ዋንሳ ቆንጭ 7

ጼታኔ ኦይታማኔ ኦይዲ ሙኩሎ እስረልታ

1የይፕ ጉየ፥ ኦይዲ ኪታንችታይ ኦይዲ ሳአ ጎንትታይል ኤቄዝታ በኤዛ። የ ኪታንችታይ ሳአል አፋ ዎይ አባል አፋ ዎይ አባ ምላካ አፋ ጫርካይ ኦይዲ ሳአ ጋጻፕ ጫርካማይ ጋርክ አይኬዛ።1 2ማ ደኦ ጾስ ማታመ የዝ ሀራ ኪታንቻይ አዋ ከስ ባጋፕ ከሳዳር ታ በኤዛ። የ ኪታንቻይ ፋ ቃላ ቅ ኡዲ፥ ሳአኔ አባ ቆሆዳይስ ዎልቃ እንግንቴዝ ኦይዲ ኪታንችታይኮ፥ 3«ኑኒ ጾስ አይልታይ ስናይድ ማታመ ጋዶድ ሄሎዳይስ ቢታ ዎይ አባ ዎይ ም ቆህፓተ» ዬጌዛ።2

4የዝን፥ ታኒ ጾስ ማታመ ስኖል ጋድንቴዝታይ ፓይዳ ስኤዛ። እስሬለ ኮች ኡባይፕ ጼታኔ ኦይታማነ ኦይዲ ሙኩሎ አሳይስ ስናይል ማታመ ጋዴዛ።

5ይሁዳ ኮቻፕ ታጶ ናምኢ ሙኩሎ፥

ሮቤላ ኮቻፕ ታጶ ናምኢ ሙኩሎ፥

ጋደ ኮቻፕ ታጶ ናምኢ ሙኩሎ፥

6ኣሴራ ኮቻፕ ታጶ ናምኢ ሙኩሎ፥

ንፍታለመ ኮቻፕ ታጶ ናምኢ ሙኩሎ፥

ምናሰ ኮቻፕ ታጶ ናምኢ ሙኩሎ፥

7ስሞና ኮቻፕ ታጶ ናምኢ ሙኩሎ፤

ለወ ኮቻፕ ታጶ ናምኢ ሙኩሎ፥

ይሳኮሬ ኮቻፕ ታጶ ናምኢ ሙኩሎ፥

8ዛብሎነ ኮቻፕ ታጶ ናምኢ ሙኩሎ፥

ዮሴፋ ኮቻፕ ታጶ ናምኢ ሙኩሎ፥

ቢናማ ኮቻፕ ታጶ ናምኢ ሙኩሎ፥

አሳይ ስናይል ማታመ ጋዴዛ።

ቦ ማኦ ማኤዝ ጋመ ዎይታ

9የይፕ ጉየ፥ ዘረ ኡባይፕ፥ ካተት ኡባይፕ፥ ኮች ኡባይፐኔ ዱማ ዱማ ዶና ኦድንትዝታይፕ ዛዋ ባ ጋመ ዎያ ታ በኤዛ። የ አሳይ ቦ አዱስ ማኦ ማኢ፥ ዛምባ ሀየ ፋ ኩሸ አይኪ፥ ዙፋናይ ቲናኔ ዱራይ ቲና ኤቄዛ። 10ኡንቲ ፋ ቃላ ቅ ኡዲ፥ «አቶት ዙፋናይል በቴዝ ኑ ጾሳይፐኔ ዱራይፕ ይእዛ» ዬጌዛ።

11ኪታንችታይ ኡባይ፥ ዙፋናይስኔ፥ ጭምታይስኔ ኦይዲ መትታይ ዩሻይር ማር ኤቄዛ። ኡንቲ ዙፋናይ ቲና ጹጉኒ ጾሳይስ ጎይኔዛ።

12«አምንኤ!

አንጆ፥ ቦንቾ፥ ኤጨት፥ ጋላታ፥ ሳባ

ዎልቃ፥ ምኖት መናፕ መና ሄሎዳይስ

ኑ ጾሳይስ ማቆ።

አምንኤ!» ዬጌዛ።

13ጭምታይፕ ፐታይ ታኮ፥ «Ꮊ ቦ ማአ ማኤዝ አስታይ ኦናንታራ? ኡንቲ አናፕ የኤኔ?» ዬጊ ታ ኦይጬዛ።

14ታንካ ማሂ፥ «ጎዳዮ፥ ነ ኤርዛ» ዬጌዛ።

ኤካ ታኮ፥ «የይትታይ ጋመ ዋየ ኣ የኤዝታ። ኡንቲ ፋ ማአ ዱራይ ሱር ሜጪ ቦ ኡዴዛ።3 15የይ ግሾስ፥

«ኡንቲ ጾስ ዙፋናይ ቲና የዝ

ቃማኔ ጋላስ ኤ ኬ ኤዛ ጎይኔዛ።

ማ ዙፋናይል አፋ በቴዛይ ኡንትስ ካምፓ ማቆዳ።

16ይከፕ ጉየ፥ ኡንቲ ናይንታሚ፥ ሳምንታሚ።

አዋ ምቻካ ኡንታን ሾጫሚ።4

17ዙፋንታይ ግዶ በቴዝ ዱራይ ኡንታን ሄንጎዳ።

ደኦ ፑልቶ ሃኮ ኡንታን ካልዳ።

ጾሲ ኡ ኣፋይፕ አፉ ኡባ ኡጮዳ»

ዬጌዛ።5