Mpoto Bible Version
Kubhoka 26
Lihema Lihuhu
Kubhoka 36:8-38
“Ulenganakyaje lihema kwa mapazia komi gha ingobhu jinyahi jihuhu jejilokakiki wichu na uzi wa langi ja buluu, zambalau na langi jikeli, na kulokakeka wichu picha ya makelubi mu mapazia hagha. Kila lipazia analikubhaje na ulachu wa mita komi na ibheli, na upana wa mita ibheli. Mapazia ghanihagha ghakubhaje na chipemu chimu. Ulombanishaje mapazia nhwanu ghakubhaje lipazia limu, na ulombanishaje mapazia nhwanu ghangi ghala ghakubhaje lipazia limu. Lenganakyaje ikamulilu ya chitambala cha buluu mu ujomukelu wa lipazia la kujomukela la chipandi cha kutumbula, kabheti chipandi cha ujomukelu cha lipazia la kabheli utendaje bhelabhela. Ubhekaje hikamulilu hamsini mu lipazia la kujomulela la chipandi cha kutumbula na hikamulilu hamsini yengi mu lipanzia la kujomulela la chipandi cha kabheli, hikamulilu yokapi ilingalanyaje. Bhela ulenganakyaje ifungu hamsini ya zahabu nahuli kuhuta mapazia papamu na kutenda lihema kubha limu.
“Lenganakyaje mapazia komi na jimu kwa mangoma gha imbuhi kwa ndandi ja kuliyekalela lihema. Kila lipazia analikubhaje na ulachu wa mita komi na itatu, na upana wa mita ibheli. Mapazia ghokapi komi na jimu hagha ghakubhaje na chipemu chimu. Ughalombaje mapazia nhwanu papamu, na mapazia sita papamu. Lipazia la sita lela ulikunjaje mala pabheli palongi ja lihema. Ulenganakyaje hikamulilu hamsini mu ujomukelu wa lipazia la kujomulela la chipandi cha kutumbula, na hikamulilu hamsini mu ujomukelu wa lipazia la chipandi cha kabheli. Bhela ulenganakyaje ifungu hamsini ya shaba, na kuibheka mu hikamulilu hamsini yela nahuli kulombanesha hipandi ibheli ya mapazia yela na kutenda kubha lipazia limu la lihema. Na nusu ja chipandi cha lipazia chela chechihighalalili uchijenjihaje upambala wa kunyuma wa lihema. Mapazia gha lihema anaghakubhaje na ulachu wa mita jimu nakanope ipambala yokapi, pandu papihighalyaje anapajenjalaje ipambala yokapi ya lihema nahuli kulihyeka.
“Lenganakyaje chifuniku cha lihema kwa hingumba ya mambeleli makambaku chechijeghaliki langi jikeli, panani ja chifuniku hechi uyekalyaje ingumba ya hinyama ya mumachi.
“Ulenganakyaje nguzu ya nkongu wa mshita, kwa ndandi ja kujemakela lihema. Kila nguzu anajikubhaje na ulachu wa mita ncheche, na upana wa sentimita sitini na sita. Kila nguzu anajikubhaje na pandu pabheli papapitalile, kwa ndandi ja kuilombanesha. Bhenibhela nde nguzu yokapi ya lihema moipalakila kulenganakeka. Bhela ulenganakya nguzu ishilini ya upambala wa kunkachi wa lihema, na hitamilu yaki alobaini ya madini gha feza ya kubheka pahi ja nguzu, hitamilu ibheli kwa kila nguzu jimu, nahuli kukamulakila pandu pabheli papapitalile. Upambala wa kungondi wa lihema, lenganakyaje nguzu ishilini, na hitamilu yaki alobaini ya madini gha feza ya kubheka pahi ja nguzu, hitamilu ibheli kwa kila nguzu jimu. Lenganakyaje nguzu sita kwa kila ujomukelu, upambala wa kolijibhi lyobha wa Lihema, bhelabhela ulenganakya nguzu ibheli na kuijemeka mu kona ja lihema upambala wa kunyuma. Nguzu ibheli heyi ipalika ilombanishwaje kutumbula pahi, na kwa panani ilombanishwaje mu peti jimu ja kutumbula, na yokapi ibheli ilenganaje. Bhela anakukubhaje na nguzu nane na hitamilu komi na sita ya madini gha feza, ibheli pahi ja kila nguzu.
“Ulenganakyaje mipengu ja nkongu wa mshita, nhwanu kwa ndandi ja nguzu ya upambala ghumu wa lihema, na nhwanu kwa ndandi ja nguzu ya upambala ghongi, na nhwanu kwa ndandi ja nguzu ya upambala wa kunyuma ja Lihema, kolijibhila lyobha. Lenganakyaje mpengu wa pachilanda upitalyaje kuhuma ujomukelu ghongoni mbaka ujomukelu ghongi pachilanda ja mapali. Yekalyaje mapali ghanihagha kwa zahabu, kabheti ulenganakyaje peti ya zahabu yeanaikamulyaje mipengu heji. Kabheti yekalyaje mipengu heji kwa zahabu. Lenganakyaje Lihema heli kwa uwananganu ghonukulangihe panani pachitombi.
“Ulenganakyaje lipazia la ingobhu jinyahi jihuhu, jejilokakiki wichu kwa uzi wa langi ja buluu, zambalau na langi jikeli, na kulokakeka wichu picha ya makelubi mu lipazia heli. Panihapa ulijenjihaje lipazia mu mapali nchechi gha nkongu wa mshita ghaghayekaliwi kwa zahabu, ikobhakelu yaki anaikubhaje ya zahabu, ikabya ijemikwi mu hitamilu nchechi ya madini gha feza. Ulijenjihaje lipazia heli mu ikobhakelu heyi, nanau uletaje Lisanduku la Lulaghilu lela na mkati jaki kukabya na hibau ibheli ya maganga, kunyuma ja lipanzia heli. Lipazia heli analilekanishaje Pandu Pahuhu na Pandu Pahuhu Nakanopi. Na wehapa anaubhekaje chifuniku cha chiha panani ja Lisanduku la Lulaghilu mkati ja Pandu Pahuhu Nakanopi pala. Ubhekaje meza kunja ja lipazia upambala wa kungonde wa Lihema, jilingalanyaje na chinala cha taa upambala wa kunkache wa Lihema.
“Pundyangu wa lihema ulenganakyaje lipazia la ingobhu jinyahi jihuhu, lelilokakiki wichu kwa uzi wa langi ja buluu, zambalau, na wa langi jikeli. Bhelabhela ulenganakyaje mapali nhwanu gha nkongu wa mshita na kughayeka kwa zahabu. Mapali ghanihagha anaghakubhaje na ikamulakilu ya zahabu, na kila limu analikubhaje na chitamilu chimu cha shaba.
Mpoto Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.