Skip to content
BibleKenya

Mbula

2 Amurǝm 1

Ɓashi mala Yahweh amur Ahaziya

Anzǝm lú mala Ahap ka, nzali Mowap mgbicau arǝ Isǝrayila.

A ɓè pwari ka [bǝsa murǝm mala Isǝrayila] yì Ahaziya, putǝli a nre ka akpamgbang mala kurǝm-kuli1 mala palta male a Samariya, yi kpa a nzali, sǝ nong nǝ rǝkwana. Nda tasǝ amǝ'na-túrbân nǝ cau ama, <<Wu kyane, wu ɗìkambancau a ban Ba'al-Zebup, ɓakuli mala Ekǝron,2 ace mǝnana mǝ sǝlǝa ko rǝkwana man ngga nǝ̀ malì rǝàm.>>

Sǝama mǝturonjar mala Yahweh ne Iliya ɓwa'Tishbe 3 ama, <<Lo, kya kum amǝ'na-túrbân mala murǝm Samariya, sǝ wu nea wia ama, <Nda acemǝnana Ɓakuli pa kàm a Isǝrayila raka, sǝ wu kǝ o ace ɗìbancau a ban Ba'al-Zebup, ɓakuli mala Ekǝron ngga le?> Acemani ka, wu banggi murǝm ama Yahweh bang ama, <A pà wunǝ loapì kal-nongŋo mǝnana a nong aɓalǝi ka ɗàng; mbak-kàngkàng awu nǝ wǔ.> >> Nda Iliya lo wari ka.

Amǝ'na-túrbân nyare aban murǝm, sǝ murǝm ɗia ama, <<Mana tsǝa sǝ wu nyare?>>

À eari wi ama, <<Ɓè ɓwabura yi kum sǝm, sǝ bangga sǝm ama, <Wu nyar aban murǝm mǝnana túr wun ngga, sǝ wu ne wi ama, Mǝnia ka nda cau mǝnana Yahweh kǝ bang ngga: Nda acemǝnana Ɓakuli pa kàm a Isǝrayila raka, sǝ a kǝ túr aɓwana ace ɗìbancau a ban Ba'al-Zebup, ɓakuli mala Ekǝron ngga le? Acemani ka, a pà wunǝ loapì kal-nongŋo mǝnana a nong aɓalǝi ka ɗàng; mbak-kàngkàng awu nǝ wǔ!> >>

Murǝm ɗia ama, <<Lang sǝ ɓwê pa, yì ɓwa mǝnana wu je wunǝia, sǝ na wun amǝnia yì acau ka?>>

À eari wi ama, <<4Ɓwê oasǝ agir-nggūrǝu mala nyang arǝì, sǝ kùr nggur-ɓunu mala nggû a taɓuni.>>

Murǝm bang ama, <<Iliya ɓwa'Tishbe na.>>

Pǝlǝa murǝm tasǝ mǝ'sàrǝ̀ban amur amǝ'lwa lumi-tongno, nǝ aburana male lumi-tongno atè aban Iliya. Mǝ'sàrǝ̀ban wari aban Iliya mǝnana ndaban do amur muna-nkono ka, sǝ ne Iliya ama, <<Ɓwa mala Ɓakuli, murǝm bang ama wu sulǝo!>>

Iliya nyesǝi mǝ'sàrǝ̀ban amur amǝ'lwa lumi-tongno ama, <<Ɓǝ̀ mǝ nda ɓwa mala Ɓakuli ka, ɓǝ̀ ɓǝsa sulǝ nǝ kuli, sǝ ɓǝ̀ pisǝo wunǝ aburana mô lumi-tongno.>> Kara bǝsa sulǝ nǝ kuli sǝ pisǝ mǝ'sàrǝ̀ban mǝno andǝ aburana male lumi-tongno.

Murǝm nyare tasǝ ɓè mǝ'sàrǝ̀ban amur amǝ'lwa lumi-tongno, nǝ aburana male lumi-tongno atè aban Iliya. Mǝ'sàrǝ̀ban man ne Iliya ama, <<Ɓwa mala Ɓakuli, murǝm bang ama wu sulǝ akaurǝa!>>

Iliya earî wi ama, <<Ɓǝ̀ mǝ nda ɓwa mala Ɓakuli ka, ɓǝ̀ bǝsa sulǝ nǝ kuli, sǝ ɓǝ̀ pisǝo wunǝ aburana mô lumi-tongno!>> Kara bǝsa mala Ɓakuli sulǝ nǝ kuli, sǝ pisǝì andǝ aburana male lumi-tongno.

Ɗǝm ngga, murǝm tasǝ tàruia mǝ'sàrǝ̀ban amur amǝ'lwa lumi-tongno, nǝ aburana male lumi-tongno atè. Mǝnia yì tàruia mǝ'sàrǝ̀ban ngga wario, sǝ ɓun a nzali amur ankūnǝi aɓadǝm Iliya, sǝ zǝm ɓwamuru abaní, ne wi ama, <<Ɓwa mala Ɓakuli, ida, ɓwamuram, sǝ wu ɗeki yilǝmem andǝ ayilǝmi aguro mò mǝnia lumi-tongno ka ɓǝà kum gulo a mǝsǝo. Sǝni, bǝsa sulǝ nǝ kuli sǝ pisǝ amǝ'sàrǝ̀ban mǝdǝmbe ɓari, komǝye ka andǝ aburana male lumi-tongno mǝnana atè ka. Sǝ adyan ngga, sǝn mǝsǝswatǝ̀r mem, amsǝ yilǝmem.>>

Mǝturonjar mala Yahweh banggi Iliya ama, <<Sulǝo kya atè, cè ɓangciu pakko arǝì ɗàng.>> Nda Iliya lo, sulǝ andǝi sǝ à wari aban murǝm.

Pǝlǝa Iliya banggi Murǝm Ahaziya ama, <<Mǝnia ka nda cau mǝnana Yahweh bang ngga: <Nda acemǝnana Ɓakuli pa kàm a Isǝrayila, mǝnana awu nǝ ɗìbancau abaní amur cau male raka, sǝ a túr amǝ'na-túrbân ɓǝà kya ɗìbancau a ban Ba'al-Zebup, ɓakuli mala Ekǝron ngga le? Acemani ka, a pà wunǝ loapì kal-nongŋo mǝnana a nong aɓalǝi ka ɗàng, mbak-kàngkàng awu nǝ wǔ!> >>

Nda Ahaziya wǔ kǝla mǝnana cau mala Yahweh bangŋi nǝ kún Iliya ka.

Sǝ acemǝnana Ahaziya pànǝ muna-ɓwabura raka, Jehoram [mǝ'eambi] duk murǝm a bancame male, a ɓaria pǝlǝa mala do-bunomurǝm mala Jehoram muna-ɓwabura mala Jehoshafa, amur Yahuda. Acili atúró mǝnana Ahaziya pea ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila.

Source notes (4)
  1. Footnote kurǝm-kuli ko <<ɓá kurǝm-kuli,>> ko <<nkanggari múr-kurǝm>>
  2. Footnote Ekǝron ɓè nggea-là mala amǝ'Filisti
  3. Footnote Ɓalli gbal aɓa: 1Amur 17:1; 21:17.
  4. Footnote Ɓalli gbal aɓa: Zak 13:4; Mat 3:4; Mar 1:6.

Mbula. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.