Skip to content
BibleKenya

Mbugu New Testament

Mariko 16

Yesu etakirii kuli he kigame

Matayo 28:1-8; Luka 24:1-12; 20:1-10

Muaze wa kufufu ureatakho, Maria kuli Magidala ne Salome hawe Maria lage wake Yakobo vekawe malhoma kalo vareulhomi msa wakwe Yesu. Chalhenu chalhenu muaze wa bosi wa ijuma, kaaze kareali vekaso he mhanga hodi msa wakwe Yesu weekeiwe. Are kwalhi vekakhwa velhasuana, “Niji eneratubingirishia hu isaheru igiru he luhige lwa mhanga yo Yesu ekeiwe?” Mira vareahe vekawesia, vekaakho hu isaheru igiru, laabingirishwa kuli to he luhige lwa mhanga ho msa wakwe Yesu ukeiwe. Vareabuu he mhanga, vekamuakho mburatu muwe eoroe gomae jiakhu, eumae bwa wa sughano, vekabubulhuka.

Hu mburatu ekavaba, “Musibubulhuke,” “Nireila ite mumdaa Yesu kuli Nazareti, hu emaiwe misumari he msaraba. Teaha ii aka kuli he kigame! Wesia, ii ni hodi ekeiwe. Soni iji murevabaya vahina kuu, hawe ne Petro ite, ‘Yesu amukaeiya kuso Galilaya. Are niho munemuaho, sakigi emubaiye.’ ”

Niho vekali gahana ya mhanga vekagugulu ilai vezingiza na kumaka. Neri tehelo mhevembaye ka mburi, kwaite veekuko bughu.

Yesu etamuliijanyia Maria kuli Magidala

Matayo 28:9-10; 20:11-18

Yesu areaka kuli he kigame hachalhenu muaze wa bosi wa ijuma, ekarongamguanyija Maria kuli Magidala, hu Yesu eemgue mapepo saba. Maria kuli magidala ekaso ekavabaiya hu veeaha hawe ne Yesu to esinaga, madamo ka veelo vuhuye na kuzo. Mira vareako ite Yesu ni mzime naho ne Maria kuli Magidala amuaho, tevedarishe.

Yesu etavalijanyija vahina kuu vanu

Luka 24:13-35

Kalufunda Yesu ekavaliijanyia vahina kuu vanu vekukhwa veso he mbuva ekukwa teakhokana sacho eetoe azeto. Ka vahina vareamuile ite niu, vekakirii na kuvabaiya vaaro kini, mira tevedarishe.

Yesu etavalianyija hu vahina kuu ikado na muwe

Matayo 28:16-20; Luka 24:36-49; 20:19-23; Miboire 1:6-8

Kalufunda Yesu ekavalianyija vahina kuu ikado na muwe to veekua viaghu. Ekavajoghoa kwa kusaadarisha he swaho kini na kusaavadarisha hu veebaye ite Yesu aaka kuli he kigame. Kwato ekavaba, “Soni he madi makhabuna murebirikira Mburi Kulho he kira kiwe. Muhe edarisha na kubatijwa eneokolwa mira mheesikadarishe eneowa zamaro. Ya lhaa jineboiwa ni vedarisha, kwailhe gho venegu mapepo na kuyo kiome kikua. Vekudara bome hile vekuwaha kigi chigaa, techikavahiri. Venevakeiya varukao miharegha kini na kuvaaresia, veneu.”

Yesu etadoriwe kuso ana he Kiumbi

Luka 24:50-53; Miboire 1:9-11

Dilao Yesu areafiriti kuyo na vahina kuu, ekadoriwe kuso ana he Kiumbi naho ekazokhodi mlha wa sughano wa Kiumbi . Niho hu vahina vekaso kuvabirikiria vahe Mburi Kulho kira hodi. Dilao nau ekaboi nyamalo hawe na vahina kuu nakuaija ite kiome kuu nichakweri kwa lhaa jiliahane na kiome kuu.

Mbugu New Testament. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.