ዋንሳ ቆንጭ 5

ዱራኔ ማጻፍቶ

1የይፕ ጉየ፥ ዙፋናይል አፋ በቴዛይ ኡሻች ኩሻይድ ጋንጨራኔ አፋር ጻፍንቲ ላፑን ማታመር ጎርድንቴዝ ጻ ማጻፍቶ ታ በኤዛ።1 2ፐቲ ምኖ ኪታንቻይ ፋ ቃላ ቅ ኡዲ፥ «ማታማ ብሎዳይስኔ ማጻፍቶ ዶዮዳይስ ቤዝዛይ ኦኖ?» ዬጊ አዋጆዳር በኤዛ። 3ዝን ሳሎ ማቅን ሳአ ዎይ ሳአፕ ኦሞ ማቅን የ ጻ ማጻፍቶ ዶዮዳይስኔ ጋንጫ በአዳይስ ዳንዳኤዝ ኦንካ ባያ። 4ጻ ማጻፍቶ ዶዮዳይስኔ እ ጋንጫ በአዳይስ ቤዝዛ አስ ቤዝ ግሾስ ታ ኢታ ዬኬዛ። 5የ ዎደ፥ ጭምታይፕ ፐታይ ታኮ፥ «ዬክፐ! ይሁዳ ዘረ ማቄዝ ጋማይ፥ ዳዉተ ሼሻይ፥ ላፑን ማታምታ ብሎዳይስኔ ማጻፍቶ ዶዮዳይስ ዳንዳኤዛ» ዬጌዛ።2

6የይፕ ጉየ፥ ዙፋናይል ኦይዲ መተታይስኔ ጭምታይስ ጋንጨ፥ ሹክንቴዝ ዱር ጋርክ ኤቄዛና ታ በኤዛ። ኤስ ላፑን ካጭታይኔ ላፑን ኣፍታይ የዛ። የይትታይ ሳአ ኡባይል ኪትንቴዝ ጾስ አያና ላፑንታ።3 7የ ዱራይ ይኢ፥ ዙፋናይል አፋ በቴዛይ ኡሻች ኩሸፕ ጻ ማጻፍቶ ኤኬዛ። 8ኤ የ ጻ ማጻፍቶ ኤኬዝ ዎደ ኦይዲ መትታይኔ ላታማኔ ኦይዲ ጭምታይ ዱራይ ቲናይድ ጉጲንጌዛ። ኡንቲ ፐታይ ፐታይ ዲኔ ጌሽታይ ዎሳ ማቄዝ እጻኔ ኩሜዝ ዎርቃ ሻተ አይኬዛ።4 9ኡንቲ፥

«ጻ ማጻፍቶ ኤኮዳይስ፥

ማታመ ብልኦዳይስ ኔስ ቤዝዛ። 5

አብስ ጊኮ፥ ኔኒ ሹክንቴዛያ፤

ዘረ ኡባይፕ፥ ዱማ ዱማ ዶናፕ፥

ያርታይፐኔ ካተት ኡባይፕ፥

ነ ሱይር ጾሳይስ ዎዜዛ።

10ኑ ጾሳይስ ካተትኔ ቄሰ ማቃዳይ ጋርክ ኡዴዛ

ኡንቲ ቢታል አፋ ካዉቶዳ።

ኡንትካ ጋደ ኡባ ሞዶዳይ»

ዬጊ ኦሮ ማዝሙረ የጼዛ።6

11ታ በአዳር ዙፋናይ፥ ኦይዲ መትታይኔ ጭምታይ ዩሻይድ ጋመ ኪታንችታይ የዛ። ኡ ጋመትይ ሙኩሎ ቶኬ ሙኩሎኔ ታጲ ሙኩሎ ቶኬ ታጲ ሙኩሎ ማቄዝ ጊር ስኤዛ።7 12የ ኪታንችታይ ቅ ጌዝ ቃላር፥

«ሹክንቴዝ ዱራይ ዎልቃ፥ ዱረት፥

ኤጨትኔ ምኖት፥ ቦንቾ፥ ሳባኔ

አንጆ ኤኮዳይስ ቤዝዛ»

ዬጌዛ።

13የይፕ ጉየ፥ ሳአ፥ ሳሎ፥ ሳአፕ ኦሞራኔ አባ ጋንጨ የዝ መት ኡባይ፥

«ዙፋነል አፋ በቴዛይስኔ ዱራይስ፥

ጋላታ፥ ቦንቾ፥ ሳባኔ ዎልቃ

መፐ መናስ ማቆ»

ዬጊ የጾዳር ስኤዛ።

14ኦይዲ መትታይካ፥ «አምንኤ» ዬጌዛ፤ ማ ጭምታይካ ጹጉኒ ጎይኔዛ።