Kubhoka 27

Kulenganakela pandu pa kubhokeha nyambiku kwa nkongu wa mshita

Kubhoka 38:1-7

1“Ulenganakyaje pandu pa kubhokeha nyambiku kwa mbau ya nkongu wa mshita, pakubhaje papalengana ipambala yokapi, ulachu waki mita ibheli na lobu, na upana waki mita ibheli na lobu, kimu chaki chikubhaje mita jimu na lobu. 2Ulenganakyaje manyelu ncheche mu kona yaki ncheche, manyelu ghanihagha anaghakubhaje chindu chimu na pandu pa kubhokeha nyambiku hapa. Na wehapa upayekaje pandu pa kubhokeha nyambiku hapa kwa shaba. 3Lenganakyaje hindu yokapi kwa shaba, yombu ya kubhokeha ilihu, na yoma yaki ya kubhokeha ilihu, na mabakuli ghaki gha kumichila, yoma ya kujochela inyama, na imbani ya kujokulela moto. Hindu heyi yokapi ulenganakyaje kwa shaba. 4Bhela ulenganakyaje waya wa shaba ghoubhili na peti nchechi ya shaba, na kujingiha pahi ja ukengu mbaka pachilanda ja pandu pa kubhokeha nyambiku. 5Ubhekaje waya hoghu mu ukengu wa pandu pa kubhokeha nyambiku hapa, nahuli waya hoghu uhikilaje pachilanda ja pandu pa kubhokeha nyambiku hapa. 6Lenganakyaje mipeku ja nkongu mshita kwa ndandi ja kutotulela pandu pa kubhokeha nyambiku hapa, na ujiyekaje kwa shaba. 7Mipeku jeniheji ujingihaje mu peti yela yeibhili mu kila upambala wa pandu pa kubhokeha nyambiku, nahuli kulitotola. 8Lenganakyaje pandu pa kubhokeha nyambiku hapa kwa mbau, na kukubhaje na mbekenyu mkati jaki, kubhokana na uwananganu ghonukulangihe pachitombi.

Liwangala la Lihema Lihuhu

Kubhoka 38:9-20

9“Ulenganakyaje liwangala kwa ndandi ya Lihema Lihuhu. Upambala wa kunkachi wa liwangala anakukubhaje na mapazia ghaghalenganakiwi kwa ingobhu jinyahi jihuhu, ambaju anajikubhaje na ulachu wa mita alobaini na nchechi kwa upambala ghumu, 10mapazia ghanihagha ghakobhakikaje mu mapali ishilini na hitamilu ishilini ya shaba. Kabhate anakukubhaje na ifungu ya madini gha feza na ikamulakilu ya madini gha feza panani ja mapali ghanihagha. 11Upambala wa kungondi, ulachu wa mapazia anaukubhaje mita alobaini na nchechi, na mapali ishilini gha shaba, na hitamilu ishilini ya shaba, nambu ifungu ya mapali na hikamulilu yaki anaikubhaje ya madini gha feza. 12Na upambala wa kolijibhi lyobha wa lihema la kuhimanganila anakukubhaje na mapazia ghaghabhili na ulachu wa mita ishilini na ibheli, na mapali ghaki komi na hitamilu yaki komi. 13Upambala wa kolipita lyobha, koubhili ndyangu wa lihema la kuhimanganila anakukubhaje na upana wa mita ishilini na ibheli. 14Lipazia la upambala ghumu wa ndyangu analikubhaje na upana wa mita sita na nusu, papamu na mapali ghatatu na hitamilu yaki itatu. 15Bhelabhela mu upambala wa kabheli wa ndyangu anakukubhaje na mapazia ghaghabhili na upana wa mita sita na nusu papamu na mapali ghaki ghatatu na hitamilu yaki itatu. 16Pundyangu wa liwangala heli anapakubhaje na lipazia lelibhili na ulachu wa mita tisa, lelilokakiki kwa uzi wa langi ja buluu, zambalau na jikeli, papamu na ingobhu jinyahi jihuhu jejilokakiki wichu. Lipazia heli analikamuliwaje na mapali nchechi na hitamilu nchechi. 17Mapali ghokapi ghaghayongolota Lihema Lihuhu analikubhaje na fitu na ifungu ya madini gha feza, na hitamilu ya shaba. 18Lihema Lihuhu analikubhaje na ulachu wa mita alobaini na nchechi, upana waki mita ishilini na ibheli, na kimu chaki mita ibheli na nusu. Mapazia ghaki anaghakubhaje gha ingobhu jinyahi jihuhu, na hitamilu yaki ya shaba. 19Hindu yokapi ya lihema lihuhu yeitumika mu kila ntundu, papamu na higingi yokapi ya liwangala heli anaikubhaje ya shaba.

Ntundu wa kujighoha taa

Bhalawi 24:1-4

20“Ubhalaghalakyaje Bhaizilaeli bhakuletilaje mahuta manyahi gha zeituni ghaghajenguliwi kwa ndandi ja kupambakila taa, nahuli kujitenda taa jela jibhelalaje chikahi chokapi. 21Mkati ja Lihema Lihuhu, kunja ja lipazia lelibhili palongi ja Lisanduku la Lulaghilu, Haluni na bhana bhaki anabhapambakyaje taa heji nahuli jibhelalaje kutumbula pakamihi mbaka lukela palongi jangu nepani Bambo Chapanga. Lilaghalakilu lenu lipalika lijengaliwaje chikahi chokapi na Bhaizilaeli bhokapi kwa ibheleku yokapi yeihika.