandu sitini na sita. Ku Misili hoku Yusufu akabhi na bhana bhabheli bha chikambaku. Bhela bhandu bhokapi bha munyumba jaka Yakobo, bhabhapiti ku Misili, bhakabhi sabini.
Yakobo na bhana bhaki bhahika ku Misili
Bhela, Yakobo akundongukili Yuda kujenda kwaka Yusufu, nahuli andonguhaje indela kujenda ku Gosheni. Na pabhahikiki ku Gosheni, Yusufu akatandiki ligali laki la falasi, na kutama panani kujenda kunjopalela Izilaeli, tati waki, ku Gosheni hoku. Chikahi Yusufu paakahikiki palongi jaka tati waki, akunjobhatili tati waki, na kulela kwa chikahi chilachu. Izilaeli akumpwaghi Yusufu, “Sajenu mi tayali kupotela, maghambu napaweni pamihu jako, kubha wakali wa mwome.”
Panihapa Yusufu akabhapwaghi bhalongu bhaki na bhandu bha munyumba jaka tati waki, “Anangwela kujenda kwaka Falao, na kumpwaghi kubha bhalongu bhangu na bhandu bha munyumba jaka tati wangu, bhabhakabhi bhatama ku inchi ja Kanaani, bhahikiki kwango. Bhandu bhanihabha nde bhadima bha hinyama, bhahikiki na mabhongelu gha mambeleli ghabhu, imbuhi yabhu na ng'ombi yabhu, na hindu yokapi yebhabhi nayu. Falao anaandohiki na kundalukila, ‘Bho, lihengu linu kike?’ Mwiyangaje, ‘Bhatumika bhaku lihengu litu nde kudima hinyama kutumbu ukombu witu mbaka sajeno, ngati akatati bhitu mobhahengile.’ Panihapa anaanjetakya kutama ku Gosheni.” Maghambu kila mdima wa hinyama nde lihakalilu kwa Bhamisili.
Mpoto Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.