Skip to content
BibleKenya

Mbula

2 Amurǝm 2

À twal Iliya aban o a kuli

Adyan ngga, lang pwari gbàshìnà mǝnana Yahweh nǝ̀ twal Iliya aɓa gyaɗace nǝ̀ umnǝi a kuli ka, Iliya andǝ 1Elisha na a njar aban nying Gilgal. Sǝ Iliya ne Elisha ama, <<Ida, kundǝ kani, acemǝnana Yahweh túrnǎm a Betel.>>

Sǝ Elisha bang ama, <<Mbak-kàngkàng Yahweh nakam, sǝ mbak-kàngkàng a ndakam ngga, pà mǝ nǝ nyio ɗang.>> Nda à o a Betel ka.

Sǝ 2nggǝsan mala amǝ'ɓangnǝa mǝnana a Betel ka, à puro à yiu aban Elisha, sǝ à ne wi ama, <<A sǝlǝ mbak ama Yahweh nǝ̀ twal mǝtala-ɓala mò arǝò yalung?>>

Elisha nyesǝia wia ama, <<E, ǝn sǝlǝna; wu duk piu.>>

Iliya ne Elisha ama, <<Elisha, ida duk kani, acemǝnana Yahweh túrnǎm a Jeriko.>>

Sǝ Elisha bang ama, <<Mbak-kàngkàng Yahweh nakam, sǝ mbak-kàngkàng a ndakam ngga, pà mǝ nǝ nyio ɗang.>> Pǝlǝa à o a Jeriko.

Nggǝsan mala amǝ'ɓangnǝa mǝnana a Jeriko ka, à wari tù aban Elisha, sǝ à ne wi ama, <<A sǝlǝ mbak ama yalung ngga, Yahweh nǝ̀ twal mǝtala-ɓala mò arǝò?>>

Sǝ Elisha nyesǝia wia ama, <<E, ǝn sǝlǝna; wu duk piu.>>

Pǝlǝa Iliya ne Elisha ama, <<Ida, duk kani, acemǝnana Yahweh túrnǎm a Jodan.>>

Sǝ Elisha nyesǝi wi ama, <<Mbak-kàngkàng Yahweh nakam, sǝ mbak-kàngkàng a ndakam ngga, pà mǝ nǝ nyio ɗang.>> Nda yià kǝm ngga, à lidǝmba nǝ gya ka.

Aburana lumi-tongno mala nggǝsan mala amǝ'ɓangnǝa wario, sǝ à cam zak nǝ ban mǝnana Iliya andǝ Elisha cam kam a kún Nggeasala Jodan ngga. Iliya panzǝ gwado male, karki sǝ walna mùr nǝi. Kara mùr gau banì ɓari, sǝ à gya amur nzali mǝ'ime yià kǝm, à yàl a nkaring.

Anzǝm mana à yàlǝ́nì Nggeasala Jodan ngga, Iliya banggi Elisha ama, <<Zǝm gìr mǝnana mǝ nǝ pàkkô ka, sǝɓǝ̀ à twalam arǝò.>> Elisha ne wi ama, <<Ida, ɓǝ̀ kāmbe ɓari mala bangŋo mò sulǝ amuram.>> Sǝ Iliya ne wi ama, <<A zǝmna gìr mǝkwane; kat andǝ amani ka, ɓǝ̀ a sǝnam lang à ndaban twalam arǝò ka, awu nǝ kum gìr mǝnana a zǝm ngga. Sǝama ɓǝ̀ a sǝnam raka, a pà wunǝ kumi ɗàng.>>

Sǝ lang à ndaban gya sǝ à kǝ nacau ka, kara 3waru-pǝr mala bǝsa puro nǝ apǝr bǝsa mana à kǝ nunni ka, à yi gau nrea. Sǝ à fwà Iliya aban o kuli aɓa gyaɗace. Elisha sǝni, sǝ tunǝban bang-bang ama, <<Dâ! Dâ! 4Awaru-pǝr andǝ amǝpǝr mala Isǝrayila!>>

Sǝ Elisha nyare sǝni ɗàng. Pǝlǝa bwal daura male sannì, gauwi ɓari. Pǝlǝa twal gwado mala Iliya mǝnana kpa arǝì ka, sǝ nyare yi came a kún Nggeasala Jodan. Twal gwado mala Iliya mǝnana kpa arǝì ka, sǝ wal mùr nǝi, sǝ bang ama, <<Yahweh, Ɓakuli mala Iliya na ke?>> Sǝ lang walna mùr ka, mùr gau arǝ abanì ɓari, sǝ Elisha gya yàl a nkaring.

Elisha twal bancame mala Iliya

Adyan ngga, nggǝsan mala amǝ'ɓangnǝa mǝnana a Jeriko, mǝnana à kǝ sǝni ka, à bang ama, <<Bangŋo mala Iliya sulǝna amur Elisha.>> À wari ace kúllè, sǝ à ɓun a nzali aɓadǝmbi. À banggi wi ama, <<Sǝni ado, aburana mǝ'rǝcandǝe nakam aɓalǝ aguro mò lumi-tongno. Ida, earia wia ɓǝà kyane ace alta mǝtala-ɓala mò. Earka, 5Bangŋo mala Yahweh twalǝni a kuli, sǝ kya tsǝ́ngŋǝ̀nì amur ɓè nkono ko aɓa ɓè dulum.>>

Sǝ Elisha nyesǝia wia ama, <<Awo, wu kǝa túriá ɗàng.>>

Sǝama lang à ɓuakiarǝi ka earia wia, nea wia ama, <<Wu túriá.>> Pǝlǝa à túr aburana lumi-tongno. À camarǝ alte nongŋo tàrú, sǝ à kumi ɗàng. Elisha na piu a Jeriko lang à nyar abaní ka. Sǝ Elisha banggia wia ama, <<Ən bang ma wun nǝma, <Wu kǝa ká raka re?> >>

Gir'ndali mǝdǝmbe mala Elisha

A ɓè pwari ka, aburana mala nggea-là Jeriko ne Elisha ama, <<Ɓwamǝgule, sǝni, ban mǝnana là mǝnia na kam ngga ɓoaro, sǝama mùr male ka ɓoar ɗàng, sǝ nzalî ka kǝ pusǝ gìrɓaban pepè ɗàng.>>

Elisha nea wia ama, <<Wu yinǝam nǝ bǝsa tasau, sǝ wu ɗàrǝ́ tuɓamur aɓalǝi.>> Nda à yinǝi wi nǝi ka.

Pǝlǝa puro wari a tūli-mùr [mala lê], sǝ so tuɓamurnî aɓalǝi, sǝ bang ama, <<Mǝnia ka nda cau mǝnana Yahweh na ka: <Ən twalna kwánó mala mùr man. Pà nǝ̀ nyare nǝ̀ yinǝ lú ko nǝ̀ ɗwanyi pusǝ ɓǝle ɗàng.> >> Nda mùrnî pǝlǝ mǝɓoarne ka ba yalung, kǝla cau mǝnana Elisha bangŋi ka.

Elisha nying Jeriko sǝ bwal njar aban ká a Betel. Lang nda a njar aban o ka, aɓea amuna pur aɓa nggea-lê, sǝ à sàkkiarǝì, à ne wi ama, <<Upì ban mǝnia, we mǝ'múr-swara! Upì ban mǝnia, we mǝ'múr-swara!>> Elisha pǝlǝá, sǝ lang sǝnia ka, suia aɓa lullǝ Yahweh. Kara abiya mǝ'nggaule ɓari pur aɓa ndà-nggun, sǝ à sàngi lumi-ine-nong-ɓari atà amunè. Elisha nying ban mǝno ka, o a 6Nkono Kamel, sǝ nǝnzǝ́mò ka nyar a Samariya.

Source notes (6)
  1. Footnote Ɓalli gbal aɓa: 1Amur 19:19-21.
  2. Footnote Ɓalli gbal aɓa: 4:1; 4:38; 5:22; 6:1; 9:1; 1Amur 20:35.
  3. Footnote Ɓalli gbal aɓa: 6:17.
  4. Footnote Ɓalli gbal aɓa: 13:14 .
  5. Footnote Ɓalli gbal aɓa: 1Amur 18:12.
  6. Footnote Ɓalli gbal aɓa: Jes 19:26; 1Amur 18:19; 20.

Mbula. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.