Skip to content
BibleKenya

Mpoto Bible Version

Utumbulilu 36

Bhabhelakeka bhaka Esau

1 Mambu gha Chikahi 1:34-37

Abhabha nde bhabhelakeka bhaka Esau. Lihina lengi laka Esau nde Edomu. Esau akatowili akambomba pachilanda ja akambomba bha Kanaani: Ada, mwali waka Eloni, wa likabila la Bhahiti, na Oholibama, mwali waka Ana, na nchokolu wa chimbomba waka Sibeoni, wa likabila la Bhahivi, bhelabhela akuntowili Basemasi, mwali waka Ishimaeli, ndombu waka Nebayosi. Ada akumbelakili Esau Elifazi, najombi Basemasi akumbelakili Leueli. Oholibama akumbelakili Yeushi, Yalamu na Kola. Bhanihabha nde bhana bhaka Esau bhabhabhelakiki chikahi paakabhi atama ku inchi ja Kanaani.

Esau akabhatoliki akabhahanu bhaki, bhana bhaki bha chikambaku na bha chimbomba, bhandu bhokapi bha munyumba jaki, ng'ombi yaki, hinyama yaki yengi yokapi na hindu yokapi yeakaipatiki mu inchi ja Kanaani, na kuhamila pandu pange, kutali na ndongu waki Yakobo. Bhakahengiki bhenibhela maghambu bhakabhi na mali ghamaheli namaa hata ngachebhaweziki kutama papamu. Inchi jebhatami ngati bhagheni ngachejawezi kubhajaghanila kwa ndandi bhakabhi na hinyama yamaheli namaa. Bhela, Esau akapiti kutama ku inchi ja itombi ja Seili. Lihina lengi laka Esau nde Edomu.

Abhabha nde bhabhelakeka bhaka Esau, atati wa Bhaedomu, mu inchi ja itombi ja Seili. Aghagha nde mahina gha bhana bha chikambaku bhaka Esau, Elifazi joakumbelakili Ada, nhwanu waki, na Leueli, mwana waka Esau joakumbelakili Basemasi, nhwanu waki. Bhana bha chikambaku bhaka Elifazi bhakabhi Temani, Omali, Sefo, Gatamu na Kenazi. Elifazi mwana waka Esau akabhi na lidaba lihina laki akalowakiki Timuna. Ajoju akumbelakili mwana, lihina laki Lameki. Bhanihabha nde bhabhakabhili bhachokolu bhaka Ada, nhwanu waka Esau. Bhana bhaka Leueli bhakabhi Nahasi, Zela, Shama na Miza. Bhanihabha nde bhabhakabhili bhachokolu bhaka Basemasi, nhwanu waka Esau.

Bhana bhaka Oholibama, mwali waka Ana, nhwanu waka Esau, joakabhili nchokolu waka Sibeoni bhakabhi Yeushi, Yalamu na Kola.

Abhabha nde bhakolongwa bha makabila pachilanda ja bhabhelakeka bhaka Esau. Elifazi joakabhili mwana wa kutumbula waka Esau, akabhabheliki jumbi Temani, jumbi Omali, jumbi Sefo na jumbi Kenazi, jumbi Kola, jumbi Gatamu, na jumbi Amaleki. Bhanihabha bhokapi nde bhana bha chikambaku bhaka Elifazi ku inchi ja Edomu, bhabhakabhili bhachokolu bha chikambaku bhaka Ada.

Bhakolongwa bha bhana bhaka Leueli, mwana waka Esau bhakabhi jumbi Nabasi, jumbi Zela, jumbi Shama, na jumbi Miza. Abhabha nde bhakolongwa bhabhahumiki kwaka Leueli ku Edomu hoku, bhabhakabhili bhachokolu bha chikambaku bhaka Basemasi, nhwanu waka Esau.

Bhana bha chikambaku bhaka Oholibama, nhwanu waka Esau bhakabhi jumbi Yeushi, jumbi Yalamu na jumbi Kola. Abhabha nde bhakolongwa bhabhahumiki kwaka nhwanu waka Esau, Oholibama mwali waka Ana. Bhela, bhanihabha nde bhabhelakeka bhaka Esau, yani Edomu, na bhanihabha nde bhabhakabhili bhakolongwa bhabhu.

Bhabhelakeka bhaka Seili

1 Mambu gha Chikahi 1:38-42

Abhabha nde bhana bhaka Seili, wa likabila la Bhaholi, mwenei wa inchi jenijela: Lotani, Shobali, Sibeoni na Ana, na Dishoni, Eseli na Dishani. Bhanihabha nde bhana bhaka Seili bhabhakabhi bhajumbi kuhuma kwa Bhaholi, mu inchi ja Edomu.

Bhana bhaka Lotani bhakabhi Holi na Hemamu. Na ndombu waka Lotani akalowakiki Timuna.

Bhana bha chikambaku bhaka Shobali bhakabhi Alivani, Manahati, Ebali, Shefo na Onamu.

Bhana bhaka Sibeoni bhakabhi Aiya na Ana. Ana ajoju nde jola joakahumbwile chemuchemu ja machi gha moto kulipololu, paakabhi adima maponda ghaka Sibeoni, tati waki. Bhana bhaka Ana bhakabhi Dishoni na Oholibama, mwali waka Ana. Bhana bhaka Dishoni bhakabhi Hemdani, Eshibani, Isilani na Kelani.

Bhana bhaka Ezeli bhakabhi Bilihani, Zaavani na Akani.

Bhana bhaka Dishani bhakabhi Usi na Alani.

Abhabha nde bhabhakabhili bhakolongwa bha Bhaholi: jumbi Lotani, jumbi Shobali, jumbi Sibeoni na jumbi Ana, jumbi Dishoni, jumbi Eseli na jumbi Dishani. Bhanihabha nde bhabhakabhili bhakolongwa bha Bhaholi, kujengalanela na mabhongelu ghabhu, mu inchi ja Seili.

Bhakolongwa bha inchi ja Edomu

1 Mambu gha Chikahi 1:43-45

Abhabha nde bhakolongwa bhabhatawili mu inchi ja Edomu mangane jaka nkolongwa jokapi jola wa Izilaeli kutawala: Bela mwana waka Beili akabhi nkolongwa wa Edomu, na lihina la muchi waki ukalowakiki Dinihaba. Bela paakapotili, pandu paki pa ukolongwa akatoliki Yobabu mwana waka Zela, kuhuma ku Bosila. Yobabu paakapotili, pandu paki pa ukolongwa akatoliki Hushamu, kuhuma ku inchi ja Bhatemani. Hushamu paakapotili, pandu paki pa ukolongwa akatoliki Hadadi mwana waka Bedadi, najombi nde joakabhalapwi Bhamidiadi ku inchi ja Moabu. Lihina la muchi waki ukalowakiki Avisi. Hadadi paakapotili, pandu paki pa ukolongwa akatoliki Samula mwenei wa ku muchi wa Masileka. Samula paakapotili, pandu paki pa ukolongwa akatoliki Shauli kuhuma ku muchi wa Lehobosi, ghoubhi pambipi na Nkoka Eufulati. Shauli paakapotili, pandu paki pa ukolongwa akatoliki Baali Hanani, mwana waka Akiboli. Baali Hanani, mwana waka Akiboli paakapotili, pandu paki pa ukolongwa akatoliki Hadadi, na lihina la muchi waki ukalowakiki Pau. Nhwanu waka Akiboli akabhi Mehetabeli, mwali waka Matiledi, na nchokolu waka Mezahabu. Abhabha nde bhakolongwa bhabhabhokini na Esau, kwa mahina ghabhu, lukolu yabhu na inchi yabhu: jumbi Timuna, jumbi Aliva, jumbi Yesesi, jumbi Oholibama, jumbi Ela na jumbi Pinoni, jumbi Kenazi, jumbi Temani na jumbi Mibisali, jumbi Magidieli na jumbi Ilamu. Bhanihabha nde bhakabhili bhakolongwa bha makabila bhabhabhokini na Edomu, kubhokana na matamu ghabhu, mu inchi jebhakajitawile. Jonihoju nde joakabhili Esau, atati wa Bhaedomu.

Mpoto Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.