Mpoto Bible Version
Utumbulilu 37
Yusufu na bhabheli bhaki
Yakobo akajendalili kutama mu inchi ja Kanaani, moakatami tati waki ngati ngene. Aghagha nde malobhi gha lukolu lwaka Yakobo.
Chikahi Yusufu paakabhi na hyaka komi na saba, akabhi adima mambeleli na imbuhi papamu na bhabheli bhaki bha akamabhu bhangi, yani bhana bhaka Biliha na bhana bhaka Zilipa, akabhahanu bhaka tati waki. Yusufu akabhi andetela tati waki malobhi gha uhakau ghobhuhenga bhabheli bhaki.
Bhela, Izilaeli akumpaliki Yusufu kupeta bhana bhaki bhokapi, maghambu nde mwana wa museja wake, panihapa akundokili likanzu linyahi lelibhi na mabhoku malachu. Bhabheli bhaki pabhaweni kubha tati wabhu ampala Yusufu kupeta bhabheli bhaki bhokapi, bhakunhakalili na ngachebhalongili naku lilobhi lokapi lela lambone.
Ikilu jimu Yusufu akalotiki ndoto, na kubhapwaghila bhabheli bhaki, nabhombi bhakunhakalili nakanope. Akabhapwaghile, “Chondi, njowanyaje ndoto jenotike. Lingalyaje, nakalotiki kubha tabhokapi tukabhi kungonda tukakonga makenda gha ingano, palapala likenda langu la ingano lakatei kujema, na makenda ghinu gha ingano ghakatei kuuyongolota na kuujinamila.”
Bhabheli bhaki bhakumpwaghile, “Bho, wehapa le uholalela kututawala? Au chakaka lelu kubha wehapa anaututawala tepane?” Bhela, bhakajonjukili kunhakalila kwa ndandi ja ndoto jaki jela, na kwa malobhi ghaki ghala.
Bhela, Yusufu akalotiki kabhete ndoto jenge, akabhalandili bhabheli bhaki akapwaghaje, “Njowanyaje, notiki kabhete ndoto jenge, na ndingalyaje, lyobha, mwehi na ndondwa komi na jimu yakatei kunyinamila.”
Chikahi paakumpwaghi tati waki na bhabheli bhaki ndoto jeniheji, tati waki akundakalili akapwaghaje, “Ndoto bholi ajeji jeulotike? Chakaka lelu kubha nepani na mabhu waku, na bhabheli bhaku bhokapi anatuhika kukujinamila wehapa mbaka pahi kwa utopelo?” Bhabheli bhaki bhakumboni wihu, nambu tati waki akalibhekiki lijambu leniheli muntima waki.
Yusufu ahemalewa ku Misili
Bhela, bhabheli bhaka Yusufu bhakapiti kudima mabhongelu gha mambelele ghaka tati wabhu pambipi na muchi wa Shekemu. Izilaeli akumpwaghi Yusufu, “Bho, bhabheli bhaku ngachebhadima mambelele pambipi na muchi wa Shekemu?” Uhikaje, nukutuma kwabho.
Yusufu akayangike, “Haya undumaje.”
Tati waki akumpwaghile, “Ujendaje ukabhalolaje bhabheli bhaku na hinyama ngati anaibhi lukwale, bhela wihika kunetela malobhi.” Bhela, Yakobo akuntumiki Yusufu kuhuma ku Libondi la Hebuloni. Mundu jumu akunhimanili Yusufu ayongolota yongolota kuchingwenje, mundu jola akunhimanili, na kupwagha, “Bho, ulonda kyane?”
Yusufu akayangike, “Nabhalonda bhabheli bhango. Chondi umbwaghilaje bhadima kwaku mabhongelu ghabhu?”
Mundu jola akayangike, “Pambani bhabhokike. Nabhajowini bhakapwaghaje, ‘Tumbokanya ku muchi wa Dosani.’ ” Bhela, Yusufu akabhajengalili bhabheli bhaki na kubhahimanila ku muchi wa Dosani.
Bhabheli bhaki pabhakumbweni cha kutali, mangane ja kuhika pabhabhile, bhakajetanganili kubha bhunkomaje. Bhakapwaghanili bheni kwa bheni, “Ndingalyaje! Jola bambo wa kulota ndoto atenda kuhika. Henu, muhikaje tunkomaje na tundekalaje mu libhomba limu pachilanda ja aghagha, na twipwagha kubha ameminwi na chinyama chikali. Na panihapa anatubhonaje mapitalilu gha ndoto yake.”
Leubeni paakajowini lijambu leniheli, akalengiki kunkengalela kuhuma mu mabhoku ghabhu, akapwaghaje, “Ngatunkoma.” Leubeni akabhapwaghile, “Ngamwijitila mwahi, mundekalaje mu libhomba aleli lelibhi koni kuchingwenje, nambu ngamungusa.” Leubeni akapwaghiki bhenibhela nahuli kunkengalela kuhuma mu mabhoku ghabhu, na palongi ankelabhuhaje kwaka tati waki. Bhela, Yusufu paakahikiki kwa bhabheli bhaki, bhakunhuliki Yusufu likanzu laki linyahi lelakabhili na mabhoku malachu leakabhi awatike. Panihapa bhakuntoliki na kundekela mulibhomba. Chikahi chenihechi libhomba heli lakabhi litopu, ngachelabhili na machi.
Bhakatami pahi kula chilebhi chabhu, bhakajinwihi mihu ghabhu, na kuubhona mwanja wa Bhaishimaeli bhakahikaje kuhuma ku Gileadi. Ngamia yabhu yakabhi bhaitwekiki ibwahila ya ubani, na mitela jejilowakeka zeli na manemane, nabhombi bhakabhi bhaipeleka ku Misili. Yuda akabhapwaghi bhalongu bhake, “Bho, anatupataje nyonjeka bhole ngati anatunkomiki ndongu witu, na kuuhiya mwahi wake? Mbanga tundombisaje kwa Bhaishimaeli abhabha, nambu mabhoku ghitu ngaghamuyonanga, maghambu jombi nde ndongu witu, na mwahi witu.” Bhalongu bhaki bhakajetakile. Bhela, bhabhahemela na kulombesa bha ku Midiani, pabhahikiki panipala, bhabheli bhaka Yusufu bhakumbohiki Yusufu mu libhomba lela, na kundombesa kwa Bhaishimaeli kwa ipandi ishilini ya madini gha feza, nabhombi bhakumpeliki Yusufu mbaka ku Misili.
Bhela, Leubeni paakakelawiki kujenda kulinga mu libhomba lela, na kubhona kubha Yusufu ngacheabhile, akaikachwili ingobhu yake kwa kubhina mtima. Akakelawiki kwa bhalongu bhaki, na kupwagha, “Nkombu ngacheabhi mu libhomba mola! Bho, nanatu nyenda kwako?”
Bhakalitoliki likanzu laka Yusufu, bhakachinjiki likenda la imbuhi, na kulijwiha likanzu lela mu mwahi ghola. Bhakalitoliki likanzu lilachu lela, na kundetela tati wabhu, bhakapwaghaje, “Tuliweni likanzu aleli. Ulilingalakyaje na ubhonaje ngati laka mwana wako.”
Atati wabhu akalimanyi, na akapwaghike, “Haleli nde likanzu laka mwana wango! Chinyama chikali chitehi kumuyonanga. Chakaka Yusufu ayonangiki ipandi ipandi!” Panihapa Yakobo akakachwili ingobhu yaki, na kuliwatika ingobhu ya magunila muchibhunu chaki, na kundelela mwana wake kwa machobha ghamahele. Bhana bhaki bhokapi bha chikambaku na bha chimbomba bhakahikiki nahuli kunjeghe mtima, nambu ngacheakajetakili kujeghaleka mtima. Akapwaghike, “Ngabhela, ananundelilaje mwana wangu mbaka panihelalaje kuwawa.” Bhela tati waki akajendalili kundelela Yusufu. Chikahi chenihechi, Bhamidiani bhakundombisi Yusufu ku Misili kola kwaka mundu jumu joalowakeka Potifa, jumu wa bhatumika bhaka Falao, jonihoju akabhi nkolongwa wa bhalonda bhaka Falao.
Mpoto Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.